Ramatua Yesus puli na lahenda, la'e fai huhule-haradoi'
14
Lai' esa de, la'e fai huhule-haradoi', lahenda agama Farisi lahenda nara malaka ni esa hule Yesus fo neu naa-ninu nai uma na. Ana naa-ninu, tehuu lahenda mama'u Ni, fo nau ritan tao ubea' la'e fai huhule-haradoi'. 2 Fai ria, lahenda kamahedis peta ao' esa natuu' nai naa. 3 Boe ma Yesus natane lahenda malela atoran agama Yahudi ma lahenda Farisi fo ri' raa-rinu rai naa nae, “Tuka ba'i Musa atoran, bole puli lahenda kamahedis la'e fai huhule-haradoi', do ta'a?”4 Tehuu ta hapu esa hu'a bafa na boe'. Boe ma Yesus oi la'e lahenda kamahedis ria, de ana te'e na aon tuti'. Yesus nadenu ni fali neun. 5 oe ma Yesus natane si bali nae, “Kalu ana' esa tuda nala oe dodolu' dale', la'e fai huhule-haradoi', emi hela ni leo dea' mai, do ta'a? Kalu sapi a tuda nala oe dodolu' dale', emi mataa' ana, do hela ni leo dea' mai? Tantu emi hela ni dea' mai. Ria sosoa na nae, emi moi nonoi', hete!”a
6 Ramanene Yesus dedea nae leo' naa, tehuu ta hapu lahenda esa sisipo' Ana boe'.
Boso' saka hada-horomata
7 Fai ria, Yesus nita lahenda fo ri' mai raa feta nai uma ria a, kadodou na here mamana' nai mata fo ratuu'. Ana nita ria, boe ma dedea nae, 8 “Besa-besa! Kalu lahenda raloo emi leo feta kakabi' meu, sona boso' saka lahenda bau-ina ara mamana nara. Huu fo boso' losa mana tao feta a naloo lahenda penting. 9 Kalu leo' naa, sona neu' ko mana tao feta a mai nafada o nae, ‘Boso' mamanasa'! Papa marali musi' dea' ele, huu fo au sadia kadera ia ra fee lahenda bau-ina' a.’ Boe ma o foa ela kadera ria de muu matuu nai dea', tehuu o mae' so. 10 De kalu o hapu naloo' de muu, sona matuu' nai kadera manai dea ra. Neu' ko mana tao feta a nita o, boe ma ana mai nae, ‘Papa! Mai' ia matuu'.’ No ria naa emi hapu hada-horomata nai basa fui ra matan.b 11 Huu fo lahenda bea natutua-nadedema aon, neu' ko Manetualain naloe-nadaen. Tehuu lahenda bea naloe-nadae aon, neu' ko Manetualain natutua-nadedeman.”c
12 Boe ma Yesus dedea no manuu uma' a nae, “Lai' esa selu', kalu papa tao feta, boso' maloo noi kileo-boboki mara ro tia-laim lahenda kamasu'i ara! Huu fo tantu sira bisa raloo ratafali' papa. 13 Tehuu kalu papa tao feta, sona maloo lahenda manato'a-manataa' ara, ei hela' ara, lahenda luku', ma poke' ara. 14 Tantu ara ta bisa balas papa. Tehuu kalu papa maloo si, sona Manetualain ri' balas. Kalu Ana fee lahenda kamahere' fo mate si a, ara rasoda selu', neu' ko Ana ta nafarene heni papa malole ma.”
Dedea nasasama' la'e-neu' feta bau-ina'
15 Lahenda fo natuu' no Yesus mei esa a namanene leo' naa, boe ma ana dedea nae, “Maua-manale' neu' lahenda fo naa-ninu sama-sama nai Manetualain uma mane' Na!”
16 Yesus nataa ni nae, “Au tui dedea nasasama' leo ia': lahenda esa tao feta bau-ina', de naloo lahenda dodou'. 17 Fai fo feta ria mana sadia', boe ma ana nadenu ata na neu nafada lahenda fo ara hapu naloo' a nae, ‘Mai leo, te basan mana sadia' de saka' mulai ria' so,’ 18 Tehuu basa sira esa' ko nafada ria pupute-aain fo ela ara ta bisa mai. Esa nafada nae, ‘Au besa' ko asa a oka' esa, de au muste uu dama sudi ni dei. Boso' mamanasa'! Huu fo au ta bisa eti.’ 19 Feke' a bali nafada nae, ‘Au besa' ko asa a sapi luku pasang lima, au ae uu dama sudi si, de boso' mamanasa'!’ 20 Feke' a bali nae, ‘Au besa' ko sao, de ta bisa fa.’
