Ina' fo ri' tuka Ramatua Yesus
8
Ta doo bea boe', te Yesus no ana mana tuka dea lahenda kasanahulu dua nara, la'o rule-feo basa kota ma koro' manai naa ra. Ana tui-beka fee lahenda ra, la'e-neu' Manetualain pareta Na. Ria dadi neu' Tutui Malole fee si. 2 Nai lahenda kabua' sira dale', ina' hida tuka si boe. Ina' ia ra, ruma parnaa ramahedi rupa', ma nitu ra heke ra ruma. Tehuu Yesus puli na katema' asa. Leo-leo' Maria neme koro Magdala. Maulu na, Yesus usi heni nitu hitu reme ao na mai. 3 Susana, ma Yohana. Mama Yohana nana, ri' papa Kusa sao na. Kusa nana, malaka urusan nai mane' Herodes uma mana pareta na. Ma bei ina feke' dodou' bali, fo ri' la'o sama-sama ro Yesus asa. Ina' ia ra pake doi nara, fo bae fee Yesus asa doi la'o eno'.aDedea nasasama' la'e-neu' lahenda sele-kari bini-kee nai dae rupa'
4 Lai' esa, de lahenda kalua reme koro' dodou' mai, saka Yesus. Basa si tesa, boe ma Ana tui fee si dedea nasasama' nae, 5 “Lahenda maue-maosa esa neu kari bini-kee nai ria oka-tinen. Bini-kee ruma tuda rai eno'. Fai fo lahenda resi' naa, ara ramolo-ratabu' bini sira. Ma manupui' ara seseu rabasa si. 6 Bini-kee ruma tuda rai dae batu. Bini-kee sira mulai mori, tehuu ara mamale, nana huu oe baiana'. 7 Bini-kee ruma tuda rai matema'. Bini-kee sira mori, tehuu matema' a amu naisa si. 8 Tehuu bini-kee ruma, tuda rai dae isi mana dadi'. Ara mori, boe ma rambau-ina losa' rabuna-raboa. Bini-kee sira reni buna-boa' lai' natun esa.”
Yesus tui basa leo' naa, boe ma Ana nate'e dedea nasasama' ria, ma naloo nae, “Bea ri' namanene, sona afi natalolole!”
Ramatua Yesus nafada nae ubea' taon Ana pake dedea nasasama'
9 Yesus ana mana tuka dea nara ratane dedea nasasama' ria sosoa na.
10 Ana nataa nae, “Leo ia'! Huu no emi tuka matetu' Manetualain hihii-nanaun, de Au soin neu' loa na ela emi bubulu', Manetualain pareta Ria lahenda nara leo bea'. Tehuu lahenda feke' ara ta tao dale' neu' Manetualain hihii-nanaun. Huu ria naa Au anori-afada si pake dedea nasasama'. Huu fo Manetualain mana nesi mata nara dui' mema' la'e-neu' lahenda ia ra nae,
‘Ara rita,
tehuu ta ralela'.
Ara ramanene,
tehuu ta bubulu'.’”b
Ramatua Yesus nafada dedea nasasama' la'e-neu' bini-kee ria sosoa na
11 Boe ma Yesus nafada dedea nasasama' ria sosoa na nae, “Bini-kee ria, nana ri' Manetualain Hara-dasin. 12 Bini-kee fo tuda rai eno' a, nana si' lahenda fo ramanene Manetualain Hara-dasin, tehuu malaka nitu a mai nalea neni Hara-dasi' ria neme sira dale nara mai. No ria naa, ta ramahere Manetualain, de ara ta hapu popo'i-tatata'. 13 Bini-kee fo tuda nai dae batu, nana si' lahenda fo ramanene Manetualain Hara-dasin no namaho'o. Tehuu oka nara raka' batu. Ara ramahere, tehuu kalu hapu susa, sona muda' lai esa' ara tuda. 14 Bini-kee fo tuda nai matema', nana si' lahenda fo ramanene ma sipo' Manetualain Hara-dasin, tehuu ta doo bea boe' te rafarene henin, nana huu rasapute ro urusan mesa nara, hata-heto rupa' nara, ma rasoda tuka lole-napu dae-bafo'. Huu ria naa sira namahere na ta nanuu buna-boa'. 15 Tehuu bini-kee fo tuda nai dae isi mana dadi', nana si' lahenda dale roo-tetu' ma dale malole. Fai fo ara ramanene Manetualain Hara-dasin, ara rapeda-rahindan neu' dale nara. No ria naa, ara ramahere raroo ma tao hihii-nanau' malole.”
