Ina-falu manato'a-manataa' a fee doi' kolete desi lena basan
21
Fai fo Yesus nanori-nafada nai Uma Mamaso Yahudi Ina a, Ana nita lahenda kamasu'i ara tu'u doi' kolete leo peti doi' dale' neu. 2 Ana nita ina-falu kasian esa, tuka mai hule-haradoi. Ana nakodi doi' sen dua leo peti ria dale' neu. Doi' sira beli nara baiana' naan seli. 3 Boe ma Yesus dedea no ana mana tuka dea nara nae, “Nenene matalolole! Ina-falu kasian ia nakodi noi doi' sen dua' a, tehuu ana fee desi lena basa lahenda ra. 4 Lahenda feke' ara rakodi doi' kolete neme sira doi' lena nara. Tehuu ina-falu ia, ana fee heni katema' doi' nara. Sekonaa te, ana nasoda neni' doi' sira.”Ramatua Yesus nafada la'e-neu' Uma Mamaso Yahudi Ina a hehea henin
5 Fai ria, Yesus ana mana tuka dea nara dedea io Uma Mamaso Yahudi Ina a rae, “Papa! Mete masudi Uma ia, malole na seli! Ara tao ni pake batu mana sapi' kaba'u-ina ra, ma ratutule' ra si tama rede-rede. Ma lahenda fee hata mabeli de paroong neu' Manetualain Uman ia!”
Tehuu Yesus nataa nae, 6 “Tebe uma ia malole a. Tehuu ta doo' a so', te lahenda rarerefa' heni batu ia ra katema', losa' natetu no dae a.”
Fai susa ma doidoso
7 Yesus ana mana tuka dea nara ratane rae, “Papa Mesen! Hata fo bisinaa' a Papa mafada a, neu' ko fai hida' dadi? Kalu ledo-fain nanenea', sona tanda nara leo bea'?”
8 Yesus nataa nae, “Sadi emi manea matalolole ela boso' lahenda tipu-dai rala' emi. Neu' ko lahenda rupa' ara mai fapa ara nara rae, ‘Au nana Kristus.’ Ruma bali rae, ‘Dae-bafo' a nonoe na nanenea' so!’ Tehuu boso' mamahere! 9 Kalu emi mamanene rae, lahenda ratati ao ma musu nai basa mamana' ain, sona boso' bii. Tebe basa sira muste dadi raulu'. Tehuu dae-bafo' a nonoe na bei ta losa.
10 Neu' ko leo esa natati soa' leo feke'. Nusa' esa natati soa' nusa feke'. 11 Neu' ko dae a natakeko naan seli. Fai laa-roes ina' a ma hedi-raus nai basa mamana' ain. Neu' ko lahenda rita hihii-nanau' fo ri' tao na ao nara maninis ma tanda heran bau-ina' rai lalai.
12 Basa hihii-nanau' ia ra bei ta dadi, tehuu neu' ko lahenda hopu ra emi ma ese-rumu emi, nana huu mamahere Au. Ma hela ro emi meu mataa nai malaka uma mamaso' fo urus emi ma ena emi nai bui dale'. Boe ma ara roo emi meu mataa nai mane' ara ma gubernor ara, nana huu emi tuka Au. 13 Tehuu emi muste pake lela' ria fo tui-beka fee si Au Tutui Malole Ka. 14 Boso dale mara doda' mae, emi masala'e tao ao-ina mara leo' bea. 15 Neu' ko Au fee emi dedea-nafada rolu-malela'. No ria naa, emi musu mara ta sefi emi dedea-nafadam.a 16-17 Neu' ko lahenda dodou' ete' ao nara ro emi, huu no emi tuka Au. Ruma reme emi kileo-boboki mara, leo-leo' ina-ama, a'a-fadi', toranoo' ara, ma tia-lai ra. Neu' ko neme sira mai ruma saka eno' fo se'o heni emi, losa' ara raisa emi ruma. 18 Tehuu emi boso' bii', huu fo Manetualain ta nafarene heni emi. Kalu ta Ria hihii-nanaun, sona laka-doo' esa boe ta bisa ono henin neme emi laka mara mai. 19 Kalu emi matea-mamepe dale mara la'o naroo, tantu Manetualain po'i-tata na emi.”
