5-6 Basa boe ma Yesus nadenu ana mana tungga kasanahulu duan nala, ma fee sala palenda nae, “Au adenu ei mini ita hataholi Yahudin nala miu, huu hataholi no'uk leme ita hataholin nala mai, ta tungga no teteben Manetualain dalan. Sila ndia, sama leo bi'i-lombo mana sala dalak. Huu ndia de ei boso mini hataholi ta Yahudi miu, conto leo hataholi Samaria la. 7 Miu mafada ita hataholi Israel asa mae, ‘Fain losa so, fo basa hataholi bisa maso dadik Manetualain hataholin.’ 8 Miu tao mahai hataholi kamahedik, tao masoda falik hataholi mana matek, tao mahai hataholi kamahedi kusta, ma husi kalua heni nitu. Manetualain fee makadotok neu ei so, tehuu ta noke falik hata esa neme ei mai boe. De hatematak ia, ei miu leo fo baba'e fee makadotok neu hataholi fe'ek, tehuu ei ta bole moke falik hata esa neme sila mai boe. 9 La'ok mia kada lima louk baa. Boso mini doik, 10 lepa-nggee, balo'a ngganggatik, tabu eik, do tete'e-aik. Huu hataholi musi fee hataholi mana tao ues, hata fo nandaa, suek ala bisa lasoda.^b

11 Mete ma ei maso mini kota esa do nggolok esa miu, na, ei sangga hataholi mana nau simbok ei. Basa, na leo nai ndia, losa ei la'o ela mamanak ndia. 12 Mete ma ei maso mini hataholi uman miu, na, mafadan mae, ‘Soda-molek! Manetualain fee ei baba'e-babatik.’ 13 Mete ma hataholi lai uma ndia simbok ei no malole, na, ei moke fo Manetualain fee baba'e-babatik neu sala. Tehuu mete ma ala ta simbok ei, na, Manetualain boe oo ta fee sala baba'e-babatik. 14 Mete ma hataholi ta nau namanene ei, na, kalua mima uma ndia do, kota ndia mai, basa ndia na sasambu heni afu neme ei eim mala mai, fo dadik tanda nae, ala ta lamanenen, na, ala lemba aon natataak ndia.^c 15 Dei fo mete ma Manetualain naketu huku hataholi malai dae-bafok ia, na, Ana naketu huhukuk belak neu hataholi Sodom ma Gomora, fo makahulun manggalauk nalan seli ndia. Tehuu masanenedak baa! Huu dei fo Ana fee huhukuk belan lena bali neu hataholi fo ta nau simbok ei!”^d

16 “Masanenedak baa! Huu Au adenu ei, sama leo Au haitua bi'i-lombo neni busa fui manggalauk kala laladan neu. Huu ndia de ei musi pake langga utek sama leo mengge malelak. Ma ei dalem mala musi ndoos, sama leo lunda fo ta mana sangga dede'ak.^e 17 Tehuu mata neuk baa! Huu dei fo hataholi tao doidoso ei sama leo busa kiki nakamate bi'i-lombo. Dei fo ala hela leni ei maso mini mamana naketu dede'a anggama miu. Ma dei fo ala filo ei nai sila uma huhule-haladoin. 18 Dei fo ala hela leni ei miu masale nggubenol ma manek, huu ei tungga Au. Tehuu ei musi pake lelak ndia, fo mafada Au Hala Maloleng neu sala. No leo ndiak, hataholi ta mana malelak Manetualain boe, bisa lamanene la'e-neu Au. 19 Huu mete ma ala hela loo ei leo ndiak, na, ei boso bii mae, ‘Dei fo au sangga kokolak ae, hata?’ Do ‘dei fo au ataa ae, hata?’ Boso dudu'a leo ndiak, huu losa ndia fain, dei fo ei Amam nai nusa sodak, nafada la'e-neu hata fo ei musi kokolak. 20 Faik ndia, hata fo ei kokolak ta naoka nai ei mesa nggei, tehuu Ndia Dula-dale Malalaon ndia nanoli ei fo kokolak hata.^f

21 Ei mete baa, huu nai uma esa dalek, mete ma hambu hataholi namahele neu Au, dei fo ndia tolanoo hehelin sangga dalak fo tao nisan. De mete ma anak namahele, na, dei fo aman tao nisan. Mete ma ina no ama lamahele, na, dei fo sila ana hehelin ndia tao nisa sala.^g 22 Mete te dei fo basa hataholi la binci ei, huu ei tungga Au. Tehuu hataholi mana makatataka losa babasan, dei fo Manetualain nasala'e nala ndia.^h 23 Mete ma hataholi tao doidoso ei nai kota esa, na, fo'a fo malai mini kota fe'ek esa miu. Tetebes ndia! Au ia, Hataholi Isi-isik. Dei fo ei bei ta la'ok mate'e ndule basa kota la lai Israel, tehuu Au fali maing so.

