Ramatua Yesus nadenu ana mana tuka dea kasanahulu dua nara
9
Lai' esa de, Yesus nabubua na ana mana tuka dea kasanahulu dua nara. Boe ma Ana fee si kuasa fo bisa usi nitu, ma bisa puli ra lahenda reme hedis rupa nara. 2 Ana nadenu si reu tui-beka fee lahenda la'e-neu' Manetualain hohomu pareta Na. Ana nadenu si fo puli ra lahenda kamahedis nai basa mamana' ara. 3 Tehuu Ana nafada si nae, “Mafarerene' matalolole! Nai emi lala'om ia, ta bole meni hata-hata esa boe'. Meni noi badu nai ao-ina mara. Boso' meni tete'e, tas, tua-lepa, do doi-tali. Badu lena' boe, boso' meni! 4 Kalu emi maso' leo koro' esa meu, ma lahenda sipo' emi leo nai sira uma nara, sona boso' madula, leo meu' naa losa' emi foa ela koro' ria. 5 Kalu emi maso' leo koro' esa meu, lahenda fo rai naa ta nau sipo', ma ta nau ramanene emi, sona kalua meme naa' mai. Ma kalu emi kalua meme naa' mai, sona tao tuka hadas a, fo sasapu heni afu a neme emi ei mara mai. Mafada si mae, ‘Emi ta nau mamanene, de ela mataa ao mara nai Manetualain matan!’”a6 Ana mana tuka dea sira la'o reme koro' mai leo koro' reu. Ara tui-beka fee lahenda ra la'e-neu' Manetualain Tutui Malolen. Ma puli ra lahenda kamahedis ara boe.
Mane' Herodes a noi patararaa' a la'e-neu' Ramatua Yesus
7 Mane' Herodes Antipasb namanene tutui rupa' la'e-neu' Yesus. Boe ma noi patararaa' a, huu fo lahenda ruma rae, “Yesus nana, ri' Yohanis Mana Sarani' a nasoda selu'.”
8 Ruma bali rae, “Ria nana, ba'i Elia nasoda selu'.”
Ma ruma bali rae, “Ria nana, Manetualain mana nesi mata fai ulu nara esa rian.”c
9 Tehuu Herodes nafarene nae, “Maulun ria, au tete heni Yohanis laka na so. Ana nasoda selu', do? Te bea ria bali?” De ana saka eno' nau naneta no Yesus.
Ramatua Yesus nahao lahenda rifun lima
10 Fai' esa, boe ma ana mana tuka dea fo ri' Yesus nadenu si a, ara fali mai si, de rabua selu' ro Ni. Ara tui Ni basa-basan fo sira tao a. Boe ma Yesus no ana mana tuka dea nara la'o ramaninino' leo mamana' esa reu nanenea' koro Betsaida, ela hahae ao nara. 11 Tehuu lahenda dodou' bubulu' Yesus asa leo bea' reu, de ara ranononda reu tuka Ni. Yesus sipo' asa no malole. Ana puli na katema' lahenda kamahedis ara ma Ana tui fee si la'e-neu' Manetualain pareta nai dae-bafo'.
12 Ledo leodae', boe ma Yesus ana mana tuka dea kasanahulu dua nara rafada Ni rae, “Malole lena' Papa madenu lahenda ia ra leo koro manenea' ia ra reu, ela bisa saka ao nara nanaa-nininu'. Ma ara saka mamana' fo suku. Huu fo nai mamana lino-nees ia, de ara ta bisa hapu nanaa-nininu'.”
13-14 Tehuu Yesus sipo' asa nae, “Leo ia'! Emi ri' mahao si!”
Boe ma ara rafada Ni rae, “Papa! Ta bisa leo naa' fa? Lahenda rifun lima lena' ia! Noi tou nara sira, bei ta reke' ina' ara ro ana nara! Ita tanuu noi roti bibia' lima ma ika' boa' dua. Tao leo' bea fo ami bisa asa tamba selu' nanaa-nininu', ela fee lahenda ia ra?!”d
Tehuu Yesus nadenu si nae, “Ator lahenda ia ra fo ratuu' rabua ao nara, lima hulu na bubua' esa.”
