2 Faik ndia, Yohanis nai bui dale so. Ledo-eik ana namanene basa dede'ak kala fo Yesus tao kala sila so, boe ma nadenu ana mana tunggan nala fo leu latane Yesus lae, 3 “Manetualain helu memak neme makahulun mai so nae, Ana sangga nadenu Karistus mai, fo nasala'e nala ita hataholi Yahudi la. De Ama ia, ndia Karistus, do? Do, ai musi mahani hataholi fe'ek bali?” Sila natatanen neu Yesus leo ndiak.

4 Yesus namanene leo ndiak, boe ma nataa nae, “Ei mamanene aom so, ma mita aom so. De fali fo mafada ka'a Yohanis mae, basan mana dadik so, tungga hata fo Manetualain mana kokolan Yesaya sulak memak kana so nae:

6 De leo iak: miu mafada ka'a Yohanis, huu dei fo ana naua-nanale, mete ma ana namahele nakandoo neu Au. Huu dei fo Manetualain fee baba'e-babatik neu hataholi fo namahehelen neu Au ta nangge'o!”

7 Ledo-eik Yohanis ana mana tunggan nala fali, boe ma Yesus kokolak neu hataholi no'uk kala la'e-neu Yohanis nae, “Neu faik fo ei miu sangga Yohanis nai mamana nees ndia, na, ei dudu'a mae sangga matonggo mia hataholi mata leo beek? Ta dadi ei mini ele miu, fo matonggo mia hataholi mana noe-na'uk, fo sama leo oo fo mana mbeu neu-mai tungga kada ani! 8 Ma ta dadi ei miu mita hataholi mana pake balo'a mabeli, huu hataholi mata leo ndiak, kada ana leo nai uma manek! 9 De ei miu mita hataholi mata leo beek nai ele? Ei dudu'a mae ei miu sangga Manetualain mana kokolan? Tetebes! Tehuu ndia ndia, mana kokola manai lain seli. 10 Huu Manetualain Susula Malalaon sulak memak la'e-neu Yohanis nae,

11 Mamanene neulalau baa! Nai dae-bafok ia, ta hambu hataholi esa boe, fo lena heni Yohanis. Tehuu neme basa hataholi mana manaku nitak Manetualain leo Manek, na, hataholi manai dae nalan seli, lena heni Yohanis so. 12 Mulai neme Yohanis tao ndia uen losa hatematak ia, hataholi makadotok kala maso dadik Manetualain enan. Tehuu hambu fe'ek luma bali dudu'a sala lae, ala musi latati fo lakaseti hataholi maso dadik Manetualain hataholin. 13 Losa Yohanis Mana Salanik mamain, ita hataholi Yahudi la tateme tasoda tungga ba'i Musa ma Manetualain mana kokolan nala heti-heun.^c 14 De kada mamahele neu Au! Yohanis ndia, na ndia Elia fo Manetualain mana kokolan nala lafada memak la'e-neu ndia mamain so.^d 15 De mana mahiik bubuluk, na mamanene neulalau baa!

16 Au sangga fee nakandandaak fo suek ei bubuluk, hataholi hatematak ia, hataholi mata leo beek. Huu sila ndia, sama leo kakanak kala mana manggatuuk lai pasak. Ala lambue langgou sila nonoon nala lae,

18 Ei ia, sama leo kakana anak kala fo ta lameda dai lalelak. Neu faik fo Yohanis mai, nateme puasa, ma ta ninu anggol. Boe ma hataholi la cap ndia lae, ‘Ndia nitu nalak!’ 19 Tehuu hatematak ia, Au, Hataholi Isi-isik ia, mai so. Au ta puasa, ma Au inu anggol. Boe ma hataholi la cap Au lae, ‘Ndia ndia, memak hataholi balena'ok! Mana mafu funak bali! Ana neu nanonoo no mana susu bea la! Ana paltei esa no hataholi papake taak kala! Ta nameda aon bali!’ Tehuu ei tanda Au kokolang ia leo baa! Manetualain malelan nana nitak nai Ndia hataholin nala sodan.”

