2 Basa fai' nee, boe ma Yesus hule Petrus, Yakobis ma Yohanis, fo ara sama-sama ae leo lete madema esa lain reu, nai naa lahenda ta'a. Ara losa lain, boe ma rita Yesus dadi feke'. 3 Ma kakao-papaken fula makarela. Nai dae-bafo' ia, ta hapu hata esa fula naa lena Ria kakao-papaken boe'. 4 Kekeneu te, rita Yesus dedea no ba'i Elia ma ba'i Musa.

5-6 Petrus asa bii raan seli, de Petrus noi namakokoa' a, losa' ana dedea nafarara'u. Ana nafada Yesus nae, “Papa! Nai ia malole na seli! De malole lena' ami mafoa ma laa' telu. Esa fee Papa, esa fee ba'i Musa, ma esa bali fee ba'i Elia.”

7 Boe ma oa' a onda mai de napoti naa si. Ara ramanene haraoe' esa neme oa' ria mai nae, “Nenene! Yesus nana Au Ana susue Ka. Emi mamanene matalolole Ni!”^a

8 Petrus asa ramanene haraoe' ria, de ara memete ralelei', tehuu kekeneu te ara ta rita lahenda feke' so'. Noi Yesus mesa' ana.

9 Basa de Yesus no ana mana tuka dea nara onda fali' reme lete' lain mai. Yesus helu ela si nae, “Hata fo bisinaa' a mita ni a, emi boso' mafada lahenda esa boe. Au, Lahenda Dae-bafo' Tetea', Au muste mate dei. Kalu Au asoda selu', besa' ko emi bole tui-beka fee lahenda.”

10 Ara homu rahere Yesus hehelun ria, de ara ta tui lahenda. Tehuu telu si mulai ratatane ao' rae, “Ria maksud na leo bea' nae, Ria ‘nasoda selu' neme mamate Na mai.’ Leo bea' ria?”

11 Boe ma ara ratane Ni rae, “Mesen agama ra rae, ‘Ba'i Elia muste mai dei, besa' ko Kristus mai.’ Tehuu tuka Papa, sona leo bea'?”^b

12 Yesus nataa nae, “Mema' tebe! Ba'i Elia muste mai dei, fo soi eno' fee Kristus, Lahenda fo Manetualain tudu mema' neme ulu' mai. Tehuu ubea' taon? De emi bei ta bubulu' hata fo ara dui' ana nai Manetualain Susura Makamoi Na la'e-neu' Lahenda Dae-bafo' Tetea' a, do? Ara dui' mema' rae, neu' ko Ana mai, sona lahenda tao rasususa' Ana losa' ara raisan. 13 Tehuu emi muste pasa' matalolole ridoo mara! Mema' ba'i Elia mai so. Tehuu lahenda tao rasususa' ana tuka sira hihii-nanaun. Ria boe natetu na hata fo ba'i ra dui' mema' neme ulu' mai.”

14 Fai ria Yesus no ana mana tuka dean katelu' sira, fali mais leo ana mana tuka dea feke nara, te rita lahenda dodou' rabua rai naa. Lahenda kadodou' sira mai te rita Yesus ana mana tuka dea feke nara, ralelena ao' ro mesen agama ra. 15 Lahenda kadodou' sira rita Yesus, boe ma ara kekes ara, huu fo raendobuko Yesus bei nai lete' lain. De ara ralai reu soru' Ana.

16 Yesus natane si nae, “Emi malelena ao' ubea' nai ia?”

17 Lahenda esa mai de nae, “Papa, nenene dei! Au oo ana tou ana ka mai, fo Papa puli maan dei. Pakanaa ni, ta bisa dedea, huu fo nitu a heke naan. 18 Kalu nitu a maso', sona lokopiro ni neu' dae a. Ana' a bafa na nafufude, ma heku nisi na. Ma ao-ina na bara'aain sama leo' ai. Au hule Papa ana mana tuka dea mara usi nitu ria, tehuu ta bisa.”

19 Yesus namanene leo' naa, boe ma nasapaa si nae, “Emi talalu! Au anori-afada emi kose-kose, tehuu emi ta bubulu' matetu'. Ma emi ta mamahere tebe-tebe neu' Au! Au muste sabar oo emi losa fai hida'? Moo ana' ria leo ia' mai!” 20 Ara roo ana' ria leo Yesus mata Na neu. Tehuu nitu ria nita Yesus, boe ma ana lokopiro nalololi' ana' a neu' dae a losa' bafa na nafufude.

21 Yesus natane ana' ria papa na nae, “O ana ma hapu hedis ia, ri' fai hida' a?”

Papa na nataa nae, “Neme' aanan ria mai. 22 Nitu ria nau namate ana' a ri' doo' a so. Ana natuda au ana ka kose-kose leo ai-pila' dale' neu, ma nabolo ni nai oe dale'. Papa tulu-fali dei! Kalu bisa, Papa kasian neu' ami fo puli ma ana' ia dei.”

23 Yesus nataa nae, “Ubea' taon de o mae ‘kalu bisa’? Tebe Au bisa tao basa-basan, sadi lahenda ramahere!”

24 Tou lasi' a nataa ma hii-hii' dola' nae, “Papa! Tebe au amahere. Tehuu tulu-fali fo au namahere ka boe-boe natea.”

25 Fai ria Yesus nita lahenda dodou' mulai mai tesa rai naa. Ana pareta nitu a nae, “Nitu makaresi'! O kalua ela ana ia leo, ela namanene ma dedea. O boso' maso' selu' leo ria dale' muu bali.”

