5 Yesus nita lahenda dodou-ina' mai rabua, boe ma Ana natane ana mana tuka dean esa, nade Filipus nae, “Ita bisa asa nanaa' nai bea, fo tahao lahenda ia ra?” 6 Yesus bubulu' Ana saka' tao ubea'. Tehuu Ana dedea nae leo' naa, nana huu nau soba naneni Filipus.

7 Filipus nataa Ni nae, “Leo mae tukan esa noi-tao fai' natun dua boe, kadi na bei ta dai asa roti fee basa lahenda ia ra! Leo mae lahenda esa hapu noi roti bibia ana' esa boe, ta dai fa!”

8 Yesus ana mana tuka dean esa, nade Anderias, Simon Petrus fadi na, nafada Yesus nae, 9 “Papa! Ana' esa nai ia neni roti lima, ma ika' boa' dua. Tehuu sira ta bisa dai tahao lahenda kakabaina' ia ra!”^a

10 Nai naa, nau dodou'. Yesus nadenu ana mana tuka dea nara nae, “Ator fo basa si ratuu'.” Boe ma ara ratuu'. Fai ria lahenda dodou-ina'! Noi tou' ara bate lahenda rifun lima.

11 Yesus hai na roti sira, boe ma Ana hule makasi neu' Manetualain. Basa de Ana bati fee ana mana tuka dea nara. Boe ma ara reu babati fee lahenda kakabaina' sira. Ana tao leo naa' neu' ika' sira boe. Basa si raa losa' rabete.

12 Raa basa boe ma Yesus nadenu ana mana tuka dea nara nae, “Mabubua ma nanaa lena' ara, ela boso' tu'u heni hihii' asa.” 13 Boe ma rabubua ra nanaa lena' neme roti kalima' sira, henu lapaneu sanahulu dua.

14 Lahenda kakabaina' ara rita tanda heran fo Yesus tao a, ara rae, “Ria nana tantu Mana nesi mata fo ri' Manetualain helu saka' feen mai a.” 15 Yesus bubulu' lahenda kakabaina' sira nau raseti Ni dadi mane'. Boe ma Ana la'o heni aon, de ae leo lete ana' esa lain neu, ela bisa mesa' ana neu' naa.

16 Ledo a saka' tena, Yesus ana mana tuka dea nara la'o leo dano a reu. 17 Boe ma ara sa'e ofa' esa, de sefe leo kota Kapernaum reu, nai dano seri'. Ara mulai sefe nana maiu' a so, tehuu Yesus bei ta mai nabua no si. 18 Dano a oe na mulai nananafa neu-mai, nana huu ani a nasa'. 19 Yesus ana mana tuka dea nara sefe bate kilo lima dodoo na, boe ma ara rita Ni la'o nesi' oe lain. Ana nanenea' sira ofa na, boe ma ara bii raan seli.

20 Tehuu Yesus nafada si nae, “Boso' bii! Te Au ia.” 21 Huu ria naa ara ta bii so'. Tehuu ara nau Ana sa'e ofa' sama-sama no si. Keken te, ofa' ria losa mamana' fo ara reu a.

22-24 Balahaa', te lahenda kakabaina' sira bei rai dano a seri'. Ara ranenea' mamana' fo ri' Yesus hule makasi neu' Manetualain, de nahao si a. Ara bubulu' usele' a noi ofa' esa nai naa. Tehuu Yesus ana mana tuka dea nara pake ofa' ria, de la'o ela mamana' ria so. Yesus ta sa'e ofa' ria neu sama-sama no ana mana tuka dea nara.

Tehuu ofa' feke' hida reme kota Tiberias reu-mai nai mamana' ria. Fai fo lahenda kakabaina' sira bubulu' rae, Yesus no ana mana tuka dea nara ta rai naa so', boe ma ara sa'e ofa feke' sira, de reu saka Yesus nai Kapernaum, nai dano a seri'.

25 Lahenda sira raneta ro Yesus nai dano seri'. Boe ma ratane Ni rae, “Papa Mesen! Papa losa nai ia ri' fai hida' a?”

26 Yesus nataa si nae, “Matetu na, leo ia': emi saka Au, nana ta huu emi mita tanda heran. Tehuu emi saka Au nana huu Au fee emi mia losa' mabete. 27 Nenene matalolole! Boso' moi-tao saka noi nanaa', fo neu' ko tadalu ni. Malole lena' emi moi-tao ela hapu nanaa' fo bisa nanenete naroo losa' neni soda' matetu' mana basa taa'. Au, Lahenda Dae-bafo' Tetea'. Au ri' bisa fee emi soda' ria. Huu fo Au Papa Ka nai nusatetu-ikutema' a fee Au haak ria.”

28 Boe ma ara ratane Ni rae, “Kalu leo' naa, sona ami muste tao leo bea', ela ami bisa malala'o Manetualain nonoi-tataon?”

