2 Naraa la'e lahenda Yahudi ra fai huhule-haradoin, Yesus maso' leo uma mamaso' dale' neu nanori-nafada. Fai ria lahenda dodou reu hule-haradoi. Ara ramanene Yesus nanori-nafadan, boe ma ara heran, de rae, “Lahenda ia malela na seli! Ria boe nanuu kuasa! Tao leo' bea de Ana bisa leo' naa? 3 Sekonaa te Ria noi tukan ai. Ita talela' Ria maman, Maria; ma fadi nara si' Yakobis, Yoses, Yudas ma Simon. Ana nanuu feto' hida boe. Ita basa leo nai koro' esa!” Huu ria naa, ete' ao nara losa' ara ta nau ramanene Ni so'.

4 Boe ma Yesus nafada nae, “Mema' tebe! Lahenda fee hada-horomata neu' Manetualain mana nesi matan nai mamana feke'. Tehuu nai ria koro-tadun, lahenda ta fee hada-horomata neu' ana.”^a

5-6 Tehuu lahenda sira dale nara tea-mepe na seli, losa' ara ta ramahere Yesus. Huu ria naa Ana heran, de ta natudu kuasa Na nai naa so'. Ana puli na noi lahenda kamahedis esa-dua.

6 Boe ma Yesus la'o rule-feo koro manenea' sira fo nanori-nafada lahenda ra Manetualain hihii-nanaun. 7 Ana naloo na ana mana tuka dea kasanahulu dua nara, fo nadenu si la'o dua-dua, reu tui-beka Manetualain Tutui Malole Na. Ana fee si kuasa ela ara usi nitu. 8-9 Ana pareta si nae, “Emi boso' meni hata dodou' nai eno', huu fo neu' ko Manetualain ator. Boso' meni tua-lepa, doi-tali ma tas. Meni tete'e ma pake tabueis, ma badu bai esa'. 10 Kalu lahenda sipo' emi nai sira uma nara, sona emi muste leo meu' naa, losa' fai fo emi la'o. 11 Tehuu kalu losa mamana' esa, boe ma lahenda manai naa ra ta sipo', ma ta nau ramanene emi, sona la'o ela mamana' ria. Ma mafada si mae, ‘Emi ta nau mamanene fa, de emi lepa aom natataa mara!’”^b

12 Boe ma ara reu tui-beka Tutui Malole ria. Ara rafada basa lahenda ra muste saledale-tu'etei nara, fo ratafali rasoda tuka Manetualain hihii-nanaun. 13 Ara usi heni nitu ra boe. Ara tao mina neu' lahenda kamahedis ara laka nara, fo hule-haradoi fee si. De ara te'e tuti' a.^c

14 Tepo' ria, lahenda nai basa mamana ain ralela' Yesus. Tutui' la'e-neu' Ria kuasa Na, mane' Herodes namanenen boe. Lahenda rae, “Yohanis Mana Sarani' a, nasoda selu' nai Yesus ao-ina Na! Huu ria naa, Ana bisa tao tanda heran dodou'.”

15 Tehuu lahenda ruma rae, “Ta'a! Ia nana Elia nasoda selu' nai Ria ao-ina Na.” Ruma bali rae, “Ria nana Manetualain mana nesi mata feke' fai ulun esa rian.”^d

16 Tehuu mane' Herodes namanene ara dedea la'e-neu' Yesus, boe ma ana nataa nae, “Ria nana tantu Yohanis Mana Sarani' fo fai' naa ra au adenu tete heni laka na. Besa' ia ana nasoda selu' bali!”

