Lamatuak Yesus Tutui Malolen
tungga
Markus
1
Tutui malole ia. Manetualain Anana tutuin ia. Ndia naden Yesus Karistus, fo Manetualain tudu memak kana neme makahulun ele mai so. Tutuin natahuhuun leo iak:
Markus 1:1-13
Yohanis Mana Salanik soi dalak fee Lamatuak Yesus
2 Yesus bei ta mulai tao Ndia uen, tehuu Manetualain nadenu nakahuluk hataholi esa so, nade Yohanis. Yohanis musi neu sadia dalak soa-neu Yesus mamain. Huu makahulun ele Manetualain pake mana kokolan esa so, nade ba'i Yesaya. Ana sulak memak kana so nae:
“Mamanene bou! Au adenu Au hataholing esa neu soi dalak fee O.b
3 Dei fo hataholi ndia neu leo nai mamana nees esa, fo nanggou nae:
‘Basa hataholi mahehele fo tao neulalau dalak, fo simbok Lamatuak mamain!
Tao mandoo dalak fo simbok Ndia.”’c
4-6 Hataholi la lateme loke Yohanis, Mana Salanik. Ana leo nai mamana nees. Balo'an, nana taok neme banda onta bulun mai. Kalikeen, nana taok neme banda loun mai. Ndia nana'a-nininun, lamak ma fani oe nula. [Yohanis dala sodan ia, sama leo ba'i Elia nai fai makahulun ele.]d
Faik ndia, hataholi la no'uk leme kota Yerusalem mai, ma basa propensi Yudea isin nala, mai latonggo lo Yohanis nai ndia mamanan. Ala mai fo sangga lita Yohanis ma lamanene nanonolin. Yohanis nafada sala nae, “Ei musi manaku ma la'o ela basa ei sala-singgom mala, fo suek Manetualain koka heni sala-singgok kala sila. Ma ei musi salani dei, fo dadik tanda nae, ei malole mia Manetualain so.”
Hataholi la lamanene basa leo ndiak, boe ma ala manaku sala-singgon nala, de ana salani sala leme lee Yarden.
7 Ana nafada nae, “Dei fo hambu Hataholi esa, ana selin lena heni au, sangga mai. Mae kada dadik neu Ndia atan boe oo, au ta andaa.e 8 Au bisa salani ei unik kada oe mesan, tehuu dei fo Ana tao lena heni au, huu Ana tao nahenu ei dalem mala no Manetualain Dula-dale Malalaon.”
Yohanis salani Lamatuak Yesus
9 Faik ndia, Yesus neme nggolo Nasaret mai nai propensi Galelea, fo natonggo no Yohanis. Boe ma Yohanis salani Ndia neme lee Yarden. 10 Ledo-eik Yesus kalua neme oe dale mai, tutik nita lalai natahu'ak. Basa boe ma Manetualain Dulan sama leo mbui lunda esa, konda neu Yesus. 11 Boe ma lamanene Manetualain halan neme lalai mai nae,
“O ia, Au Ana susueng.
O tao mamahoko Au daleng taa-taa.”f
Nitu la malanggan soba-dou Lamatuak Yesus neme mamana nees
12 Basa boe ma Manetualain Dulan hela noo Yesus neni mamana nees esa neu. 13 Nai ndia hambu banda fui la boe. Yesus leo nai mamanak ndia, faik haa hulu. Nai ndia, nitu la malanggan mai soba-dou Yesus fo suek Ana tungga ndia, tehuu ta nala sana. Basa boe ma Manetualain ata nusa sodan nala mai ono-lau Ndia.
Lamatuak Yesus neni Galelea neu, fo natudu Manetualain dala sodan
14 Fai maneuk, ala landee Yohanis Mana Salanik neni bui dale neu, boe ma Yesus neni propensi Galelea neu, fo Ana tui-bengga Manetualain Hala Malolen nai ndia.
Markus 1:14-45
“Mamanene baa! Hatematak ia Manetualain fain losa so!
Hatematak ia basa hataholi la bubuluk lae, Manetualain to'u palenda so.
Huu ndia de ei musi hahae mima ei pepekom mala mai leo,
fo fali miu tungga Manetualain.
Basa ndia, na mamahele miu Ndia Hala Malolen ia leo.”g
Lamatuak Yesus noke mana dolu-dala la fo tungga Ndia
16 Faik esa, Yesus la'ok tungga dano Galelea bifin. Ana nita hataholi esa, nade Simon, no fadin, nade Anderias. Dua sala dala i'ak. Sila uen tungga-tungga faik ndindia. 17 Yesus noke sala de nae, “Wei! Mai fo tungga Au leo. Ei mateme sangga i'ak tungga-tungga faik, tehuu hatematak ia Au sangga tao ei dadik miu mana sangga samanek.” 18 Dua sala lamanene leo ndiak, boe ma ala fo'a la'o ela sila dalan nala, de leu tungga memak Ndia.
19 Basa boe ma Yesus la'ok nakandoo faa, de nita Sabadeus anan nala. Ka'ak nade Yakobis ma fadik nade Yohanis. Dua sala lafafa'u dalan nala lai ofak lain. 20 Yesus noke dua sala nae, “Wei! Mai fo tungga Au.” De dua sala la'o ela aman no hataholi mana tao ues lai ofak lain. Boe ma leu tungga Ndia.
