Ina falu hata taak, fee doi kolete ina-huuk nalan seli
21
Neu faik fo Yesus fee nanonolik nai Uma Ina Huhule-haladoik, Ana nita hataholi kamasu'ik kala mbeda doi kolete neni peti derma neu. 2 Ndia boe oo nita ina falu hata taak esa, mai tungga hule-haladoi. Ana mbeda doik sen dua neni peti ndia neu. Doik ndia belin kada faa anak. 3 Basa de Yesus kokolak no ana mana tunggan nala nae, “Mamanene neulalau! Ina falu hata taak ia, mbeda doik kada sen dua, tehuu ana fee lena heni basa hataholi so. 4 Hataholi fe'ek kala sila mbeda doi kolete neme kada sila doi sisan mai. Tehuu ina falu ia, fee basa doin nala. Naa te doik ndia, na ndia doin fo nasoda nenik.”Lamatuak Yesus nafada la'e-neu Uma Ina Huhule-haladoik tutu'un
5 Faik ndia, Yesus ana mana tunggan nala kokolak koa Uma Ina Huhule-haladoik lae, “Ama! Mete sudik Uma ia lolen ana seli maa! Ala taon nenik batu-batu nana tatik ina-huuk ana seli, basa de ala lakatotodok lalan no malole. Ma hambu hataholi fee bua mabeli so, fo heu Manetualain Uman ia!”
Tehuu Yesus nataa nae, 6 “Uma ia memak malole. Tehuu ta dook bali, te hataholi la tao latu'u heni basa batu ia, losa bebelak neu dae.”
Fai toto'ak kala ma doidosok
7 Basa de Yesus ana mana tunggan nala latane lae, “Ama Mesen! Hata fo Ama kokolak isinaak ndia, meda dadi nai faik bee? Mete ma fain dekak so, na, dei fo ndia tandan nala leo beek?”
8 Boe ma Yesus nataa nae, “Sadi ei manea matalolole fo boso nana kedi nalak. Dei fo hambu hataholi mata-matak mai babamba kalan lae, ‘Au ia Karistus.’ Luma boe lae, ‘Dae-bafok fai babasan deka-deka mai so!’ Tehuu boso mamahele! 9 Mete ma ei mamanene halak nae, hataholi la tao nahuuk, ma latati nai sudi bee, na, boso bii. Memak basa sila musi dadi lakahuluk. Tehuu dae-bafok fai babasan bei ta losa.
10 Dei fo leo esa natati laban leo fe'ek. Nusak esa natati laban nusa fe'ek. 11 Dei fo hambu dae nangge'o nalan seli. Sudi nai bee hambu fai ndoes ana seli, ma hedi manggalauk napadaka nalan seli. Dei fo hataholi boe oo lita dede'ak, fo tao nala aon bulun nala lambadei, ma tandan nala ana seli nai lalai.
12 Basa dede'ak kala ia bei ta late'e, tehuu dei fo hataholi la humu lala ei, ma tao doidoso ei, huu ei mamahele Au. Basa de ala fee ei miu fo hataholi la lakaneni ei dede'am nai uma huhule-haladoik kala, ma kena ei nai bui dale. Sila boe oo ladenu ei miu masale manek ma mana palenda fe'ek kala. Basa ia dadi, huu ei tungga Au. 13 Tehuu ei musi pake lelak ndia fo mafada sala Au Hala Maloleng. 14 De boso dudu'a makahuluk mae, ei sili ei aom mala leo beek. 15 Huu dei fo Au afada ei dede'a de'ek mandaak fo sili ei aom mala. No leo ndiak, na, ei musum mala ta bubuluk lae hata bali.a 16-17 Dei fo hataholi no'uk binci nalan seli neu ei, huu ei tungga Au. Hambu neme ei bobonggi hehelim mai, leo ina-ama, ka'a-fadi, tolanoom mala ma ei nonoom mala. Dei fo hambu neme sila mai sangga dalak fo se'o heni ei, losa hambu luma leme ei mai nana tao nisak. 18 Tehuu ei boso bii, huu dei fo Manetualain ta nafalende heni ei. Langga buluk dook esa boe oo, ta bisa mo'u neme ei langgam mai, mete ma ta no Ndia hihiin. 19 Mete ma ei makatataka makandondoo henin, na, neu ko Manetualain nasala'e nala ei.”