15 Boe ma ara ator asa leo naa'. 16 Ara ratuu ra ao nara, boe ma Yesus hai na roti kalima' sira ma ika boa' kadua' ara. De Ana nasare leo lalai neu, fo hule makasi. Ana tetebi roti ma ika' sira, boe ma loo si leo ana mana tuka dea nara reu fo babati fee lahenda sira. 17 Basa si raa losa' rabete. Basa de ara rabubua ra nanaa lena' ara, henu lapaneu sanahulu dua.
Petrus mulai nameda nae, Ramatua Yesus nana, Kristus, ri' Lahenda fo Manetualain helu mema' neme fai a ulu na mai
18 Lai' esa de, Yesus mesa' ana hule-haradoi nai mamana' esa. Ana mana tuka dea nara boe rabua roon. Ana hule-haradoi basa, boe ma natane si nae, “Emi mamanene lahenda rafada rae, Au ia nana bea?”
19 Ara rataa rae, “Ruma rae Papa nana, Yohanis Mana Sarani'. Ruma bali rae, ba'i Elia. Kalu ta'a, sona Manetualain mana nesi mata fai ulun esa ian nasoda selu'.”e
20 Yesus natane si bali nae, “Kalu tuka emi, sona Au nana bea?”
Petrus nataa nae, “Papa nana Kristus, Lahenda fo Manetualain tudu mema' ana neme fai a ulu na mai.”f
21 Yesus horo si boso' tutui rae, Ria nana Kristus.
Ramatua Yesus nafada la'e-neu' Ria mamate Na ma nasoda selu' a
22 Yesus dedea tamba selu' nae, “Au, Lahenda Dae-bafo' Tetea'. Au lepa doidoso mabera rupa'. Neu' ko lahenda Yahudi ra lasi nara, malaka agama ra malaka nara, ma mesen agama ra ta sipo' rae, Au ia, Kristus. Ma neu' ko raisa Au. Tebe Au mate, tehuu fai binesa na, te Au asoda selu'!”g
23 Boe ma Ana nafada lahenda kadodou-ina' ara nae, “Lahenda fo nau tuka Au, sona tuka-tuka fai' ana muste tuka nahere. Ana muste tu'u heni ria hihii-nanaun. Ana muste tuka naroo, leo mae lahenda raisa ni, sama leo' lahenda nasaa ai kake na, leo mamana mamate na neu.h 24 Huu fo lahenda bea sadia mate nana huu tuka Au, neu' ko ana hapu soda' mana basa taa'. Tehuu lahenda fo nasoda soa noi ria ao-ina heheli na, neu' ko ana bika-bati neme Manetualain mai.i 25 Leo mae lahenda nanuu katema' dae-bafo' a oe-isin, tehuu kalu Manetualain tipa-tola' ana, sona onto ubea'? 26 Au, Lahenda Dae-bafo' Tetea'. De lahenda mae' tuka Au, ma mae' homu Au nanori-nafada Ki, neu' ko Au boe mae' manaku ria nai Manetualain matan, fai fo Au fali selu' eme nusatetu-ikutema' a mai. Neu' ko Au onda mai oo Papa Ka kuasa marela-masa'an, sama-sama oo eila'o-limalopen reme nusatetu-ikutema' a mai. 27 Tetebes ara Au afada emi. Neme emi ia mai, neu' ko lahenda hida rita mata' Manetualain homu pareta, besa' ko mate si.”
Nai lete' lain, Ramatua Yesus dadi feke'
28 Basa fai' falu, boe ma Yesus noo Petrus, Yohanis ma Yakobis ae leo lete' esa lain reu hule-haradoi. 29 Yesus bei hule-haradoi, te Ana narupa feke', ma kakao-papaken dadi fula makarela.
30 Kekeneu te, lahenda dua toda mai, de dedea ro Yesus. Sira dua nana ba'i Musa no ba'i Elia. 31 Sira boe marela-masa'a. Telu si dedea-rao nara la'e-neu' Yesus neu' ko mate Ni nai Yerusalem.
