2 Tepo' ria, Yohanis nai bui dale'. Ana namanene basa hata fo Yesus tao a, boe ma nadenu ana mana tuka dea nara reu ratane Yesus rae, 3 “Manetualain helu mema' neme ulu' mai nae, Ana fee Kristus mai fo po'i-tata naa ita lahenda Yahudi. Papa nana, ri' Kristus, do? Do, ami muste mahani lahenda feke' bali?” Boe ma ara reu ratane Yesus.

4 Yesus namanene leo' naa, boe ma nataa nae, “Emi mamanene, ma mita mata' so. De fali leo fo tui a'a Yohanis mae, basa-basan dadi tuka hata fo Manetualain mana nesi matan Yesaya dui' mema' nae:

6 De leo ia': meu mafada a'a Yohanis mae, neu' ko ana naua-nanale kalu namahere naroo Au. Huu fo neu' ko Manetualain fee ua-nale' neu' lahenda fo namahere naroo Au, ma ta keke-boi'!”

7 Yohanis ana mana tuka dea nara fali, boe ma Yesus dedea no lahenda kadodou-ina' sira la'e-neu' Yohanis nae, “Tepo' fo emi meu saka Yohanis nai mamana lino-nees a, emi afi mae meu mita lahenda dae-bafo' rupa-lole leo bea'? Emi bubulu' ria ta lahenda noe-na'u sama leo' mila' a, de ani a fuun sona liu' neu-mai! 8 Ria boe ta lahenda pake papake mabeli, huu fo lahenda rupa' leo naa' a leo-naparasa noi nai uma mane'! 9 De emi meu mita lahenda rupa leo bea' a nai naa? Ria nana Manetualain mana nesi matan. Tebe! Ria nana mana nesi mata nanuu kuasa bau-ina'. 10 Huu fo Manetualain Susura Makamoi Na mana dui' mema' la'e-neu' Yohanis nae,

11 Nenene matalolole! Nai dae-bafo' ia, ta hapu lahenda esa kahere' lena Yohanis boe'. Tehuu neu' ko lahenda dae-bafo' ara manaku rae Mesias nana sira Manen. Ma basa lahenda ra leo' naa boe, lahenda fo aana' naan seli a, Manetualain tao si reu' lahenda kahere' lena Yohanis. 12 Mulai neme Yohanis noi ria nonoi-tataon losa' besa' ia, lahenda dodou' dadi reu' Manetualain nuun. Tehuu nai lahenda sira talada, ruma afi sala. Ara makate raan seli losa' raseti lahenda feke' ara dadi reu' Manetualain lahendan. Tehuu lahenda fo ri' raseti si a, ara ta sipo' ma radedea laka neu' Manetualain lahendan sira. 13 Losa leo Yohanis Mana Sarani' a mamai na, ita lahenda Yahudi a bisa tuka ba'i Musa ma Manetualain mana nesi mata nara atoran.^c 14 De mamahere Au! Elia fo ri' Manetualain mana nesi matan nafada mema' a, ana natafali selu' mai, ri' Yohanis!^d 15 De bea nau bubulu', muste nenene natalolole!

16 Au nau fee dedea nasasama' ela emi malela' lahenda besa' ia ra, lahenda dae-bafo rupa ubea'. Huu fo sira sama leo' ana' fo ratuu' rai pasar. Ara raloo bou-bou ro sira tia-lai nara rae,

18 Emi sama leo' ana aana' ara de ta doa' fa. Tepo' fo Yohanis mai, ana nahii' puasa, ma ta ninu anggor. Tehuu lahenda rae, ‘Nitu heke'!’ 19 Besa' ia Au, Lahenda Dae-bafo' Tetea' mai so. Au ta puasa, ma inu anggor. Tehuu lahenda rae, ‘Lahenda dae-bafo' maoro'! Mana mafu'! Ana natia' no mana susu doi-bea ra! Partei esa no lahenda papake taa' ara! Ta dodoo aon!’ Nenene matalolole! Manetualain dudu'a-aafi tanden, nana nita' nai Ria lahenda nara masodan.”

