2 Basa faik nee dalen, boe ma Yesus noke Petrus, Yakobis, ma Yohanis fo basa sala nda'e leni lete madema nees esa lain leu. Ledo-eik ala losa lain, ala lita Yesus namata-ao fe'e. 3 Ma Ndia balo'an boe oo, dadik fula manggahadok. Nai dae-bafok ia, ta hambu buas esa boe fo fulan lena heni Ndia balo'an ndia. 4 Kada nggengge neuk boe ma ala lita Yesus nakokola no ba'i Elia ma ba'i Musa.

5-6 Petrus asa bii lalan seli. Boe ma Petrus nakandaa losa kokolak nadabak leo ndiak so. Basa de nafada Yesus nae, “Ama! Ai neulau hiak nai ia maa! De malolenak ai tao mala lalaa anak telu. Esa fee Ama, esa fee ba'i Musa, ma esa bali fee ba'i Elia.”

7 Basa boe ma ko'as konda mai, de mboti nala sala. Boe ma lamanene halak kalua neme ko'as ndia dalek mai nae, “Mamanene baa! Yesus ia, na Au Ana susueng! Ei mamanene neulalau neun baa!”^a

8 Ledo-eik Petrus asa lamanene halak ndia, boe ma ala suli lafeok, tehuu nggengge neuk ala ta bisa lita hataholi fe'ek so bali. Kada Yesus mesak kana.

9 Basa boe ma Yesus no ana mana tunggan nala loe fali leme letek ndia mai. Boe ma Yesus nafada sala nae, “Hata fo isinaak bei fo ei mitan ndia, ei boso mafada sudi see. Au ia, Hataholi Isi-isik. Au musi mate dei. Dei fo neu faik fo Au asoda fali so, bei fo ei bole mafada hataholi la.”

10 Ala to'u lahele Yesus hala hehelun ndia, de ta lafada hataholi la. Tehuu telu sala latatane aok lae, “Ndia maksut hata de nae, Ana nau ‘nasoda fali neme Ndia mamaten mai’ ndia? Talo bee bae?”

11 Boe ma ala latanen lae, “Mese anggama la lae, ‘Ba'i Elia musi mai nahahuluk, bei fo Karistus mai.’ Tehuu tungga Ama, na leo bee?”^b

12 Yesus nataa nae, “Memak tetebes. Ba'i Elia musi mai nakahuluk fo sadia dalak fee Karistus, ndia Hataholi fo Manetualain tudu memak kana neme makahulun mai so. Tehuu talo bee? Ei bei ta bubuluk hata fo ala sulak kana nai Manetualain Susula Malalaon la'e-neu Hataholi Isi-isik ndia, do? Huu ala sulak memak lae, dei fo neu faik fo Ana mai so, na, hataholi la lakatoto'ak kana, losa ala tao lisa Ndia. 13 Tehuu ei musi pasa neulalau ndi'i dook baa! Ba'i Elia ndia memak ana mai so. Tehuu hataholi la lakatoto'ak kana, tungga sila hihiin. Ndia boe nandaa no hata fo ba'i la sulak memak kana neme makahulun mai so.”

14 Ledo-eik Yesus no ana mana tungga katelun nala sila latonggo falik lo ana mana tungga fe'en nala, boe ma ala lita hataholi no'uk kala lakabubua. Hataholi la sila mai lita Yesus ana mana tungga fe'en nala lasisimbo bafak lo mese anggama la. 15 Ledo-eik hataholi no'uk kala sila lita Yesus, de ala nggengge, huu lae hetuk Yesus bei nai letek lain. Boe ma lalai leu latonggo loon.

16 Boe ma Yesus natane sala nae, “Ei masisimbo bafak hata nai ia?”

17 Boe ma hataholi esa mai, de nae, “Ama, mamanene dei! Au ua au ana tou anang mai, fo Ama tao mahai ndia dei. Ana ta bisa kokolak, huu nitu nalak. 18 Mete ma nitu ndia nala kakanak ndia dalek, na ana babala kakanak ia neu dae. Basa ndia, na kakanak bafan nafufude, ma ana henggu nisin. Boe ma aon nakambii sama leo ai. Au oke Ama ana mana tunggan nala fo ala husi heni nitu ndia. Tehuu ala ta bisa hata esa boe.”

