Mateos 10

Ramatua Yesus teka-here ana mana tuka dean sanahulu dua

Boe ma Yesus naloo na ana mana tuka dea nara fo rabua ao nara. Ana fee si kuasa fo usi nitu, ma puli ra lahenda reme hedis rupa' ara. 2 Ana mana tuka dea kasanahulu dua' fo Ana nadenu si a, nade nara si':

Masososa' a, nade Simon (biasa lahenda raloon rae, ‘Petrus’),

ma fadi na, nade Anderias,

Yakobis,

ma fadi na, nade Yohanis (sira dua, nana Sabadeus ana nara).

3 Filipus,

ma Bertolomeos.

Tomas,

ma Mateos (mana susu doi-bea).

Yakobis (Alpius ana na),

ma Tadius.

4 Simon (fo tuka partei Selot),^a

ma Yudas Iskariot (fo ri' neu' ko se'o heni Yesus).

Ramatua Yesus nadenu ana mana tuka dea nara

(Markus 6:7-13; Lukas 9:1-6)

5-6 Boe ma Yesus nadenu ana mana tuka dean sanahulu duas, ma Ana fee si pareta nae, “Au adenu emi leo ita lahenda Yahudi nara meu, nana huu ita lahendan dodou' ta tuka matetu' Manetualain eno-dalan. Sira sama leo' bibi-lopo manasala-manamopo'. Huu ria naa, emi boso' leo lahenda fo ta Yahudi, conto leo-leo' lahenda Samaria ra. 7 Meu mafada ita lahenda Israel nara mae, ‘Losa ledo-fain so, de basa lahenda Yahudi ra bisa dadi reu' Manetualain lahenda nara.’ 8 Meu puli ma lahenda kamahedis, fee lahenda mana mate' ara rasoda selu', puli ma lahenda kamahedis kusta, ma usi kalua nitu. Manetualain fee emi dodou', tehuu Ana ta hule fali' hata-hata esa boe'. De besa' ia emi muste meu ela fee dodou' soa-neu' lahenda feke', tehuu emi boso' hule fali' hata-hata esa neme sira mai. 9 Meu hihii'. Boso' meni doi-tali, 10 tua-lepa, kakao-papake lena', sopatu, do tete'e. Nana huu lahenda fo ri' sipo nanori-nafada neme mana noi ra mai, sira muste fee hata naraa soa-neu' mana noi ra ela bisa rasoda.^b

11 Kalu emi maso' kota esa, do koro' esa, sona emi saka lahenda fo ri' nau sipo' emi. Boe ma leo meu' naa, losa' emi foa ela mamana' ria. 12 Kalu emi maso' leo lahenda uman meu, sona mafada mae, ‘Soda-mole'! Manetualain fee ua-nale' soa-neu' emi.’ 13 Kalu lahenda rai uma ria sipo' emi no malole, emi hule fo Manetualain fee si ua-nale'. Tehuu kalu ara ta sipo' emi, Manetualain boe ta fee si ua-nale'. 14 Kalu lahenda ta nau ramanene neu' emi, sona kalua meme uma ria, do kota ria, ma sasapu heni afu a neme ei mara mai, ela dadi tanda nae, ara ta nau ramanene, de ara lepa aon natataa nara.^c 15 Kalu Manetualain fee huhuku' neu' lahenda nai dae-bafo' ia, neu' ko Ana fee huhuku' mabera neu' lahenda Sodom ma Gomora fo ri' fai a ulu na tadalu raan seli a. Tehuu mafarerene'. Huu fo Ana fee huhuku mabera lena bali soa-neu' lahenda fo ri' ta nau sipo' emi!”^d

Ramatua Yesus nafada ana mana tuka dea nara nae, neu' ko ara hapu doidoso

(Markus 13:9-13; Lukas 21:12-17)

16 “Mafarerene'. Huu fo Au adenu emi, sama leo' Au po'i bibi-lopo a leo busa fui ma'aa' a talada neu. Huu ria naa, emi muste pake dudu'a-aafi' sama leo' meke malela'. Ma emi dale ma muste roo-tetu', sama leo' manupui kalasi fo ta saka nalela' dedea laka'.^e 17 Tehuu besa-besa! Neu' ko lahenda ese-rumu emi sama leo' busa fui' a, aa namate bibi-lopo. Neu' ko ara hela roo emi leo mamana parisa dedea agama a meu. Ma neu' ko ara li'u-fepa emi nai sira uma mamaso Yahudi na. 18 Neu' ko ara hela roo emi meu mataa nai gubernor no mane' a, nana huu emi tuka Au. Tehuu emi muste pake lela' ria, fo tui-beka Au Tutui Malole Ka soa-neu' asa. No ria naa, lahenda fo ta ralela' Manetualain boe, ramanene la'e-neu' Au. 19 Tehuu kalu ara hela roo emi leo' naa, sona boso' bii' mae, ‘Neu' ko au dedea ae, leo' bea?’ Do, ‘Neu' ko au ataa ae, ubea'?’ Boso' dale mara doda', huu fo losa ledo-fai na, te neu' ko emi Amam nai nusatetu-ikutema' a nafada emi muste dedea mae leo' bea. 20 Hata fo emi dedean ta naoka-nasamu neme emi mai, huu fo Ria Dula-dale Malalao-malalafu Na nanori-nafada, ela emi bisa dedea mae leo' bea.^f

21 Emi mete, nai uma esa dale', kalu hapu lahenda namahere Au, neu' ko ria toranoo boki na saka eno' fo naisa ni. Kalu ina-ama ramahere, neu' ko sira ana boki na naisa si.^g 22 Meten te, neu' ko basa lahenda ete' ao nara ro emi, nana huu emi tuka Au. Tehuu lahenda fo nanenete losa' babasa na, neu' ko Manetualain po'i-tata naan.^h 23 Kalu lahenda ese-rumu emi nai kota esa, sona malai leo kota feke' meu. Tebe ria! Au ia, Lahenda Dae-bafo' Tetea'. Neu' ko emi bei ta la'o rule-feo mabasa kota nai Israel, tehuu Au atafali mai so.

