Ramatua Yesus Tutui Malole Na
tuka
Yohanis susura na
Yesus nana bea?
1
Masososa na, nana Manetualain Hara-dasin.Manetualain Hara-dasin ria, sama no Lahenda esa.
Lahenda ria sama-sama no Manetualain.
Ma Ria boe, ri' Manetualain.
2 Lalai no dae-ina' a bei ta dadi,
te Lahenda ria sama-sama no Manetualain mema' so.
3 Manetualain adu na basa-basan dadi, pake Ria Hara-dasin.
Kalu Lahenda ria ta adu-tao, sona ta hapu hata esa dadi boe'.
4 Ria nana soda' a huu na.
De lahenda hapu soda' roo-tetu' a,
neme' Ria mai.
Ria boe sama leo' Makaledo',
de lahenda fo rasoda nai Makaledo' ria,
bisa rita ma bubulu'.
5 Makaledo' ria, nahaa sapu-seri' maiu-mahatu' a;
ma maiu-mahatu' a ta bisa ena-natabaa nala Makaledo' ria.
Huu fo Makaledo' ria nahaa naroo.
6 Lahenda feke' esa, nade Yohanis. Manetualain nadenun mai,a 7 fo dadi sakasii, ela nafada lahenda la'e-neu' Makaledo' ria. Fo ela basa lahenda bisa ramahere Manetualain, nana huu Yohanis dedea na.
8 Yohanis, ta ri' Makaledo' ria fa. Tehuu Manetualain nadenu ni nafada lahenda la'e-neu' Makaledo' ria. 9 Lahenda fo dadi Makaledo matetu', saka' leo dae-bafo' ia mai. Makaledo' ria nahaa soa-neu' basa lahenda ra ela ara bubulu' hihii-nanau' roo-tetu' ara.
10 Leo mae Ana adu na basa-basan nai dae-bafo' a so, tehuu tepo' fo Ana mai leo-naparasa nai dae-bafo' ia, lahenda dae-bafo' a ta ralela' Ana. 11 Leo mae Ana mai leo-naparasa no Ria lahenda nara, tehuu ara ta nau sipo' Ana. 12 Leo mae leo' naa, tehuu basa lahenda fo sipo' ma ramahere Ni, Manetualain fee si haak ela dadi reu' Ria ana nara. 13 Lahenda sira sama leo' nana boki natafali'. Tehuu ta boki si sama leo' lahenda boki-lae ana'. Ma ta huu neme tou' esa nahii' hapu tititi-nonosi'. Ara dadi Manetualain ana nara, nana huu Manetualain ri' fee si soda' bebeu'.
14 ‘Manetualain Hara-dasin’ ria,
boki-laen dadi lahenda dae-bafo'.
Ana leo-naparasa nai ita talada.
Ita tita Ria marela-masa'a Na.
Ana marela-masa'a, huu fo Ria nana Manetualain Ana Mane Ise Na.
Ana natudu dale malole Na neu' ita,
huu fo Ria manasue-manalai matetu'.
Ma basa-basan fo Ana nafada la'e-neu' Manetualain, mema' tebe.
15 Yohanis nafada la'e-neu' Lahenda ia. Ana naloo bou-bou nae, “Nenene! Lahenda ia ri' au tui ae, ‘Neu' ko Lahenda esa mai. Ria kahere' lena neme au mai. Huu fo bei ta boki au, te Ria naulu' au so!’”
16 Yohanis dedea nae leo' naa, nana huu Lahenda ria talalu nahii' natudu dale malole Na. Ma Ana tao nasarerei leo naa' naroo soa-neu' ita basa. 17 Fai a ulu na ba'i Musa naonda Manetualain Atoran nara, fee ita bei-ba'in. Tehuu besa' ia Lahenda ria, ri' Yesus Kristus, natudu Manetualain dale malole Na neu' ita. Ma basa-basan fo Ana nafada la'e-neu' Manetualain, mema' tebe. 18 Ta parnaa lahenda esa nita mata' Manetualain boe'. Tehuu Ria Ana Mane Ise susue Na, ri' natudu ita Manetualain dale Na. Ana' ria nai Papa Na boboan. Huu fo Ria boe, Manetualain.
