3 Besa' ia emi meu leo! Au adenu emi fo leo lahenda kadodou-ina' ara meu. Tehuu mafarerene' leo ia'. Emi sama leo' bibi-lopo ana' dale balaroe-balanau' a, leo busa fui ma'aa' ara talada meu.^c

4 Emi boso' meni doi', tas bua-loas, do tabueis lena' nai eno'. Boso' tutu'u ledo-fai fo mate'a lahenda nai eno talada'.

5-8 Kalu maso' leo koro' esa meu, emi boso' lali meme uma esa mai leo uma feke' meu. Kalu lahenda sipo' emi no malole nai uma esa, sona leo meu' naa, losa' emi la'o ela koro' ria. Kalu maso' leo uma esa meu, emi muste hule Manetualain fee ua-nale' neu' lahenda rai uma ria dale'. Kalu manuu uma' ria, sipo' emi no malole, tantu Manetualain natudu dale malole Na neu' uma isi' sira. Tehuu kalu ara ta sipo' emi, sona neme' naa ela Manetualain natudu fee noi emi Ria dale malole Na. Kalu emi maso' leo uma esa, do koro' esa meu, ara fee emi ubea' na mia-minu. Sipo' no dale namaho'o, huu fo naraa ara fee emi leo' naa ela kati sosota mara.^d 9 Puli ma sira lahenda kamahedis nara. Ma mafada si mae, ‘Manetualain pareta Na nanenea' so!’

10 Tehuu koro' ruma lahenda nara ta sipo' emi boe'. Kalu ara tao emi leo' naa, sona meu mapadei' nai koro' ria eno nara fo dedea mae, 11 ‘Nenene matalolole! Ami meni Manetualain Hara-dasin mai fee emi, tehuu emi ta tao dale' neu. De besa' ia ami sasapu heni koro' ia afu na nai ami ei mara, fo dadi tanda nae, neu' ko emi lepa-masaa ao mara mana dadi' a! Tehuu mafarerene' matalolole! Manetualain pareta Na nai dae-bafo' a nanenea' so!’^e

12 Emi bubulu' kota Sodom a tadalu na, hete? Au afada emi! Neu' ko naraa la'e dae-bafo' a nonoe na, te lahenda fo ta sipo' emi a, Manetualain huku si bera lena lahenda Sodom ara huhukun!”^f

13 Yesus dedea tamba selu' nae, “Emi nai koro Korasin^g ma koro Betsaida! Besa-besa! Soe a la'e emi! Au tao tanda heran rupa' nai emi mata-idum, tehuu emi ta mamahere Manetualain. Sekonaa te emi lahenda Yahudi fo manaku mae malela' Ana. Tehuu uni' ko leo tanda heran fo ri' Au tao si rai emi koro-tadum a la'e nai kota Tirus no Sidon, tantu doo-naru basa ia lahenda fo rai naa saledale-tu'etei nara, ma tuka Manetualain. Ma sira boe tantu pake papake luumata-pinuidu', ma kari afu neu' laka nara dadi tanda nae, sira rasaledale no sala-siko nara. Sekonaa te lahenda Tirus ma lahenda Sidon asa nana lahenda ta Yahudi fo manaku rae, ralela' Manetualain.^h 14 Tebe! Emi dei mitan! Neu' ko Manetualain naetu' basa lahenda ra dedea nara, lahenda Tirus ma lahenda Sidon huhuku nara bei kafa' a neme emi huhuku ma.

15 Koro Kapernaum lahendan emin! Besa-besa! Emi boso' mae, neu' ko Manetualain nahene-naae' emi leo nusatetu-ikutema' a meu. Ta'a! Neu' ko Manetualain tu'u emi leo naraka a meu!ⁱ

16 Mafarene matalolole! Huu fo lahenda bea ramanene neu' emi, sama leo' ara ramanene neu' Au. Ma lahenda bea ta ramanene neu' emi, sama leo' ara ta ramanene neu' Au. Leo' naa boe, lahenda bea ta ramanene neu' Au, sama leo' ara ta ramanene neu' Manetualain fo ri' nadenu Au leo dae-bafo' ia mai.”^j

17 Fai fo lahenda nadedenu kahitu hulu dua' ara fali mai si,^k dale nara ramaho'o raan seli. Ma ara tui Yesus rae, “Kahere' leon! Fai fo ami pake Ramatua' a nade ma de usi nitu ra, ara ramanene ami. Boe ma ara kalua tuti'! Talalu na!”

