Ramatua Yesus puli na lahenda kamahedis kusta esa
8
Yesus onda neme lete' lain mai, boe ma lahenda dodou' ranononda reu tuka Ni. 2 Kekeneu te, lahenda kamahedis kusta esa mai nasare Naan. Ana sunda' undulaka na ma hule Yesus nae, “Ramatua'! Tulu-fali au dei! Kalu Ramatua' a nau, sona bisa mamopo au hedis ka, ela lahenda boso' rahia' au, fo au bisa hule-haradoi selu' nai uma mamaso Yahudi.”3 Yesus namanene leo' naa, boe ma loo' lima Na neu, de nafaroe lahenda kamahedis kusta ria, ma dedea nae, “Au nau! O te'e ma aom leo!” Kekeneu te, lahenda ria hedis na mopon tuti'. 4 Boe ma Yesus nafada ni nae, “Mafarerene'! O te'e ma aom so, tehuu ta bole mafada lahenda esa boe'. O muste tuka ba'i Musa atoran na dei. De leo malaka agama muu, fo ana parisa' ao-ina ma, ela ana bubulu' nae o hedis ma mopon matetu' so do, bei'. Boe ma o muste fee tutunu-hohotu' tanda makasi, ela basa lahenda bubulu' rae, o te'e matetu' so.”a
Ramatua Yesus puli na komendaan Roma esa ata na
5 Boe ma Yesus maso' leo koro' Kapernaum neu. Nai naa, komendaan Roma esa mai hule tutulu-fafali' nae, 6 “Papa! Au ata ki esa namahedi bera' nai uma. Ana ta bisa foa neme koi lain mai, huu fo ana doidoso naan seli.”
7 Yesus nataa nae, “Malole! Neu' ko Au uu fo puli aan.”
8 Tehuu komendaan ria nae, “Papa! Papa boso' masosota aom muu bali, huu fo au ta araa sipo' Papa nai au uma ka. Sadi Papa moi mafada' a meme ia' mai, tantu au ata ka te'e tuti' a. 9 Au bubulu' hihii-nanau' ia, nana huu au malaka kara ranuu kuasa pareta au. Ma au boe anuu kuasa pareta soldadu kara. Kalu au pareta ei-lima ki esa ae, ‘Leo ele' muu!’ tantu ana neu. Kalu au ae, ‘Leo ia' mai!’ tantu ana mai. Ma kalu au adenu ata ka ae, ‘Moi-tao ia!’ tantu ana tao leo naa'. De sadi Papa moi dedea' a, tantu au ata ki ria te'e na aon.”
10 Yesus namanene leo' naa, boe ma Ana heran. Ana dedea neu' lahenda kadodou' fo tuka Ni a nae, “Heran! Doo-naru basa ia, tehuu Au bei ta parnaa aneta oo lahenda Yahudi esa, namahere tebe-tebe sama leo' lahenda Roma ia! 11 Nenene! Neu' ko lahenda dea dodou' reme dulu ma reme muri mai sama leo' lahenda Roma ia, ara ratuu' raa feta sama-sama ro ba'i Abraham, ba'i Isak ma ba'i Yakob rai Manetualain uma na nai nusatetu-ikutema' a.b 12 Leo mae Manetualain teka-here lahenda Yahudi ra dadi reu' Ria lahendan, tehuu lahenda dodou' ta tao dale' neu' Ana. Neu' ko Ana tipa heni si leo mamana maiu-mahatu' a reu. Nai naa ara dola-ramatani ma doidoso raan seli.”c
13 Yesus dedea basa nae leo' naa, boe ma nafada komendaan ria nae, “Papa fali leo. Huu fo ata ria te'e na aon so, sama leo' papa namahere ma.” Naraa no oras ria boe, ata ria te'e na aon.
Ramatua Yesus puli na lahenda kamahedis dodou'
14 Lai' esa de, Yesus leo Petrus uma na neu. Ana nita Petrus arina na napeu' nai koi lain, huu fo ao na luumai. 15 Yesus tai na lima na, boe ma ina lasi' a ao luumai na mopon tuti' a. Boe ma ana foa de nalalau' Yesus asa.