19 Yesus namanene leo ndiak, boe ma Ana mboka sala nae, “Wei! Ei ia ana seli maa! Au anoli ei taa-taa so, tehuu ei ta malelak neulalau. Ma ei ta mamahele tebe-tebe neu Au! De Au musi nggale loak neu ei losa fai hida? Mia kakanak ndia neni ia mai!” 20 Boe ma ala ko'o loo kakanak ndia neni Yesus neu. Tehuu ledo-eik nitu nita Yesus, boe ma ana bala nabuu kakanak ndia lololi neu dae, losa bafan fufudek kala.

21 Basa boe ma Yesus natane kakanak aman nae, “O anam dadi leo iak, neme fai hidak mai so?”

Boe ma aman nataa nae, “Neme kadi'i anan mai so. 22 Nitu ndia sangga tao nisa kakanak ia dook so. Ana tao natuda au anang taa-taa neni ha'i dale neu, ma nabolon neni oe dale neu. De Ama fali malan dei! Mete ma bisa, na, kasian ai fo mahai kakanak ia dei.”

23 Yesus nataa nae, “Tehuu hatina de o mae, ‘mete ma bisa’? Memak Au bisa tao ala basa-basan, tehuu sadi hataholi namahele dei!”

24 Basa boe ma tou lasik ndia nataa ma hihii namatani nae, “Ama! Memak au amahele so. De fali mala au, fo au namaheheleng boe natea bali!”

25 Faik ndia, Yesus nita hataholi no'uk mai lakaseseti lai ndia. Basa boe ma Ana palenda nitu ndia nae, “Heeh! Nitu manggalauk! O kalua muma kakanak ndia mai, fo ela ana bisa namanene ma bisa kokolak. O boso maso seluk muni kakanak ia dalek muu bali!”

26 Nitu ndia namanene Yesus kokolak leo ndiak, boe ma ana nakau natingga nalan seli. Ana bala nabuu kakanak ndia losa ana le'a, bei fo nitu ndia kalua la'o elan. Boe ma kakanak ndia ana male leo bali sangga maten. Losa hataholi la sila kokolak lae, “Naa! ana mate so!”

27 Tehuu Yesus to'u nala kakanak ndia liman, de nafofo'an. Boe ma ana fo'a tutik leo.

28 Basa boe ma Yesus no ana mana tunggan nala la'o ela mamanak ndia, de ala leni uma esa dalek leu. Losa dalek, boe ma ala latane Yesus lae, “Ama! Huu hata de isinaak, ai ta bisa husi heni nitu ndia?”

29 Boe ma Yesus nafada nae, “Mamanene neulalau baa! Nitu la memak manggalauk. De mete ma ei ta hule-haladoi moke tulu-falik neme Manetualain mai, na, ei ta mabe'i husi nitu mata leo ndiak.”

30 Basa boe ma Yesus no ana mana tunggan nala la'o ela mamanak ndia, de ala maso leni propensi Galelea leu. Faik ndia, Yesus ta nau hataholi la bubuluk Ndia nai ndia, 31 huu Ana nau kada nanoli ana mana tunggan nala. Ana nafada sala nae, “Ta dook so bali, tehuu ala sangga se'o heni Au uu hataholi fe'ek kala. Basa, na ala tao lisa Au, Hataholi Isi-isik ia. Memak Au mate, tehuu neu binesan, na Au asoda fali.”^c

32 Yesus nafada leo ndiak, tehuu ana mana tunggan nala lakandaan. Ala ta lambalani latane seluk Yesus maksut ndia hata.

33 Basa boe ma Yesus asa la'o losa Kapernaum. Ledo-eik ala maso leni uma dale leu, boe ma Yesus natane ana mana tunggan nala nae, “Isinaak ei masisimbo bafak hata neme dala laladak ndia?”