29 Yesus nafada si nae, “Manetualain nonoi-tataon leo ia': emi muste mamahere Au. Huu fo Manetualain ri' nadenu Au.”

30 Boe ma ara ratane Ni bali rae, “Papa matudu tanda heran ubea', ela ami bisa mita ma mamahere Papa? Boe ma Papa tao ubea' soa-neu' ami bali? 31 Conto leo-leo', ita bei-ba'i nara raa roti manna nai mamana lino-nees. Ria dadi sama leo' mana dui' nai Manetualain Susura Makamoi Na nae, ‘Ana naonda fee si roti neme lalai mai, ela raa.’”^b

32 Yesus nafada si nae, “Tebe-tebe Au afada leo ia': fai a ulu na, ta ba'i Musa ri' naonda roti ria neme lalai mai fee emi bei-ba'i mara. Au Papa Ka nai nusatetu-ikutema' a ri' naonda fee. Besa' ia boe Ana sadia fee emi roti neme lalai mai. Tehuu roti ia, Roti matetu' fo ri' ta parnaa tadalu ni. 33 Huu fo Roti neme Manetualain mai, ri' onda neme nusatetu-ikutema' a, ma neni soda' matetu' mana basa taa' fee lahenda nai dae-bafo' ia.”

34 Boe ma ara hule Ni rae, “Papa! Fee ami roti ria la'o naroo dei!”

35 Yesus nafada si nae, “Au ri' Roti ria. Huu fo Au ri' uni soda matetu'. De kalu lahenda bea dadi neu' Au lahenda Ki, ta namalaa so'! Ma lahenda bea namahere Au, ta maamada-metihedu so'!

36 Tehuu Au parnaa afada emi ae, leo mae emi mita Au, tehuu emi bei ta mamahere Au. 37 Sekonaa te basa lahenda fo Au Papa Ka teka-here naa si dadi reu' Au lahenda kara, neu' ko ara leo Au mai. Ma kalu lahenda bea leo Au mai, sona Au ta bisa usi heni ni! 38 Huu fo Au onda eme lalai mai. Au mai ela tao tuka Au Papa Ka hihii-nanaun, nana huu Ria ri' nadenu Au. Au ta nau tao tuka noi Au hihii-nanau mesa Ka. 39 Ma Ria hihii-nanaun leo ia': neme basa lahenda fo Ana teka-here naa si dadi reu' Au lahenda kara, Ana nau Au abubua aa katema' asa. Au ta ataa' esa mopon boe'. Tehuu neu' ko nai dae-bafo' a nonoe na, te Au muste fee si rasoda selu'. 40 Sama leo' bisinaa' a Au ae, Au Papa Ka nau basa lahenda fo ralela' ma ramahere Au, Ria Anan, ara bisa hapu soda matetu' mana basa taa'. Boe ma neu' ko nai dae-bafo' a nonoe na, te Au fee si rasoda selu'.”

41 Lahenda Yahudi a malaka nara mulai ramumuu Ni, nana huu Ana nae, “Roti fo neme Manetualain mai a, nana ri' Au onda eme nusatetu-ikutema' a mai.”

42 Ara dedea rae, “Leo bea' ia so? Lahenda ia nana Yesus, papa Yusuf ana na, hete? Ita talela' Ria ina-ama nara. Tao leo' bea de besa' ia Ana nae, ‘Au onda eme nusatetu-ikutema' a mai’? Hapun neme bea' mai?”

43 Yesus nafada si nae, “Hahae mamumuu' a meu' naa! 44 Au Papa Ka nai nusatetu-ikutema' a ri' nadenu Au leo ia' mai. Ta hapu lahenda esa bisa leo Au mai, kalu Papa Ka ta napipipi-nalala'o noo ni. Boe ma neu' ko nai dae-bafo' a nonoe na, te Au fee si rasoda selu'. 45 Manetualain mana nesi mata fai ulu nara parnaa dui' rae, ‘Manetualain nanori-nafada basa lahenda ra.’ Basa lahenda fo ramanene neu' Ama' a nai nusatetu-ikutema' a, ma ranori reme' Ana mai, ara leo Au mai fo dadi reu' Au lahenda kara.^c 46 Au onda eme Manetualain mai. De noi Au ri' ita Ni. Ta hapu lahenda feke' esa nita Ama' a nai nusatetu-ikutema' a boe'.

47 Tebe-tebe! Au afada mema' emi! Lahenda bea namahere Au, neu' ko hapu soda matetu' mana basa taa'. 48 Au nana Roti mana neni soda'. 49 Fai a ulu na, emi bei-ba'i mara raa roti manna, tepo' fo ara la'o horo-pali rai mamana lino-nees. Leo mae ara raa roti ria, tehuu mate si boe. 50 Tehuu Roti fo besa' ia onda neme nusatetu-ikutema' mai a, feke'. Huu fo basa lahenda bole raa. Ria sosoa na nae, lahenda bea ramahere Au, ara ta bika-bati reme Manetualain mai. 51 Au nana Roti mana neni soda', onda eme nusatetu-ikutema' a mai. Kalu Au mate, neu' ko Au fee ao-paa Ka ela basa lahenda nai dae-bafo' a bisa rasoda. Boe ma lahenda fo raa Roti ria, ara hapu soda matetu' mana basa taa'.”