Yerusalem tutu'un
20 Yesus kokolak nakadaik nae, “Mete ma ei mita musu la e'o lala kota Yerusalem so, na, ei bubuluk mae, ndia sangga nakalulutuk so. 21 Lita leo ndiak, na, hataholi malai propensi Yudea fo'a fo lalai leni letek leu leo. Hataholi malai kota boe oo fo'a lalai leo. Ma hataholi malai nggolok, na boso maso leni kota dale leu bali. 22 Huu Manetualain haitua fai toto'ak kala sila fo huku hataholi fo ta mana nau lamanene Ndia. Basa sila dadi nandaa no hata fo Manetualain mana kokolan sulak memak neme makahulun mai so.b 23 Faik ndia, hataholi kasian nala, ndia inak kailus, ma ina mana masusu ana mbimbila anak. Faik ndia, dae-bafok katematuan hambu toto'ak, ma basa hataholi Yahudi hambu doidosok belak, huu Manetualain luli sala. 24 Dei fo musu tao lisa sila luma, ma humu lala luma, fo dadik ata sudi lai bee nai dae-bafok ia. Boe ma hataholi nusa fe'ek fo ta lalelak Manetualain, mai heheta tao langgenggeo kota Yerusalem, ma koasa basa kota isin, losa basa sila fain.”
Hataholi Isi-isik mamain
25 Basa boe ma Yesus nafada la'e-neu Ndia fafali main nae, “Mete ma Hataholi Isi-isik sangga fali main so, na, dei fo hambu tandan nala kalua nai ledo, nai bulak, ma nai nduuk kala. Nai dae-bafok boe oo hambu tanda, fo ndia tasi foe, ani makaluluuk, ma lii mbombonuk hene mai. Basa ia tao lala hataholi la bii ma lamanggonggoak, losa ala ta bubuluk tao hata bali.c 26 Koasa malai lalai, fo ndia ledo, bulak ma nduuk kala langge'o kii-konak, dulu-mulik. Hataholi lita leo ndiak, boe ma ala bii lalan seli, huu dae-bafok sangga hambu soe so! 27 Basa ndia, bei fo hataholi lita Au, ‘Hataholi Isi-isik, konda mai ua ko'as.’ Au konda ua koasa, ma basa Au mandela-masa'ang.d 28 Mete ma basa tanda ia mulai dadi so, na, ei botik ei langgam leo, huu Manetualain fain losa so, fo nasala'e nala ei.”
Nakandandaak neme ai mai
29 Basa boe ma Yesus tui nakandandaak esa nae, “Ei mete neulalau ai la. 30 Mete ma doon nala mulai kuni so, na, ndia dadik tanda nae, fai hanas deka-deka mai so. 31 Leo ndiak boe no fai toto'ak kala. Mete ma ala sadu mai so, na, ndia dadik tanda nae, Manetualain palendan deka-deka mai so.
32 Au afada memak! Neme basa hataholi fo bei lasoda hatematak ia, dei fo hambu luma bei ta mate, huu fai toto'ak kala sadu mai so. 33 Mae lalai no dae-bafok mopo so, tehuu Au Dede'a-kokolang nahele nakandoo.”
Ei paluu manea Lamatuak mamain
34 Basa boe ma Yesus tuti kokolan nae, “Manea neulalau, huu kada nggengge neuk Au sadu mai so! Boso losak ei ta dudu'a no teteben so bali, boe ma kada ei masoda mia minu mafuk, ma masambute sangga soda namahokok. Boso losak ei ta tanda malelak ndia tandan, huu ei masambute mia dede'a fe'ek. 35 Boso dudu'a mae ta la'e ei. Huu Au mai kaiboik. Ma mete ma Au fali maing, ta hambu hataholi esa boe bisa kekek neme Au matang mai. 36 De manea taa-taa. Hule-haladoi, na boso no namaketuk, fo suek ei bisa makatataka nai basa to'a-taak ndia. No leo ndiak, mete ma Au fali maing so, na, ei ta mae mambadeik nai Hataholi Isi-isik matan.”