Yohanis Mana Sarani' a natudu Ramatua Yesus
19 Lai' esa de, lahenda Yahudi ra malakan fo rai Yerusalem radenu malaka agama hida, ma lahenda hida reme leo Lewi fo ri' biasa ralalau nai Manetualain Uma Mamaso Yahudi Ina a. Ara leo lee Yarden seri' reu, ratane Yohanis Mana Sarani' a rae, “O nana Kristus fo ri' Manetualain helu nau feen mai a, do?”
21 Boe ma ara ratanen bali rae, “Kalu leo' naa, sona bea o? Ba'i Elia, do?”
Ana nataa nae, “Ta'a boe.”
Ara ratane selu' bali rae, “Bate o nana Manetualain mana nesi mata feken, do?”
Ana nataa nae, “Ta'a boe.”c
22 Boe ma ara ratanen bali rae, “Kalu leo' naa, sona bea o? Tolong mafada ami dei! Huu fo ami muste fali meu mafada malaka fo ri' radenu ami a!”
23 Boe ma ana nafada tuka hata fo parnaa ba'i Yesaya dui' nae,
“Au nana ri' lahenda fo naloo bou-bou nai mamana lino-nees nae,
‘Basa lahenda ra mahehere ao mara tao matalolole eno',
fo sipo' Ramatua' a mamai Na!
Pori matetetu eno', fo sipo-soru' Ana.’”d
24 Lahenda fo reme Yerusalem mai a, nana lahenda partei agama Farisi hida rai dale' boe. 25 Ara ratane Yohanis rae, “Leo ia'. Kalu o nana ta Kristus, ta ba'i Elia, ma ta Manetualain mana nesi matan esa boe', ubea' taon de o sarani lahenda? O hapu haak neme bea' mai?”
26 Boe ma Yohanis nataa si nae, “Au sarani lahenda pake oe. Tehuu Lahenda esa nai emi talada ia, emi ta malela' Ana. 27 Ria kahere' lena neme au mai, leo mae au ri' tui-beka aulu' lahenda. Ma dadi noi uu' Ria atan boe, ta araa fa.”e
28 Basa hihii-nanau' ia ra dadi nai Betania, fo ri' nai lee Yarden na seri'. Yohanis no ana mana tuka dea nara sarani lahenda rai naa.f
Ramatua Yesus sama leo' Manetualain Bibi-lopo Ana Na
29 Balahaa' boe ma Yohanis nita Yesus la'o leo ria mai. Boe ma ana dedea nae, “Mete Lahenda a ri' ele' dei! Ria nana Manetualain Bibi-lopo Anan fo ri' dadi tutunu-hohotu' ela sae-safe heni lahenda dae-bafo' a sala-sikon. 30 Lahenda ia, ri' usele' a au afada emi ae, ‘Neu' ko Lahenda esa toda mai. Ria kahere' lena au, nana huu Ana naulu' au.’ 31 Maulu na au ta bubulu' Ria nana Kristus. Leo mae leo' naa, tehuu au bubulu' au muste fee lahenda Israel ara ralela' Ana. Huu ria naa, au mai fo sarani lahenda pake oe.
32-33 Manetualain nadenu au, sarani lahenda pake oe. Ana nafada au nae, ‘Neu' ko Lahenda esa leo o mai. Au Dula-dale Ka onda mai, leo nai Ria. Lahenda ria ri', neu' ko neni Au Dula-dale Malalao-malalafu Ka, fo fee kuasa neu' Au lahenda kara.’ Lahenda ria mai a, au ta alela' Ana. Tehuu fai fo au ita Manetualain Dula-dale Na sama leo' manupui kalasi, onda neme lalai mai tena neu' Ana, besa' ko au alela' ae, ‘Lahenda a ri' na'!’ 34 Au ita mata' hihii-nanau' ia ra. Boe ma au afada emi ae, ‘Lahenda fo ri' mai a, nana Manetualain Ana Na!’”
