2 Tehuu Yesus nataa nae, “Tebe, Uma ia malole a! Tehuu ta doo' a so', te rarerefa' heni katema' batu ia ra.”

3 Yesus asa leo lete Saitun a reu, ratuu' rai mamana' fo rasare leo Uma Mamaso Yahudi Ina a reu. Boe ma ana mana tuka dean haa mai dedea ro noi mesa' Ana. Si' Petrus, Yakobis, Yohanis ma Anderias. 4 Ara ratane rae', “Papa! Soba Papa tui selu' bisinaa' a dedea ma. Tepo-lele' bea ri' ledo-fai sira mai? Ma tanda nara leo bea'?”

5 Yesus nataa nae, “Sadi emi manea matalolole! Ela boso' lahenda tipu-dai rala' emi. 6 Neu' ko lahenda rupa' ara mai fapa ara nara rae, ‘Au nana Kristus, lahenda fo ri' Manetualain helu mema' neme ulu' mai’. Ara tipu-dai lahenda dodou'. 7 Kalu emi mita lahenda ratati ao, do emi mamanene fifo' rae, natati ao' nai basa mamana' ain, sona emi boso' bii. Huu fo rupa' leo naa' a dadi raulu' dei, tehuu dae-bafo' a nonoe na bei ta losa. 8 Neu' ko leo esa natati soa' leo feke'. Nusa' esa natati soa' nusa feke'. Dae a natakeko nai basa mamana' ain. Fai laa-roes ina'! Basa ia ra dadi tanda, sama leo' ina' fo besa' ko mulai nameda hedi boboki'.

9 De emi muste manea matalolole! Neu' ko ara hopu roo emi leo mamana naetu dedea agama a meu. Ma ara popo'o emi nai uma mamaso' ara dale'. Ara heke roo emi leo mana homu kuasa ra meu, nana huu emi tuka Au. Tehuu no ria naa emi hapu lela' fo mafada si la'e-neu' Au. 10 Manetualain lahenda nara muste reu tui-beka raulu' Au Tutui Malole Ka neu' basa leo nai dae-bafo' ia, besa' ko dae-bafo' a nonoe na losa. 11 Mafarerene'! Kalu ara heke ro emi leo mamana naetu dedea' a meu, emi boso' bii' mae, ‘Neu' ko au dedea ae leo' bea? Do au ataa ae, leo' bea?’ Kalu ledo-fai leo naa' a losa, emi dedea tuka hata fo Manetualain Dula-dale Malalao-malalafu Na nafada emi a.^a

12 Nai uma esa dale', kalu hapu lahenda namahere Au, neu' ko toranoo boki na boe saka eno' fo naisa ni. Kalu ana' a namahere, neu' ko papa boki na ri' naisa ni. Ma kalu ina-ama ramahere Au, neu' ko ana nara raisa si. 13 De neu' ko lahenda ete' ao nara ro emi, nana huu emi mamahere Au. Tehuu bea ri' nanenete losa' babasa na, tantu Manetualain po'i-tata naan.”^b

14 Yesus dedea naroo nae, “Lahenda makaresi' esa neu' ko mai. Ana maso' neu napadei nai mamana luli' nai Manetualain Uma Mamaso Yahudi Ina Na, fo ta naraa soa-neu' ana, losa' tao nakekeo-nakakanu mamana' ria. Huu ria naa, Manetualain foa ela mamana' ria. Kalu emi mita leo naa', sona besa-besa! (Bea ri' lees ia, boe muste besa-besa!) Ria dadi tanda nae, fai susa-lela a losa nai lelesu bafa' a so. Kalu lahenda rai propensi Yudea rita leo' naa, sona ara ralai lete' reu leo.^c 15 Ma muste ralai ina' a, ela boso' hapu soe. Kalu bea kalua ela uma a, sona boso' fali neu hai hata-nuun nai uma bali. 16 Lahenda fo nai oka-tine, boso' fali hai lafa hanas bali. Nalai naroo leo!^d 17 Kasian naan seli a, nana ina kairus ara, ma ina anutu ra. Huu fo ara ta ralai rala. 18 De malole lena' emi hule-haradoi ela hihii-nanau' tadalu' ria boso' dadi la'e fai uda. 19 Huu fo fai ria susa na bau na seli! Mulai neme Manetualain adu dae-bafo' a losa' besa' ia, lahenda bei ta parnaa nita susa bau-ina' rupa leo naa'. Ma neu' ko lahenda ta nita selu' susa rupa leo naa' a.^e 20 Kalu Manetualain ta tao eetu fai ria, neu' ko ta hapu lahenda esa bisa nasoda boe'. Tehuu no Manetualain sue-lai Ria lahenda teteka-hehere nara, de Ana tao eetu fai susa sira.

