Lamatuak Yesus tao nahai hataholi lu'uk esa
9
Basa boe ma Yesus asa hene fali leni ofak lain leu, fo leni dano selik leu, losa Ndia kota hehelin. 2 Nai ndia, hataholi la ndolo leni sila nonoo lu'un esa neu Ndia. Yesus nita leo ndiak, boe ma Ana bubuluk ala lamahele neu Ndia lae, Ndia bisa tao nahai sila nonoon ndia. Boe ma Ana nafada hataholi lu'uk ndia nae, “Ana, ei! Matetea o dalem dei! Huu Au koka heni o sala-singgom mala so.”3 Tehuu mese anggama Yahudi hida lai ndia, lamanene Yesus kokolan ndia. Boe ma dalen nala latobi tutik. De lakokola aok lae, “Hataholi ia nambalani nalan seli kokolak leo ndiak bae maa! Kada Manetualain mesak kana bisa fee ambon neu hataholi sala-singgon. Tehuu hataholi ia kokolan ndia, Ana tao aon sama leo ndia Manetualain. Ana kokolak nakadadaek nalan seli ndia so!”
4 Tehuu Yesus bubuluk sila dalen nala. Basa de Ana kokolak nae, “Hatina de ei dudu'a mae, Au ia, kokolak akadadaek alan seli? 5 Bee ndia lofo anak? Mete ma Au afada hataholi lu'uk ia ae, ‘O sala-singgom nana fee ambon so,’ do, Au ae, ‘Fo'a leo, fo fali.’ 6 Mete ma ana fo'a tutik, dei fo ei mita mia mata de'e hehelim mala mae, Au ia Hataholi Isi-isik. Au aena haak fee ambon neu hataholi sala-singgon.”
Boe ma Yesus palenda hataholi lu'uk ndia nae, “Fo'a leo! Lu'a mala o mamana ndondolom fo fali leo!”
7 Boe ma hataholi lu'uk ndia fo'a, de ana fali. 8 Basa hataholi la lita leo ndiak, boe ma ala heran. De ala so'u dema-demak Manetualain naden lae, “Manetualain ndia, ana seli bou! Ana fee koasa ina-huuk leo iak neu hataholi so.”
Lamatuak Yesus noke nala Mateos fo tungga Ndia
9 Basa boe ma Yesus la'ok neme ndia mai, de nita hataholi mana susu bea esa tao ues neme kantor bea. Ndia naden, Mateos. Boe ma Yesus noken nae, “Mai tungga Au!” Mateos namanene leo ndiak, boe ma ana fo'a de ana tungga tutik Ndia.
10 Basa ndia, boe ma Mateos hoka Yesus asa mai la'a nai ndia uman. Ana hoka ndia nonoo mana susu bean nala boe, ma nana hoka fe'ek kala, fo mai la'a no'u lo sala.
11 Tehuu hataholi paltei Farisi hida mai manggalau Yesus ana mana tunggan nala lae, “Hatina de ei mesem nanggatuuk na'a no'u no hataholi papake taak kala sila, sama leo mana susu bea la, ma sila nonoo hataholi manggalauk kala sila?”a
12 Tehuu Yesus nafada sala nae, “Hataholi kamahedik memak paluu dotel. Tehuu hataholi ta kamahedik ta paluu dotel. 13 Malolenak ei fali fo palisak neulalau Manetualain Dede'a-kokolan, fo makahulun Ana nadenu Ndia mana kokolan Hosea sulak nae,
‘Au hihiing, fo ndia,
Au hataholi nggala lasue ao esa no esa, ma latudu namemeda kasian.
Mete ma ala ta tao leo ndiak, na,
sila banda tunu-hotun fo leni fee Au ndia,
sosoan ta faa boe.’
Ndia, fo Manetualain nafadan so. Huu ndia de Au ta mai akaneni hataholi fo taok aon malole so, tehuu Au mai akaneni hataholi ta malole la.”b
Hataholi natane, hatina de Lamatuak Yesus ana mana tunggan nala ta puasa
14 Basa boe ma Yohanis Mana Salanik ana mana tunggan nala leni Yesus leu. Ala latane lae, “Ai mana tungga Yohanis ndia, mateme puasa. Hataholi Farisi la puasa boe. Tehuu hatina de Ama ana mana tunggan nala lambue la'a-linu lakandondoo henin? Sila ta puasa lalelak, do?”
15 Tehuu Yesus nataa sala nenik nakandandaak nae, “Leo iak: mete ma feta kabin, na, nana hokak kala ta puasa, tehuu la'a-linu lakabete. Mete ma tou mana kabin bei nai ndia, na, neu ko la'a-linu leu esa. Tehuu dei fo la'i esa mete ma hataholi fe'ek kala humu leni tou mana kabin ndia, boe ma ndia nonoon nala lameda dale hedi dei, bei fo ala puasa.
16 Hataholi ta ha'i nala tema beu bibiak esa, fo tandan neu badu laak sidak. Huu mete ma safe badu ndia, na, dei fo tema beuk nana tandak ndia ana kukulu. No leo ndiak, na badu laak ndia sidan boe namaloa.
17 Leo ndiak boe oo, hataholi ta di'a tua beuk neu samba laak nalan seli, huu dei fo sambak ndia sidan, de loo heni tua ndia. De tua beuk, na di'an neni samba beuk dale neu, fo suek dua sala bisa lakatataka lahele!”c [No leo ndiak Yesus nanoli sala nae, Ndia nanonolin ndia, beuk. De boso seseok kana no nanonoli laak.]