21 Ata ria fali, boe ma tui malaka na. Malaka feta a namanene na ria, de namanasa naan seli. Boe ma ana pareta ata ria nae, ‘Kalu leo' naa, sona o malale kalua, leo basa eno lai' ia ra muu ma basa eno bafa lutu' nai kota ia, fo maloo muni lahenda manato'a-manataa' ara, ei hela' ara, poke' ara, ma luku' ara.’ 22 Ata ria namanene leo' naa, boe ma neu naloo lahenda sira. Ana fali, boe ma nafada malaka na nae, ‘Papa! Basa si mai so, tehuu mamana rou' bei dodou'.’
23 Malaka ria nae, ‘Kalu leo' naa, sona leo koro' fo rai kota dea', losa leo oka' ara dale' muu. Lele'o sudi bea a, moo si mai fo sadi ratuu rahenu mamana feta ia. 24 Mafarerene'! Lahenda fo tipa au naloo ka, ara ta raa rita au feta ka mina-maladan bai' boe'!’”
Dodoo-tatai matalolole, besa' ko tuka Ramatua Yesus
25 Boe ma Yesus asa la'o raroo leo Yerusalem reu, lahenda dodou' tuka Ni. Ana nasare na si, boe ma dedea nae, 26 “Lahenda fo tebe-tebe nau tuka Au, ana muste sue-lai Au lena neme basa-basan: lena neme ina-aman, sao-anan, a'a-fadin, ma ao-ina heheli na. Kalu ta'a, sona lahenda ria ta naraa dadi Au ana mana tuka dea Ki.d 27 Lahenda fo ta nau lepa doidoso nana huu tuka Au, ana ta naraa dadi Au lahenda Ki. Lahenda fo nau dadi Au lahenda Ki, leo mae lahenda raisa ni boe, ana lepa naroo doidoso ria.e
28 De kalu nau tuka Au, sona dodoo-tatai matalolole. Conto leo-leo' lahenda nafoa uma matatada'. Ana muste reke naulu' nae mai te uma ria nabasa doi' hida losa leo lulutu-rarae'. Boso losa doi' ta dai. 29 Kalu ta reke lutu', sona bate ana bei tao noi uma a fanderen a, te basa doi' ara so. Boe ma lahenda hi'a ramamae' ana 30 rae, ‘Emi mete masudi lahenda ria dei! Ana besa' ko tao fanderen, tehuu bei ta hata-hata esa boe', te basa doi' ara so.’
31 Conto feke' la'e-neu' natati ao'. Mane' fo nau natati ao, ana muste dodoo-tatai naulu' no ria nonoo nara. Kalu soldadu ni noi lahenda rifun sanahulu' a, bisa naseki musu-noon lahenda rifun dua hulu do, ta'a? 32 Ana dodoo-tatai basa, tehuu kalu ta naseki musu a, sona malole lena', fai fo musu a bei nai doo' a, ana fee mema' lahenda nadedenu' reu urus ela mole-dame. 33 Leo' naa boe lahenda fo nau tuka Au. Ana muste dodoo-tatai neu-mai nae, ana sadia foa ela basa-basan, do ta'a? Kalu ta'a, sona lahenda ria ta naraa dadi Au ana mana tuka dea Ki.”
Lahenda fo ta naraa tuka Ramatua Yesus, sama leo' masi' sosoa-raraa' taa'
34-35 Yesus nafada dedea nasasama' esa bali nae, “Tebe masi' a malole. Nanaa' a mina-malada oo masi' dei. Tehuu kalu masi' a mamin sona sosoa-raraan ubea'? Ta bisa pake ni so'. Tao ni neu' pupuk boe ta bisa, de tu'u henin. De emi muste dadi sama leo' masi', ela masue-malai ao mo basa lahenda. Bea nanuu ridoo', sona nenene natalolole!”