Manea ao mara fo boso' tuka lahenda Farisi ra masarole-masaralin
12
Fai ria, lahenda rifun hida mai nau nenene neu' Yesus. Ara la'o raseseti ao rarurupu ra Yesus. Ana dedea naulu' no ana mana tuka dea nara nae, “Manea ao mara fo boso' tuka lahenda Farisi ra masarole-masaralin.a 2 Ara tao ao nara dadi' malole, tehuu neu' ko sira masarole-masaralin ria nana nita'. Huu fo besa' ia hata nafuni' a neu' ko nana nita'.b 3 Hata fo ri' besa' ia emi dedea mafufuni', neu' ko lahenda ramanenen neu' loa na. Hata fo ri' emi maboboto' nai kama dale', neu' ko lahenda dedea rambera ni nai lahenda dodou' matan.”Lahenda dae-bafo' a beli na nai Manetualain matan
4 Yesus dedea tamba nae, “Ana kara emin! Boso' bii kalu lahenda raisa emi. Huu fo ara raisa noi emi ao-paa mara, tehuu ta raisa emi sumane mara. 5 Au afada ae, emi muste bii-mamata'u neu' bea. Emi muste bii-mamata'u neu' Manetualain. Huu fo Ana bisa naisa emi, basa te tu'u emi leo naraka dale' meu. De Ria ri' emi muste bii-mamata'u Ni.
6 Emi dodoo masudi, manupui karutu' a beli na bau bea? Beli' baiana' a, hete?! Manupui' lima sona sen dua, hete? Leo mae leo' naa, tehuu Manetualain ta nafarene heni esa boe'. 7 Leo' naa boe Manetualain tao dale' neu' emi. Ana reke na emi laka-doo mara dedesi na. De emi boso' bii-mamata'u, huu fo tuka Manetualain sona emi beli mara lena manupui karutu' kakabaina' sira.”
Boso' mae' manaku Ramatua Yesus
8 Yesus dedea selu' no ana mana tuka dea nara nae, “Nenene matalolole! Kalu lahenda ta mae' manaku Au nai lahenda dodou matan nai dae-bafo' ia, neu' ko Au boe ta mae' manaku ria nai Manetualain eila'o-limalopen nai nusatetu-ikutema' a ae, ria nana Au lahenda Ki. 9 Tehuu kalu lahenda dedea nai lahenda dae-bafo' a mata na nae, ana ta nalela' Au, neu' ko Au boe dedea nai Manetualain eila'o-limalope na matan nai nusatetu-ikutema' a ae, Au ta alela' ana.
10 Au, Lahenda Dae-bafo' Tetea'. Kalu lahenda namumulu-namamae' Au, sona Manetualain bei sadia fee ni ampon. Tehuu kalu ana namumulu-namamae' Manetualain Dula-dale Malalao-malalafu Na, Manetualain ta fee ni ampon.c
11 Kalu lahenda kolaa' emi leo mamana parisa dedea agama, do leo mana pareta ra meu, huu no emi mamahere Au, emi boso' bii' mae masala'e tao ao-ina mara leo' bea. 12 Huu fo neu' ko fai ria te, Manetualain Dula-dale Malalao-malalafu Na nanori-nafada emi dedea-nafada matetu-maraa', fo emi bisa mataa si.”d
Lahenda kamasu'i pakanaa' a tutui na
13 Boe ma lahenda kadodou-ina' sira esa natane Yesus nae, “Papa Mesen! Mafada au a'a ka babati ami papa ma posaka nara no au dei.”
14 Tehuu Yesus nataa ni nae, “Bea ri' so'u na Au dadi Mana Ee Dedea' fo aetu' emi dua dedea' rupa leo' naam?”
15 Boe ma Yesus dedea no lahenda kadodou-ina' sira nae, “Emi muste besa-besa ela boso' tendetuu. Huu fo hata-heto dodou' a ta neni tetu-tema'.”
16 Boe ma Ana tui dedea nasasama' esa nae, “Lahenda kamasu'i esa, oe-dae ni reni buna-boa' dodou-ina'. 17 Losa' uma pepeda-fufua nara henu-sofe', ma ta bubulu' tao leo bea' so'. 18 Boe ma ana naetu' naan nae, ‘Au saka' tao leo ia'! Au fate heni uma pepeda-fufua paraa' ara, fo afoa selu' kaba'u-ina, ela peda au oe-dae kara buna-boan ma basa hata-heto feke' ara reu' naa. 19 Kalu leo naa', neu' ko au dedea o ao-ina ka ae, ‘Uma pepeda-fufua' a henu' so! Nanaa' dai fo taa-tinu losa teu-too' ara!’ De mua-minu malada ma matuu matule' ei ma leo!’ 20 Tehuu Manetualain nafada ni nae, ‘Pakanaa' on! Hatun ia boe, o mate. Boe ma bea ri' hapu o uma pepeda-fufua ma oe-isi nara?’