Ramatua Yesus teka-here ana mana tuka dea masososa nara
35 Balahaa' boe ma Yohanis napadei no ana mana tuka dean dua. 36 Yohanis nita Yesus la'o nesi' naa, boe ma ana nafada nae, “Mete dei! Ria nana, Manetualain Bibi-lopo Anan fo ri' neu' ko dadi tutunu-hohotu'!”
37 Yohanis ana mana tuka dean sira dua ramanene ria dedea na, boe ma ara foa ela ni de reu tuka Yesus. 38 Yesus lipe aon, te nita si tuka Ni. Boe ma Ana natane si nae, “Leo' bea? Parluu ubea'?”
Ara ratane ratafali' Ana rae, “Rabii a leo nai bea?” (Nai sira dedea Aram na, ‘Rabii’ sosoa na nae, ‘Papa Mesen’.)
39 Yesus nataa si nae, “Mai mete ao mara.” Boe ma ara tuka ro Ni, de rita Ria mamana leleo Na. Ara losa mamana' ria nana, bate li'u haa leodae na. Ara sama-sama ro Ni losa' ledo a tena.
40 Neme lahenda sira dua fo ri' ramanene Yohanis dedea na, de reu tuka Yesus a, esa nade Anderias. Ria nana Simon Petrus fadi na. 41 Ara fali boe ma, Anderias neu saka a'an Simon de nafada ni nae, “A'a! Ami maneta moo Mesias so!” (Nai sira dedea na, ‘Mesias’ sosoa na nae, ‘Kristus nana Lahenda fo fai a ulu na Manetualain helu nau feen mai.’) 42 Ana noo a'a na leo Yesus neu.
Yesus nita Simon, boe ma Ana nafadan nae, “O ia, Simon. O papa ma ri' Yohanis. Mulai neme besa' ia, lahenda hule o rae ‘Kefas’” (Ria sosoa na nae ‘Petrus’, nana ‘batu’.)g
Ramatua Yesus naloo na Filipus no Natanel
43-44 Lahenda feke' esa nai naa boe, nade Filipus. Ria koro-tadun, ri' Betsaida. Petrus no Anderias reme naa' mai boe.
Balahaa' boe ma Yesus naetu' naan nau leo propensi Galilea neu. Boe ma Ana neu dama Filipus, de lele'on nae, “Mai tuka Au fo dadi muu' Au lahenda Ki!”
45 Filipus neu saka Natanel, de nafadan nae, “A'a! Ami maneta moo Lahenda fo ri' mana dui' nai ba'i Musa susura nara. Manetualain mana nesi mata fai ulu nara dui' la'e-neu' Lahenda ia boe. Ria nade Yesus, neme koro Nasaret. Papa Na nade Yusuf.”
46 Tehuu Natanel nataa ni nae, “Lahenda Nasaret!? Ta hapu hihii-nanau' malole esa kalua neme naa' mai boe'!”
Filipus nae, “Boso' mae leo' naa. Mai mete aom!”
47 Yesus nita Natanel la'o mai, boe ma nae, “Lahenda dale roos ia! Huu fo ana ta nanuu dale napuputa'. Lahenda Israel tetea' ia!”h
48 Natanel natane Ni nae, “Tao leo' bea, de Ramatua' a malela' au?”
Yesus nataa ni nae, “Leo ia'. Fai fo Filipus bei ta naloo o,i te Au ita o nai ai ria huu na so.”
49 Natanel nataa Ni nae, “Papa Mesen nana, tantu Manetualain Ana Na! Ma Papa boe, tantu ita lahenda Israel ara Mane na!”
50 Yesus natane nae, “Bate o mamahere Au, nana huu bisinaa' a afada ae, ‘Au ita o nai ai ria huu na,’ do? Mafarerene', te neu' ko o bisa mita basa hihii-nanau' fo kahere' lena ria bali!
51 Tebe! Au afada mema'. Neu' ko emi mita lalai natahu'a, boe ma Manetualain eila'o-limalopen rai nusatetu-ikutema' a onda-ae rai Au, Lahenda Dae-bafo' Tetea' ia boboa Ka.”j