17-18 Mane' Herodes nadenu leo' naa, nana huu ana nadedea no Yohanis. Tutui na leo ia': mane' Herodes, sao na fadin Filipus sao na, nade Herodias. Sekonaa te Filipus no Herodias bei ta ramaetu'. Huu ria naa, Yohanis nasa'ai nasarerei ni nae, “Papa mane' ta bole sao fadi ma sao na. Huu fo ria nalena-laka neu' ita hadas Yahudi na!” Tehuu Herodes sao na ina' ria. Boe ma ana nadenu lahenda reu hopu ra Yohanis fo teen leo bui dale' neu.^e

19 Huu no Yohanis nasa'ai nasarerei, de ina' ria napeda dale' nau naisa ni. Tehuu ta dadi fa, huu fo Herodes ena Yohanis nai bui dale'. 20 Boe ma ana nadenu soldadu ra ranea ratalolole Yohanis.

Mema' Herodes lele Yohanis. Ana bubulu' nae, Yohanis nana, Manetualain ri' feen mai. Ma ria nana lahenda roo-tetu'. Mema' Herodes nahii' namanene Yohanis dedea-nafadan. Tehuu lai'esa-lai'esa nai ria, dale na ta nahii' namanene Yohanis dedea-nafadan.

21 Boe ma mama Herodias hapu lela' fo balas ria dale hedi na. Fai' ria ara tao mane' Herodes fai boboki na. Ara raloo lahenda bau-ina' ara mai raa fai boboki'. Mana mai sira nana, mana pareta, soldadu ra malaka na ma lasi hadas Galilea. 22 Feta losa talada, boe ma mama Herodias ana feto na neu roke. Roroke na malole na seli, losa' tao na Herodes no fui nara ramaho'o. De Herodes naloo naan, natane ni nae, “O hule ubea' neme au mai, sona mafada leo! Neu' ko au fee. 23 Leo mae o hule au nusa pareta ka seri boe, au fee. Au soo-supa pake Manetualain nade Na.”

24 Ana feto' ria neu natane mama na nae, “Mama! Au hule papa ka hata malole ubea'?”

Mama na nataa nae, “Muu hule Yohanis laka na.”

25 Boe ma ana feto' ria neu nafada mane' a nae, “Papa! Au hule muni fee au Yohanis laka na, tao ni neu' dulang dale'. Besa' ia leo!”

26 Herodes namanene leo' naa, boe ma mopo aafi na tuti'. Tehuu ana ta bisa hela fali' ria sosoo-susupan, nana huu lahenda ra ramanene basa so. 27 De ana pareta komendaan esa neu tete na Yohanis laka na nai bui dale'. 28 Ara tete ra Yohanis laka na, boe ma taon neu' dulang esa dale', de renin leo ana feto' a neu. Ana sipo na dulang ria, boe ma o'o nenin feen leo mama na neu. 29 Yohanis ana mana tuka dea nara ramanene rae, tete reni Yohanis laka na, de ara reu o'o ra popora na, fo ratoin.

Yohanis mamate na, tutui na te'e ada' naa.

30 Fai' esa, boe ma ana mana tuka dea fo Yesus nadenu si a, basa si fali de rabua selu' ro Ni. Ara tui basa-basan fo sira taon, ma hata fo sira ranori-rafada neu' lahenda ra.

31 Tehuu tepo' ria, lahenda dodou-ina' reu-mai saka Yesus, losa' no ana mana tuka dea nara ta hapu lela' fo raa-rinu. Boe ma Yesus nafada ana mana tuka dea nara nae, “Mai ita teu saka mamana lino-nees fo hahae bai' dei.”

32 Boe ma basa si ae leo ofa' lain reu, de saka mamana' lino-nees doo' a neme koro' a mai.

33 Tehuu lahenda kakabaina' sira rita Yesus asa ofa na tuka-tuka dano a suu na. Boe ma ara kalua ela koro' a de la'o tuka mada' lain, ara losa raulu' Yesus asa. 34 Yesus bei onda neme ofa' lain mai, te nita lahenda dodou' rahani Ni. De Ana kasian neu' asa, nana huu sira basa ta bubulu' rae tao ao nara leo' bea so', sama leo' bibi-lopo a ta nanuu mana foo. Boe ma Ana nanori-nafada si Manetualain hihii-nanaun^f 35-36 neme' ledo hanan ria losa ledo leodae'. Ria ana mana tuka dea nara rafada Ni rae, “Papa! Malole lena' Papa madenu basa lahenda ia ra reu asa nanaa' nai koro manenea' ia ra. Huu fo ledo leodae' ia so, ma ta hapu nanaa' nai ia.”