18 Yesus nataa si nae, “Tebe! Fai fo emi tao leo naa', Au ita Manetualain tu'u heni nitu ra ro sira malaka na reme lalai mai, sama leo' relas a nahate ii-ona'! 19 Mafarerene'! Malaka nitu, nana ita musu-noon. Ma nanuu kuasa boe! Tehuu Au fee emi kuasa ela maseki ria kuasa na. Ma uni' ko leo emi molo la'e meke maraso', do ura', tehuu ta hata-hata esa boe'. Ta hapu esa tao soe neu' emi boe'.^l 20 Emi dale mara ramaho'o, huu fo nitu ra ramanene neu' emi. Malole a boe, tehuu hihii-nanau' aana' ria! Malole lena' emi dale mara ramaho'o, huu fo Manetualain dui' na emi nade mara, ela dadi Ria lahendan fo maso' nusatetu-ikutema' a.”

21 Tepo' ria, Manetualain Dula-dale Malalao-malalafu Na tao na Yesus namaho'o-natadale. Boe ma Ana io-oa Manetualain nae, “Papa! Papa nanuu haak pareta basa-basan nai lalai ma dae-ina' a. Au hule makasi dodou', nana huu Papa mafuni basa hihii-nanau' ia ra neu' lahenda fo rae sira malela', ma mana koao' ara. Tehuu Papa matudu hihii-nanau' ia ra soa-neu' ana aana' ara ro lahenda maloe-madae ao' ara. Tebe, Papa! Huu fo ria ri' tao na Papa dale Ma namaho'o!”

22 Yesus nafada lahenda kadodou-ina' ara nae, “Nenene! Au Papa Ka nai nusatetu-ikutema' a fee Au kuasa a katema'. Noi Au Papa Ka ri' bubulu' matetu', Au nana bea. Ma noi Papa Ana Na fo ri' Au ia, bubulu' matetu', Papa nana bea. Ma Au teka-here lahenda feke' fo afada si, ela ara ralela' Ana boe.”^m

23 Boe ma Yesus nasare na ana mana tuka dea nara, ma nafada si nae, “Emi maua-manale matetu', huu fo emi mita Manetualain kuasa Na. 24 Mane' ara ro mana nesi mata fai ulu' ara rahii' raan seli nau rita hata fo emi mita ni, tehuu ara ta bisa. Sira boe rahii' raan seli nau ramanene hata fo emi mamanene ni, tehuu ara ta bisa.”

25 Lai' esa de, mesen agama esa foa napadei nau nahihii' Yesus. Ana natane nae, “Papa Mesen! Mafada fee au dei! Au muste tao ubea', ela au bisa asoda aroo sama-sama oo Manetualain nai nusatetu-ikutema'?”

26 Yesus nataa nae, “Ba'i Musa dui' ubea' la'e-neu' hihii-nanau' ia? O hahapu ma leo bea'?”

27 Lahenda ria nafada nae, “Ana dui', nae:

Mana dui' boe nae, ‘O muste sue-lai toranoo mara, sama leo' sue-lai ao-ina heheli ma.’”ⁿ

28 Yesus balas nae, “Tebe! Kalu o tao tuka ria, sona o hapu soda' mana basa taa'.”^o

29 Tehuu lahenda ria tao aon leo' lahenda roo-tetu'. Boe ma ana natane Yesus nae, “Tehuu au ‘toranoo’ kara si' bea?”

30 Yesus nataa nae, “Leo ia'! Au afada dedea nasasama' esa. Neu' ko o mafada, mae ‘toranoo’ tetea ma ri' bea. Tutui na leo ia': Lahenda Yahudi esa neme kota Yerusalem mai, onda leo Yeriko neu. Tehuu kekeneu te parampok ara mai de rafara'u raan. Ara popo'o ni, ma roso reni doi nara ro bua-loa nara katema'. Boe ma ara tu'un neu' eno' a suu na, de foa ela ni. Lahenda ria kura bai' maten.