16 Ledo a mulai tena, boe ma lahenda ra roo lahenda nitu heke nara mai. Yesus pareta nitu sira nae, “Nitu emin! Heo' meme lahenda ia ra mai!” Boe ma nitu sira kalua tuti' a. Ana puli na katema' lahenda kamahedis ara. 17 Ana tao basa ia ra, ela natetu na hata fo Manetualain mana nesi matan Yesaya dui' mema' nae,
“Ana puli na ita hedi-raun.
Ma Ana lepa-nasaa na ita doidoso na.”d
Lahenda fo nau tuka Ramatua Yesus muste tuka no matetu'
18 Yesus nita lahenda dodou' mai eo Raan. Boe ma Ana nafada ana mana tuka dea nara nae, “Mai hela laa fo leo dano seri' teu.”
19 Boe ma mesen agama esa mai dedea nae, “Papa mesen! Papa leo bea' muu, sona au tuka ahere Papa!”
20 Tehuu Yesus nataa ni nae, “Malole a boe! Tehuu mafarerene' leo ia'. Basa lahenda ma banda ara esa' ko nanuu' mamana leleon. Busa fui' a fali leo bolo na neu. Manupui' a fali leo runu na neu. Tehuu Au, Lahenda Dae-bafo' Tetea' ia, ta anuu uma fo fali leo naa' uu. Ainulu laka' boe ta'a.”
21 Boe ma lahenda mana tuka dea feken esa bali, mai hule nae, “Ramatua'! Au nau tuka Ramatua' a, tehuu leo' bea sona au fali fo urus ina-ama kara dei. Kalu mate au papa ka, besa' ko au tuka.”
22 Tehuu Yesus dedea nae, “Leo ia'! Neme' naa ela lahenda fo ta ramahere Manetualain, urus sira lahenda mana mate nara. Tehuu kalu o nau tuka Au, sona o muste tuka no matetu'!”
Ramatua Yesus tao na ani ina' a namate
23 Boe ma Yesus sama-sama no ana mana tuka dea nara ae leo ofa' lain. 24 Fai ria ara sa'e ofa' leo dano seri' reu a, Ana suku. Ta doo bea boe', te ani ina' a foa. Nafa ra rapepena, de oe a nala ofa' dale'. 25 Ana mana tuka dea nara rita leo' naa, boe ma ara fafae Ni rae, “Ramatua'! Ramatua'! Foa fo tulu-fali ami dei! Huu fo ita saka' bolo ria' so!”
26 Yesus nataa si nae, “Ubea' taon de emi bii'? Emi ta mamahere Au, do?” Boe ma Ana foa, de nahara neu' nafa-ani ria nae, “Mamate leo!” Boe ma nafa-ani tena tuti' a.
27 Yesus ana mana tuka dea nara heran, ma rae, “Awii! Lahenda ia nana bea ia? Tao leo' bea, de Ana bisa pareta nafa-ani fo tuka Ria hihii-nanaun?”
Ramatua Yesus puli na lahenda nitu heke' dua
28 Ta doo bea boe', te ara losa dano seri', nai lahenda Gadara rae nusa na. Nai naa lahenda nitu heke' dua, leo rahani' rates ara talada. Sira makaresi nara seli, losa' ta hapu lahenda esa naparani la'o nesi' naa boe'. Ara rita Yesus mai boe ma 29 raloo rae “Manetualain Anan! Ubea' taon de O mai maepo' ami? Leo mae bei ta losa ledo-fain fo huku ami, tehuu O nau mai ese-rumu ami.”
30 Ta doo' a neme naa' mai, bafi dodou' totofi saka nanaa'. 31 Nitu ra hule Yesus rae, “Kalu nau usi ami, sona madenu ami maso' leo bafi sira dale' meu!”
32 Yesus pareta si nae, “Meu leo!” Boe ma nitu ra kalua ela lahenda sira dua, de ara maso' leo bafi ra dale' reu. Bafi ra ralai ratotofa' tuka lete' a suu na, boe ma tuda rala dano dale', de mate basa si.