Lamatuak Yesus tao nahai ina mana mbo'a daak esa, ma tao nasoda falik ina anak esa
18 Ledo-eik Yesus bei kola-kola no Yohanis ana mana tunggan nala, boe ma malangga uma huhule-haladoik esa mai natonggo noon. Hataholi ndia sendek neu Yesus matan, de hule nae, “Ama! Tulun dei! Huu au ana ina anang bei fo maten. Ama tulun mai, fo tao limak neun dei, suek ana bisa nasoda fali.”
19 Yesus no ana mana tunggan nala lamanene leo ndia, boe ma ala tungga tutik hataholi ndia.
20-21 Nai dala laladak, inak esa la'ok tungga sala. Ana hambu bulak ta no hahaek teuk sanahulu dua ia so. Ana dudu'a nai dalen nae, “Sadi au bisa kada kame la'e Yesus badun, na au hai ia so.” Huu ndia de ana neu kame la'e Yesus badu mbedan.
22 Yesus namedak, boe ma Ana heok matan nasale inak ndia. De Ana kokolak nae, “Ana, ei! Matetea o dalem. Huu o mamahele tebe-tebe neu Au, de o hai ia so.” Ledo-eik ndia boe oo inak ndia hai tutik.
23 Basa boe ma Yesus asa la'ok lakandoo leni malangga uma huhule-haladoik ndia uman leu. Losa ele boe ma Ana maso de nita mana makamina musiik dale hedik, ma hataholi no'uk kala lakaleleu. 24 Tehuu Yesus nafada sala nae, “Hahae makaleleu, fo ama fali leo! Huu kakanak ia ta mate. Kada ana sunggu ndia.” Tehuu ala hika haumemee Ndia.
25 Basa boe ma basa hataholi la sila kalua. Boe ma Yesus maso neni kakanak ndia kaman dale neu, de ana to'u nala liman. Boe ma kakanak ndia nasoda fali tutik. 26 Hataholi la lita leo ndia, boe ma ala mulai tui ndule sila nusan, la'e-neu hata fo Yesus taok ndia so.
Lamatuak Yesus tao nahai hataholi mbokek dua
27 Basa boe ma Yesus la'ok nakandoo. Nai dala laladak, hataholi mbokek dua tungga-tungga loon. Ala langgou lae, “Yesus! Mane Dauk numbu-sadun! Kasian neu ai dei!”
28 Yesus maso neni uma dale neu, boe ma hataholi mbokek kaduak kala sila mai lasale Ndia. Boe ma Ana natane sala nae, “Ei mamahele tebe-tebe mae, Au aena koasa fo tao ei bisa mita, do?”
Boe ma ala lataa lae, “Awii! Ama boso matane bali, huu ai mamahele tebe-tebe neu Ama so.”
29 Yesus namanene leo ndiak, boe ma Ana nafaloe matan nala, ma kokolak nae, “Mete ma leo ndiak, na, neme naa fo dadi tungga ei namahehelem ndia!” 30 Yesus kokolak nate'e leo ndiak, boe ma ala lita tutik. Tehuu Yesus nasanenedak kasa tingga-tingga nae, “Masanenedak baa! Boso mafada hataholi esa boe la'e-neu hata fo mana dadik ia so!”
31 Tehuu ta bisa lakatataka lala. Boe ma ala la'ok ndule basa nusak ndia, de ala tui-bengga la'e-neu Yesus tataon ndia so.
Lamatuak Yesus tao nahai hataholi ta bisa kokolak
32 Hataholi mboke kaduak kala sila kalua, boe ma hataholi loo hataholi fe'ek esa neni Yesus neu. Hataholi ndia ta bisa kokolak, huu nitu nalan. 33 Yesus nita leo ndiak, boe ma Ana palenda nitu ndia kalua neme hataholi ndia mai. Nitu kalua, boe ma hataholi ndia bisa kokolak tutik. De hataholi no'uk malai ndia la heran lalan seli. Ala lae, “Awii! Ita hataholi Yahudi la bei ta tita titak leo iak ia maa!”
34 Tehuu hataholi Farisi la ta lamahoko. Ala kokolak lae, “Wei! Nitu la malanggan fee Ndia koasa fo Ana husi kalua heni nitu.”d
Lamatuak Yesus nameda kasian nita hataholi no'uk kala
35 Basa de Yesus la'ok ndule basa kota ma nggolok kala, fo fee nanonolik nai uma huhule-haladoik kala. Ana nanoli hataholi la'e-neu Manetualain Hala Malolen, ma dalan talo bee fo ala bisa maso dadik Ndia hataholin. Ndia boe oo tao nahai basa hedis mata-matak kala.e 36 Yesus nita hataholi no'uk kala sila, boe ma Ana nameda kasian neu sala, huu ala ta bubuluk leni bee leu. Huu sila basa sala, sama leo bi'i-lombo mana hoon taa.f 37 Boe ma Yesus kokolak no ana mana tunggan nala nae, “Hataholi no'uk kala ia, sama leo osi buna-boan nala. Mae buna-boak no'uk, tehuu hataholi mana tao ues ta dai fo ketu-kolu nala buna-boak sila, ma mbeda sala leu kama mbembedak dale.g 38 Huu ndia de ei musi moke osi Lamatuan ndia, fo Ana nadenu hataholi mana tao ues, fo suek leu lakaduduluk lala Ndia buna-boan nala.”