24 Hataholi la lateme fee hada-holomata neu mesen esa, lena heni ana mana tunggan nala. Ma ala fee hada-holomata neu malanggan esa, lena heni mana tao uen nala.ⁱ 25 Mete ma ana mana tunggan nala lanoli fo malelan leo sila mesen, na, dai ndia so. Ma mete ma ana mana tao ues nanoli fo malelan leo malanggan, na, ndia boe nameda dai so.

De masanenedak bou! Mete ma hataholi noke maumak nae, ‘O ia Balsebuul, fo nitu la malanggan!’ na, ndia uma isin nala hambu nadek ta malole nalan seli.”^j

26 “De ei boso bii hataholi mana laban ei. Huu hata fo hataholi tao nafufunik, dei fo basa hataholi la litan.^k 27 Hata fo Au anoli ei mesa nggei ndia, na dei fo ei musi miu mafada basa hataholi la. Ma hata fo Au afada no nee-neek, na dei fo miu mafada mafeok basa mamanak lala'en. 28 Boso bii hataholi, huu kada ala bisa tao lisa hataholi ao-mbaan, tehuu ta bisa tao lakalulutu hataholi samanen. Huu ndia de ei musi bii Manetualain, huu kada Ndia mesak kana naena koasa fo mbia heni hataholi aon ma samanen neni tasi ha'ik fo mana mbila nakandondoo henin. 29 De matetea ei dalem mala. Hataholi la se'o mbui hadek nai pasak, belin nai dae nalan seli. Tehuu ta hambu esa mate boe, mete ma ei Amam ta mbo'i. 30 Ei Amam nai nusa sodak boe oo tao matak neu ei, losa dede'a kadi'i anak. Ei langga bulu doo makadoton nala lai ei langgam mala boe oo, Ana bubuluk kasa so. 31 De ei boso bii! Huu Manetualain timba-tai ei belin lena heni basa mbui hadek kala sila.”

32 Basa de Yesus kokolak bali nae leo iak, “Hataholi nambalani manaku nalelak Au nai hataholi no'uk kala lai dae-bafok ia, na dei fo Au boe oo manaku alelak kana nai Au Amang matan nai nusa sodak ae, ‘Ndia ia, Au hataholing.’ 33 Tehuu hataholi fo mana nalelesi Au nai hataholi no'uk matan nae, ana ta nalelak Au, na dei fo Au afada Au Amang nai nusa sodak ae, ‘Au ta alelak hataholi ia boe.”’^l

34 “Ei boso mae hetuk, Au mai uni mole-damek nai dae-bafok ia. Tehuu Au mai fo tao hataholi la esa laban esa. 35 Au uni dae-bafok ia mai, tungga hata fo Manetualain mana kokolan nafada memak so nae,

37 De hataholi fo tebe-tebe nau tungga Au, na ana musi sue Au lena heni basa-basan; lena heni ndia ina-aman, ma lena heni ndia anan nala. Tehuu mete ma taa, na, hataholi ndia ta nandaa dadik Au hataholing. 38 Huu hataholi mana nau tungga Au, tehuu ta nau lemba doidosok, na, ndia ta nandaa dadik Au hataholing.ⁿ 39 Hataholi fo sadia mate huu ana tungga Au, dei fo ana bisa nasoda nakandondoo henin no Manetualain. Tehuu hataholi fo kada nasoda soa-neu ndia soda hehelin, na dei fo ndia sodan, mopo henin leo ndiak leo!”^o

40 “Hataholi fo mana simbok ei no malole, na, ana simbok Au leo ndiak boe. Ma hataholi fo mana simbok Au, na, ndia boe oo simbok Manetualain fo mana nadenu Au.^p 41 Hataholi fo mana simbok Manetualain mana kokolan, huu mana kokola ndia kokolak la'e-neu Manetualain, na dei fo Manetualain balan sama leo Manetualain bala mana kokola esa. Ma hataholi fo mana simbok hataholi dale ndoos esa, huu hataholi ndia tungga tebe-tebe Manetualain hihiin, na, dei fo Manetualain balan sama leo Manetualain bala hataholi ndoos esa. 42 Hataholi fo mana simbok hataholi esa kadi'ik nalan seli, huu ana tungga Au, na Manetualain balan. Mae hataholi kada fee oe hiak nggalaas esa boe oo, na, neu ko Manetualain ta nafalende henin.”