4 Tehuu ta hambu hataholi esa hu'a bafan. Boe ma Yesus daba hataholi kamahedik ndia, de ana hai tutik. Basa de Yesus nadenun fali. 5 Basa boe ma Yesus natane sala bali nae, “Mete ma hambu kakanak esa tuda neni oe dolu dale neu, nandaa no fai huhule-haladoik, na, ei miu hela kalua henin do, taa? Mete ma sapi tuda, na, ei elan do, hela kaluan? Neu ko ei hela kaluan. Ndia sosoan nae, ei tao ues so, hetu!”^a

6 Ala lamanene Yesus kokolak leo ndiak, boe ma ta hambu hataholi esa boe, bisa nataa Ndia.

7 Faik ndia, Yesus susuli hataholi fo mana mai la'a feta nai uma ndia. Hataholi no'uk hele mamanak nai mata, fo langgatuuk leu ndia. Ana nita leo ndiak, boe ma kokolak nae, 8 “Mata neuk, baa! Mete ma hataholi hoka ei mini feta kabin miu, na, boso sangga mamana nanggatuuk nai hataholi ina-huuk kala mamanan. Huu boso losak mafetak hoka hataholi fo penting lena. 9 Mete ma leo ndiak, na, dei fo mafetak mai nafada o nae, ‘Boso mamanasa, baa! Ama tulun lali muni dea muu dei, huu au sadia kadela ia, soa-neu hataholi ina-huuk so!’ Boe ma o fo'a la'o ela kadela ndia no mamaek, fo muu manggatuuk muu kadela manai dea. 10 De mete ma o hambu hohokak, na, muu manggatuuk muu kadela manai dea nalan seli. Mete ma mafetak nita o, dei fo ana mai, boe ma nae, ‘Eh, Ama! Mai manggatuuk muu mata ia.’ No leo ndiak, ei hambu hada-holomata nai basa nana hokak kala matan.^b 11 Huu hataholi fo mana soso'uk aon, dei fo Manetualain tao natudan. Tehuu hataholi fo mana tao aon sama leo hataholi kadi'ik, dei fo Manetualain so'u laik kana.”^c

12 Basa boe ma Yesus kokolak no maumak nae, “Fai seluk, mete ma ama tao feta, na, boso hoka kada ama bobonggin ma nonoo kamasu'im mala! Huu neu ko ala bisa hoka bala ama. 13 Mete ma ama tao feta, na, hoka hataholi hata taak, hataholi hela eik, hataholi fo ta bisa la'ok, ma hataholi mbokek kala. 14 Neu ko ala ta bisa bala ama. Tehuu mete ma ama hoka sala, na, Manetualain ndia bala. Mete ma Ana tao nasoda falik hataholi kamahele mana matek kala so, na, dei fo Ana ta nafalende heni ama dale malolen.”

15 Hataholi mana nanggatuuk mei esa no Yesus namanene leo ndiak, boe ma ana kokolak nae, “Maua-manalek seli neu hataholi fo mana na'a sama-sama nai Manetualain uma manen, bae!”

16 Yesus nataa nae, “Au tui nakandandaak leo iak: hambu hataholi esa tao feta ina-huuk. Boe ma ana hoka hataholi makadotok. 17 Ledo-eik feta nahehele sangga mulai so, boe ma nadenu ndia atan neu noke hataholi nana hokak kala nae, ‘Mai leo, huu feta sangga mulai so.’ 18 Tehuu basa sala lato'o mata-matak fo suek ala ta bisa leu. Esa nato'o nae, ‘Awii! Bei fo au hasa ala osi esa, de au musi uu mete sudik kana dei. Boso mamanasa baa!’ Au ta bisa mai. 19 Fe'ek nato'o nae, ‘Bei fo au hasa ala sapi luku pasan lima. Au sangga uu soba sudik kasa ia, de boso mamanasa baa!’ 20 Fe'ek bali nae, ‘Bei fo au sao, de ta bisa.’

21 Boe ma ata ndia fali, de nafada ndia malanggan. Malanggan namanene leo ndiak, boe ma ana luli nalan seli. Basa boe ma ana palenda ata ndia nae, ‘Mete ma leo ndiak, na, o kalua lai-lai! O muni basa okofoo ma dala makabi'ak nai kota ia muu, fo hoka basa hataholi kasian, hataholi hela eik, hataholi mbokek, ma hataholi lu'uk kala.’ 22 Ata namanene leo ndiak, boe ma ana neu hoka basa hataholi sila. Basa de ana nafada nae, ‘Ama! Basa sala mai so, tehuu mamanak no'uk bei louk.’

23 Boe ma malanggan ndia nae, ‘Mete ma leo ndiak, na, o muu seluk bali muni nggolok kala malai kota deak, losa osi la. Kokoe mala sudi see fo mua sala mai, sadi lahenu mamana feta ia. 24 Mamanene, baa! Hataholi mana timba heni Au hohokang ndia so, ta lameda feta ia ladan faa boe!”’

25 Basa boe ma Yesus asa la'ok lakandoo leni Yerusalem leu. Hataholi no'uk tungga Ndia. Boe ma Ana nasale sala, de kokolak nae, 26 “Hataholi fo tebe-tebe nau tungga Au, ana musi sue Au lena heni basa-basan: lena heni ina-aman, lena heni sao-anan, lena heni ka'a-fadin, nakalenak lena heni ao-ina hehelin. Mete ma taa, na, hataholi ndia ta nandaa dadik Au ana mana tunggang.^d 27 Hataholi fo ta nau lemba doidosok, huu ana tungga Au, na ndia ta nandaa dadik Au hataholing. Hataholi fo nau dadik Au hataholing, mae hataholi sangga tao nisan boe oo, tehuu ana lemba nakandoo doidoson.^e

28 De mete ma sangga nau tungga Au, na, hingga neulalaun dei. Conto leo hataholi sangga nambadedei uma katadak. Ana musi hingga nakahuluk ongkos losa lutu-lutuk. Huu boso losak doik ta dai. 29 Mete ma ta hingga lutu-lutuk, naa fo ana bei fo tao uma fanderen, te basa doik so. Boe ma hataholi la hika lakamamaek kana 30 lae, ‘Ei mete sudik hataholi ndia dei. Bei fo ana tao fanderen, tehuu bei ta hata-hata, te basa doik so.’

31 Conto fe'ek, fo ndia dede'a natatik. Manek fo nau natati, musi nanggatuuk hingga nakahuluk no ndia nonoon nala. Mete ma ndia soldadun kada hataholi 10.000, na, meda ana bisa senggi laban musun hataholi 20.000 do, taa? 32 Mete ma hingga basan so, tehuu dei fo ndia ta senggi, na, malolenak, ledo-eik musu bei nai dook, ana nadenu memak nadedenuk neu fo tao dame. 33 Leo ndiak boe neu hataholi mana nau tungga Au. Ana musi hingga neu-mai nae, ana nahehele so, fo la'o ela basa-basan do, taa? Mete ma taa, na, hataholi ndia ta nandaa dadik Au ana mana tunggang.”

34-35 Yesus tuti kokolan no conto fe'ek bali nae, “Masik ndia, neulauk. Ita paken fo tao nalada nana'ak. Tehuu mete ma masik mami so, na, ndia sosoan hata? Ta bisa paken bali, fo tao nalada nana'ak. Sangga taon neu pupuk boe oo ta bisa. Kada ita nggali henin. De ei boe oo musi dadik sama leo masik, fo masoda masue ao mia basa hataholi. See kandi'i dook, na, mamanene neulalau, baa!”