2 Tehuu Yesus nataa nae, “Uma ia, memak malole! Tehuu ta dook so bali, te ala latu'u heni basa batu la ia.”

3 Basa boe ma Yesus asa leni lete Setun lain leu, de langgatuuk lai mamanak fo nasasale matak no Uma Ina Huhule-haladoik ndia. Basa boe ma ana mana tunggan haa mai, de lakokola lo Ndia. Fo ndia Petrus, Yakobis, Yohanis ma Anderias. 4 Boe ma ala latane Yesus lae, “Ama! Soba mafada seluk Ama kokolan isinaak dei. Faik bee ndia fo fain ndia losa? Ma tandan nala leo hata?”

5 Boe ma Yesus nataa nae, “Sadi ei manea matalolole bou! Fo suek boso ei nana kedi nalak. 6 Dei fo hambu hataholi mata-matak kala mai babamba kalan lae, ‘Au ia Karistus, ndia Hataholi fo Manetualain helu memak neme makahulun ele mai so.’ Boe ma ala kedi lala hataholi no'uk. 7 Mete ma ei mita hataholi la latati do, ei mamanene lae natatik nai sudi bee, na, boso bii. Huu mata leo ndiak ndia musi ana dadi nakahuluk dei, tehuu dae-bafok fai babasan bei ta losa. 8 Dei fo leo esa natati laban leo fe'ek. Nusak esa natati laban nusa fe'ek. Hambu dae nangge'o sudi nai bee. Fai ndoes boe ana seli! Basa ia la dadik tanda, sama leo inak fo bei fo tein mulai hedis fo sangga ana bonggi.

9 De ei musi manea matalolole baa! Huu dei fo ala mai humu lala ei, fo ala hela loo ei mini mamana naketu dede'a anggama miu. Ma ala mbomboko ei nai uma huhule-haladoik kala dale. Ma ala mba'a leni ei mini mana to'u koasa miu, huu ei tungga Au. Tehuu ndia boe oo dadik neu dalak esa, fo suek ei mafada sala la'e-neu Au. 10 Manetualain hataholin nala musi leu tui-bengga lakahuluk Au Tutui Maloleng neu basa leo la malai dae-bafok ia, bei fo dae-bafok fai babasan losa. 11 Masanenedak baa! Mete ma ala mba'a loo ei mini mamana naketu dede'ak miu, na, ei boso bii mae, ‘Dei fo au kokolak hata? Do, au ataa hata?’ Mete ma fain ndia losa so, na, kada ei kokolak tungga hata fo Manetualain Dula-dale Malalaon nafada ei.^a

12 Nai uma esa dalek, mete ma hambu hataholi esa namahele neu Au, na, neu ko ndia tolanoo hehelin sangga dalak fo tao nisan. Mete ma anan ndia namahele neu Au, na, dei fo aman tao nisan. Ma mete ma inan no aman lamahele neu Au, na, dei fo anan tao nisa sala. 13 De dei fo hataholi la binci ei lalan seli, huu ei mamahele Au. Tehuu see ndia nakatataka losa babasan, na neu ko Manetualain nasala'e nala ndia.”^b

14 Yesus kokolak nakandoo nae, “Dei fo hataholi esa fo manggalaun seli sangga mai. Ana maso neu nambadeik nai mamana lulik fo manai Manetualain Uma Ina Huhule-haladoin dale, fo ta nandaa neu ndia, losa ana tao nunute mamanak ndia. Huu ndia de Manetualain heok nasadea ela mamanak ndia. Mete ma ei mita leo ndiak so, na, mata neuk baa! (See ndia lees ia, na ana musi mata neuk boe!) Ndia dadik tanda nae, fai toto'ak kala deka-deka mai so. Mete ma lita leo ndiak so, na, hataholi malai propensi Yudea lalai leni letek lain leu leo.^c 15 Ma ala musi lalaik lai-lai, fo suek boso hambu soe. Mete ma hambu see ndia kalua la'o ela uman so, na, boso fali mai ha'i balo'as bali. 16 Boe ma hataholi malai osi dale, na boso fali mai ha'i bua nalusek bali. Tehuu malai makandoo leo!^d 17 Hataholi fo kasian nalan seli, ndia ina kailus sala, ma ina mana masusu ana mbimbila anak kala. Huu ala ta bisa lalaik lai-lai. 18 De malolenak ei hule-haladoi fo moke dede'a manggalauk ndia, boso nandaa no fai oe faak. 19 Faik ndia toto'an ana seli! Mulai neme Manetualain nakadadadik dae-bafok losa hatematak ia, hataholi la bei ta lita litak toto'a ina-huuk mata leo ndiak. Ma dei fo hataholi la ta lita seluk toto'a mata leo ndiak boe.^e 20 Mete ma Manetualain ta tao keke'u faik ndia, na, dei fo ta hambu hataholi esa boe fo bisa nakatataka nasoda. Huu Manetualain sue hataholi fo Ana hele nalak kala so, de Ana tao keke'u fai toto'ak kala sila.

