Manetualain natudu Ramatua Yesus marela-masa'a Na
17
Basa fai' nee, boe ma Yesus naloo naa Petrus, Yakobis no fadin Yohanis, fo ara sama-sama ae leo lete madema esa lain reu, de noi mesa' asa rai naa. 2 Losa lain, boe ma ara rita Yesus narupa feke. Mata-idun rahaa sama leo' ledo, ma kakao-papaken dadi fula makadila. 3 Kekeneu te, ara rita Ni dedea no ba'i Musa ma ba'i Elia. 4 Boe ma Petrus noi namakokoa' a losa' ana dedea nafarara'u nae, “Papa! Ami nai ia malole na seli! De malole lena' ami mafoa ma laa' telu. Esa fee Papa, esa fee ba'i Musa, ma esa bali fee ba'i Elia.”5 Petrus bei dedea nae leo' naa, kekeneu te, oa' a onda mai de napoti naa si. De ara heran ramanene haraoe' esa neme oa' ria mai nae, “Nenene! Yesus nana Au Ana susue Ka. Ana tao naa Au dale Ka namaho'o. Mamanene matalolole neu' Ana!”a
6 Ana mana tuka dea nara ramanene leo' naa, boe ma ara bii raan seli, losa' ara leku-bara reu. 7 Tehuu Yesus mai fafae si, ma nae, “Emi foa leo. Boso' bii'!” 8 Boe ma ara boti' laka nara, tehuu ara ta rita lahenda esa nai naa boe'. Noi Yesus mesa' ana.
9 Ara onda reme lete' lain mai, boe ma Yesus pada' asa nae, “Hata fo besa' ko emi mita ni a, boso' mafada esa boe! Au, Lahenda Dae-bafo' Tetea' ia, muste mate dei. Kalu Au asoda selu', besa' ko emi bole tui-beka lahenda.”
10 Boe ma ara ratane Ni rae, “Papa nana, tebe Kristus, tehuu ba'i Elia nai bea? Huu fo mesen agama sira ranori-rafada rae, ba'i Elia muste mai dei, besa' ko Kristus mai. Tehuu tuka Papa, sona leo' bea?”b
11 Yesus nataa nae, “Tebe. Ba'i Elia muste mai fo soi eno' soa-neu' Kristus dei. 12 Nenene matalolole! Ba'i Elia mai so, tehuu lahenda ta ralela' ana. Ara tao rasususa' ana, tuka sira hihii-nanaun. Leo' naa boe, neu' ko ara tao Au, Lahenda Dae-bafo' Tetea' ia.”c
13 Ara ramanene leo' naa, besa' ko bubulu' rae, ba'i Elia fo ri' Yesus nafada a, nana ri' Yohanis Mana Sarani'.
Ramatua Yesus puli na ana nitu heke' esa
14 Yesus asa fali, te lahenda dodou' rahani mema' asa so. Boe ma tou' esa mai sunda' undulaka na hule tutulu-fafali' neu' Ana 15 nae, “Ramatua'! Kasian neu' au ana ka dei! Huu fo ana hede-hede mesan, ma doidoso naan seli. Kalu hedis ria foa, sona ana tuda nala oe dale', do ai-pila' dale'. Ramatua', tulu-fali dei! 16 Au oo ni leo Ramatua' a ana mana tuka dea mara neu so, tehuu ara ta bisa puli ralan.”
17 Yesus namanene leo' naa, boe ma nasapaa ana mana tuka dea nara nae, “Emi talalu! Au anori-afada emi kose-kose, tehuu emi ta bubulu' matetu'. Ma emi ta mamahere tebe-tebe neu' Au! Au muste anenete oo emi losa fai hida' bali? Moo ana' ria leo ia' mai!”
18 Ara roo ana' a neu, de Ana usi heni nitu a neme ana' ria mai. Nitu a kalua ela ana' ria, boe ma te'e na aon tuti' a.
19 Fai fo Yesus no noi ana mana tuka dea nara mesa' asa, boe ma ara ratane Ni rae, “Papa! Ubea' taon, de bisinaa' a ami ta bisa usi mala nitu ria fa?”
20 Yesus nataa natafali asa nae, “Emi ta bisa usi nitu ria, nana huu emi ta mamahere tebe-tebe. Mafarerene'! Kalu emi mamahere tebe-tebe neu' Au, leo mae noi baiana' sama leo' ai deke ana' a boe,d emi bisa pareta lete' esa mae, ‘Lete', on! Marali ele' muu!’ Tantu ana narali. De emi bisa tao sudi ubea', sadi emi mamahere tebe-tebe neu' Ramatua' a.e 21 [Tehuu nenene! Nitu rupa leo ia' a mema' makaresi na seli. Kalu emi ta hule-haradoi ma puasa fo hule tutulu-fafali' neu' Manetualain, sona emi ta bisa usi mala nitu rupa leo naa'.”]f
Ramatua Yesus nafada kalai' dua na la'e-neu' Ria mamaten
(Markus 9:30-32; Lukas 9:43b-45)
22 Lai esa, de Yesus no ana mana tuka dea nara rabua rai propensi Galilea. Ana nafada si nae, “Ta doo' a so', te lahenda se'o heni Au. 23 Boe ma ara raisa Au, Lahenda Dae-bafo' Tetea' ia. Tebe Au mate, tehuu fai binesa na, te Au asoda selu'.”
Ana mana tuka dea nara ramanene Ni dedea nae leo' naa, boe ma dale nara susa raan seli.
Ramatua Yesus dedea la'e-neu' uma mamaso' a doi-bea na
24 Yesus no ana mana tuka dea nara leo koro Kapernaum reu, boe ma mana susu doi-bea ra mai ratane Petrus rae, “Emi Mesen ma bae Uma Mamaso Yahudi Ina a doi-bea na do, ta'a?”g
25 Petrus nataa nae, “Tantu bae!”
Petrus fali, boe ma Yesus nafada naulu' ana nae, “Simon! Soba o afi dei. Mane' ara rai dae-bafo' ia susu doi-bea neme bea mai? Neme sira ana nara, do neme lahenda feke' mai?”
26 Petrus nataa nae, “Neme lahenda feke' mai!”
Yesus nafada bali nae, “Kalu leo' naa, sona mane' a ana nara ta bae fa, hete? 27 Leo' naa boe neu' Uma Mamaso Yahudi Ina a bea na. Tehuu ita ta bole tao fee mana susu doi-bea ra ramanasa. De malole lena', o muu dolu ika' nai dano. O mala ika masososa' a, sona buka bafa na. Neu' ko o hapu doi lilo fula' esa nai naa. Pake doi' ria fo muu bae ita dua doi-bea na. Huu fo doi' ria dai soa-neu' ita dua.”h