Lahenda Farisi ma lahenda Saduki ra nau rahihii' ratuda Ramatua Yesus
16
Lai' esa, de lahenda Farisi ma lahenda Saduki hida leo Yesus mai. Ara nau ratatane ao' ro Ni, ela rahihii' Ana. Huu ria naa, ara hule Ni rae, “Papa! Matudu tanda heran dei, fo dadi buti nae, Papa hapu kuasa neme Manetualain mai.”a2 Tehuu Yesus nataa nae, “Kalu ledo a tena ma lalai haramea, sona emi mae, ‘Balahaa' te ta uda fa.’ 3 Ma kalu ledo a tii ma oa keo-ina' a, emi mae, ‘Fai ia saka' uda.’ De kalu emi bisa tanda malela' oa-ani leo' naa, ubea' taon emi ta bisa tanda malela' hata mana dadi' ara nai basa tepo-lele' a? 4 Emi lahenda besa' ia malela' noi tatao tadalu' a! Emi ta tao dale' neu' Manetualain! Leo mae emi hule tanda heran, tehuu Au ta fee fa. Huu fo maulu na Manetualain fee tanda heran, pake Ria mana nesi matan Yunus. De ria dai so!” Yesus dedea basa nae leo' naa, boe ma Ana foa ela si.b
Ramatua Yesus nanori-nafada nae, besa-besa mo lahenda Farisi ma lahenda Saduki ra duduku-papaun
5 Fai fo Yesus asa losa dano a talada, besa ko ana mana tuka dea nara rafarene, ara ta reni tua-lepa. 6 Ana namanene si rae leo' naa, boe ma nafada nae, “Emi muste besa-besa mo lahenda Farisi ma lahenda Saduki ra ralu tetei na.”c
7 Ana mana tuka dea nara ramanene leo' naa, boe ma roi ramakokoa' a. Ara dedea-rao nara rae, “Tou lasi' a dedea nae ubea' ria? Bate Ana dedea nae leo' naa, nana huu ita ta teni roti, do?”
8 Tehuu Yesus bubulu' sira dudu'a-aafin. De Ana dedea nae, “Emi talalu maan seli! Ubea' taon, de emi dedea la'e-neu' roti! Emi ta mamahere Au, do? 9 Emi bei ta bubulu' Au kuasa Ka, do? Fai' naa ra, Au tetebi roti bibia kalima' sira fee lahenda rifun lima raa a, emi mabubua ma lena nara lapaneu hida?d 10 Boe ma roti kahitu' fo ri' Au bati fee lahenda rifun haa a, leo bea' bali? Emi mabubua ma lena nara lapaneu hida?e 11 Ubea' taon, de emi ta bubulu' bisinaa' a Au dedea Ka? Au ta dedea la'e-neu' roti. Au afarerene' fee emi, ela emi besa-besa mo lahenda Farisi ma lahenda Saduki ra nanori-nafadan. Huu fo sira nanori-nafadan, bisa duduku-papau' ra lahenda dodou', sama leo' ralu tetei' a tao na roti a aifuu.”
12 Yesus dedea nae leo' naa, besa' ko ara bubulu', Ana ta dedea la'e-neu' roti. Tehuu Ana dedea la'e-neu' lahenda Farisi ma lahenda Saduki ra nanori-nafada masalan.
Petrus manaku nae, Ramatua Yesus, nana Kristus
13 Boe ma Yesus asa leo nusa' fo nanenea' no kota Kaisarea Filipi. Nai eno talada', Ana natane si nae, “Tuka lahenda ra dedean, ara rae, Au, Lahenda Dae-bafo' Tetea' ia, nana bea?”