21 Mete ma faik ndia losa so, na dei fo ei mamanene hataholi la lae, ‘Mita dei! Karistus nai ia!’ Tehuu hataholi fe'ek lae, ‘Karistus nai ele!’ Tehuu ei boso mamanenen! 22 Dei fo hambu hataholi kalua fo babamba kalan nae, ‘Au ia, Karistus!’ Luma bali lae, ‘Au ia, Manetualain mana kokolan.’ Dei fo ala tao tanda heran mata-matak, pake nitu koasan fo ala pepeko hataholi la. Ala soba-soba fo kedi lala Manetualain hataholin nala boe! 23 Tehuu ei musi manea matalolole baa! Fai toto'ak kala sila bei ta losa, tehuu Au asanenedak memak ei so!”

24 Basa boe ma Yesus tuti seluk kokolan bali fo nafada ana mana tunggan nala nae, “Mete ma fai toto'ak kala sila basan so,

26 Basa ndia, bei fo basa hataholi la lita Au, Hataholi Isi-isik ia. Dei fo Au mai nai ko'as uma lalai mai. Ma basa hataholi la lita Au koasang, ma basa Au nula-nambung!^h 27 Boe ma Au palenda Manetualain ata nusa sodan nala, fo leu lakabubua lala basa hataholi la fo Au hele ala sala leme dae-bafok bu'un nala mai so, neme dulu mai losa muli, neme kii mai losa kona.”

28 Yesus tuti kokolan nae, “Au ha'i nakandandaak neme ai huuk mai. Mete ma doon mulai kuni, na, ndia dadik tanda nae, fai hanas deka-deka mai so.

29 Leo ndiak boe oo, mete ma ei mita fai toto'ak kala losa so, fo leo isinaak Au afada ei ndia so, na, ndia dadik tanda nae, Au deka-deka mai so. 30 Hatematak ia mamanene neulalau! Neu faik fo fai toto'ak kala sila losa so, neme basa hataholi kasodak kala hatematak ia, dei fo hambu hataholi luma bei ta mate. 31 Mae lalai ma dae-bafok mopo heni sala so, tehuu Au kokolang ia nahele losa ta mana basak.”

32 Yesus kokolak nakadaik nae, “Ta hambu hataholi esa boe bubuluk fai hida do, li'u hida Au fali maing. Manetualain ata nusa sodan nala boe oo ta bubuluk. Au mesa nggau boe oo ta bubuluk. Kada Au Amang mesak kana bubuluk.ⁱ 33 Huu ndia de ei musi manea matalolole, huu ei ta bubuluk fai hida fain ndia losa.

34 Ta dook so bali Au la'o ela ei basa nggei. Tehuu dei fo Au fali maing. Sama leo maumak la'o ela uman fo ana neni dae dook neu. Ana palenda ana uma dalen nala fo lakaneni neulalau uma ndia. Ma ana ba'e fee sala esa-esak uen. Ana palenda mana manea lelesu fo lanea neulalau losa ana fali main.^j 35 Ei boe oo musi manea leledo-le'odaen, huu ei ta bubuluk faik bee fo maumak fali main. Ana fali ledo bobok do, fatiladak do, leledok do, ledo saduk do, ei ta bubuluk faik bee. 36 Boso losak ana mai no kaiboik, te ana hambu ei bei sunggu masanggolo.

37 De hata fo Au afada ei ia, na Au afadan neu basa hataholi fe'ek kala boe ae, ‘Ei musi manea matalolole fo simbok Au mamaing.”’

[Lamatuak Yesus kokolak no ana mana tunggan nala lai lete Setun, losa kada ndia.]