32 Oras ria, Petrus no nonoo kaduan sira suku renin. Ara keke ra ao nara, te rita Yesus napadei no lahenda dua. Ara rita Yesus narela-nasa'a naan seli.
33 Petrus noi namakokoa' a, ana ta bubulu' nae tao ubea'. De ba'i Musa no ba'i Elia saka' la'o ela Yesus, boe ma ana dedea nafarara'u nae, “Ramatua'! Nai ia malole na seli! De malole lena' ami mafoa ma laa' telu. Esa fee Ramatua' a, esa fee ba'i Musa ma esa fee ba'i Elia.” 34 Tehuu ana bei dea-dea nae leo' naa, te oa' esa onda mai napoti na si, de Petrus asa bii. 35 Ara ramanene haraoe' esa neme oa' ria mai nae,
“Ia nana Au Ana teteka-hehere Ka!
Ana dedea, sona mamanene matalolole Ni!”j
36 Haraoe' ria nate'e, boe ma Petrus asa rita noi Yesus mesa' ana. Hata fo telu si rita ni a, ara ta tutui esa boe'. Doo' a besa' ko ara tui lahenda feke'.
Ramatua Yesus puli na ana nitu heke'
37 Balahaa', boe ma Yesus no Petrus asa, onda reme lete' ria lain mai, fai ria lahenda dodou' mai saka Yesus. 38 Lahenda esa naloo Ni nae, “Papa Mesen! Au hule fo mete maneni au ana mane ise ka dei! 39 Nitu a heke naan, de ana kasi nabeke' a, ma hede losa' fude' ara kalua reme bafa na mai. Nitu ria fepa-li'un, ma duku-pau' ana la'o naroo. 40 Au hule Papa ana mana tuka dea mara, usi heni nitu ria, tehuu ta rala ni!”
41 Yesus nasapaa basa si nae, “Emi ta mamahere kalu Manetualain bisa puli na lahenda, do? Emi lahenda dae-bafo' ta masoda tuka eno roo-tetu'! Au muste sama-sama oo emi losa fai hida', fo dei mamahere Au? Au muste sabar oo emi losa fai hida' bali!?”
Boe ma Ana lipe aon de dedea no ana' a papa na nae, “Moo ana ma leo ia' mai!”
42 Ara roo ana' ria leo Yesus neu, boe ma nitu a lokopiro ana' ria neu' dae a, ma nalololi' ana. Tehuu Yesus pareta nitu a kalua ela ana' ria, de ana' a te'e na aon tuti'. Boe ma Yesus fee ana' ria leo papa na neu. 43a Lahenda fo rita Manetualain kuasa marela-masa'an ria, basa si heran.
Ramatua Yesus nafada selu' la'e-neu' Ria mamaten
43b Fai fo basa lahenda ra bei dedea-rao nara, la'e-neu' tanda heran fo Yesus tao a, Ana nafada ana mana tuka dea nara nae, 44 “Emi tanda mahere Au dedeak ia! Ta doo' a so', te lahenda se'o heni Au, Lahenda Dae-bafo' Tetea' ia. Boe ma ara fee Au leo lahenda feke' ara uu.” 45 Tehuu ana mana tuka dea nara roi ramakokoa' a. Ara ta bubulu' maksud na. Sira boe bii' ratane ria sosoa-raraan ubea'.