52 Lahenda Yahudi ra malaka nara ramanene leo' naa, boe ma ara mulai ralelena ao' esa no esa rae, “Ana dedea ubea' ria? Tao leo' bea de Lahenda ia fee ao-paa Na, fo ita taa?”

53 Boe ma Yesus nafada si nae, “Tebe-tebe Au dedea. Ma Au afada leo ia': Au Lahenda Dae-bafo' Tetea'. Lahenda fo nahii' soda matetu' a, muste nabua-naesa no Au. De kalu emi ta mia Au ao-paa Ka, ma ta minu Au daa Ka, sona emi ta hapu soda matetu' mana basa taa'.^d 54 Lahenda bea naa Au ao-paa Ka, ma ninu Au daa Ka, sona ana hapu soda matetu' mana basa taa'. Boe ma dae-bafo' a nonoe na, te neu' ko Au feen nasoda selu'. 55 Huu fo nanaa matetu' a, ri' Au ao-paa Ka. Ma nininu matetu' a, ri' Au daa Ka. 56 De lahenda bea naa Au ao-paa Ka, ma ninu Au daa Ka, sona ana nabua-naesa no Au. Ma Au boe abua-aesa oo ni. 57 Ama' nai nusatetu-ikutema' fo ri' nadenu Au, nana Ama masoda'. Ma Au hapu soda' neme' Ria mai. Huu ria naa, lahenda bea naa Au ao-paa Ka, neu' ko ria hapu soda matetu' mana basa taa' a neme Au mai. 58 Fai a ulu na, emi bei-ba'i mara raa roti manna fo ri' onda neme lalai mai. Leo mae ara raa roti ria, tehuu mate si boe. Tehuu roti fo ri' besa' ia onda neme nusatetu-ikutema' a mai a, feke'. Lahenda bea naa roti ia, neu' ko hapu soda matetu'.”

59 Yesus nanori-nafada hihii-nanau' ia ra, nai kota Kapernaum nai lahenda Yahudi ra uma mamason esa dale'.

60 Lahenda dodou' tuka Yesus. Fai fo ara ramanene Ni dedea nae leo' naa, boe ma ruma rafada rae, “Ria nanori-nafadan, bera' a! Bea ri' bisa sipo' nanori-nafada' ria?”

61 Tehuu Yesus bubulu' sira namuu-nadaun ria, boe ma Ana natane si nae, “Ubea' taon de Au nanori-nafada Ki tao nasususa' emi? 62 Emi susa lena bali kalu emi mita Au, Lahenda Dae-bafo' Tetea', hene-ae fali leo mamana maulu Ka nai nusatetu-ikutema' a.

63 Manetualain Dula-dale Na ri' neni soda matetu'. Ta lahenda a ao-paa na ri' bisa neni soda matetu'. Tehuu Au Dedea-nafada kara raoka-rasamu reme Manetualain Dula-dale Na mai. De Dedea-nafada' ria boe neni fee lahenda ra soda matetu'. 64 Tehuu emi ruma ta mamahere Au.”

Yesus dedea nae leo' naa, nana huu neme masososa na mai Ana bubulu' bea ra si' ta ramahere, ma neu' ko bea ri' se'o heni Ni. 65 Boe ma Ana dedea selu' nae, “Huu ria naa, Au afada emi ae, Au Papa Ka nai nusatetu-ikutema' a muste soi fee lahenda eno' dei, besa' ko ria bisa dadi neu' Au lahenda Ki.”

66 Mulai neme fai ria mai, boe ma dodou' neme Ria ana mana tuka dea nara heo' heni ao nara reme' Ana mai, huu fo ara ta nau tuka Ni so'. 67 Boe ma Yesus natane ana mana tuka dean lahenda kasanahulu dua' ara nae, “Te emi leo bea' bali? Nau heo' meme Au mai boe, do?”

68 Tehuu Simon Petrus nataa Ni nae, “Ramatua'! Ami saka' leo bea meu bali? Ta hapu lahenda feke', bisa nafada nae ami tao leo bea', ela ami bisa hapu soda matetu' mana basa taa'. Noi Ramatua' a mesa' ana! 69 Ma ami mamahere Ramatua' a. Ami bubulu' Ramatua' a, nana Manetualain Lahenda Malalao-malalafun.”^e

70 Yesus nafada si nae, “Au teka-here basa emi lahenda sanahulu dua. Tehuu mafarerene'! Neme emi mai, esa dadi sama leo' nitu!” 71 Ria maksud na, nana Yudas, Simon Iskariot ana na. Yudas nana esa neme Ria ana mana tuka dea kasanahulu dua nara. Ria ri' neu' ko se'o heni Yesus.