Dedea nasasama' la'e-neu' tatana etu dedede' a pake ure dae
16 Yesus dedea bali nae, “Ta hapu lahenda dede na dedede ana' a, sona tatana etun neni' ure dae, do peda dedede' a neu' roa' a fiki dale na. Huu fo kalu tao leo naa', sona lahenda ta bisa rita makaledo' a. Dedede' fo nanuu sosoa-raraa', nana ri' fua ni neu' mamana madema, ela lahenda kodi mai boe makaledo' a.c 17 Besa' ia basa-basan fo nafuni', neu' ko nananita'. Ma basa hihii-nanau' fo besa' ia, lahenda ta ralela' ana, neu' ko ralela' ana.d
18 De emi muste dodoo-tatai matalolole hihii-nanau' ia ra. Lahenda fo saka matetu' Manetualain hihii-nanaun, ana boe-boe nalela'. Tehuu lahenda fo ta tao dale' neu' Manetualain hihii-nanaun, ana boe-boe pakanaa.”e
Ramatua Yesus kileo-boboki tea nara
19 Lai' esa de Yesus mama Na ma fadi nara mai dama Ni. Tehuu ara ta bisa ranenea' Ana, huu fo lahenda dodou' eo raan. 20 Boe ma lahenda reu rafada Yesus rae, “Papa! Mama ma no fadi mara rai dea'. Ara mai saka Papa.”
21 Ana nataa si nae, “Leo ia', Au mama Ka ma toranoo tea kara nana si' lahenda fo ramanene Manetualain Hara-dasin ma tao tukan.”
Ramatua Yesus tao na ani ina' a namate
22 Lai' esa de, Yesus hule ana mana tuka dea nara nae, “Mai ita sa'e ofa', leo dano seri' teu.” Boe ma sa'e ra ofa' esa, de ara la'o. 23 Ara la'o, boe ma Yesus suku. Ta doo bea boe', te ani ina' a foa de nafa ra toto'o rala ofa' dale'. Ara hii-hii' bolo.
24 Ana mana tuka dea nara rita leo' naa, boe ma ara fafae Yesus rae, “Ramatua'! Ramatua'! Foa dei! Te ita saka' bolo ria' so!”
Yesus foa, de Ana nahara neu' nafa-ani nae, “Mamate leo!” Boe ma nafa-ani tena tuti'.
25 Boe ma Ana nafada ana mana tuka dea nara nae, “Ubea' taon emi bei ta mamahere Au?”
Ara bii ma heran, de esa natane esa rae, “Yesus nana, bea? Tao leo' bea de Ana bisa pareta nafa-ani, de tuka Ria hihii-nanaun?”
Ramatua Yesus usi heni nitu a neme lahenda kamulus a
26 Ta doo bea boe', te ara losa rai nusa Gerasa, nai dano Galilea seri'.f 27-29 Nai naa, lahenda esa nitu ra heke raan doo' a so. Ana ta nanuu uma, ma ana leo nahani' rates ara talada. Tuka-tuka fai' ana lei'-lei ada' naa ma po'irao'. Huu fo nitu ra pareta ni la'o naroo. La'i-la'i lahenda heke ei-liman reni' rante besi, tehuu rui naetu si. Ma nitu ra raseti ni, nalai leo mamana lino-nees neu.
Fai ria Yesus asa onda reme ofa' lain mai, boe ma lahenda kamulus ria leo Yesus neu. Lahenda ria kasi, ma bara neu' Yesus ei dae Na. Boe ma Yesus pareta nae, “Nitu on! Kalua meme' lahenda ia mai!”
Boe ma lahenda kamulus ria nahara nae, “Boso' tao mahehedi' au! Huu fo au bubulu' O nana Yesus, Manetualain Madema a Anan! O boso' ese-rumu au!”
30 Yesus natane ni nae, “O nade bea?”
Nitu a nataa nae, “Legion, nana huu ami dodou-ina', sama leo' soldadu rifun.” Ana nae leo' naa, huu fo nitu dodou' maso' rai ria aon dale'.
31 Nitu sira hule Yesus boso' nadenu si leo Bolo Eese-rurumu' a reu, mamana' fo ri' ena kuasa tadalu' ara.
32 Nanenea' nai naa, bafi bubua' esa totofi saka nanaa' nai lete' a suu na. Nitu ra hule Yesus rae, “Madenu ami maso' leo bafi sira dale' meu!” Boe ma Yesus nataa. 33 Nitu ra kalua ela tou' ria, boe ma ara kodi leo bafi sira dale' reu. Basa bafi sira ramulu si, de ralai ratotofa' reme lete' lain mai, ara tuda rala dano dale' de mate basa si.
34 Manea bafi ra rita leo' naa, boe ma ralai reu tui nai basa koro manai naa ra. 35 Lahenda dodou' ramanene si tui rae leo' naa, boe ma ara kalua leo mamana' ria reu, ela rita mata' mana dadi' ubea' ria. Losa naa, te rita lahenda nitu heke' ria natuu' neu-neu nanenea' nai Yesus ei dae Na. Ana pake bua-loas, ma kamulu na mopon so. Basa si rita leo' naa, boe ma ara bii. 36 Lahenda fo rita mana dadi' ria, ara tui lahenda fo besa' ko mai a, eno na leo bea' de lahenda kamulus ria te'e na aon. 37 Boe ma basa lahenda fo ri' leo rai nusa Gerasa, ara raseti Yesus foa ela si huu fo basa si bii raan seli.
