Tutui Sososak
Mulai neme Manetualain nakadadadik lalai no dae-bafok
Manetualain nakadadadik lalai ma dae-bafok no isin nala
1
Sososan Manetualain nakadadadik lalai no dae-bafok.2 Lelek ndia, dae-bafok bei ta dadi, ma basan bei bebebik neu esa. Hambu kada oe. Ma makiu-mumuuk mboti nalan. Manetualain Dulan laa-laa nai oe bafon.a
3 Boe ma Manetualain kokolak nae, “Musi hambu manggaledok.” Kokolak nate'e leo ndiak, boe ma manggaledok dadi. 4 Ana nita manggaledok ndia, boe ma dalen namahoko, huu hata fo Ana nakadadadik ndia so, memak malole. Boe ma Ana tada kofe'e manggaledok ndia neme makiuk mai, fo esa-esak no ndia fai hehelin. 5 Ana foi manggaledok ndia, nade ‘leledok’, ma makiuk ndia, nade ‘le'odaek’. Fai kaesan ndindia.
6-7 Boe ma Manetualain kokolak bali nae, “Musi hambu mamana louk fo tada kofe'e oe. Huu ndia de hambu oe nai baba'ek lain, ma hambu oe nai baba'ek dae.” Ana kokolak nate'e leo ndiak, boe ma oe ndia naba'e neu dua. 8 Ana foi mamana louk manai baba'ek lain ndia, nade ‘lalai’. Fai kaduan ndindia.
9 Boe ma Manetualain kokolak bali nae, “Oe manai baba'ek dae ndia, musi nakabubua nai mamanak esa, fo suek hambu dae madak.” Kokolak nate'e leo ndiak, boe ma hambu dae madak. 10 De dae madak ndia, Ana foin nade ‘madak lain’; ma oe mana makabubuak ndia, Ana foin nade ‘tasi’. Ana nita basa sila, boe ma dalen namahoko, huu hata fo Ana nakadadadik ndia so, memak malole. 11 Boe ma Manetualain kokolak bali nae, “Madak lain, musi namoli sesele-ngganggalik. Musi hambu sesele-ngganggalik mana maboak, kade'ek, ma mana madoo momodok. Fo suek sesele-ngganggalik kala esa-esak kalua buna-boan tungga numban.” Ana kokolak nate'e leo ndiak, boe ma basa sesele-ngganggalik kala dadi. 12 Nai madak lain, sesele-ngganggalik kala kalua sila buna-boan tungga esa-esak numban. Ana nita basa sila, boe ma dalen namahoko, huu hata fo Ana nakadadadik ndia so, memak malole. 13 Fai katelun ndindia.
14-15 Basa de Manetualain kokolak bali nae, “Nai baba'ek lain, musi hambu bua manggaledok mata-matak, fo tao manggaledo dae-bafok ia. Musi hambu mana tao manggaledo fai leledok, ma musi hambu mana tao manggaledo fai le'odaek. Basa sala dadik tanda, fo suek bisa hingga faik, teuk, ma fai hanas no fai oe faak.” Ana kokolak nate'e leo ndiak, boe ma basa bua manggaledok kala dadi. 16 Ana nakadadadik bua manggaledo ina-huuk dua. Ina-huuk nalan seli, tao manggaledo fai leledok; ma kadi'ik nalan seli tao manggaledo fai le'odaek. Ndia boe oo nakadadadik nduuk kala. 17 Ana heti buas sala sila lai lalai, fo lasa'a leni dae-bafok mai. 18 Boe ma tao manggaledo fai leledok ma tao manggaledo fai le'odaek. No leo ndiak, ala tada kofe'e manggaledok neme makiuk mai. Ana nita basa sila, boe ma dalen namahoko, huu hata fo Ana nakadadadik ndia so, memak malole. 19 Fai kahaan ndindia.
20 Boe ma Manetualain kokolak bali nae, “Musi hambu banda mata-matak lasoda nai oe. Ma musi hambu mbuik mata-matak laa nai dae-bafok lain.” 21 Boe ma Ana nakadadadik basa i'ak mata-matak, ma banda ina-huuk mana masoda nai oe. Ndia boe oo nakadadadik basa mbuik mata-matak, fo mana laa nai lalai. Ana nita basa sila, boe ma dalen namahoko, huu hata fo Ana nakadadadik ndia so, memak malole. 22 Boe ma Ana kokolak fee baba'e-babatik neu basa banda sila nae, “I'ak kala musi lamano'u, fo tao lahenu oe sudi nai bee. Ma mbuik kala boe oo, musi lamano'u.” 23 Fai kaliman ndindia.
24-25 Boe ma Manetualain kokolak bali nae, “Musi hambu banda mata-matak lasoda nai madak lain. Fo ndia banda nakaboik, banda fui, ma banda mana lae-lodok nai dae, esa-esak no ndia numban.” Kokolak nate'e leo ndiak, boe ma basa banda sila dadi. Ana nita basa sila, boe ma dalen namahoko, huu hata fo Ana nakadadadik ndia so, memak malole.
26 Boe ma Manetualain kokolak bali nae, “Mai fo Ita takadadadik hataholi tungga Ita mata-aon. Suek ala lakaneni ma heti basa i'ak malai tasi, basa mbuik malai lalai, basa banda nakaboik, ma basa banda fe'ek kala, fo mana lasoda lai dae-bafok.”b
27 Boe ma Ana nakadadadik hataholi tungga Ndia mata-aon. Ana nakadadadik kasa, touk ma inak. 28 De Ana kokolak fee baba'e-babatik neu sala nae, “Ei musi bonggi mala makadotok, fo tao mahenu, ma heti dae-bafok ia. Au boe oo fee haak neu ei, fo makaneni i'ak kala, mbuik kala, ma basa banda malai madak lain. 29 Mamanene neulalau! Au fee ei nana'ak mata-matak nai dae-bafok ia. Fo ndia: sesele-ngganggali mana maboak, kade'ek, ma mana madoo momodok. 30 Au boe oo, fee basa sesele-ngganggalik mata-matak, fo dadik neu basa banda la nana'an. Hambu nana'ak soa-neu banda nakaboik, banda fui, banda mana lae-lodok, ma mbuik kala.” Ana kokolak nate'e leo ndiak, boe ma hambu basa nana'a mata-matak kala dadi. 31 Ana nita basa sila, boe ma dalen namahoko, huu hata fo Ana nakadadadik ndia so, memak lolen seli. Fai kaneen ndindia.