Ramatua Yesus puli na lahenda luku' esa
9
Yesus asa sa'e ra selu' ofa' a, fo leo dano seri' reu, losa Ria kota Na. 2 Nai naa lahenda rolo reni sira nonoo lukun leo Yesus neu. Yesus nita leo naa' boe ma Ana bubulu' nae, ara ramahere Ni bisa puli na sira nonoon ria. Boe ma Ana dedea neu' lahenda luku' ria nae, “Ana Ki on! Matetea dale ma dei! Huu fo Au sae-safe heni o sala-sikom.”3 Tehuu mesen agama Yahudi hida rai naa, ramanene Yesus dedean ria. Boe ma dale nara hanas a, de beidea rae, “Lahenda ia naparani lai'esa' dedea leo naa'! Noi Manetualain bisa fee ampon neu' lahenda sala-sikon. Tehuu lahenda ia dedea na, tao aon sama leo' ria nana Manetualain. Ana namumulu-namamae' Manetualain ria so!”
4 Tehuu Yesus bubulu' sira dale na. Boe ma Ana dedea nae, “Ubea' taon de emi afi mae, Au dedea amumulu-amamae'? 5 Muda na ri' ubea'? Kalu Au afada lahenda luku' ia ae, ‘O sala-sikom hapu ampon,’ do, Au ae, ‘Foa fo fali leo.’ 6 Kalu ana foa tuti' a, besa' ko emi mita buti mae, Au, Lahenda Dae-bafo' Tetea'. Huu fo Au anuu haak fee ampon neu' lahenda sala-sikon.”
Boe ma Yesus pareta lahenda luku' ria nae, “Foa leo! Hai ma tandu ma, fo fali leo!”
7 Lahenda luku' ria foa tuti' a, de ana fali neun. 8 Basa lahenda ra rita leo naa', boe ma ara heran. Ara io-oa Manetualain nade Na rae, “Manetualain marela-masa'a naan seli! Ana fee kuasa bau-ina leo ia' neu' lahenda dae-bafo' a.”
Ramatua Yesus naloo Mateos tuka Ni
9 Yesus la'o neme naa' mai, boe ma nita lahenda mana susu doi-bea esa, nai mamana sususu doi-bea. Ria nade, Mateos. Yesus lele'on nae, “Mai tuka Au!” Mateos namanene leo' naa, boe ma foa neu tuka tuti' Ana.
10 Mateos hule Yesus asa raa-rinu nai uma na. Ana hule nonoo mana susu doi-bea nara, ma fui feke' ara, fo mai raa-rinu sama-sama ro si.
11 Tehuu lahenda partei Farisi hida, ramumuu neu' Yesus ana mana tuka dea nara rae, “Ubea' taon, de emi mesen ma natuu' naa-ninu sama-sama noo lahenda masala-masiko' ara, leo-leo' mana susu doi-bea ra, ma sira tia-lai lahenda tadalu nara?”a
12 Tehuu Yesus nafada si nae, “Tebe lahenda kamahedis ara parluu doter. Tehuu lahenda soda' a ta parluu so'. 13 Malole lena' emi fali fo lees matalolole Manetualain Hara-dasin, fo ri' fai a ulu na Ana nadenu mana nesi matan Hosea dui' nae,
‘Au hihii-nanau Ki, ri',
Au lahenda kara rasue-ralai ao ma ratudu dale kasian ara.
Kalu ara ta tao leo naa', sona,
sira banda tutunu-hohotun fo ri' reni fee Au a,
ta nanuu sosoa-raraa'.’
Ria ri' Manetualain nafada. Huu ria naa, Au ta mai urus lahenda fo tao ao nara dadi' lahenda roo-tetu', tehuu Au mai urus lahenda masala-masiko' ara.”b
Lahenda ratane, ubea' taon de Ramatua Yesus ana mana tuka dea nara ta puasa
14 Boe ma Yohanis Mana Sarani' a ana mana tuka dea nara leo Yesus reu. Ara ratane rae, “Ami fo tuka Yohanis a, biasa puasa. Lahenda Farisi ra boe puasa. Tehuu ubea' taon, de Papa ana mana tuka dea mara raa-rinu raroo? Ara ta puasa ralela', do?”
15 Tehuu Yesus nataa si pake dedea nasasama' nae, “Leo ia': kalu feta kakabi', fui ra ta puasa, tehuu ara raa-rinu rabete. Kalu mana kabi tou' a bei nai naa, tantu ara raa-rinu. Tehuu kalu lai' esa nai ria lahenda feke' ara hopu roo mana kabi tou' a, boe ma tia-lai nara susa dei, fai' ria besa' ko ara puasa.
16 Lahenda ta hai na tema' bibia bebeu', fo tapa neu' badu paraa' a sai na. Huu fo kalu safe badu ria, tema' bebeu' mana tapa' a u'ulu. No ria naa badu paraa' a sii nambera.
17 Leo' naa boe, lahenda ta disi tua nasu beu' neu' hai paraa' dale'. Huu fo neu' ko hai' ria hean, boe ma tua nasu a nosi henin. De tua nasu beu' a muste disin neu' hai bebeu' dale', ela hai' a boso' hean ma tua nasu a ta nosi henin!”c [No ria naa, Yesus nanori si nae Ria nanori-nafadan, bebeu'. De boso' epo-seo' ana no nanori-nafada paraa'.]
