4 Yesus kokolak nakadaik nae, “Ana nggala ei! Boso bii mete ma hataholi sangga tao lisa ei. Huu kada ala bisa tao lisa ei aom, tehuu ta bisa tao hata-hata neu ei samanem. 5 Au sangga afada ae, ei musi bii see. Ei musi bii Manetualain. Huu Ndia ndia bisa tao nisa ei, boe ma mbia ei mini naraka miu. De ei musi bii tebe-tebe Ndia.

6 Ei dudu'a sudik kana, mbui hadek belin hida? Belin da'uk nalan seli, hetu?! Mbuik lima, na doik sen dua, hetu? Mae leo ndiak, tehuu Manetualain ta nafalende heni mbuik esa boe. 7 Leo ndiak boe oo, Manetualain tao dalek neu ei. Ana bubuluk no teteben langga buluk hida lai ei langgam. De ei boso bii, huu Manetualain timba-tai ei lena heni mbui hadek makadotok sila.”

8 Boe ma Yesus kokolak bali no ana mana tunggan nala nae, “Pasa neulalau ndi'i dook! Mete ma hambu hataholi nambalani manaku Au nai hataholi no'uk matan nai dae-bafok ia, na, dei fo Au boe oo manakun nai Manetualain ata nusa sodan matan ae, ndia ndia, Au hataholing. 9 Tehuu mete ma hambu hataholi kokolak nai hataholi matan nae, ndia ta nalelak Au, na, dei fo Au kokolak nai Manetualain ata nusa sodan matan ae, Au ta alelak ndia boe.

10 Au ia, Hataholi Isi-isik. Mete ma hambu hataholi kokolak naboboo Au nade maloleng, na, Manetualain bei sadia nafalende heni ndia sala-singgon. Tehuu mete ma ana kokolak naboboo Manetualain Dula-dale Malalaon nade malolen, na, Manetualain ta nafalende heni ndia sala-singgon.^c

11 Dei fo mete ma hataholi hela ei mini mamana naketu dede'ak anggama miu, do mini hataholi mana to'u palenda la miu, huu ei mamahele Au, na, ei ta paluu bii masala'e aok leo beek. 12 Dei fo neu faik ndia boe oo, Manetualain Dula-dale Malalaon nanoli dede'a de'ek mandaak fo ei mataa sala.”^d

13 Basa boe ma esa neme hataholi no'uk kala mai natane Yesus nae, “Ama Mesen! Tulun madenu au ka'ang, fo ana ba'e no au, ai aman pusakan.”

14 Tehuu Yesus nataan nae, “Wei! See so'u nala Au, dadik Mana Maketu Dede'ak fo aketu ei dua nggei dede'am mata leo ndiak?”

15 Boe ma Yesus kokolak neu hataholi no'uk kala nae, “Ei musi mata neuk, fo boso masanggenggeu. Huu hata no'uk, ta tanggon masoda mole-damek.”

16 Basa boe ma Ana tui nakandandaak esa nae, “Hambu hataholi kamasu'ik esa, osin buna-boan makadotok. 17 Losak ndia kama mbembeda nana'an nala lakase'e so, ma ta bubuluk sangga tao leo beek bali. 18 Basa de ana naketun nae, ‘Au sangga tao leo iak leo! Au ofe heni kama mbembeda nana'a laak kala, fo ambadedei ina-huuk lena, boe ma mbeda au osing buna-boan, ma basa hata-heto fe'ek leu ndia. 19 Mete ma leo ndiak so, na, dei fo au kokolak ua au ao heheling ae, “Wei! Kama mbembeda nana'ak henuk so! Nana'ak dai so, fo mu'a losa teu-teuk. De mu'a-minu malada-malada ma pepedo eik no namahokok leo!”’ 20 Tehuu Manetualain nafadan nae, ‘Wei! O nggoam, dei! Le'odaen ia boe oo, o mate. De see ndia hambu basa o kama mbembeda nana'am isin nala?’

21 De leo iak! Hataholi kada bisa nakaduduluk hata-heto makadotok nai dae-bafok ia, soa-neu ndia ao-ina hehelin, tehuu nai Manetualain dudu'an, na ndia ndia hata taak, huu ta mole no Manetualain.”

