Ramatua Yesus puli na lahenda naraa la'e fai hahae ao'
3
Boe ma Yesus fali selu' leo uma mamaso' a neu. Nai naa Ana nita lahenda esa mate liman esa.
Markus 3:1-19
2 Nai naa boe, lahenda hida rasaka eno' fo nau sale Yesus. De ara memete' Ana, ela ara bubulu' Ana puli lahenda ria naraa la'e fai hahae ao', do ta'a.
3 Yesus naloo lahenda fo mate liman esa a nae, “Mapadei' mai' mata ia.”
4 Boe ma Ana natane lahenda sira nae, “Kalu tuka ita atoran agama na, ita bole tao hata ubea' naraa la'e fai hahae ao'? Ita tao malole, do ta'a? Ita puli lahenda, do taisa lahenda?” Tehuu basa si roi nenee' a.
5 Yesus dale Na susa naan seli, nana huu ara tao dale' noi neu' sira atoran agama na, tehuu ta tao dale' neu' lahenda fo mate liman esa a. Ana namanasa, de mete nalelei' asa. Boe ma nafada lahenda ria nae, “Loo' lima ma mai leo!” Lahenda ria loo' lima na, kekeneu te lima na te'e tuti' a. 6 Boe ma lahenda Farisi ra foa ela uma mamaso' ria. Ara reu rala hara' ro Herodes partei na lahenda nara, fo saka eno' ela raisa Yesus.
Yesus puli na lahenda dodou' nai dano a suu na
7-8 Lai' esa de, Yesus no ana mana tuka dea nara leo dano Galilea a suu na reu. Tehuu no lahenda dodou' ramanene hata fo Ana tao a, huu ria naa sira reme' basa koro' ara mai tuka Ni. Ara reme propensi Galilea, propensi Yudea ma propensi Idumea. Lahenda feke' ruma reme' kota Yerusalem, kota Sidon ma kota Tirus. Ma feke' ruma reme lee Yarden poo' dulu mai. Basa si saka Yesus nau raneta roon. 9 Huu no lahenda dodou', losa' Yesus nadenu ana mana tuka dea nara sadia fee Ni ofa' esa. Ana nau dedea nai ofa' lain, ela basa si ramanene, ma Ana boso' nahapa'.
10 Maulu na, Ana parnaa puli na lahenda kamahedis dodou'. Huu ria naa besa' ia basa lahenda kamahedis ara raseti ao nau oi la'e Ni.a 11 Fai ria lahenda nitu heke' ara rita Ni, tuti' a ara tu'u reu, losa' mata-idu nara neta dae a nai Yesus mata Na. Ara kasi rae, “O nana Manetualain Anan.”
12 Ana horo si nae, “Emi boso' mafada lahenda mae, Au nana bea.”
Yesus teka-here na lahenda sanahulu dua dadi ana mana tuka dean
13 Basa de Yesus ae leo lete' esa lain neu. Ana naloo na lahenda hida fo ri' la'e dale Na. De ara leo mata Na mai. 14 Ana teka-here na lahenda sanahulu dua. Ana nafada si nae, “Au teka-here emi ela tuka mahere Au, dadi meu' Au lahenda nadedenu Ki. Au adenu emi meu tui-beka fee basa lahenda ra Manetualain Tutui Malole Na. 15 Ma Au fee emi kuasa, ela emi usi heni nitu reme lahenda ra mai.”
16-19 Lahenda kasanahulu dua ara nade nara si':
Simon (fo ri' Yesus feen nade' Petrus),
Yakobis,
Yohanis, (Yakobis no fadin Yohanis, nana Sabadeus ana nara. Yesus fee si nade ‘Boanerges’, sosoa na ‘sama leo' tatas’.)b
Anderias,
Filipus,
Bertolomeos,
Mateos,
Tomas,
Yakobis (Alpius ana na),
Tadius,
Simon (fo tuka partei Selot),c
ma Yudas Iskariot, (ria ri' neu' ko se'o heni Yesus).
Mesen Agama ra sale Ramatua Yesus rae, nitu ra malakan ri' fee Ni kuasa
20 Boe ma Yesus no ana mana tuka dea nara onda fali' reme lete' lain mai. Ara maso' leo uma dale' reu. Tehuu lahenda dodou' mai eo ra Yesus, losa' ara ta hapu lela' fo raa-rinu.
Markus 3:20-35
21 Lahenda ra rita leo' naa boe ma rae, “Mete maneni Yesus dei. Ana ta nafarene urus ao-ina Na so'.” Huu no kileo-boboki nara ramanene lahenda dedea rae leo' naa, de ara mai rala fali' Ana.
22 Fai ria mesen agama reme Yerusalem mai, de rafada lahenda fo rai naa rae, “Emi boso' tuka Yesus. Ana bisa usi heni nitu leo' naa, nana huu Ana hapu kuasa neme nitu ra malakan, fo ri' lahenda biasa raloo rae, Balsebul.”d
23 Yesus namanene leo' naa, boe ma Ana naloo na basa si, de nae, “Ta la'e fa. Tao leo' bea de nitu ra malaka na bisa usi selu' ria ao-ina na? Ta bisa fa! 24 Kalu nai nusa' esa, anaraun ara ranala ao, tao leo' bea fo nusa' ria bei bisa natata'a? Ta bisa fa! 25 Ma kalu uma isi' ara esa no esa rarui ao, tao leo' bea fo ara bei bisa ranenete? Ta bisa fa! 26 Leo' naa boe kalu nitu ra esa musu no esa, tantu ara rabika-rabati'. Kalu leo' naa sona ara rasosopu'.
27 Kalu lahenda mai ofe hata-heto nai lahenda bara'ai esa uma na, ana muste heke naisa' lahenda ria dei. Besa' ko ana bisa ofe neni lahenda ria hata-heton.e
28 De Au afada mema' emi: Manetualain sadia sae-safe heni lahenda sala-sikon. Ma kalu lahenda dedea tadalu' soa-neu' lahenda feke', Manetualain bei sadia fee ni ampon. 29 Tehuu kalu lahenda naparani dedea tadalu' soa-neu' Manetualain Dula-dale Malalao-malalafu Na, sona losa dae-bafo' a noe boe, Manetualain ta fee ni ampon.”f
30 Yesus nae leo' naa, nana huu ara rae, “Lahenda ria nitu ra heke raan so!”
Lahenda fo tuka Manetualain hihii-nanaun, sira nana tebe-tebe Ramatua Yesus kileo-bobokin
31 Boe ma Yesus mama na no fadi nara, leo uma ria reu, fo nau raneta ro Ni. Nai naa ara rapadei rahani uma dea' de radenu lahenda reu raloo Ni. 32 Fai ria Yesus natuu' dedea no lahenda dodou'. Lahenda mai rafadan rae, “Papa! Mama ma no fadi mara rai dea'. Ara nau raneta ro Papa.”
33 Tehuu Yesus nataa nae, “Au mama Ka ma toranoo matetu kara si', bea?”