4 Yesus ana mana tuka dea nara rataa rae, “Papa! Mamana ia doo' a neme koro a mai. De tao leo' bea oo, ita ta bisa tahao lahenda kakabaina' ia ra.”

5 Tehuu Yesus natane si nae, “Emi manuu roti hida?”

Ara rataa rae, “Papa. Ami peda noi roti hitu' a!”

6 Yesus nadenu basa lahenda sira ratuu' reu' dae a. Boe ma Ana hai na roti kahitu' sira, de hule makasi neu' Manetualain. Ana tetebi roti sira, de fee si leo ana mana tuka dea nara reu. Boe ma ara babati fee basa lahenda sira. 7 Ara ranuu ika' boa' hida boe. De Yesus hule makasi selu' neu' Manetualain. Ana nadenu ana mana tuka dea nara babati fee lahenda sira. 8-9 Basa si bate lahenda rifun haa. Ara raa losa' rabete. Raa basa, boe ma ana mana tuka dea ra rabubua ra nanaa lena' sira, henu lapaneu hitu. Boe ma Yesus nadenu basa si fali. 10 Fai ria ara fali, Yesus no ana mana tuka dea nara sa'e ofa' leo mamana esa reu, nade Dalmanuta.

11 Fai fo Yesus asa losa Dalmanuta, boe ma lahenda partei Farisi hida mai raneta ro Ni. Ara ratatane ao' ro Ni fo nau rahihii' Ana. Ara hule Ni rae, “Papa! Matudu tanda heran fo dadi buti nae, tebe Papa hapu kuasa neme' Manetualain mai.”^a

12 Yesus hela hahae Na nae, “Kalu Au amanene emi dedea leo naa', sona Au asaledale! Ubea' taon de emi hule tanda heran? Boso' tao leo' naa! Mema' hapu tanda heran, tehuu Au ta atudu fee emi.”^b

13 Boe ma Yesus foa ela si, de no ana mana tuka dea nara sa'e ofa' leo dano seri' reu.

14 Fai ria Yesus asa losa dano a talada, besa' ko ana mana tuka dea nara rafarene ara ta reni tua-lepa. Ara reni noi roti balo' esa. 15 Yesus namanene si dedea la'e-neu' roti, boe ma nae, “Emi muste besa-besa! Emi boso' tuka mane' Herodes no lahenda Farisi ra duduku-papau tadalu' nara. Sira duduku-papau nara sama leo' ralu tetei' fo lahenda ame rabuan no uu' ela roti a aifuu.”^c

16 Ana mana tuka dea nara ramanene Ni dedea nae leo' naa, boe ma ara roi ramakokoa' a. De dedea-rao nara rae, “Tou lasi' a dedea nae ubea' ria? Bate Ana nae leo' naa, nana huu ita ta teni roti, do?”

17 Tehuu Yesus bubulu' sira dudu'a-aafi nara. De Ana dedea nae, “Ubea' taon de emi dedea noi roti a? Emi ta bubulu' Au maksud Ka, do? Emi dodole mara mema' ta tande' a! 18 Emi mita no mata', tehuu ta bubulu' ria sosoa na! Sama leo' ta mita. Emi mamanene ao mara, tehuu ta bubulu' hata-hata esa boe'. Sama leo' emi ta mamanene! Emi mafarene heni^d 19 roti kalima' ara fo ri' Au tetebi si de fee lahenda rifun lima raa a, do? Fai' na emi mabubua ma roti lena' ara lapaneu hida?”

Ara rataa rae, “Lapaneu sanahulu dua, Papa.”

20 Yesus natane selu' nae, “Emi bei mafarene' fai' naa Au tetebi roti balo ka hitu' ara fo fee lahenda rifun haa raa a, do? Emi mabubua ma lena nara lapaneu hida?”

Ara rataa rae, “Hitu, Papa!”

21 Yesus nae, “Mema' tebe! Emi mita no mata', tehuu ubea' taon de emi bei ta bubulu' Au kuasa Ka neme bea' mai?”

22 Boe ma Yesus asa losa koro' Betsaida. Nai naa lahenda ra hela roo lahenda poke' esa leo Yesus neu. Ara hule Yesus nafaroe lahenda poke' ria, ela nita dae.

23 Yesus hela na lahenda ria lima na, de noon leo koro' a dea' neu. Boe ma Ana mudi ape neu' lahenda ria mata na, ma nafaroe ni. Ana natane nae, “Leo' bea? O bisa mita dae so, do?”