22 Basa de Yesus nanoli nakadaik ana mana tunggan nala nae, “Ei boso masambute mia ei soda basa fain la'e-neu sangga mi'a hata, do pake hata. 23 Huu ita sodan ia, lena heni hata fo ita ta'a, ma hata fo ita pake. 24 Mete sudik mbui kaa nggeok kala! Ala ta sele-nggali, ta ketu-kolu, ta laena kama mbembeda nana'ak, tehuu Manetualain nakaboi sala. Mete ma leo ndiak, na, neu ko Ndia boe oo bisa nakaboi ei, huu Ana timba-tai ei belim lena heni mbuik kala sila. 25 Mete ma hataholi nambadeik neu titilok matan, boe ma nasambute no ndia ao-inan, na, meda ana bisa tao namanalu ndia sodan, do? Ta bisa! 26 De mete ma nasambute no kada dede'a kadi'ik leo ndiak, na, ta neni buna-boak hata-hata, hatina de ei bei nau masambute mia dede'a ina-huuk kala bali? Ndia nanalan hata?

27 Mete sudik bungga nula. Ala ta tao osi, ma ta tenu sidi. Tehuu mane Soleman balo'an fo neulaun ana seli boe oo, ta bisa laban bungga nula lolen.^e 28 Manetualain nakaboi na'u ana fo sosoan taa, fo kada nasoda faik ia, boe ma fo'a maten, fo hataholi mbian neni ha'i dale neu. Mete ma leo ndiak, na, Ndia boe oo bisa nakaboi ei fo belin lena heni na'u ndia. Hatina de ei ta masalai tebe-tebe neu Ndia? 29 Leo ndiak boe, ei ta paluu masambute mia kada dede'a nana'a-nininuk. Huu dei fo Manetualain nakanenin. 30 Hataholi fo ta mana nasalai neu Manetualain, ala mbilu-mbuse fo lakaneni basa dede'ak sila. Tehuu ei boso leo ndiak, huu ei Amam manai nusa sodak bubuluk basa hata fo ei paluuk so. 31 Mete ma ei makalala'ok Manetualain uen, dei fo Ndia boe oo nakaneni dede'ak kala ia fee ei.”

32 Boe ma Yesus tuti bali nae, “Ei sama leo bi'i-lombo bubua anak esa, fo balakain ta faa boe. Tehuu boso bii! Huu ei Amam nai nusa sodak ndia, Mane Ina-huuk. Hata fo Ndia enan, na Ana namahoko feen neu Ndia ana susuen nala. 33 De miu se'o heni ei buam mala, basa na, doin baba'en neu hataholi hata taak kala. No leo ndiak, ei mbeda hata-heto nai nusa sodak, nai mamana sodak, ma nahele nakandoo. Na'o ta bisa neu namana'o nalan. Hihinggi boe oo ta bisa na'a nakalulutun. 34 Masaneda neulalau! Ei hata-hetom lai bee, na, ei dalem lai ndia boe.”

35-36 Yesus kokolak bali nae, “Leledo-le'odaen, ei musi mahehele fo ono-lau Manetualain. Sama leo ata be'e nahani maumak fali neme feta kabin mai. Mete ma maumak dedele lelesu, na, ana bisa soi lelesu no lai-laik.^f 37 Mete ma maumak mai, de nita ndia hataholi mana tao uen nala lahani leo ndiak, na, neu ko ala laua-lanale. Huu dei fo maumak mesak kana natudu dale malolen neu sala. Ana pake balo'a tao ues, boe ma neu ono-lau hataholi mana tao ues sala no nana'a malada. 38 Hataholi mana tao ues sala sila memak laua-lanale, huu ala ono-lau maumak no malole. Mae maumak mai sudi li'u hida, fatiladak do, lole mbilak, sila lahehele taa-taak.

39 Dudu'a neulalau! Mete ma hambu maumak bubuluk no teteben li'u hida na'o mai, na, neu ko ana ta fee lelak neu na'o ndia, fo ofe uman. 40 De ei musi mahehele taa-taa, huu ta hambu hataholi esa boe bubuluk no teteben, faik bee ndia Hataholi Isi-isik fali main.”^g

41 Boe ma Petrus natane Yesus nae, “Ama Mesen! Ama nakandandaan isinaak ndia, kada la'e ai mesa nggai do, la'e basa hataholi la?”

