2 Boe ma Yesus naloo na ana aana' esa, de feen napadei neu' sira talada. 3 Ana nae, “Nenene matalolole! Lahenda bea nau dadi neu' Manetualain lahendan, ria muste narali dudu'a-aafin dadi sama leo' ana aana' fo ta natutua-nadedema aon.^b 4 Huu fo lahenda bea naloe-nadae aon sama leo' ana aana' ia, sona ria ri' lahenda bau-ina' nai Manetualain matan. 5 Ma lahenda bea sipo' lahenda aana' leo ia', nana huu namahere Au, sona ana sipo' Au ria so.”

6 Yesus nafada selu' asa nae, “Kalu lahenda bea no ria popode-eedon de tao naa ana aana' esa, tuka eno sala' a, losa' ta namahere Au, sona besa-besa! Malole lena' lahenda heke batu bau-ina' esa,^c neu' bolii na, fo tu'un leo tasi' dale' neu. 7 Dae-bafo' ia tebe-tebe mamana soe, huu fo hihii-nanau' dodou' tao ra lahenda tuda rala sala-siko' dale'. Tehuu lahenda fo soe naan seli' a, nana ri' lahenda fo popode-eedo naa lahenda feke' tao sala'.

8 Kalu o tao sala' muni' lima ma, do, ei ma, sona tete henis! Huu fo malole lena' o maso' nusatetu-ikutema' a no lima seseri', do ei seseri', bera' ko no o ei-lima katematuam, ara tu'u o leo naraka dale' muu.^d 9 Kalu o tao sala' muni' mata ma, sona edo henin! Huu fo malole lena' o maso' nusatetu-ikutema' a no mata seseri', bera' ko no o matam duas ara tu'u o leo ai-pila naraka muu.”^e

10 Yesus dedea bali nae, “Besa-besa! Boso' losa emi ta hika-hada' ana aana leo ia'. Huu fo Manetualain eila'o-limalopen rai nusatetu-ikutema' a ranea si. Ma eila'o-limalopen sira bisa maso' fai' bea a, fo reu rafada Manetualain la'e-neu' lahenda ia ra hihii-nanau' nara.

11-13 Emi afi matalolole, huu fo Au fee dedea nasasama' leo ia': Lahenda esa nanuu bibi-lopo natun esa. Fai' esa boe ma bibi esa la'o sala de mopon. Tuka emi dale dodoo ma, sona mana foo ria muste tao ubea'? Tantu ana foa ela bibi-lopo kasio hulu sio' sira reu' lete' lain, fo neu saka bibi-lopo mana mopo' ria.^f

Kalu hapu fali' ana, sona dale na namaho'o-natadale nita bibi-lopo ise' mana mopo' ria, lena neme nita bibi-lopon kasio hulu sio mana mopo taa' sira. [Au, Lahenda Dae-bafo' Tetea' ia, mai ela po'i-tata lahenda fo ri' heo reme eno roo-tetu' a mai.]^g 14 Huu fo leo mae mopo noi ana aana kamahere' esa boe, Au Papa Ka nai nusatetu-ikutema' a, ta nau.”

15 Yesus dedea selu' nae, “Kalu toranoom lahenda kamahere' tao nasala' o, sona muste muu dama ni. Kalu noi emi dua, sona besa' ko mafada ria sala na. Kalu ana namanene o dedea-nafadam, sona emi dua malolole ao'.^h 16 Tehuu kalu ana ta nau namanene neu' o, sona muu mala tia-laim esa-dua mo si sama-sama meu dama lahenda ria, ela dedea mo ni selu'. Huu fo mana dui' nai Manetualain Susura Makamoi Na dale' nae, ‘Nai dedea' esa, muste sakasii dua do telu tutui nara sama, besa' ko bisa sipo' asa.’ⁱ 17 Tehuu kalu ana bei ta nau namanene neu' emi, sona meu mafada jama'at ara. Ma kalu ana ta nau sipo' no malole jama'at ara dedean, sona tao ni sama leo' lahenda fo ta nalela' Manetualain. Ta'a sona tao ni neu' lahenda tadalu' sama leo' mana susu doi-bea.