21 Kalu fai sira losa, sona emi mamanene lahenda rae, ‘Mita'! Kristus nai ia!’ Ma lahenda feke' rae, ‘Kristus nai ele!’ Tehuu emi boso' mamanene! 22 Neu' ko lahenda kalua mai fapa ara na nae, ‘Au nana Kristus!’ Feke' bali nae, ‘Au nana Manetualain mana nesi matan.’ Neu' ko ara tao tanda heran rupa' ara pake nitu a kuasa na, fo rapuputa' lahenda. Ara tipu-dai Manetualain lahenda nara! 23 Tehuu emi muste manea matalolole! Fai susa sira bei ta losa, tehuu Au afarerene' mema' fee emi!”

24 Yesus nafada selu' ana mana tuka dea nara nae, “Kalu basa fai susa-lela sira,

26 Besa' ko basa lahenda rita Au, Lahenda Dae-bafo' Tetea' ia. Neu' ko Au onda oo oa' a eme lalai mai. Ma basa lahenda ra rita Au kuasa Ka, ma Au marela-masa'ak katema'!^h 27 Boe ma Au pareta Manetualain eila'o-limalopen rai nusatetu-ikutema' a, reu rabubua ra basa Au lahenda teteka-hehere kara reme dae-bafo' a bukun haas, neme dulu losa muri; ma neme ii losa ona.”

28 Yesus tuti naroo dedea na nae, “Au hai dedea nasasama' neme ai huu' a mai. Kalu doo nara mulai mofa, ria tanda na nae, fai hanas a nanenea'.

29 Leo' naa boe, kalu emi mita fai susa-lela sira mai, sama leo' bisinaa' a Au afada a, ria dadi tanda nae, Au mamai Ka nanenea'. 30 Besa' ia, nenene matalolole! Neme basa lahenda fo rasoda nai besa' ia, neu' ko ruma bei ta mate, te fai susa-lela sira mai so. 31 Leo mae lalai no dae-ina' ia sapu-lalo, tehuu Au dedea-nafada Ki natea-namepe ma ta moi-mosa.”

32 Yesus dedea tamba nae, “Ta hapu lahenda esa bubulu' fai' bea ma li'u hida fo Au atafali selu' mai. Manetualain eila'o-limalope nara rai nusatetu-ikutema' a boe, ta bubulu'. Au boe ta bubulu'. Noi Au Papa Ka ri' bubulu'.ⁱ 33 Huu ria naa, emi muste manea matalolole, nana huu emi ta bubulu' ria ledo-fain.

34 Ta doo' a so' te Au foa ela emi, tehuu neu' ko Au atafali selu' mai. Sama leo' manuu uma' fo la'o ela uma na leo mamana' doo' neu. Ana nadenu ata nara urus ratalolole uma ria. Ma ana bati fee si esa' ko no' ria nonoi-tataon. Ana pareta manea lelesu bafa' a ranea ratalolole, losa' ana fali main.^j 35 Emi boe muste manea hatu-leledon, huu fo emi ta bubulu' manuu uma' a fai hida' fali main. Fali ledo leo dae', hatu', ledo hana', do balahaa ana'. Emi ta bubulu' fai hida'. 36 Boso' losa kekeneu te ana mai, hapu na emi suku mamanee.

37 De hata fo Au afadan neu' emi ia, Au boe afada basa lahenda feke' ara ae, ‘Emi muste manea matalolole fo sipo' Au mamai Ka.’”

[Ramatua Yesus dedea no ana mana tuka dea nara nai lete Saitun lain a, te'e ada' ria.]