24 Lahenda ra biasa fee hada-horomata neu' mesen esa, lena ria ana sakola nara. Ma lahenda fee hada-horomata neu' malaka esa, lena ria ata nara.ⁱ 25 Kalu ana sakola a nanori de malela na sama no ria mesen na, sona ana nameda naan dai so. Ma kalu ata a nanori, de malela na sama no ria malaka na, sona ana nameda naan dai so.

De mafarerene'! Kalu lahenda naloo manuu uma' a nae, ‘O nana Balsebul, fo ri' nitu ra malaka na!’ sona tantu ria uma isi nara boe hapu nade tadalu' lena bali.”^j

Boso' bii' lahenda dae-bafo', huu fo Manetualain nanea-nasala'e emi

(Lukas 12:2-7)

26 “De emi boso' bii lahenda fo soa' emi. Te hata fo lahenda tao nafufuni', neu' ko basa lahenda ra rita.^k 27 Hata fo Au anori-afadan noi neu' emi, neu' ko emi muste meu mafada basa lahenda ra. Ma hata fo Au afada oi aboboto' a, neu' ko emi muste meu mafada rule-feo nai basa mamana'. 28 Boso' bii' lahenda dae-bafo', huu fo sira raisa noi lahenda ao-ina na, tehuu ara ta raisa lahenda sumane na. Huu ria naa, emi muste bii' Manetualain, te noi Ria ri' nanuu kuasa fo tu'u lahenda ao-ina na no sumane na leo tasi ai-pila mana mate taa' a dale' neu. 29 De matetea dale mara. Lahenda se'o manupui karutu' nai pasar neni' beli' baiana'. Tehuu ta mate esa boe', kalu emi Papa ma nai nusatetu-ikutema' a ta nataa fa. 30 Emi Papa ma nai nusatetu-ikutema' a relu-natanae emi losa leo lulutu-rarae' a. Emi laka-doo mara dedesi na boe, Ana reke naa si. 31 De emi boso' bii-mamata'u! Huu fo Manetualain uku-sudi emi beli ma lena neme manupui karutu' sira mai.”

Boso' mae' manaku Ramatua Yesus

(Lukas 12:8-9)

32 Boe ma Yesus dedea bali nae, “Lahenda fo naparani manaku nae nalela' Au nai lahenda dodou' matan nai dae-bafo' ia, neu' ko Au boe manaku ae alela' ana nai Au Papa Ka matan, nai nusatetu-ikutema' a ae, ‘Ria nana Au lahenda Ki.’ 33 Tehuu lahenda fo nalena Au nai lahenda dodou' matan nae, ana ta nalela' Au, neu' ko Au boe afada Papa Ka nai nusatetu-ikutema' a ae, ‘Au ta alela' lahenda ia.’”^l

Ramatua Yesus mai tao na lahenda ra esa soa' esa, ta radame ao

(Lukas 12:51-53, 14:26-27)

34 “Emi boso' afi mae, Au mai uni mole-dame nai dae-bafo' ia. Au mai fo tao a lahenda dae-bafo' ara esa soa' esa. 35 Au mai nai dae-bafo' ia, tuka hata fo ri' Manetualain mana nesi mata nara dui' mema' rae,

‘Neu' ko ana tou' a soa' papa na,

ana ina' a soa' mama na,

ma manafeu ina' a soa' arina na,

36 huu fo uma isi' ara, esa musu no esa.’^m

37 De lahenda bea tebe-tebe nau tuka Au, ana muste sue Au lena neme basa-basan; lena neme ina-aman, ma lena neme ria ana nara. Kalu ta'a, sona lahenda ria ta naraa dadi Au lahenda Ki. 38 Lahenda bea nau tuka Au, tehuu ta nau lepa doidoso, ana ta naraa dadi Au lahenda Ki.ⁿ 39 Lahenda bea sadia mate nana huu ana tuka Au, neu' ko nasoda naroo no Manetualain. Tehuu lahenda bea nasoda soa noi ria ao-ina hehelin, neu' ko soda na sapu-lalo!”^o

Manetualain neu' ko balas lahenda nonoi-tataon

(Markus 9:41)

40 “Lahenda bea sipo' emi no malole, ria boe sipo' Au. Ma lahenda bea sipo' Au, ria boe sipo' Manetualain fo ri' nadenu Au.^p 41 Lahenda bea sipo' Manetualain mana nesi matan, huu fo sira dedea la'e-neu' Manetualain, neu' ko Manetualain balas ana sama leo' Manetualain balas mana nesi mata esa. Ma lahenda bea sipo' lahenda dale roo-tetu' esa, huu fo lahenda ria tuka matetu' Manetualain hihii-nanaun, neu' ko Manetualain balas ana sama leo' Manetualain balas lahenda dale roo-tetu' esa. 42 Lahenda bea sipo' lahenda aana' esa, huu fo ana tuka Au, tantu Manetualain balas ana. Leo mae lahenda fee noi oe hihii' galaas esa boe, tantu Manetualain ta nafarene heni ni.”