Tutui Masososa'
Mulai neme Manetualain adu lalai ma dae-ina' a
Manetualain adu lalai, dae-ina' a no basa oe-isin
1
Masososa na, Manetualain adu lalai ma dae-ina' a.2 Tepo' ria, dae-ina' a bei ta dadi. Basan bei taohiro-taohari. Bei noi oe, ma maiu-ina' napoti naan. Manetualain Dula-dale Na laa-laa nai oe lain.a
3 Manetualain dedea nae, “Makaledo' muste dadi.” Dedea basa nae leo' naa, boe ma makaledo' a dadi. 4 Ana nita makaledo' ria, dale Na namaho'o, nana huu hata fo Ana adu a, tebe malole. Boe ma Ana tada makaledo' ria neme' maiu' a mai, de esa' ko no' ledo-fain. 5 Ana fee makaledo' a, nade ‘leledo'’, ma maiu' a nade ‘hatu'’. Manetualain adu ia ra nai fai masososa'.
6-7 Manetualain dedea bali nae, “Oe nai tada' lai ma oe nai tada' dae, nai sira talada muste rou'. Huu ria naa, basa sira dadi leo naa'.” Dedea basa leo' naa, boe ma oe a tada batin neu' dua. 8 Ana fee mamana rou' nai talada a, nade ‘lalai’. Manetualain adu ia ra nai fai kadua.
9 Manetualain dedea bali nae, “Oe nai tada' dae, muste nabua neu' mamana' esa, ela hapu dae tuu'.” Dedea basa nae leo' naa, boe ma dae tuu' a dadi. 10 Ana fee dae tuu' a, nade ‘mada' lain’ ma oe fo ri' nabua neu' esa, Ana feen nade ‘tasi'’. Ana nita basa sira, boe ma dale Na namaho'o, nana huu hata fo Ana adu a, tebe malole. 11 Manetualain dedea bali nae, “Mada' lain muste namomori' basa huu mana rerebi' ma doo mana sesepe' ara. Muste ai huu maboa', madeke' ma doo mana momodo'. Ela leo' bea na, huu mana rerebi' ma doo mana sesepe' ara esa' ko neni' buna-boan tuka ria rupa na.” Dedea basa leo' naa, boe ma basan dadi. 12 Nai mada' lain huu mana rerebi' ma doo mana sesepe' ara kalua buna-boa nara tuka sira esa' ko rupan. Ana nita basa sira, boe ma dale Na namaho'o, nana huu hata fo Ana adu a, tebe malole. 13 Manetualain adu ia ra nai fai katelu.
14-15 Manetualain dedea bali nae, “Nai tada' lai muste hapu hata makaledo rupa' ara, ela dae-ina' a makaledo'. Muste ruma rahaa nai fai leledo', ma feke' ara rahaa nai fai hatu'. Basa sira dadi ela bisa reke fai, teu' ma ledo-fai.” Dedea basa nae leo' naa, boe ma basa hata makaledo' ara dadi. 16 Ana adu hata makaledo bau-ina' rupa' dua. Hata bau-ina' a, nahaa nai leledo'; ma maraa' a nahaa nai hatu'. Ana adu ruu' ara boe. 17 Ana ator hata sira rai lalai fo rahaa leo dae-ina' a mai. 18 De ara rahaa nai leledo' ma rahaa nai hatu'. No ria naa, ara tada bati makaledo' a neme maiu' a. Ana nita basa sira, boe ma dale Na namaho'o, nana huu hata fo Ana adu a, tebe malole. 19 Manetualain adu ia ra nai fai kahaa.
20 Manetualain dedea bali nae, “Muste banda rupa' dodou' rasoda rai oe dale'. Ma muste manupui rupa' laa-laa rai lalai.” 21 Ana adu na ika rupa' ma banda bau-ina' rasoda rai oe dale'. Ana adu manupui rupa' laa-laa rai lalai. Ana nita basa sira, boe ma dale Na namaho'o, nana huu hata fo Ana adu a, tebe malole. 22 Boe ma Ana dedea fee basa banda ra ua-nale' nae, “Basa banda rai oe dale' muste ramefu. Ma manupui' ara boe muste ramefu.” 23 Manetualain adu ia ra nai fai kalima.
24-25 Manetualain dedea bali nae, “Muste banda rupa' rasoda rai mada' lain. Si' banda ae', banda fui' ma banda manalodo-manarae', esa' ko no' rupan.” Dedea basa nae leo' naa, boe ma basa banda-manu' ara dadi. Ana nita basa sira, boe ma dale Na namaho'o, nana huu hata fo Ana adu a, tebe malole.
26 Manetualain dedea bali nae, “Mai Ita adu lahenda tuka Ita eilali-limalopen. Ela ara urus ma ator basa ika' rai tasi' a, basa manupui' rai lalai, basa banda ae' ma basa banda fui' fo ri' rasoda rai dae-ina' a.”b
27 Ana adu lahenda dae-bafo' tuka Ria eilali-limalopen. Ana adu tou' ma ina'. 28 Ana dedea fee si ua-nale' nae, “Emi muste boki mamefu mahenu dae-bafo' ia, ma ator ana. Au fee emi haak urus ika' ara, manupui' ara ma basa banda rai mada' lain. 29 Nenene matalolole! Au bati-pala fee emi nanaa-nininu rupa' nai dae-bafo' ia. Si': huu mana rerebi' ma doo mana sesepe' maboa', madeke' ma doo mana momodo'. 30 Au boe fee basa huu mana rerebi' ma doo mana sesepe' rupa', ela dadi banda rupa' ara nanaan. Nanaa' soa-neu' banda ae', banda fui', manalodo-manarae' ma manupui' ara.” Dedea basa leo' naa, boe ma nanaa' rupa' ara dadi. 31 Ana nita basa sira boe ma, dale Na namaho'o, nana huu hata fo Ana adu a, tebe malole na seli. Manetualain adu ia ra nai fai kanee.