21 De leo ia'! Lahenda bisa rabubua hata-heto dae-bafo' dodou' soa-neu' ria ao-ina heheli na, tehuu tuka Manetualain, ria lahenda hata taa', huu fo ana doo' a neme Manetualain mai.”
Mamahere noi Manetualain
22 Boe ma Yesus nanori-nafada ana mana tuka dea nara nae, “Emi boso' dale mara doda' la'e-neu' mia ubea', do pake ubea'. 23 Huu fo ita masodan ia, lena neme nanaa-nininu' ma kakao-papake'. 24 Mete maneni manupui kaa' ara! Ara ta sele-tande, ta etu-oru, ma ta ranuu uma pepeda nanaa', tehuu Manetualain naboi si. Kalu leo' naa, tantu Ana nahao emi boe. Huu fo Ana uku-sudi emi lena meme manupui' sira. 25 Kalu lahenda titiro aon nai tiro-ao, boe ma dale na doda', sona ana bisa namananaru teu-fain, do? Ta bisa fa! 26 De kalu emi dale mara doda' neu' hihii-nanau' aana' fo ta neni buna-boa' esa boe', ubea' taon de emi dale mara doda' neu' hihii-nanau' bau-ina' ara?
27 Mete maneni buna nura a. Ara ta tao oka-tine, ma ta heke-tenu boe'. Tehuu mane' Soleman kakao-papake madidila-mabebeben boe, ta bisa leo' buna' sira lole nara.e 28 Huu fo Manetualain naboi nau lutu' sosoa-raraa taa', ana nasoda noi fai' ia, ma balahaa' te mate ni, de lahenda ra hotu henin. Kalu leo' naa, sona Ria boe bisa naboi emi fo ri' beli mara lena neme nau a. Ubea' taon, de emi ta mamahena neu' Ana? 29 Leo' naa boe emi boso' masapute la'e-neu' nanaa-nininu'. Huu fo Manetualain ri' urus. 30 Lahenda fo ta namahena neu' Manetualain, ara sota raan seli fo urus basa hihii-nanau' sira. Tehuu emi boso' leo naa', huu fo emi Papa ma nai nusatetu-ikutema' a bubulu' basa-basan fo emi parluu. 31 Emi malala'o maulu' Manetualain nonoi-tataon, sona neu' ko Ana urus fee emi, basa hihii-nanau' ia ra.”
Peda hata-heto nai nusatetu-ikutema'
32 Yesus dedea naroo nae, “Emi sama leo' bibi-lopo, de bara'ai' ta'a. Tehuu boso' bii'! Huu fo emi Papa ma nai nusatetu-ikutema' a nana, Mane' Bau-ina'. Ana nanuu ubea', sona dale Na namaho'o bati fee ana nara. 33 De se'o heni emi hata-heto mara fo babati doi nara fee lahenda manato'a-manataa' ara. No ria naa emi peda hata-heto nai nusatetu-ikutema' a nai mamana malolole, de ta sapu-lalo. Na'o ra ta bisa ramana'o si. Ule-pa'i ta bisa to'i ralutu si. 34 Mafarerene' matalolole! Emi hata-hetom nai bea, emi dale ma boe nai naa.”
Lahenda nadedenu' fo sadia nalalau' hatu-leledon
35-36 Yesus dedea bali nae, “Emi muste sadia malalau' Manetualain hatu-leledon. Sama leo' ata a nanea nahani ria manuu uma na fali neme feta kakabi' a mai. Kalu manuu uma' a dedelu lelesu a, sona ana nalale soi ni.f 37 Kalu manuu uma' a mai, te nita ata nara rahani leo' naa, tantu ara raua-ranale. Huu fo neu' ko manuu uma' a natudu fee si dale susue-lalain. Ana pake papake nonoi-tatao' a fo nalalau' ata nara neni' nanaa-nininu' malada. 38 Ata sira tebe raua-ranale, huu fo ara ralalau' sira manuu uma na no malole. Leo mae manuu uma' a mai li'u hida a, fatiladan do dulupilan, sira rahani rahere.