20 Basa boe ma Lamatuak Yesus sapa hataholi fo mana leo lai nggolok hida. Ana tao tanda heran no'uk lai ele so, tehuu ala ta nau la'o ela sila sala-singgon nala fo tungga Manetualain dala ndoon. 21 Yesus sapa nae, “Ei hataholi Korasin ma hataholi Betsaida la! Mata neuk baa! Dei fo ei hambu soe! Au tao tanda heran mata-matak kala neu ei matam mala so, tehuu ei ta nau mamahele neu Manetualain. Naa te ei ia hataholi Yahudi, fo manaku malelak Manetualain. Tehuu leo tanda heran nala sila fo Au taok kala lai ei nggolom mala, dadi nakahuluk nai kota Tirus ma kota Sidon, na, doo basa ia de hataholi malai sila la hondak tutik, ma ala la'o ela sala-singgon nala, de ala tungga Manetualain. Ma sila boe oo pake balo'a fafaluk, ma tao afu neu langgak fo dadik tanda nae, ala fale dalen nala neu sila sala-singgon nala. Naa te hataholi Tirus ma hataholi Sidon nala ia, ta hataholi Yahudi la, fo ala manaku lalelak Manetualain.^e 22 Tetebes! Dei fo kada ei mete leo! Mete ma Manetualain naketu basa hataholi la dede'an nala, na, hataholi Tirus ma hataholi Sidon nala huhukun bei da'un lena heni ei huhukum mala.

23 Ei hataholi Kapernaum! Mata neuk baa! Ei boso dudu'a mae, dei fo Manetualain so'u nala ei maso mini nusa sodak miu? Taa! Dei fo Manetualain mbia heni ei maso mini naraka miu! Leo tanda heran nala fo Au taok kala neu ei nggolom mala dadi nakahuluk nai kota Sodom so, na, Manetualain ta paluu tao nakalulutu kota manggalauk ndia. Huu mete ma hataholi Sodom lita tanda heran nala sila, na, ala la'o ela sila manggalaun nala.^f 24 Tetebes! Dei fo kada ei mete leo! Mete ma Manetualain naketu basa hataholi la dede'an nala, na, hataholi Sodom huhukun da'un lena neme ei huhukum mai!”^g

25 Yesus kokolak basa leo ndiak, boe ma Ana hule-haladoi nae, “Ama! Ama fo maena haak palenda basa-basa malai lalai ma dae-bafok. Au oke makasi no'uk, huu Ama tatana mala basa dede'a huhukuk neme hataholi mana taok aon malelak, ma mana koao la. Tehuu Ama makambela basa dede'ak kala sila neu hataholi kadi'ik kala, ma hataholi dale kadi'i-taidaek kala. 26 Tetebes, Ama! Huu ndia ndia tao nala Ama dalen namahoko!”

27 Hule-haladoi nate'e leo ndiak, boe ma Yesus nafada hataholi malai sila nae, “Mamanene neulalau baa! Au Amang nai nusa sodak fee Au basa koasa la. Mana bubuluk neulalau neu Au, na, kada Amak. Ma mana malelak neulalau Amak, na, kada Ama Anan mesak kana, fo ndia Au ia. Ma Au hele hataholi fe'ek kala fo afada sala, fo suek lalelak neulalau Ndia.^h

28 Basa ei mana mangguk tao ues tingga-tingga, mai tungga Au! Basa ei mana lemba dede'a mabela, mini Au mai! 29 Mete ma ei simbo Au nanonoling fo la'ok no'u mia Au, na, ita ia, sama leo sapi luku dua fo hela no'u luku esa. Huu Au daleng malole ma kadi'i-taidaek. Mete ma ei tungga Au, na, ei matea masafali.ⁱ 30 Huu Au nanonoling lofo anak. Ma Au palendang ta mabela.”