Lamatuak Yesus tao nahai hataholi, nandaa no fai hahae tao ues
3
Basa boe ma Yesus fali seluk neni hataholi Yahudi uma huhule-haladoin neu. Nai ndia, Ana nita hataholi esa liman seli kamates.
Markus 3:1-19
2 Nai ndia boe oo, hambu hataholi hida lasanggak dalak fo soli salak neu Yesus. De ala malok lakandondoo henin Ndia, fo sangga bubuluk Ana tao nahai hataholi ndia, nandaa no fai hahae tao ues do, taa.
3 Boe ma Yesus noke hataholi liman seli kamates ndia nae, “Mai fo mambadeik muu mata ia.”
4 Boe ma Ana natane basa hataholi la sila nae, “Mete ma tungga ita anggaman heti-heun, na, ita bole tao hata, nandaa no fai hahae tao ues? Ita tao malole do, taa? Ita tao tahai hataholi do, tao tisan?” Tehuu basa sala kada nee-nee.
5 Boe ma Yesus dalen hedis nalan seli, huu ala tao kada a'afik neu sila heti-heun, tehuu ta tao a'afik neu hataholi liman seli kamates ndia. Boe ma Ana luli, de nakabubulak matan ndule basa sala. Basa boe ma Ana nafada hataholi ndia nae, “Look o limam mai leo!” Hataholi ndia look liman neu, de ana hai tutik.
6 Boe ma hataholi Farisi la sila kalua la'o ela uma huhule-haladoik ndia. De leu lala halak lo Herodes paltei politik hataholin fo ala sangga dalak tao lisa Yesus.
Lamatuak Yesus tao nahai hataholi no'uk leme dano bifin
7-8 La'i esa, Yesus no ana mana tunggan nala la'o heok leni dano Galelea bifin leu. Tehuu hataholi no'uk kala lamanene hata fo Ana taok so, huu ndia de basa sala leme nggolo-nggolok mai fo ala tunggan. Ala leme propensi Galelea, propensi Yudea, ma propensi Idumea mai. Hambu hataholi fe'ek kala leme kota Yerusalem, kota Sidon, ma kota Tirus mai. Ma hambu hataholi fe'ek kala leme lee Yarden dulu mai boe. Basa sala sangga Yesus fo latonggo loon. 9 Huu hataholi la no'un seli, losak Yesus nadenu ana mana tunggan nala sadia feen ofak esa. Ana nau kokolak nai ofak lain, fo suek basa sala lamanene, ma ala bisa litan no malole.
10 Makahulun Ana tao nahai nitak hataholi kamahedik no'uk. Huu ndia de hatematak ia basa hataholi kamahedik kala mai lakaseseti, fo nau kame la'en.a 11 Ledo-eik hataholi nitu nalak kala lita Ndia, boe ma ala bala leu dae neu Yesus matan. De ala lakau lae, “O ia, memak Manetualain Anan!”
12 Tehuu Ana ka'i nisak kasa nae, “Ei boso mafada hataholi esa boe mae, Au ia see!”
Lamatuak Yesus hele nala hataholi sanahulu dua dadik Ndia ana mana tunggan
13 Basa boe ma Yesus nda'e neni letek esa lain neu. Ana noke nala hataholi hida fo nandaa no Ndia dale hihiin. De ala leni matan leu. 14 Boe ma Ana hele nala hataholi sanahulu dua. De nafada sala nae, “Au hele ala ei fo tungga mahele Au, fo dadik miu Au nadedenung. Au boe oo sangga adenu ei, fo miu mafada Manetualain hehelun neu basa hataholi lala'en. 15 Ma au sangga fee koasa neu ei, fo ei bisa husi heni nitu la leme hataholi la mai.”
16-19 Hataholi kasanahulu duak kala sila naden nala, sila:
Simon (fo Yesus foin nade Petrus boe),
Yakobis,
Yohanis, (Yakobis no fadin Yohanis ia, na Sabadeus anan nala. Yesus foi dua sala nade ‘Boanerges’, fo ndandaan ‘sama leo tatas’),b
Anderias,
Filipus,
Bertolomeos,
Mateos,
Tomas,
Yakobis (fo Alfius anan),
Tadius,
Simon (fo mana tungga paltei politik Selot),c
ma Yudas Iskariot (ndia ia dei fo se'o heni Yesus).
Mese anggama la soli salak leu Lamatuak Yesus lae, nitu la malanggan fee koasa neu Ndia
20 Basa boe ma Yesus no ana mana tunggan nala loe fali leme letek ndia lain mai. De ala maso leni uma esa dalek leu. Tehuu hataholi no'uk kala mai lakaseseti lala Ndia bali, losa Yesus asa ta hambu lelak fo la'a so bali.
Markus 3:20-35
21 Hataholi la lita leo ndiak, boe ma lae, “Mete sudik Yesus dei. Ana nafalende faduli aon so.” Huu ka'a-fadin nala lamanene hataholi la kokolak leo ndiak, de ala sangga mai lala falik Ndia.
22 Faik ndia, mese anggama la leme Yerusalem mai de lafada hataholi malai ndia lae, “Wei! Ei boso kada tungga-tungga mia Yesus ndia. Ana bisa husi heni nitu leo ndiak, huu Ana hambu koasa neme nitu la malanggan mai, fo hataholi lateme loke lae Balsebuul.”d
23 Yesus namanene leo ndiak, boe ma Ana noke nala basa sala de nafada nae, “Ta masok langga utek! Talo bee fo nitu la malanggan bisa husi seluk ndia aon? Ta bisa! 24 Mete ma nai nusak esa, lau-inggun nala lahuu, na talo bee fo nusak ndia bei bisa nakatataka? Ta bisa! 25 Ma mete ma uma isi la lasii-lala'u ao esa no esa, na talo bee fo ala bei bisa lakatataka? Ta bisa! 26 Leo ndiak boe oo, mete ma nitu la esa musu no esa, na, neu ko ala lasidak. Mete ma leo ndiak, na, basa sala lakalulutuk!
27 Mete ma mana mamoak esa sangga mai namoa buas nai hataholi balakaik esa uman, na, ana musi hengge nisak maumak ndia dei. Basa ndia, bei fo ana bisa namoa nala hataholi ndia buan nala.e
28 De Au afada memak ei: Manetualain sadia koka heni hataholi la sala-singgon nala so. Ma mete ma hataholi kokolak manggalauk neu hataholi fe'ek, na, Manetualain bei fee ambon neun. 29 Tehuu mete ma hambu hataholi nambalani kokolak manggalauk neu Manetualain Dula-dale Malalaon, na, Manetualain ta fee ambon neun losa dae-bafok fai babasan.”f
30 Yesus nae leo ndiak, huu ala kee-dede lala Ndia lae, “Hataholi ndia nitu nalak so!”
Hataholi fo mana tungga Manetualain hihiin, na, sila ndia Lamatuak Yesus bobonggi teteben
31 Basa boe ma Yesus inan no fadin nala leni uma ndia leu, fo sangga latonggo loon. Nai ele, ala lambadeik kada deak, de ladenu hataholi neu noke Yesus. 32 Ledo-eik Yesus nanggatuuk nakokola no hataholi no'uk kala, boe ma hataholi mai nafada nae, “Ama! Ama inam no fadim mala lai deak. Ala sangga latonggo lo Ama.”
33 Tehuu Yesus nataa nae, “Au inang ma Au tolanoo tetebeng sila, see?”