2 Nandaa no hataholi Yahudi la fai huhule-haladoin, de Yesus maso neni uma huhule-haladoik dalek neu fo fee nanonolik. Faik ndia, hataholi no'uk kala leu hule-haladoi. Ledo-eik lamanene Ndia nanonolin, boe ma ala heran lalan seli, de lae, “Hataholi ia malelan seli maa! Ndia boe oo naena koasa maa! Talo bee de Ana bisa leo ndiak? 3 Naa te Ndia kada tuka ai. Ita talelak inan Maria; ma fadin nala, fo ndia Yakobis, Yoses, Yudas, ma Simon. Ndia boe oo naena fadi ina anak hida. Ita basa nggata leo nai nggolok esa naa!” Huu ndia de ala dale hedin losa ta nau lamanene Ndia so.

4 Boe ma Yesus nafada nae, “Memak tetebes! Nai mamana fe'ek, na, hataholi lahiik fee hada-holomata neu Manetualain mana kokolan. Tehuu nai ndia nggolo hehelin, na, hataholi ta fee hada-holomata neu ndia.”^a

5-6a Tehuu hataholi sila dalen nala lakababatu, losa ta nau lamahele Yesus. Huu ndia de Ana heran, ma ta pake Ndia koasan bali nai ndia. De Ana kada tao nahai hataholi kamahedik hida nai ndia.

6b Basa boe ma Yesus la'ok ndule basa nggolo mana dekak kala, fo nanoli hataholi la Manetualain hihiin. 7 Ana noke nala ana mana tungga kasanahulu duan nala, de nadenu sala la'ok dua-duak fo leu lafada Manetualain Hala Malolen. Ndia boe oo fee sala koasa fo husi heni nitu. 8-9 Ana palenda sala nae, “Ei boso mini no'uk nai dalak. Boso mini lepa-nggee, doik, ma tas. Mini tete'e-aik, ma tabu eis manai ei eim mala, ma kada badu esak. 10 Mete ma hataholi simbok ei nai uman, na, ei musi leo nai ndia, losa ei la'o seluk. 11 Tehuu mete ma ei losa nai mamanak esa, boe ma hataholi malai sila ta nau simbok ma ta nau lamanene ei, na, la'o ela mamanak ndia. Basa, na mafada sala mae, ‘Ei ta nau mamanene, na, ela ei lemba aom ei natataam ndia!”’^b

12 Basa boe ma ala tungga leu tui-bengga Hala Malole ndia. Ala lae, basa hataholi la musi hahae leme sila sala-singgon nala mai leo, fo fali tungga Manetualain hihiin. 13 Boe ma ala husi kalua heni nitu la. Basa ndia, na ala tao mina neu hataholi kamahedik kala langgan, fo ala hule-haladoi fee sala. De ala hai memak.^c

14 Faik ndia, hataholi lai sudi bee mesan lalelak Yesus so. Tutuik la'e-neu Ndia koasan ndia losa nai Mane Herodes ndi'i doon so boe. Hambu hataholi lae, “Yohanis Mana Salanik ndia, nasoda falik nai Yesus aon dale so! Huu ndia de Ana bisa tao basa tanda heran nala sila.”

15 Tehuu hataholi fe'ek kala lae, “Taa! Elia ndia nasoda fali nai Ndia aon dale.” Hambu fe'ek bali lae, “Ndia ndia, esa neme Manetualain mana kokola fe'e makahulun nala mai.”^d

16 Tehuu ledo-eik mane Herodes namanene hataholi la kokolak la'e-neu Yesus leo ndiak, boe ma ana nataa nae, “Yohanis Mana Salanik fo fai maneuk au fee tete lala langgan. Hatematak ia nasoda fali seluk so maa!”