Yerusalem hehea heni na
20 Yesus dedea tamba nae, “Kalu emi mita musu a eo na kota Yerusalem, emi bubulu' ana saka' nalulutu'. 21 Lahenda Yudea ra mita leo' naa, sona malai lete' meu leo. Lahenda fo rai kota dale' boe malai leo. Ma lahenda fo rai koro' a boso' maso' leo kota dale' meu bali. 22 Manetualain fee fai susa-lela sira mai, ela huku lahenda fo ta ramanene Ni. Basa sira dadi natetu na hata fo Manetualain mana nesi mata nara dui' mema' ana neme ulu' mai.b 23 Tepo' ria te lahenda fo kasian naan seli a, nana si' ina kairus ara, ma ina anutu ra. Tepo' ria te katema' dae-bafo' a hapu susa, ma lahenda Yahudi ra basa si doidoso raan seli, nana huu Manetualain namanasa no si. 24 Neu' ko musu a naisa ruma, ma heke ro ruma, fo dadi ata nai basa mamana' ain nai dae-bafo' a. Lahenda mana mai fo ta ralela' Manetualain, mai momolo-tatabu rakekeo kota Yerusalem, ma ara pareta kota a oe-isin, losa' rabasa sira ledo-fain.”
Lahenda Dae-bafo' Tetea' mamai Na
25 Yesus nafada la'e-neu' natafali mai Na nae, “Kalu Lahenda Dae-bafo' Tetea' a saka' natafali mai, hapu tanda kalua nai ledo a, bula' a, ma nai ruu' ara. Nai dae-ina' a boe hapu tanda, ri' tasi' a nahoo ma nafa-ani lua dodopo. Basa ia ra tao ra lahenda bii ma roi ramakokoa' a losa' ara ta bubulu' rae tao ubea' so'.c 26 Basa kuasa rai lalai ratakeko liuaari. Lahenda ra rita leo' naa, boe ma ara bii raan seli, huu fo dae-ina' a saka' soe! 27 Basa ria, besa' ko lahenda rita Au, ‘Lahenda Dae-bafo' Tetea', onda mai oo oa' a’. Au onda oo basa kuasa ma Au marela-masa'a Ka.d 28 Kalu basa tanda ia ra mulai dadi, sona emi boti' laka mara leo, huu fo losa Manetualain ledo-fain fo po'i-tata na emi.”
Dedea nasasama' neme ai huu'
29 Boe ma Yesus tui dedea nasasama' esa nae, “Emi bebesa matalolole ai huu' ara. 30 Kalu doo nara mulai mofa, ria dadi tanda nae, fai hanas a nanenea'. 31 Leo' naa boe fai susa-lela sira. Kalu ara toda mai, ria dadi tanda nae, Manetualain pareta Na nanenea'.
32 Au afada mema'! Neme basa lahenda fo rasoda nai besa' ia, neu' ko ruma bei ta mate, te fai susa-lela sira toda mai so. 33 Leo mae lalai no dae-ina' a sapu-lalo, tehuu Au Hara-dasi Ki natea-namepe ma ta moi-mosa.”
Parluu manea nai Ramatua' a mamai Na
34 Boe ma Yesus dedea naroo nae, “Manea, huu fo kekeneu te Au toda mai! Boso' losa emi ta aafi no matetu', boe ma masoda nai nininu mafu' a dale', ma masaliu saka noi lole-napu dae-bafo'. Boso' losa emi ta bubulu' tanda na, huu no masapute urusan feke'. 35 Boso aafi mae ta la'e emi, huu fo Au mamai Ka noi nakeke' a. Kalu Au atafali mai, ta hapu lahenda esa bisa nafuni nala ao na neme Au mata Ka mai boe'. 36 De manea la'o naroo. Hule-haradoi boso' namaetun, ela emi bisa manenete nai basa susa sira talada. No ria naa, kalu Au atafali mai, emi ta mae' mapadei nai Lahenda Dae-bafo' Tetea' mata Na.”