14 Ara rataa rae, “Ruma rae Papa nana, Yohanis Mana Sarani' a nasoda selu'. Feke' ara rae, Papa nana ba'i Elia. Feke' ara bali rae, ba'i Yeremia. Kalu ta'a, sona Manetualain mana nesi mata fai ulu feke Na.”f
15 Yesus natane si bali nae, “Tuka emi, sona Au nana bea?”
16 Boe ma Simon Petrus nataa nae, “Papa nana Kristus, Lahenda fo ri' fai a ulu na Manetualain helu nau feen mai a! Ma Papa nana, Manetualain masoda' a Anan!”g
17 Yesus nae, “Simon, Yunus anan! O maua-manale! Huu fo ta lahenda dae-bafo' a ri' nafada o hihii-nanau' ia. Tehuu Au Papa Ka nai nusatetu-ikutema' a ri' nafada. 18 Nenene! Besa' ia Au fee o nade ‘Petrus’. Nade' ria sosoa na nae, ‘batu’.h Nana huu o namahere ma tea' a leo' batu, neu' ko o dadi fanderen soa-neu' Au lahenda kamahere kara. Leo mae ara hapu eese-rurumu' losa' mate boe, ara ranenete raroo. 19 Neu' ko Au fee o haak, fo urus Au lahenda kara, sama leo' o homu nusatetu-ikutema' a koe na. Hata ubea' fo emi ta fee lela' neu' ana nai dae-bafo' ia, Manetualain boe ta fee lela' neu' ana nai nusatetu-ikutema' a. Ma hata ubea' fo emi fee lela' neu' ana nai dae-bafo' ia, Manetualain boe fee lela' neu' ana nai nusatetu-ikutema' a.”i
20 Yesus dedea basa nae leo' naa, boe ma Ana pada' asa fo boso' rafada esa boe, rae Ria nana Kristus.
Ramatua Yesus nafada mema' la'e-neu' Ria mamate Na ma nasoda selu' a
21 Mulai neme fai ria mai, Yesus nafada ana mana tuka dea nara nae, “Au muste leo kota Yerusalem uu. Tehuu nai naa neu' ko Au hapu doidoso dodou' neme lasi' ara, malaka agama Yahudi malaka nara ma basa mesen agama ra. Neu' ko ara raisa Au, tehuu fai binesa na, te Au asoda selu'.”j
22 Yesus nafada nae leo' naa, boe ma Petrus hela no Ni leo mamana feke' neu, de nafadan nae, “Papa boso' dedea leo naa'! Manetualain ta bisa noi nataa' a leo naa' fa!”
23 Tehuu Petrus dedean ria, ta tuka Manetualain hihii-nanaun. Huu ria naa, Yesus nafada natafali' ana nae, “Heo' meme ia' mai! Ria nana, nitu a malaka na ri' dedea! O boso' matabaa Au! O du'a-afi tuka noi lahenda dae-bafo' a hihii-nanaun, ta tuka Manetualain hihii-nanaun!”
24 Yesus nanori-nafada ana mana tuka dea nara nae, “Lahenda fo tuka Au, sona tuka-tuka fai' ana muste tuka nahere! Ana muste nafarene heni ria hihii-nanaun, fo tuka noi Manetualain hihii-nanaun. Leo mae lahenda raisa ni, ana muste tuka nahere, sama leo' lahenda nasaa ai kake na leo mamana mamate na neu.k 25 Huu fo lahenda bea sadia mate nana huu ana tuka Au, neu' ko nasoda naroo no Manetualain. Tehuu lahenda bea nasoda soa noi ao-ina heheli na, neu' ko ria masoda na sapu-lalo!l 26 Nenene! Leo mae o manuu katema' dae-bafo' a oe-isin, tehuu kalu Manetualain tipa heni o, sona onto ubea'? Leo mae o lepa muni katema' dae-bafo' a oe-isin boe oo, ta bisa kati neu' o sumane ma fa.
27 Au afada emi basa hihii-nanau' ia ra, nana huu Au ia, Lahenda Dae-bafo' Tetea'. Neu' ko Au onda fali' mai pake Au Papa Ka kuasa marela-masa'an, sama-sama oo Ria eila'o-limalopen rai nusatetu-ikutema' a. Tepo' ria, te neu' ko Au balas lahenda ra tuka sira esa-esa' ko nonoi-tataon.m 28 Mafarerene' matalolole! Neme emi ia mai, neu' ko lahenda hida ta mate, losa fai bea ara rita Au, Lahenda Dae-bafo' Tetea' a dadi Mane' fo pareta.”