37 Tehuu Yesus nataa nae, “Boso'! Emi ri' mahao si.”

Tehuu ara ratane ratafali' Yesus rae, “Kalu ami mahao lahenda kakabaina' ia ra, sona ami muste kalua doi' dodou'! Sama leo' tukan esa kadi na teu' esa!^g Ami hapu tao doi kakabaina' sira leo' bea?”

38 Yesus nataa nae, “Emi matatane dei, bate bea nanuu tua-lepa!”

Ara reu ratatane fali, boe ma rafada rae, “Hapu roti lima ma ika' boa' dua.”

39 Boe ma Yesus nadenu basa lahenda sira ratuu' rabubua ao nara reu' nau lain.

40 De ara ratuu' rabubua ao nara. Bubua' ruma lahenda natun esa, ma ruma lima hulu.

41 Yesus hai na roti kalima' ma ika boa kadua' sira. Ana nasare leo lalai neu fo hule makasi neu' Manetualain. Ana tetebi roti sira, boe ma loo leo ana mana tuka dea nara reu, fo babati fee basa lahenda sira. Ika boa kadua' sira boe babati si. 42 Basa si raa losa' rabete. 43 Raa basa, boe ma ana mana tuka dea ra rabubua ra nanaa lena' ara, henu lapaneu sanahulu dua.

44 Lahenda mana naa sira bate rifun lima. Ria noi tou nara. Bei ta reke' ina' ara ro ana nara.

45 Boe ma Yesus nadenu ana mana tuka dea nara sa'e ra ofa' fo raulu' leo koro Betsaida reu nai dano seri'. Tehuu Ana bei nahani' naa, ela nadenu fali' lahenda kakabaina' sira. 46 Basa si fali, boe ma Ana ae leo lete' esa lain neu hule-haradoi.

47-50 Nahatu, boe ma Yesus onda fali'. Ana nita ana mana tuka dea nara ofa na losa nai dano a talada so. Tehuu ara sefe sota raan seli, nana huu ani a neme mata mai. Dulu pila, boe ma Yesus neu tuka si. Tehuu Ana la'o nesi' oe lain. Ana saka' seli ofa' ria, boe ma ana mana tuka dea nara ritan, de ara kekes ara. De ratatane ao' rae, “Hata ubea' ia? Nitu, do ubea' ia?”

Tehuu Yesus dedea no si tuti' a nae, “Emi boso' bii'! Te Au ia!”

51 Yesus ae ofa' lain neu, boe ma ani a namate tuti' a. Ana mana tuka dea nara heran raan seli. 52 Ara besa' ko rita Yesus pake kuasa Na de nahao lahenda rifun lima lena'. Tehuu ara bei ta ralela' matetu' Ria kuasa Na, nana huu dale nara bei ta sipo'.

53 Fai fo ara losa dano a seri', boe ma ara nafu reu' kota Genesaret namo-sesee na. 54 Ara bei onda reme' ofa' lain mai, te lahenda dodou' rita si. De ara bobou' rae, “Yesus mai so!” 55-56 Ara ralai reu rafafada ao', boe ma lahenda ra rolo roo lahenda kamahedis ara mai.

Sadi ramanene rae, Yesus nai mamana' esa, sona ara rame-rame rolo roo lahenda kamahedis ara, fo rapeu' asa reu' moo loa'. Ara afi rae, “Sadi lahenda kamahedis ara oi la'e Yesus badu peda Na, tantu ara te'e.” Oi la'e leo' naa boe, ara te'e tuti'.