Ramatua Yesus puli na ina' esa namahedi po'a daa, ma fee ana feto' esa nasoda selu'
18 Yesus bei dedea no Yohanis ana mana tuka dea nara, te malaka uma mamaso Yahudi esa mai naneta no Ni. Lahenda ria sunda' undulaka na neu' Yesus matan, ma hule nae, “Papa! Tulu-fali dei! Huu fo au ana feto ka besa' ko maten. Papa muu fua lima ma neu' ana, ela bisa nasoda selu'.”
19 Yesus namanene leo' naa, boe ma no ana mana tuka dea nara tuka tuti' lahenda ria.
20-21 Ina' esa tuka no si rai eno talada'. Ana namahedi po'a daa teu' sanahulu dua so, ta te'e fa. Ana afi nai dale na nae, “Sadi au bisa afaroe la'e Yesus badu Na, tantu au te'e a ao ki.” Huu ria naa, ana neu nafaroe Yesus badu peda Na.
22 Yesus nameda naan, boe ma Ana lipe aon fo mete ina' ria. Ana dedea nae, “Ana Ki on! Matetea dale ma. Huu fo o mamahere tebe-tebe neu' Au, de o te'e ma aom.” No besa' ria boe, ina' a te'e tuti'.
23 Yesus asa la'o raroo leo malaka uma mamaso Yahudi a, uma na reu. Losa naa boe ma Ana maso' leo uma dale' neu, ma nita mana mamina musik luumata-pinuidu', ma lahenda dodou' dola. 24 Tehuu Yesus nafada si nae, “Emi hahae dodola' a, fo fali leo! Huu fo ana' ia ta maten fa, ana suku ria.” Tehuu ara hi'a ma peko bafa nara ro Ni.
25 Basa lahenda sira kalua, boe ma Yesus maso' leo ana' ria kaman dale' neu, ma tai na lima na. Boe ma ana' ria nasoda selu'. 26 Lahenda ra rita leo' naa, boe ma ara mulai ratui' rule-feo sira nusa-namon la'e-neu' hata fo Yesus tao a.
Ramatua Yesus puli na lahenda poke' dua
27 Basa boe ma Yesus la'o naroo. Nai eno talada', lahenda poke' dua tutuka' Ana. Ara raloo bou-bou rae, “Mane' Daud tititi-nonosin! Kasian neu' ami dei!”
28 Yesus maso' uma dale' neu, boe ma lahenda poke kadua' sira mai. Ana natane si nae, “Emi mamahere tebe-tebe, Au anuu kuasa fo tao a emi bisa mita-dae?”
Ara rataa rae, “Papa boso' matane bali, huu fo ami mamahere tebe-tebe neu' Papa.”
29 Yesus namanene leo' naa, boe ma Ana nafaroe sira dua mata nara, ma dedea nae, “Kalu leo' naa, sona ela dadi tuka emi namahere ma!” 30 Yesus dedea basa leo' naa, boe ma ara rita-dae tuti' a. Yesus nafarerene' fee si nae, “Mafarerene'! Emi boso' mafada lahenda hata mana dadi' ia!”
31 Tehuu ara ta bisa ranenete, de ara la'o rule-feo nusa' ria fo tui-beka la'e-neu' Yesus nonoi-tataon.
Ramatua Yesus puli na lahenda pakanaa'
32 Lahenda poke kadua' sira kalua, boe ma lahenda roo lahenda feke' esa leo Yesus neu. Lahenda ria pakanaa' ta bisa dedea, huu fo nitu a heke naan. 33 Yesus nita leo' naa, boe ma Ana pareta nitu a kalua neme lahenda ria mai. Nitu a kalua boe ma lahenda ria dedea tuti' a. Basa lahenda fo rai naa, ara heran ma rae, “Ami lahenda Yahudi a bei ta parnaa mita leo ia' fa!”
34 Tehuu lahenda Farisi ra dale nara ta loa' a. Ara dedea rae, “Nitu ra malaka na ri' feen kuasa ela Ana bisa usi kalua nitu.”d
Ramatua Yesus kasian neu' lahenda kadodou' fo nita si a
35 Basa de Yesus la'o rule-feo kota ma koro' dodou', fo nanori-nafada nai uma mamaso Yahudi ra. Ana nanori-nafada lahenda la'e-neu' Manetualain Tutui Malole Na, ma tao leo' bea fo ara bisa dadi reu' Ria lahendan. Ana puli na basa hedis rupa' ara, ma lahenda luku-laka' ara boe.e 36 Yesus nita lahenda kadodou' sira, boe ma Ana kasian neu' asa, huu fo ara ta bubulu' rae tao leo bea'. Nana huu sira basa sama leo' bibi-lopo, ta ranuu mana foo.f 37 Boe ma Yesus dedea no ana mana tuka dea nara nae, “Lahenda kadodou' ia ra, sama leo' oka-tine a buna-boan. Leo mae buna-boan dodou', tehuu lahenda mana noi ta dai fo etu-oru buna-boa' sira, ma peda si reu' mamana pepeda-fufua'. 38 Huu ria naa, emi muste hule Manuu oka' a fo fee lahenda mana noi selu', ela ara rabubua ra Ria buna-boa nara.”g