Ara tati raisa Yohanis Mana Sarani'
14
Tepo' ria, mane' Herodes pareta nai propensi Galilea. Ana namanene tutui' rupa' la'e-neu' Yesus boe. 2 Ana nafada pegawe nara nae, “Yesus nana, tantu Yohanis Mana Sarani' fo ri' fai naa ra au adenu tete heni laka na. Besa' ia ana nasoda selu' so! Huu ria naa, ana nanuu kuasa fo tao tanda heran sira.”3 Mane' Herodes a dedea nae leo' naa, huu fo maulu na ana nadedea no Yohanis, losa' ana hopu na Yohanis de teen leo bui dale' neu. Dedea' ria tutui na leo ia': mane' Herodes, sao na fadin Filipus sao na, nade Herodias. Sekonaa te Filipus no Herodias bei ta ramaetu' fa. 4 Huu ria naa, Yohanis nasa'ai nasarerei ni nae, “Papa mane' ta bole sao fadi ma sao na. Huu fo ria nalena-laka neu' ita hadas Yahudi na!”a
5 Tehuu Herodes ta tao dale' neu' ana, de sao na Herodias. Tuka matetu na, Herodes nahii' naisa Yohanis Mana Sarani'. Tehuu ana lele lahenda kadodou' ara, huu fo ara ramahere rae, Yohanis nana Manetualain mana nesi matan. Huu ria naa, ana nadenu lahenda nara tee Yohanis leo bui dale' neu.
6 Tehuu naraa la'e Herodes fai boboki na, boe ma ana tao feta. Fai' ria, ina mane' Herodias ana feto na roke nasare na fui ra. Roroke na malole na seli', losa' tao na Herodes namaho'o naan seli. 7 Roke basa, boe ma Herodes naloo na ana feto' ria de nae, “O hule ubea' neme au mai, sona mafada leo! Neu' ko au fee o. Tebe-tebe au homu ahere hehelu ki ia. Ma au soo-supa pake Manetualain nade Na.”
8 Ana feto' a mama na namanene mane' a dedea nae leo' naa, boe ma ana duduku-papau' ana feto na. Huu ria naa, ana hule nae, “Papa! Au hule Yohanis Mana Sarani' a laka na. Tao ni neu' dulang dale', menin fee au.”
9 Herodes namanene ana feto' a hule leo naa', boe ma mopo aafi na tuti'. Tehuu ana ta bisa hela fali' ria sosoo-susupan, nana huu basa fui ra ramanene basa so. Huu ria naa, ana tuka ana feto' ria hihii-nanaun. 10 De ana pareta lahenda reu tete ra Yohanis laka na nai bui dale'. 11 Ara tete ra Yohanis laka na, de taon neu' dulang esa dale', boe ma renin leo ana feto' a neu. Ana sipo na dulang ria, boe ma o'o nenin feen leo mama na neu.
12 Yohanis ana mana tuka dea nara ramanene tete reni laka na, de ara mai o'o ra popora na, fo reu ratoin. Basa de ara reu tui hihii-nanau' ria neu' Yesus.
Ramatua Yesus nahao lahenda rifun lima lena'
13 Yesus namanene tutui' la'e-neu' Yohanis, de no ana mana tuka dea nara heo' reme mamana' ria mai. Boe ma ara sa'e ofa' saka' leo mamana lino-nees reu, ela bisa hahae ao nara. Tehuu lahenda dodou' rita Yesus asa ofa na tuka-tuka dano a suu na. De ara kalua reme koro' ara mai, ara la'o ralai' a tuka mada' lain. Huu ria naa, ara leo mamana' ria reu a, losa raulu' Yesus asa. 14 Ana bei onda neme ofa' lain mai, te nita lahenda dodou-ina' rahani Ni. Ana kasian neu' asa, de puli na sira lahenda kamahedis nara.
15 Ledo leodae', boe ma Ria ana mana tuka dea nara rafada Ni rae, “Papa! Malole lena' Papa madenu lahenda ia ra basa si reu asa nanaa' nai koro manenea' ia ra. Huu fo ledo leodae' ia so! Nai ia ta hapu nanaa' fa.”