39 Dodoo matalolole! Kalu manuu uma' fo bubulu' matetu' na'o ra mai li'u hida, tantu ana ta fee lela' fo na'o sira ofe uma na. 40 De emi muste sadia kokosen, nana huu ta hapu lahenda esa bubulu' matetu' fai hida' Lahenda Dae-bafo' Tetea' natafali mai.”g
Mana tuka dea fo dite-tama nahere, ma mana tuka dea fo ta dite-tama nahere
41 Petrus natane Yesus nae, “Papa Mesen! Bisinaa' a Papa dedea nasasama ma la'e noi ita mesa' kata, do la'e basa lahenda ra?”
42-44 Yesus nataa nae, “Dedea nasasama' ria la'e basa lahenda fo tao sama leo' malaka urusan fo urus nalela', ma dite-tama nahere malaka na. Neu' ko malaka na so'u naan ela bati nanaa-nininu' fee basa ata ra. Kalu ana nakate tao natetu ria nonoi-laka na, sona leo mae malaka na mai fai bea a, tehuu ana tao malole kokosen. De naua-nanale, huu fo neu' ko malaka na so'u naan ela urus ria hata-heton katema'.
45 Tehuu malaka urusan ria soe, kalu ana mulai afi nae, ‘Tantu tou lasi' a doo' a dei fali main.’ Boe ma ana nafero ata ina-tou feke' ara, de popo'o si. Ana naa-ninu nasosoe aon losa' mafu'. 46 Tehuu neu' fai fo malaka urusan ria ta bubulu' hata esa boe', kekeneu te malaka na fali main. Malaka na bubulu' hihii-nanau' sira, boe ma popo'o ni, ma usi henin, de hapu babati na nai dea' sama-sama no lahenda fo ta tao tuka malaka na hihii-nanaun.
47 Soa-neu' ata fo bubulu' malaka na hihii-nanaun, tehuu ana ta sadia tao tuka, do ta nau tao tuka, neu' ko ana hapu huhuku mabera. 48 Tehuu ata fo noi-tao nasala', nana huu ana ta bubulu' malaka a hihii-nanaun, neu' ko huhuku na kafa' a. Huu fo lahenda bea sipo dodou', sona partutu ni boe dodou'. Lahenda fo sipo nonoi bau-ina', ria lelepa na boe bau-ina'.”
Ramatua Yesus nanori-nafadan bisa tao na lahenda esa soa' esa
49 Yesus tuti naroo dedea Na nae, “Au mai ela tada heni lahenda kara reme lahenda feke' a nai dae-bafo' ia. Ria sama leo' lahenda hotu heni kadafu' a. Au ahii' kalu ai ria pila nai basa mamana' ain. 50 Tehuu Au muste lepa aulu' doidoso mabera. Tebe neu' ko Au doidoso, losa' Au abasa nonoi-laka Ka.h 51 Emi afi mae Au mai uni mole-dame nai dae-bafo' ia, do? Ta'a! Au mai fo tao a lahenda rahuu-ralena ma tao a si rasida-rasai', huu no Au nanori-nafada Ki. 52 Mulai neme besa' ia mai toranoo' no toranoo' ara rabika-rabati'. Nai kileo-boboki' esa dale', telu soa' dua, dua soa' telu.
53 Papa' a soa' ana tou' na;
ana tou' a soa' papa na.
Mama' a soa' ana ina na;
ana ina' a soa' mama na.
Arina' a soa' manafeu na;
manafeu' a soa' arina na.”i
Malela' matalolole fai susa a tanda nara
54 Boe ma Yesus dedea no lahenda kadodou-ina' sira nae, “Kalu emi mita oa keo-ina' a toda nai muri, emi mae, ‘Tanda ia nana, uda a saka' mai.’ Tebe leo' naa. 55 Kalu ani onas a mai, emi mae, ‘Tanda ia nana, fai' ia makahana na seli.’ Tebe leo' naa. 56 Lahenda masarole-masarali' emin! Emi tanda malela' dae-ina' a ma oa-ani. Tehuu ubea' taon emi ta bubulu' Manetualain hihii-nanaun nai tepo-lele' ia?”
Mole-dame mo musu-noo mara
57-58 Yesus dedea tamba selu' nae, “Kalu emi madedea, sona ubea' taon de emi ta bisa maetu' ao mara tuka matetu na! Malole lena' mole-dame dei! Boso' losa emi nai mana ee dedea' ara matan, boe ma ana naetu' fo huku emi nai bui dale'. 59 Huu fo kalu mana ee dedea' ara raetu' raan leo' naa, sona emi ta bisa kalua, losa' emi mahuta basa dei.”