42-44 Boe ma Yesus nataa nae, “Nakandandaak ndia la'e basa hataholi fo taok sama leo malangga makanenik, fo nalelak nakaneni no dale katemak neu ndia malanggan. Huu dei fo ndia malanggan so'u nalan, fo ba'e nana'ak fee hataholi mana tao ues fe'ek kala. Mete ma ana manggate tao tungga ndia uen leo ndiak, na, mae sudi faik bee ndia malanggan mai, tehuu ana tao dede'a tetebes taa-taa. Ana naua-nanale, huu ndia malanggan dei fo so'u nalan, fo nakaneni basa ndia hata-heton.

45 Tehuu soe, mete ma malangga makanenik mulai dudu'a nae, ‘Eh! Neu ko bei dook bei fo tou lasik fali.’ Boe ma ana mulai mbomboko hataholi mana tao ues fe'ek kala, touk ma inak. Basa de ana nanggatuuk na'a-ninu no namahokok losa mafuk. 46 Tehuu la'i esa, malangga makanenik ta du'a la'en, te nggengge neuk malanggan fali. Ledo-eik malanggan bubuluk dede'ak kala sila, boe ma malanggan mbombokon, de husi henin fo ana hambu baba'ek nai deak sama-sama no hataholi ta dale katemak, fo ta mana tao tungga malanggan hihiin.

47 Huu hataholi mana tao ues fo bubuluk ndia malanggan hihiin, tehuu ta nahehele tao tunggan do, ta nau tao tunggan, na dei fo ana hambu huhuku belak. 48 Tehuu hataholi mana tao ues fo tao ues sala, huu ta bubuluk malanggan hihiin, dei fo ana hambu huhuku ta mabela. Huu hataholi mana simbo no'uk so, ndia natataan no'uk boe. Hataholi mana simbo ues ina-huuk, ndia tanggon-natataan ina-huuk boe.”

49 Yesus tuti kokolan nae, “Au mai fo tada kofe'ek Au hataholing leme hataholi fe'ek mai lai dae-bafok ia. Ndia sama leo hataholi pake ha'i, fo hotu heni kadafuk. Au hihiing, mete ma ha'i ndia mulai mbila sudi nai bee so. 50 Tehuu Au musi lemba doidoso mabela ndia nakahuluk. Dei fo Au doidoso tebe-tebe losa Au ueng nate'e so.^h 51 Ei mae hetuk Au mai uni dame nai dae-bafok ia, do? Taa! Au mai fo tao hataholi la lasisimbo bafak, ma tao hataholi la latanggelak huu Au nanonoling. 52 Mulai neme hatematak ia mai, hataholi ka'a-fadik kala latanggela. Nai bobonggik esa na, telu laban dua, dua laban telu.

54 Boe ma Yesus kokolak neu hataholi no'uk kala sila nae, “Mete ma ei mita ko'a makate sadu nai muli, na, ei mae, ‘Ia tanda nae, uda sangga mai so.’ Memak tetebes leo ndiak. 55 Mete ma ani konak fumbu mai, na, ei mae, ‘Ia tanda nae, leledon ia matobin ana seli.’ Memak tetebes leo ndiak. 56 Heeh! Ei hataholi mana dea-matak fo kokolak fe'ek, tehuu tao fe'ek! Ei bisa tanda malelak dae-bafok ia fai hanan ma fai oe faan hihiin. Tehuu hatina de ei ta nau malelak Manetualain hihiin nai lelek ia?”

57-58 Yesus kokolak nakadaik nae, “Mete ma ei madede'a, na, hatina de ei ta bisa maketu aom, bee ndia tetebes! Malolenak tao dame dei! Boso losak ei losa mana maketu dede'ak matan so, boe ma naketun ei maso mini bui dale miu. 59 Huu mete ma leo ndiak, na, neu ko ei ta bisa kalua, losa ei bae ketu ei hutam fo mana maketu dede'ak naketu basan ndia so.”