26 Nitu ria namanene Yesus dedea nae leo' naa, boe ma ana kasi nambera-ina. Ana tao na ana' ria bara neu ma hede, besa' ko nalai elan. Ana' ria hela naroroo aon sama leo' mate ni. Losa' lahenda fo rai naa ara beidea rae, “Mate ni so!”

27 Tehuu Yesus tai na ana' ria lima na de hela nafoan. Boe ma ana foa tuti' a.

28 Yesus no ana mana tuka dea nara la'o ela mamana ria, de kodi leo uma esa dale reu. Nai naa ara ratane Yesus rae, “Papa! Ubea' taon de bisinaa' a ami ta bisa usi mala nitu ria?”

29 Yesus nafada nae, “Nenene matalolole! Nitu ra tebe makaresi'. De kalu emi ta hule-haradoi fo hule tutulu-fafali' neu' Manetualain, sona emi ta bisa usi mala nitu rupa leo naa'.”

30 Boe ma Yesus no ana mana tuka dea nara foa ela mamana' ria, de leo propensi Galilea reu. Fai ria, Yesus ta nau lahenda bubulu' Ria nai naa, 31 huu fo Ana nau nanori-nafada noi ana mana tuka dea nara. Ana nafada si nae, “Ta doo' a so', te lahenda se'o heni Au. Boe ma ara raisa Au, Lahenda Dae-bafo' Tetea' ia. Tebe Au mate, tehuu nai fai binesa na,^c te Au asoda selu'.”

32 Yesus nafada nae leo' naa, tehuu ana mana tuka dea nara roi ramakokoa' a. Ara ta raparani ratane Yesus maksud Na nae leo' bea.

33 Yesus no ana mana tuka dea nara la'o losa kota Kapernaum. Fai ria ara kodi leo uma dale' reu, boe ma Yesus natane ana mana tuka dea nara nae, “Bisinaa' a emi malelena ao' ubea' nai eno talada' ria?”

34 Tehuu ta hapu esa naparani nataa boe', huu fo nai eno talada' ara rasisipo' bafa' rae, neme sira basa mai bea ri' bau lena.^d

35 Yesus natuu' de nanori-nafada si nae, “Bea ri' nau dadi lahenda bau-ina', sona ria masoda na tebe-tebe muste dadi sama leo' lahenda aana' fo nalalau' basa lahenda ra.”^e

36 Boe ma Yesus o'o na ana aana' esa nai naa, de fali selu' leo sira talada neu. Ana dedea nae, 37 “Bea ri' tuka Au fo nalalau' lahenda aana' a sama leo' ana' ia, sona sosoa na nae, ana nalalau' Au. Ma ria boe nalalau' Au Papa Ka, fo ri' nadenu Au leo dae-bafo' ia mai.”^f

38 Boe ma Yesus ana mana tuka dean Yohanis, tui Yesus nae, “Papa! Lai' esa de, ami mita lahenda esa pake Papa nade Na, fo usi nitu. Tehuu ami horo ni, huu fo ita lahendan ta ria.”

39 Tehuu Yesus nataa nae, “Emi boso' horo lahenda ria. Huu fo bea tao tanda heran pake Au nade Ka, ana ta namumulu-namamae' Au nade Ka. 40 Kalu ana ta nalena-laka neu' ita, sosoa na nae ria boe ita lahendan.^g 41 Mafarerene' matalolole! Kalu lahenda bubulu' emi tuka Kristus, ma ana tulu-fali emi, tantu Manetualain ta nafarene heni ria sosota na. Leo mae ana fee noi oe galaas esa boe, Manetualain ta nafarene heni ni.”^h

42 Yesus nafada selu' asa nae, “Kalu lahenda bea no ria popode-eedon de tao na ana aana' esa tuka eno sala' a, losa' ana' ria ta namahere Au, sona besa-besa! Malole a soa-neu' lahenda ria, kalu heke batu ba'u-ina esa,ⁱ neu' bolii na fo tu'un leo tasi' a talada neu.

43 Kalu o tao sala' muni' lima ma, sona tete heni lima' ria. Huu fo malole lena' o maso' nusatetu-ikutema' a muni noi lima' seri' a, bera ko no o limam dua si, ara tu'u o leo naraka dale' muu.^j 44 [Naraka nana mamana doidoso. Ai-pila na ta maten, ma ule' fo rai naa boe tao maboo puru' la'o naroo.]^k 45 Kalu o tao sala' muni' ei ma, sona tete heni ei' ria. Huu fo malole lena' o maso' nusatetu-ikutema' a muni noi ei' seri' a, bera ko no o eim dua si, ara tu'u o leo naraka dale' muu. 46 [Naraka nana mamana doidoso. Ai-pila na ta maten, ma ule' fo rai na boe tao maboo puru' la'o naroo.]^l 47 Kalu o tao sala' muni' mata ma, sona edo henin. Malole lena' o maso' nusatetu-ikutema' a muni noi mata' seri' a, bera ko no o matam dua si, ara tu'u o leo naraka dale' muu.^m

49 Tebe Au nanori-nafada Ka bera' a. De bea nau tuka Au, sona ana muste nanenete tuka nahere, sama leo' lahenda mamasi paa' fo nunuu ni neu' ai-pila' a, ela paa' ria boso tadalun.

50 Masi' a, malole. Ita paken fo tao na nanaa' a mina-malada. Tehuu kalu masi' a mamin sona sosoa-raraan ubea'? Tapa henin leo. Emi boe muste dadi sama leo' masi', ela emi mo basa lahenda ra masue-malai ao.

Emi hahae malelena ao' a mae, bea bau-ina', ma bea aana'!”^o