34 Tehuu ta hambu esa nambalani nataa boe, huu lasisimbo bafak leme dala laladak lae, nai sila basa sala see ndia ina-huun nai lain seli.^d

35 Basa boe ma Yesus nanggatuuk, de nanoli sala nae, “See nau dadik hataholi ina-huuk, na ndia sodan musi dadik tebe-tebe leo hataholi kadi'i anak fo ono-lau fee basa hataholi la.”^e

36 Boe ma Yesus ko'o nala kakanak kadi'ik esa nai ndia, de Ana fali neni basa sala laladan neu. Boe ma Ana kokolak nae, 37 “See nau tungga Au fo ono-lau hataholi kadi'i anak sama leo kakanak ia, na ndia ndandaan nae, hataholi ndia boe oo, ono-lau Au. Ma ndia boe oo ono-lau Au Amang fo mana nadenu Au uni dae-bafok ia mai.”^f

38 Basa boe ma Yesus ana mana tunggan Yohanis nafada nae, “Ama! La'i esa, ai mita hataholi esa husi nitu pake Ama naden. De ai ka'in, huu ita hataholin ta ndia.”

39 Boe ma Yesus nataa nae, “Heeh! Ei boso ka'i hataholi ndia. Te see ndia pake Au nadeng fo tao tanda heran, na ana ta kokolak naboboo Au nadeng ndia. 40 Mete ma ana ta laban ita, na, ndandaan nae ita hataholin ndia boe.^g 41 Masaneda matalolole baa! Mete ma hambu hataholi bubuluk ei tungga Karistus, boe ma ana tulu-fali ei, na, Manetualain ta nafalende heni ndia sosotan. Mae kada ana fee ei minu oe hiak nggalaas esa boe oo, Manetualain ta nafalende heni ndia.”^h

42 Boe ma Yesus nafada seluk kasa bali nae, “Mete ma hambu hataholi tao nasala kakana anak esa, losak ta namahele Au so bali, na, mata neuk leo baa! Malolenak mba'a batu ina-huuk esaⁱ neu hataholi ndia lesuhain, fo mabolon nai tasi laladan.

43 Mete ma o tao salak munik o limam, na, tete heni limak ndia leo! Huu malolenak o maso muni nusa sodak muu, muni kada o limam esa lena heni ala mbia o muni ha'i naraka muu mua o limam dua sala.^j 44 [Naraka ndia, memak mamana doidosok. Ndia ha'in ta mana matek. Ma ulek malai sila la ta hahae e'edok tao kaboo mbuluk].^k 45 Mete ma o tao salak munik o eim, na, tete heni eik ndia leo. Huu malolenak o maso muni nusa sodak muu, muni kada o eim esa lena heni ala mbia o muni ha'i naraka muu mua o eim dua sala. 46 [Naraka ndia memak mamana doidosok. Ndia ha'in ta mana matek. Ma ulek malai sila la ta hahae e'edok tao kaboo mbuluk.]^l 47 Mete ma o tao salak munik o matam, na, edo henin leo! Huu malolenak o maso muni nusa sodak muu, muni kada o matam esa lena heni ala mbia o muni ha'i naraka muu mua o matam dua sala.^m

49 Au nanonoling ia, memak belan seli. De see nau tungga Au, na ana musi nakatataka tungga nakandoo. Sama leo mbaa fo ala mamasin ma ala se'in lenik ha'i, suek mbaa ndia nakatataka nala dook.

50 Masik ndia, malole. Ita paken fo tao nalada nana'ak. Tehuu mete ma masik ndia mamin so, na, sosoan hata? Kada ita nggali henin leo. Ei boe oo musi dadik sama leo masik, fo masoda masue ao mia basa hataholi la.^o

Ei hahae masisimbo bafak mae, see ndia ina-huuk ma see ndia kadi'ik!”