18 Mafarerene' matalolole Au dedea Ka! Kalu hata ubea' fo emi horo ta bole taon nai dae-bafo' a, sona Manetualain boe horo leo naa' nai nusatetu-ikutema' a. Ma kalu hata ubea' fo emi ta horo bole taon nai dae-bafo' a, sona Manetualain boe ta horo leo naa' nai nusatetu-ikutema' a.^j

19 Ma Au afada selu' ae, kalu lahenda dua neme emi mai dale' esa, fo hule-haradoi, neu' ko Au Papa Ka nai nusatetu-ikutema' a fee hata fo ara hule a. 20 Kalu Au lahenda Ki dua do telu rabua-raesa fo hule-haradoi sama-sama, sona Au boe nai sira talada.”

21 Boe ma Petrus mai natane Yesus nae, “Ramatua', au atane bai'. Kalu au toranoo lahenda kamahere ka tao nasala' au kose-kose, sona au muste fee ampon neu' ana losa lai' hida? Losa lai' hitu, do?”

22 Yesus nataa ni nae, “Ta'a! O muste fee ampon neu' ana lai' hitu lai' hitu hulu,^k losa' o reke doa' asa.^l 23 Emi muste tao tuka leo' naa, nana huu Manetualain sama leo' mane' esa bareken pegawe nara huta-bu'un. 24 Fai fo ana mulai bareken, boe ma nadenu ria lahendan neu naloo pegawe fo ri' nahuta ni doi', losa kefu-kafun.^m 25 De pegawe ria ta bisa bae nala huta na. Boe ma mane' a pareta nae, ‘Meu se'o lahenda ia no basa sao-anan, ela ara dadi ata. Ma se'o heni basa hata-heton, fo ela bae ria huta-bu'un.’

26 Pegawe ria namanene leo' naa, boe ma ana sunda' undulaka na neu' mane' a matan, fo lele'o ni nae, ‘Papa! Papa mane' fee au fai lela' bai' dei! Neu' ko au bae etu katema' huta-bu'u kara.’ 27 Mane' a namanene leo' naa, boe ma kasian neu' ana. De ana e'a heni pegawe ria huta-bu'u nara katema', ma ana po'i ni.

28 Tehuu pegawe ria kalua, boe ma neu dama tia-lain fo ri' nahuta ni doi' bai'.ⁿ Ana hopu na tia na, de rumu neu' bolii na, ma nasapaa nae, ‘O bae huta-bu'u ma besa' ia leo!’

29 Tia na namanene leo' naa, boe ma sunda' undulaka na fo lele'o ni nae, ‘Tia! Fee au fai lela' bai' dei! Neu' ko au bae etu katema' huta-bu'u kara.’

30 Tehuu pegawe ria nae, ‘Ta bisa fa! Leo mae leo' bea boe, muste bae ada' besa' ia!’ De ana tee ni leo bui dale' neu, losa' ana bae etu katema' huta nara. 31 Mane' a pegawe feke nara rita hata mana dadi' ria, boe ma dale nara susa, de reu tui mane' a.

32 Mane' a namanene leo' naa, boe ma naloo na pegawe mata mamae taa' ria. Ana nasa'ai ni nae, ‘Lahenda tadalu' on! O hule au kasian neu' o, huu ria naa de au e'a heni katema' huta mara. 33 Tehuu ubea' taon de o ta kasian neu' tia-laim ria, sama leo' au kasian neu' o?’ 34 Mane' a namanasa, losa' ana nadenu si teen leo bui dale' neu, ela ara ese-rumun, losa ana bae nabasa huta-bu'un.”

35 Yesus tui nate'e, boe ma Ana nafada nae, “Au Papa Ka nai nusatetu-ikutema' a bareken leo naa' boe. Kalu tebe-tebe emi ta mafarene heni toranoo kamahere mara sala-sikon, sona neu' ko Ana huku emi.”