17-18 Mane Herodes nadenu leo ndiak, huu ana hambu dede'a ina-huuk no Yohanis. Tutuin leo iak: Fai maneuk ele mane Herodes sao nala fadin Filipus saon, nade Herodias. Naa te Filipus no Herodias bei ta lamaketu. Huu ndia de Yohanis ka'i taa-taa nae, “Ama manek ta bole sao mala fadim saon. Huu tatao leo ndiak ndia, na, ama la'o lena ita hada Yahudin so.” Tehuu Herodes kada sao nahele inak ndia. Basa boe ma ana fee hataholi leu humu lala Yohanis, de ala landeen neni bui dale neu.^e

19 Huu Yohanis ka'i taa-taa leo ndiak, de inak ndia nambeda dalek neun fo ana sangga dalak fo tao nisan. Tehuu ana bei ta hambu lelak, huu Herodes taon nai bui dale so. 20 Ma Herodes nadenu soldadu la fo lanea lahele Yohanis.

Memak Herodes bii Yohanis. Huu ana bubuluk Yohanis ndia, na Manetualain nadenun mai so. Ma ndia boe oo hataholi malole. Memak Herodes nahiik namanene Yohanis kokolan. Tehuu la'i-la'i esa, na dalen ta malole no Yohanis kokolan.

21 Basa boe ma faik esa, ina Herodias hambu fai lelak fo bala dale hedin. Faik ndia, ala tao mane Herodes fai bobonggin. Ala hoka hataholi ina-huuk kala fo ala mai la'a feta fai bobonggik ndia. Mana maik sila, na hataholi mana palenda la, malangga soldadu la, ma nusa Galelea lasi hadan nala. 22 Nai feta laladan, boe ma ina Herodias ana fe'on neu longge. Ndia lolonggen lolen seli, losa ana tao namahoko Herodes ma ndia nana hokan nala. Boe ma mane Herodes noke nalan de natanen nae, “O nau moke au hata, na, kada mafada leo! Dei fo au fee o. 23 Mae o moke ba'e duak au nusa palendang boe oo, au fee o. Au soo unik Manetualain naden!”

24 Boe ma ina anak ndia neu natane inan nae, “Ina! Ina dudu'an, na, au oke hata fo neulaun seli neme ama mai?”

Boe ma inan nataa nae, “Naaa! Muu fo moke Yohanis langgan.”

25 Basa boe ma ina anak ndia lai-lai neni Herodes neu, de nae, “Ama! Au oke fo leni fee au Yohanis langgan, taon neu dulang esa dalek. Hatematak ia leo!”

26 Mane Herodes namanene leo ndiak, boe ma tenden hako tutik. Tehuu ana ta bisa hela falik ndia sosoon so, huu basa hataholi la lamanene basan so. 27 Basa boe ma ana palenda malangga soldadu esa, neu tete neni Yohanis langgan neme bui dale mai. 28 Boe ma ala tete lala Yohanis langgan, de ala taon neu dulang esa dalek, boe ma lenin neu ina anak ndia. Ana simbo nala dulang ndia, boe ma ana ko'o nenin neu inan. 29 Ledo-eik Yohanis ana mana tunggan nala lamanene lae, ala tete leni Yohanis langgan, boe ma ala leu ha'i lala mbombolan fo leu latoin.

Yohanis mamaten tutuin, kada leo ndiak.

30 Faik esa, boe ma Yesus ana mana tunggan nala fo Ana nadenu sala sila so, basa sala fali de lakabubua seluk lo Ndia. Ala tui basa hata fo ala taon so, ma hata fo lanoli hataholi la so.

31 Tehuu faik ndia hataholi no'uk kala la'ok leu mai sangga Yesus. Losak Yesus no ana mana tunggan nala ta hambu lelak fo la'a so. Boe ma Yesus nafada ana mana tunggan nala nae, “Mai fo teu sangga mamana nees fo ita bisa hahae aok tala faa dei.”

