Ramatua Yesus Tutui Malole Na
tuka
Markus susura na
1
Tutui malole ia. Ia nana, Manetualain Ana Naa tutuin. Nade Yesus Kristus, Manetualain tudu mema' Ana neme ulu' mai. Tutui na leo ia':
Markus 1:1-13
Yohanis Mana Sarani' a sadia eno' fee Ramatua Yesus
2 Yesus bei ta noi Ria nonoi-tataon, te Manetualain nadenu lahenda esa, nade Yohanis. Yohanis muste sadia eno' fee Yesus mamai Na. Huu fo nai fai a ulu na Manetualain pake mana nesi matan esa, nade ba'i Yesaya. Ana dui' mema' nae:
“Nenene! Au adenu Au lahenda Ki esa, fo soi eno' fee O.b
3 Lahenda ria neu' ko neu nai mamana' lino-nees, de naloo bou-bou nae:
‘Basa lahenda mahehere ao mara tao matalolole eno', fo sipo' Ramatua' a mamai Na!
Pori matetetu eno', fo sipo-soru' Ana!’”c
4-6 Lahenda biasa raloon rae Yohanis Mana Sarani'. Ana leo nai mamana lino-nees. Ria papake na tao neme banda onta a bulu na. Ria tali-ee na tao neme banda rou'. Ria nanaa na, lama' ma fani oe nura. [Yohanis masoda na, sama leo' fai a ulu na ba'i Elia.]d
Tepo' ria, lahenda dodou' reme kota Yerusalem mai, ma propensi Yudea a isi na katema', leo Yohanis mai nai ria mamana na. Ara mai nana nau rita Yohanis ma nau ramanene ria nanori-nafadan. Yohanis nafada si nae, “Emi muste manaku ma foa ela sala-siko mara katema', fo ela Manetualain sae-safe heni sala-siko' sira. Boe ma emi muste sarani dei, fo dadi tanda, nae emi malolole mo Manetualain.”
Ramanene basa leo' naa, boe ma ara manaku sala-siko nara, de ana sarani si nai lee Yarden.
7 Ana nafada nae, “Neu' ko lahenda esa matua-madema lena au, saka' mai. Leo mae au dadi noi neu' Ria atan boe, au ta araa.e 8 Au sarani emi pake oe, tehuu neu' ko Ria tao lena au, huu fo Ana tao nahenu emi dale mara neni' Manetualain Dula-dale Malalao-malalafu Na.”
Yohanis sarani Ramatua Yesus
9 Tepo' ria, Yesus neme' koro Nasaret nai propensi Galilea, leo Yohanis mai. Boe ma Yohanis sarani Ni nai lee Yarden. 10 Fai ria Yesus kalua neme' oe dale' mai, kekeneu te, lalai natahu'a. Boe ma Manetualain Dula-dale Na onda neu' Ana, sama leo' manupui kalasi. 11 Ma ramanene Manetualain haraoe Na neme' lalai mai nae,
“O ia Au ana susue Ka.
O tao ma Au amaho'o.”f
Nitu ra malaka na soba Ramatua Yesus nai mamana lino-nees
12 Boe ma Manetualain Dula-dale Na noo Yesus leo mamana lino-nees neu. 13 Banda fui' ara rai naa. Yesus leo nai mamana' ria fai' haa hulu. Nai naa, nitu ra malaka na mai soba Yesus ela tuka ni, tehuu ta nalan. Boe ma Manetualain eila'o-limalopen reme nusatetu-ikutema' a mai urus Ana.
Ramatua Yesus leo Galilea neu fo natudu Manetualain eno Na
14 Tepo' fo, ara ena Yohanis Mana Sarani' a nai bui dale', Yesus leo propensi Galilea neu tui-beka Manetualain Tutui Malole Na.
Markus 1:14-45
“Nenene! Besa' ia Manetualain ledo-fain losa so!
Besa' ia basa lahenda ra bubulu', Manetualain homu pareta.
Huu ria naa, emi muste hahae meme' mapuputa mara mai leo,
fo matafali mai tuka Manetualain.
Basa sona, mamahere Ria Tutui Malole Na leo.”g
Ramatua Yesus naloo manadolu-manadala ra fo tuka Ni
16 Fai esa boe ma Yesus la'o tuka dano Galilea suu na. Ana nita lahenda esa, nade Simon no fadi na, nade Anderias. Dua si dala ika'. Huu fo sira dua nonoi bale fain ria. 17 Yesus naloo si nae, “Mai tuka Au leo! Emi biasa saka ika', tehuu besa' ia Au fee emi dadi mana saka sumane'.” 18 Dua si ramanene leo' naa, boe ma foa ela dala ria, de reu tuka tuti' Ana.
19 Yesus la'o naroo selu' bai', boe ma Ana nita Sabadeus ana nara. A'a a nade Yakobis, ma fadi na nade Yohanis. Dua si rahii puka' nai ofa' lain. 20 Yesus naloo dua si nae, “Mai tuka Au!” Dua si foa ela papa na, no lahenda mana noi ra rai ofa' lain, de reu tuka Ni.