Lamatuak Yesus husi heni nitu neme hataholi esa mai nai kota Kapernaum
21 Boe ma Yesus no hataholi kahaak kala fo mana tungga Ndia, la'ok losa kota Kapernaum. Neu faik fo hataholi Yahudi la fai huhule-haladoin,h boe ma Yesus maso neni uma huhule-haladoik dale neu, de fee nanonolik nai ndia. 22 Basa hataholi la lamanene Ndia kokolan, boe ma ala heran lalan seli, huu Ana bubuluk tebe-tebe nanonolik ndia isin. Ndia ta sama leo hataholi Yahudi la mesen nala.i
23 Faik ndia, hambu hataholi nitu nalak esa. Ndia boe oo maso neni uma huhule-haladoik dale neu, boe ma nitu manai hataholi ndia dalek nakau nae, 24 “Wei! Yesus, hataholi Nasaret! O dede'am hata mua ai! O mai fo sangga tao makalulutu ai, do? Ai malelak O. O ia, ndia Hataholi Malalaok fo makahulun Manetualain helu fo nadenun mai.”
25 Tehuu Yesus nasapalak kana nae, “Seu o bafam! Kalua muma hataholi ndia dalek mai leo!”
26 Boe ma nitu ndia tao nala hataholi ndia le'a nalan seli. De ana kalua neme hataholi ndia dalek mai ma nakau tingga-tingga. 27 Basa boe ma basa hataholi malai uma huhule-haladoik ndia dalek heran lalan seli. Boe ma basa sala lakokola lae, “Awii! Hata ia bae? Ana palenda nitu la fo ala kalua, boe ma ala tungga Ndia hihiin. Nanonoli beuk ia, hetu maa? Tou lasik ia Dede'a-kokolan ana seli maa!”
28 Boe ma hataholi la mulai tui lafeok neme bafak mai neni bafak neu, losa natanggela nai basa nggolok kala malai propensi Galelea ndia.
Lamatuak Yesus tao nahai Petrus ali-inan ma hataholi no'uk kala
29 Ledo-eik ala kalua leme uma huhule-haladoik dale mai, boe ma Yesus neni Simon no Anderias uman neu. Yakobis no Yohanis leu no'u loon. 30 Nai ndia, Simon ali-inan sumai, de nakambe'uk nai koi lain. Ledo-eik Yesus no ana mana tunggan nala leni uma dale leu, boe ma hataholi la mai lafada lae, “Ina lasik sumai.”
31 Basa de Yesus neu tilo ina lasik ndia, boe ma Ana to'u nala liman, de nafofo'an. Boe ma ina lasik sumain mopon tutik. Basa boe ma ina lasik kalua, de neu ono-lau sala.
32 Neu faik fo ledo mulai tesa, boe ma hataholi la loo basa sila hataholi kamahedin ma hataholi nitu nalak kala leni Yesus mai, fo loke tulu-falik. 33 Losa basa hataholi la kota esa isin nala mai lakahohombu lai uma ndia pasan. 34 Hataholi la sila hedin nala mata-matak kala, tehuu Yesus tao nahai basa sala. Ma Ana husi kalua heni nitu makadotok nalan seli. Tehuu Ana ta mbo'i nitu la sila kokolak, huu lalelak Ndia.
Lamatuak Yesus la'ok ndule basa nggolo fe'ek kala, fo tui-bengga Manetualain Hala Malolen
35 Neu fo'a mai lole mbilan, fo bei makikiu anak Yesus fo'a so, de Ana kalua neme uma ndia mai. Ana neni mamana nees esa neu, de Ana hule-haladoi, ma nakokola no Manetualain. 36 Ledo-eik Simon asa fo'a, tehuu ta lita Yesus, boe ma ala leu sanggan. 37 Ala latonggo lo Ndia, boe ma lafadan lae, “Ama, hataholi no'uk kala mai sangga Ama.”
38 Tehuu Ana nataa nae, “Ndia malole boe. Tehuu malolenak ita teni nggolo fe'ek teu dei fo mana dekak nai ia. Huu Au sangga tui-bengga Hala Malole neu sala boe. Te Au ueng ndia.”
39 Basa boe ma Ana la'ok ndule propensi Galelea ndia, de tui-bengga Manetualain Hala Malolen nai sila uma huhule-haladoin dale. Ma Ana husi kalua heni nitu la leme hataholi la mai boe.j
Lamatuak Yesus tao nahai hataholi kamahedi kusta esa
40 Faik ndia, hataholi kamahedi kusta esa neni Yesus mai. Boe ma ana sendek fo noke tulun Yesus nae, “Ama aa! Fali mala au dei! Huu au bubuluk Ama bisa tao mahai au heding ia, fo suek hataholi la boso nunute au. Sadi Ama nau.”
41 Basa boe ma Yesus tuda kasian neu hataholi ndia, boe ma Ana look liman neu fo kame la'en, de nafada nae, “Memak! Au nau! De o hai leo!” 42 Kada nggengge neuk, hataholi ndia hedin mopon. Boe ma ana hai tutik. 43 De Yesus nadenu hataholi ndia fali, ma Ana fee nasanenedak neun 44 nae, “Masanenedak neulalau! O hai ia so, tehuu ta bole mafada sudi see baa! O musi tungga ba'i Musa palendan dei. De muni malangga anggama muu, suek ana palisak o aom, fo ana mete o hedim mopo tetebes, do beik. Boe ma o musi fee tunu-hotuk, dadik tanda makasi, fo suek basa hataholi la bubuluk lae, o hai tetebes so.”k
45 Tehuu hataholi ndia kalua nala deak, boe ma neu tui nafeok sudi nai bee. Basa ndia, boe ma hataholi no'uk kala lasanggak fo latonggo lo Yesus, losak Ana ta bisa natudu matan nai kota ndia. De Ana leo nahele nai kada mamana nees manai kota deak. Tehuu hataholi la lafaan leme basa mamanak lala'en mai, fo ala nau latonggo lo Ndia.