20 Boe ma Ramatua Yesus mulai hara pila neu' lahenda fo leo rai koro' hida. Ana tao tanda heran dodou' nai naa, tehuu ara ta saledale-tu'etei nara, fo tuka Manetualain eno masoda roo-tetun. 21 Yesus nasa'ai si nae, “Emi lahenda Korasin, ma lahenda Betsaida! Besa-besa! Neu' ko emi soe! Au tao tanda heran rupa' nai emi mata-idum, tehuu emi ta nau mamahere Manetualain. Sekonaa te emi lahenda Yahudi fo manaku mae, malela' Manetualain. Tehuu uni' ko leo tanda heran fo ri' Au tao si rai emi koro-tadum, dadi naulu' nai kota Tirus ma kota Sidon, tantu doo-naru basa ia lahenda fo rai naa saledale-tu'etei nara, ma tuka Manetualain. Ma sira boe tantu pake papake luumata-pinuidu', ma kari afu neu' laka nara dadi tanda nae, sira rasaledale no sala-siko nara. Sekonaa te lahenda Tirus ma lahenda Sidon, nana lahenda ta Yahudi fo manaku rae, ralela' Manetualain.^e 22 Tebe! Neu' ko emi dei mitan! Kalu Manetualain naetu' basa lahenda ra dedean, lahenda Tirus ma lahenda Sidon huhuku na bei kafa' a neme emi huhuku ma mai.

23 Lahenda Kapernaum emin! Besa-besa! Emi boso' afi mae, neu' ko Manetualain nahene-naae' emi leo nusatetu-ikutema' a meu. Ta'a! Neu' ko Manetualain tu'u emi leo naraka a meu! Uni' ko leo tanda heran fo ri' Au taon nai emi koro-tadum dadi naulu' nai kota Sodom, tantu Manetualain ta parluu tao nalulutu' kota tadalu' ria. Huu fo kalu lahenda Sodom ara rita tanda heran sira, tantu ara foa ela sira tadalu nara.^f 24 Tebe! Neu' ko emi dei mitan! Kalu Manetualain naetu' basa lahenda ra dedean, lahenda Sodom ara huhuku na bei kafa' a neme emi huhuku ma mai!”^g

25 Yesus dedea basa nae leo' naa, boe ma Ana hule-haradoi nae, “Papa! Papa ri' manuu haak pareta basa-basan nai lalai ma dae-ina' a. Au hule makasi dodou', nana huu Papa mafuni huhuku' neme lahenda fo tao ao nara malela', ma mana koao' ara. Tehuu Papa soi basa huhuku' sira reu' loan soa-neu' lahenda aana' ma lahenda dale balaroe-balanau' ara. 26 Tebe, Papa! Huu fo ria ri' tao na Papa dale Ma namaho'o!”

27 Yesus hule-haradoi basa leo' naa, boe ma nafada lahenda rai naa nae, “Nenene matalolole! Au Papa Ka nai nusatetu-ikutema' a fee Au kuasa a katema'. Noi Au Papa Ka ri' nalela' Au. Ma noi Au ia fo Papa Ana Na, ri' alela' matetu' Ana. Ma Au teka-here lahenda feke' ara fo afada si, ela sira boe ralela' matetu' Ana.^h

28 Basa manamela-manamaku' emin, mai tuka Au! Basa mana lepa bera-bau' emin, leo Au mai! 29 Kalu emi sipo' Au nanori-nafada Ki, fo la'o sama-sama mo Au, sona ita sama leo' sapi luku dua hela bela' luku esa. Huu fo Au, dale malole, ma Au dale balaroe-balanau'. Kalu emi tuka Au, sona emi dadi mapii-bara'ai' selu'.ⁱ 30 Huu fo Au nanori-nafada Ki, ta susa. Ma Au pareta Ka, ta bera' a.”