Ramatua Yesus usi heni nitu neme lahenda esa nai kota Kapernaum
21 Yesus no lahenda kahaa' fo ri' tuka Ni a, losa kota Kapernaum. Fai fo lahenda Yahudi ra fai huhule-haradoin,h boe ma Yesus leo uma mamaso' dale' neu, fo nanori-nafada nai naa. 22 Ramanene dedea Na, basa lahenda ra roi ramakokoa' a, huu fo Ana nalela' matetu' nanori-nafada' ria isi-liin. Ta sama no lahenda Yahudi ra mesen agama nara.i
23 Fai ria lahenda nitu heke' esa, tuka leo uma mamaso' dale neu, nitu fo nai lahenda ria dale' a naloo 24 nae, “Yesus lahenda Nasaret! O manuu urusan ubea' mo ami? O mai tao malutu ami, do? Ami malela' O. Lahenda fo Manetualain helu feen mai. O nana Manetualain Lahenda Malalao-malalafun, sala' taa'.”
25 Tehuu Yesus nasapaa ni nae, “Ma'au' bafa ma! Kalua meme lahenda ria mai!”
26 Nitu a tao na lahenda ria hede-hede mesan. Boe ma ana kalua neme lahenda ria mai, ma kasi nambera-ina. 27 Basa lahenda rai uma mamaso' ria dale', roi ramakokoa' a. Ara bai dea rae, “Ubea' ia? Ana pareta nitu ra kalua, tuka Ria hihii-nanaun. Nanori-nafada bebeu' ia, do? Tou lasi' a dedea na kahere'!”
28 Boe ma lahenda ra mulai tui-beka mana dadi' ria rule-feo basa koro' nai propensi Galilea.
Ramatua Yesus puli na Petrus arina na, ma lahenda dodou'
29 Fai fo ara kalua reme uma mamaso' ria mai, boe ma Yesus leo Simon no Anderias uma na neu. Yakobis no Yohanis sama-sama ro si. 30 Simon arina na namahedi ao luumai', de napeu' nai koi lain. Yesus no ana mana tuka dea nara kodi leo uma ria dale' reu, boe ma lahenda mai rafadan rae, “Ina lasi' a namahedi ao luumai'.”
31 Yesus neu mete ina lasi' a, boe ma tai na lima na, fo bifi nafoan. Boe ma ao luumai na mopon tuti' a. Boe ma ina lasi' a kalua neu nalalau' asa.
32 Ledo a tena, boe ma lahenda ra roo sira lahenda kamahedi nara, ma lahenda nitu heke nara leo Yesus mai hule tutulu-fafali'. 33 Losa' kota esa lahenda nara mai, de tesa rai uma ria matan. 34 Lahenda sira hedi nara rupa' ara, tehuu Yesus puli na basa si. Ma usi heni nitu makaresi' dodou-ina'. Tehuu Ana ta fee nitu sira lela' fo dedea, nana huu ara ralela' Ana.
Ramatua Yesus la'o rule-feo kota feke' ara, fo tui-beka Manetualain Tutui Malole Na
35 Balahaa' dulupila na, bei maiuana', te Yesus foa de kalua neme uma ria mai. Ana leo mamana lino-nees esa neu fo hule-haradoi, dedea no Manetualain. 36 Fai ria Simon asa foa, te ta rita Yesus, boe ma reu saka Ni. 37 Ara raneta ro Ni boe ma rae, “Papa, lahenda dodou' saka Papa.”
38 Tehuu Ana sipo' asa nae, “Ria malole a boe. Tehuu malole lena' ita leo koro feke' fo ranenea' nai baiana' ia dei. Huu fo Au afada si Tutui Malole a boe. Huu fo Au nonoi-laka Ki ria.”
39 Boe ma Ana la'o rule-feo propensi Galilea, fo tui-beka Manetualain Tutui Malole Na nai sira uma mamaso nara. Ma Ana usi heni nitu ra reme' lahenda ra mai boe.j
Ramatua Yesus puli na lahenda kamahedis kusta esa
40 Tepo' ria, lahenda kamahedis kusta esa leo Yesus mai. Ana sunda' undulaka na, hule neu' Yesus nae, “Papa! Fali ma au dei! Huu fo au bubulu', Papa bisa tao mamopo hedis ki ia, ela lahenda boso' rahia' au bali. Sadi Papa nau.”
41 Yesus kasian neu' lahenda ria, boe ma Ana loo' lima Na neu, de nafaroe ni ma nae, “Mema', Au nau! O te'e ma aom leo.” 42 Kekeneu te, lahenda ria hedis na mopo' ana. 43 Boe ma Yesus nadenu lahenda ria fali neun, tehuu feen nafarerene' 44 nae, “Mafarerene' matalolole! O te'e ma aom so, tehuu ta bole mafada lahenda esa boe'! O muste tuka ba'i Musa pareta na dei. De leo malaka agama muu, fo ana parisa' o ao-ina ma, ela nita o hedis ma mopon matetu' so, do bei'! Basa sona, o muste fee tutunu-hohotu' tanda makasi, ela basa lahenda ra bubulu' rae, o te'e matetu'.”k
45 Tehuu lahenda ria nala dea', boe ma ana neu tui rule-feo basa mamana' ain. Boe ma lahenda dodou' saka Yesus fo nau raneta roon, losa' Ana ta bisa natudu mata-idun nai kota dale'. De Ana leo nahani' mamana lino-nees nai kota a dea'. Tehuu neme mamana' ain mai, lahenda roi faa-faa' a mai, fo nau raneta ro Ni.