Boe ma Yesus asa ae ofa' lain reu, fo saka' fali leo dano Galilea seri' reu.
38 Tehuu lahenda nitu heke' ria hule Yesus nae, “Papa! Ela au tuka Papa boe!”
Tehuu Yesus sipo' ana nae, 39 “Leo ia'! Malole lena' o fali leo kileo-boboki mara muu, fo tui si la'e-neu' Manetualain susue-lalain fo ri' Ana taon soa-neu' o a.”
Boe ma lahenda ria la'o rule-feo basa kota ria, de tui basa lahenda ra la'e-neu' Yesus puli naan.
Ramatua Yesus fee Yairus ana feto na nasoda selu', ma puli na ina kamahedis po'a daa
40 Boe ma Yesus asa sa'e ofa' leo dano Galilea seri' reu. Ara onda reme ofa' lain mai, te lahenda dodou' rahani Ni so. Ara rarurupu mai fo nau sipo' Ana. 41-42 Tou' esa nade Yairus nai naa boe. Ria malaka uma mamaso' nai kota ria. Ana ni noi esa' a; ana ina', teu ni sanahulu dua. Besa' ia ana feto' ria hedis bera' noi mamaten. Fai ria Yairus nita Yesus mamai Na, ana sunda' undulaka na neu' Yesus mata Na. Ana hule Yesus leo uma na neu, ela tulu-fali na ana feto na.
Yesus nataa, de ara leo Yairus uma na reu. Tehuu lahenda dodou' tuka boe, huu ria naa ara la'o raseseti ao.
43 Ina' esa la'o no si boe. Ina ria namahedi po'a daa teu' sanahulu dua so. Ana nabasa doi-talin ma hata-heton, fo bae doter. Tehuu ta bisa puli rala ni, hedin ria ta te'e.g 44 Ana nanenea' nesi' Yesus dea Na. De ana nafaroe la'e Yesus badu peda Na. Ana nafaroe la'en, boe ma hedis po'a daan ria te'e tuti' a.
45 Kekeneu te Yesus napadei, ma natane nae, “Bea ri' nafaroe la'e Au?”
Tehuu ta hapu esa manaku boe'. Boe ma Petrus nae, “Ramatua'! Te lahenda dodou' la'o raseseti ao leo' ia! Ara ratipa ao reme dea' mai.”
46 Tehuu Yesus nafada ni nae, “Ta'a! Bisinaa' a Au ameda kuasa kalua neme Au mai. Au bubulu' lahenda esa nafaroe la'e Au.”
47 Ina' ria nameda naan ta bisa nafuni nala, de ana bii naan seli. Ana dere, ma sunda' undulaka na neu' Yesus. Ana tui neu' basa lahenda sira matan, ria hedi-raun huu-pedan. Nafada nae, naraa no ana nafaroe la'e Yesus, boe ma te'e na aon tuti'.
48 Yesus nafada ni nae, “Susi! O te'e ma aom, huu fo mamahere Au. Fali no mole-dame leo!”
49 Yesus bei dedea no ina' ria, te Yairus lahendan esa mai nafada ni nae, “Adoo, Papa! Papa ana ma ne'es ana so! Maten so, de boso' masosota Papa Mesen bali.”
50 Tehuu Yesus namanene lahenda ria tutui na, boe ma Ana nafada Yairus nae, “A'a! Nee-nee! Dale ma boso' doda'! Mamahere Manetualain. Ria ri' fee a'a ana ma nasoda.”
51-53 Ara losa Yairus uma na, te lahenda tesa rahenu naa so, Ara boreu. Boe ma Yesus nafada si nae, “Emi hahae boreu' a! Ana' ia ta maten, ana suku ria!”
Tehuu lahenda ra hi'a ma peko bafa nara ro Ni, huu fo rita mata' ana' ria maten so. Boe ma Yesus hule ana feto' a ina-aman, Petrus, Yohanis ma Yakobis, fo sama-sama ro Ni maso' uma dale' reu. Feke' ara sona nafada si rahani' dea'.
54 Ara dale' reu, boe ma Yesus tai na ana' ria lima na, ma naloo nae, “Ana feto' on! Foa leo!” 55 Kekeneu te, ana feto ana' ria nasoda selu', ma ana foa tuti'. Boe ma Yesus nafada ana feto' ria mama na nae, “Fee ana' ia naa dei!” 56 Ana feto ana' ria ina-ama nara heran raan seli. Tehuu Yesus fee si nafarerene', fo boso' tui-beka mana dadi' ria neu' lahenda ra.