16 Yesus nataa nae, “Boso'! Emi ri' mahao si.”
17 Tehuu ara rataa rae, “Papa! Ami ta manuu hata-hata esa boe', fo mahao lahenda kakabaina' ia ra. Ami tao leo bea'? Huu fo hapu noi roti lima, ma ika' boa' dua!”
18 Tehuu Yesus dedea nae, “Neu! Ria malole a so. Meni si mai leo!” 19 Boe ma Ana nadenu lahenda sira fo ratuu rabubua reu' nau lain. Yesus hai na roti kalima' sira, ma ika' boa kadua' ara. Boe ma Ana nasare leo lalai neu hule makasi neu' Manetualain. Basa de Ana tetebi roti sira, de loo si leo ana mana tuka dea nara reu, fo ara babati fee basa lahenda sira. 20 Basa si raa losa' rabete. Raa basa, boe ma ara rabubua ra nanaa lena' ara, losa' henu lapaneu sanahulu dua. 21 Lahenda mana naa sira, nana bate tou' rifun lima. Bei ta reke' ina' ara ro ana nara.
Ramatua Yesus la'o nesi' oe lain
22 Ara raa basa, boe ma Yesus nadenu ana mana tuka dea nara sa'e ofa' raulu' leo dano a seri' reu. Tehuu Ana bei nahani' naa, ela nadenu lahenda kakabaina' sira fali reus. 23 Basa si fali, boe ma Yesus ae leo lete' esa lain neu hule-haradoi. Nahatu so boe, Ria mesa' ana bei nai naa. 24 Ria ana mana tuka dea nara ofa na losa nai dano a talada so. Tehuu ara sefe sota raan seli, nana huu ani tatada', ma nafa lolis ara. 25 Lole malua', boe ma Yesus neu tuka si. Tehuu Ana la'o nesi' oe lain. 26 Ana mana tuka dea nara rita leo' naa, boe ma ara kekes ara. Ara dedea no bibii' rae, “Mita' nitu a ri naa'!”
27 Tehuu Yesus dedea mata' no si nae, “Emi boso' bii! Te Au ia, Yesus!”
28 Petrus namanene leo' naa, boe ma ana nataa nae, “Tebe-tebe o nana Ramatua', sona madenu au la'o usi' oe lain leo Ramatua' a uu.”
29 Yesus nataa nae, “Neu! Mai leo!” Boe ma Petrus kalua neme ofa' a mai de ana la'o nesi' oe lain leo Yesus neu. 30 Tehuu Petrus nameda naan ani a nasa', de ana bii naan seli. Ana mulai bolo, boe ma naloo nae, “Adoo, Ramatua'! Mai tulu-fali ma au dei!”
31 Yesus nalale loo' lima Na neu, de lobe' naan. Ana dedea nae, “Petrus! Ubea' taon, de dale ma doda'? O ta mamahere matetu' Au, do?”
32 Dua si ae ofa' lain reu, boe ma ani a namate tuti' a. 33 Ria ana mana tuka dea nara rita leo' naa, boe ma ara io Ni rae, “Awii! Papa nana tetebes ara Manetualain Anan!”
Ramatua Yesus puli na lahenda kamahedis ara rai Genesaret
34 Yesus asa losa dano a seri', boe ma ara see reu' koro Genesaret a namo-sesee na. 35 Ara bei onda, te lahenda dodou' ralela' tuti' asa. Boe ma ara mulai bobou' rae, “Yesus mai so!” Ara ralai reu rafada rule-feo nusa' ria, de lahenda ra roo basa lahenda kamahedis ara mai. 36 Ara hule fo bisa oi la'e Ria badu Na. Huu fo ara afi rae, “Sadi lahenda kamahedis ara oi la'e Yesus badu peda Na boe, tantu ara te'e tuti' a.” De basa lahenda kamahedis fo ri' oi la'e Ria badu Na, ara te'e tuti' a.