31 Ta bubulu', te malaka agama Yahudi esa onda mai nesi' naa. Ana nita lahenda ria hina-hina' mesan, ma leka-leka nai eno' a suu na, tehuu ta nate'e fo tulu-fali ni. Ana heo heni aon de la'o naroo. 32 Ta doo bea boe', te lahenda feke' esa nesi' naa. Ria nana, lahenda neme leo Lewi mai, biasa ana nalalau' nai Manetualain Uma Mamaso Yahudi Ina Na dale'. Ana nita lahenda ria leka-leka nai eno' a suu na, boe ma tuturu mata neu bebesa ni, tehuu ana ta tulu-fali ni. Ana heo heni aon de la'o naroo.

33-34 Ta doo bea boe', te lahenda esa neme nusa Samaria mai no keledei na nesi' naa. Ita basa bubulu', lahenda Yahudi ra biasa relu lahenda Samaria ra reni' mata i'o nara. Lahenda Samaria ia nita lahenda fo ri' parampok ara popo'on, ma roso reni hata nara a, boe ma noi sue' ana, de nanenea' mata neu ela tulu-fali ni. Ana safe makamomoi lahenda ria hina nara neni' anggor, tao mina neu ma feo etu si. Boe ma fua naan neu' keledei na lain, de noon leo kota dale' neu. Ana fee lahenda ria leo lalai neu' uma ofu esa, ela urus natalolole ni.^p

35 Balahaa', boe ma lahenda Samaria a fee lalai tali, doi lilo fula' dua^q neu' manuu uma' ria, ma nafada ni nae, ‘Pake doi' ia ra fo urus matalolole lahenda hedis ia losa' te'e na aon. Kalu ta dai, sona papa pake lalai doim dei. Fai bea au atafali mai, neu' ko au kati fali' papa doi mara katema'.’”

36 Yesus dedea nasasama na te'e ada' naa. Boe ma Ana natane lahenda malela hohoro-lalane' ria nae, “Tuka o, sona neme sira telu, bea ri' ‘toranoo’ tea' soa-neu' lahenda, fo bisinaa' a parampok ara roso reni hata nara?”

37 Lahenda ria nataa nae, “Tantu, lahenda fo nanuu dale kasian neu' ana a.”

Yesus nae, “Tebe, a'a! Muu fo tao tuka ria leo.”

38-40 Boe ma Yesus no ana mana tuka dea nara la'o raroo leo Yerusalem reu. Ara tuli koro' esa. Nai naa ina' esa nade Marta ma toranoo na nade Maria. Marta hule Yesus asa tuli uma na.

Yesus nanori-nafada si, de Maria natuu' nanenea' Yesus ei Na fo namanene Dedea-nafadan. Tehuu Marta nasapute nalisu tasa' nai dapu dale'. Ta doo bea boe', te ana maso' mai de namumuu neu' Yesus nae, “Ramatua'! Leo bea' ia! Au asapute no nalisu tasa' a, ma au fadi ka natuu' hihii' mai' ia. Mafada ni dei! Ela ana fali au nai dapu dale' bai'!”^r

41 Boe ma Ramatua Yesus nataa ni nae, “Marta, Marta. O masapute maroo' a, dale' ma doda' neu' hihii-nanau' rupa'. 42 Tehuu hihii-nanau' esa lena heni, ri' Maria here na hihii-nanau' ia malole ina', huu fo ana natuu' ma namanene Au Dedea-nafada Ki. Lahenda ta bisa ralea ra Dedea-nafada' sira reme ria mai.”