24 Lahenda ria boti' laka na de memete ii-ona', boe ma nataa nae, “Au ita lahenda ra lala'o. Tehuu nonoo' leo ai huu' ara lala'o.”

25 De Yesus fua selu' lima Na neu' lahenda ria mata na. Boe ma ana memete soba selu' bali, te mata na te'e matetu'. Besa' ia ana nita dae no matetu'. 26 Yesus nadenu lahenda ria fali, ma nafarerene' feen nae, “O fali leo, tehuu tuka eno feke'. Boso' fali selu' leo Betsaida muu.”

27 Boe ma Yesus asa la'o rule-feo koro' fo rai Kaisarea Filipi. Nai eno talada' Yesus natane si nae, “Kalu tuka lahenda ra tutui na, ara rae Au nana, bea?”

28 Ara rataa rae, “Ruma rae ‘Yohanis Mana Sarani'’. Ruma rae ‘ba'i Elia’, Manetualain mana nesi mata fai ulu na. Feke' ara rae, Papa nana Manetualain mana nesi mata fai ulu feke' nara esa ian.”^e

29 Yesus natane selu' nae, “Tehuu emi sona mae Au nana, bea?”

Petrus nataa nae, “Papa nana Kristus! Fo ri' Manetualain tudu mema' ana neme fai a ulu na mai.”^f

30 Tehuu Yesus horo si nae, “Boso' mafada lahenda esa boe!”

31 Boe ma Yesus mulai nafada ana mana tuka dea nara nae, “Au, Lahenda Dae-bafo' Tetea'. Neu' ko Au hapu doidoso dodou', nana huu lasi' ara, malaka agama Yahudi ra malaka nara ma mesen agama ra, ara ta sipo' Au. Neu' ko raisa Au, tehuu fai binesa' na,^g te Au asoda selu'.”

32 Yesus nafada ledo-ledo leo' naa, boe ma Petrus hela no Ni leo mamana feke' neu de nafadan nae, “Papa! Boso' dedea leo naa'. Au ta ataa' sira lima-ei nara dai Papa.”

33 Petrus dedea leo naa', tehuu ta tuka Manetualain hihii-nanaun. Yesus lipe aon de mete ana mana tuka dea feke nara. Ana nasa'ai Petrus no hara bera' nae, “Nitu ra malaka na dedean ria! Heo' meme ia' mai! O du'a-afi tuka noi lahenda dae-bafo' a hihii-nanaun, ta tuka Manetualain hihii-nanaun!”

34 Boe ma Yesus naloo na lahenda feke' ara mai rabua ro ana mana tuka dea nara. Ana nanori-nafada si nae, “Bea nau tuka Au, sona ana muste tuka nahere Au fai-fai'! Ana muste nafarene heni ria hihii-nanau mesan, fo tuka noi Manetualain hihii-nanaun. Leo mae lahenda raisa ni, ana muste tuka nahere, sama leo' lahenda lepa na ai kake na leo mamana mamate na neu.^h 35 Lahenda bea nasoda soa noi ao-ina heheli na, neu' ko ria masoda na sapu-lalo! Tehuu lahenda bea sadia mate nana huu ana tuka Au, ma tui-beka Manetualain eno masoda Na, neu' ko nasoda naroo no Manetualain.ⁱ 36 Nenene! Kalu o manuu katema' dae-bafo' a oe-isin, tehuu Manetualain tipa heni o, sona onto ubea'? 37 Leo mae o lepa muni katema' dae-bafo' a oe-isin boe, ta bisa katin neu' o sumane ma!

38 Mafarerene'! Besa' ia lahenda nai dae-bafo' ia tadalu nara rupa' ara. Ara ta tao dale' neu' Manetualain. De bea mae' tuka Au, do mae' homu Au nanori-nafada Ki, Au boe mae' manaku ria nade na nai Manetualain matan. Huu fo Au, Lahenda Dae-bafo' Tetea', neu' ko Au fali selu' eme nusatetu-ikutema' a mai. Ma Manetualain eila'o-limalopen rai nusatetu-ikutema' a, sama-sama ro Au. Ami onda meme nusatetu-ikutema' a mai mo Papa Ka kuasa marela-masa'an, besa' ko lahenda bubulu' Au nana, bea.