Bea ri' dadi lahenda matua-madema
46 Lai' esa de Yesus ana mana tuka dea nara mulai ralelena ao' la'e-neu' neme sira mai neu' ko bea ri' dadi neu' lahenda matua-madema.k 47 Tehuu Yesus bubulu' sira ralelena ao' huu ubea'. Ana naloo na ana aana' esa, de fee ni napadei neu' boboa Na. 48 Boe ma Ana nafada si nae, “Nenene matalolole! Lahenda fo tuka Au ma nalalau' lahenda aana' a sama leo' ana' ia, sona sosoa na nae, ana nalalau' Au. Ma ria boe nalalau' Au Papa Ka nai nusatetu-ikutema', fo ri' nadenu Au leo dae-bafo' ia mai. Lahenda dodou' ta tao hihika-rereke' neu' lahenda kasian, mana susa, masala-masiko', ua soe ra ma manato'a-manataa'. De lahenda fo nahii' nalalau' lahenda rupa leo naa', sona Manetualain tao si reu' lahenda manuu hada'.”l
Lahenda fo ta nalena-laka, ria nana ita tia-lain
49 Yohanis nafada Yesus nae, “Ramatua'! Lai' esa de ami mita lahenda esa usi heni nitu, ma ana sesei' Papa nade Ma. De ami horo ni boso' sesei' Papa nade Ma, nana huu ita lahendan ta ria.”
50 Tehuu Yesus nataa si nae, “Boso' horo si! Huu fo bea ta nalena-laka neu' ita, sona ita tia-lain sira.”
Koro' esa nai Samaria lahenda nara ta nau sipo' Ramatua Yesus
51 Yesus bubulu' Ria fai hehene-a'aen leo nusatetu-ikutema' a neu, nanenea'. Boe ma Ana naetu' naan leo kota Yerusalem neu. 52 Ana nadenu lahenda reu raulu' asa, ela ara bisa ator nanaa-nininu'. Boe ma ara maso' leo koro' esa reu nai propensi Samaria, fo sadia mamana' ofu. 53 Tehuu lahenda Samaria ra ta sipo' Yesus asa, nana huu Ana neu do'o-tabe Manetualain nai kota Yerusalem.m 54 Yakobis no Yohanis ramanene lahenda Samaria ra nonoi-tatao nara, boe ma ara hule Yesus rae, “Ramatua'! Leo' bea na ita hule Manetualain fee ai-pila' a neme lalai mai, ela naa heni si.”n
55 Tehuu Yesus nasare na dua si, ma nasa'ai si nae, “Boso' tao aafi leo naa'.” 56 Boe ma ara leo koro feke' reu.
Eno na fo tuka Ramatua Yesus
57 Ara la'o-la'o rai eno talada', te lahenda esa dedea no Yesus nae, “Ramatua'! Ramatua' a leo bea' muu boe, au tuka ahere!”
58 Tehuu Yesus nataa ni nae, “Malole a boe! Tehuu mafarerene' leo ia'. Basa lahenda ma banda ra, esa' ko ranuu' mamana leleon. Busa fui' ara fali leo bolo nara reu, manupui' ara fali leo runu nara reu. Tehuu Au, Lahenda Dae-bafo' Tetea' ia, ta anuu uma. Ainulu laka' boe ta'a.”
59 Lai' esa de Yesus naloo na lahenda feke' esa nae, “Mai tuka Au, fo dadi Au lahenda Ki.”
Lahenda ria nataa nae, “Neu! Tehuu leo ia' Ramatua'. Ela au fali fo urus a ina-ama kara dei. Kalu au papa ka mate ni sona, besa' ko au tuka.”
60 Tehuu Yesus nafada ni nae, “Leo ia'! Neme' naa ela lahenda fo ta ramahere Manetualain, urus sira lahenda mana mate nara. Tehuu lahenda fo ramahere Manetualain, emi nonoi-laka ma ri' meu tui-beka la'e-neu' Manetualain hohomu pareta Na.”
61 Lahenda esa bali sona nae, “Malole a Ramatua'! Au nau tuka ahere Ramatua' a. Tehuu fee au isin fo uu de'i ate'a kileo-boboki kara dei, besa' ko au fali mai tuka Ramatua' a.”o
62 Boe ma Yesus nafada ni nae, “Leo ia'! Kalu lahenda foi na dae a, tehuu nasapute nonoi feke', losa' nafarene heni sesele' a, sona oka-tinen ta dadi. Leo' naa boe lahenda fo naetu' naan nau tuka Au, tehuu nafarene noi soda maulu na, sona ana ta naraa dadi neu' Manetualain atan fo nalalau' basa lahenda rai Ria pareta Na.”