32 De basa sala sa'e leni ofak dale leu, de leu sangga mamana nees fo dook neme nggolok mai.

33 Tehuu hataholi makadotok kala sila lita Yesus ofan tungga dano bifin. Boe ma ala kalua leme nggolok dale mai, tungga dala madak lain, de ala losa lakahuluk Yesus asa. 34 Ledo-eik Yesus konda neme ofak lain mai, boe ma nita hataholi no'uk lahani Ndia so. Boe ma dalen tuda kasian neu sala, huu ala ta bubuluk tao leo bee so, sama leo bi'i-lombo fo mana hoon taa. Boe ma Ana nanoli sala Manetualain hihiin,^f 35-36 neme ledo hana mai losa bobok. Boe ma Yesus ana mana tunggan nala lafada Ndia lae, “Ama! Malolenak Ama madenu basa hataholi la ia, fo leu hasa nana'ak nai nggolo mana dekak kala lai ia. Huu ledo bobok ia so, de ta hambu nana'ak nai ia so.”

37 Tehuu Yesus nataa nae, “Bosok! Kada ei ndia fee sala la'a.”

Tehuu ala lataa lasafalin lae, “Awii! Mete ma ita fee hataholi desi-desi ia la'a, na, ita musi kalua doik makadotok nalan seli! Sama leo tukan esa nggadin teuk esa!^g Neme bee mai, ita bisa hambu doik no'uk leo ndiak!”

38 Boe ma Yesus nae, “Miu matane sudik kasa dei, see neni lepa-nggee.”

Basa boe ma leu latane sala, de ala fali mai lafada lae, “Hambu kada loti lima ma i'ak boak dua.”

39 Basa boe ma Yesus nadenu basa hataholi la sila langgatuuk lakabubua leu na'u lain. 40 Boe ma leu langgatuuk lakabubua. Hambu lakabubua beke natun esak, ma hambu luma beke lima huluk.

41 Basa de Yesus ha'i nala loti kalimak kala, ma i'a boa kaduak kala sila. Boe ma Ana nasale lalai neu, de noke makasi neu Manetualain. Basa boe ma Ana bibi'i loti sila de Ana loo fee sala leu Ndia ana mana tunggan nala, fo leu baba'e sala leu basa hataholi la sila. Ana baba'e i'a boa kaduak kala sila boe. 42 De basa sala la'a losa lakabete. 43 La'a basa, boe ma Ndia ana mana tunggan nala leu lakaduduluk lala nana'a lenak kala, de henu lembeneu sanahulu dua.

44 Neme basa hataholi mana na'ak kala sila mai, meda touk 5.000. Bei ta hingga tamba inak kala ma kakanak kala.

45 Basa boe ma Yesus nadenu ana mana tunggan nala leu sa'e ofak lakahuluk leni nggolok Betsaida leu nai dano selik. Tehuu Ndia bei nai ndia, fo nadenu hataholi no'uk kala sila fali. 46 Ledo-eik basa sala fali, boe ma Ana nda'e neni letek esa lain neu, de Ana hule-haladoi.

47-50 Ledo-eik le'odae so, boe ma Yesus konda fali. Ana nita ana mana tunggan nala ofan losa nai dano laladan so. Tehuu ala sefe sota lalan seli, huu ofak laban ani solu. Lole mbilak, boe ma Yesus neu tungga sala. Tehuu kada Ana la'ok nesik oe bafon. Ledo-eik Ana sangga la'o seli ofak ndia, boe ma ala lita Ndia. Ala nggengge lalan seli. Boe ma latatane aok lae, “Awii! Hata ia? Nitu do, hata?”

Tehuu Yesus kokolak matan nae, “Wei! Ei boso bii baa! Au ndia ia.”

51 Ledo-eik Yesus hene neni ofak dale neu, boe ma ani hahae tutik. Ndia ana mana tunggan nala heran lalan seli. 52 Bei fo lita Yesus pake koasan, fo fee hataholi lifun lima lenak la'a. Tehuu ala bei ta lalelak tebe-tebe Yesus koasan, huu dalen nala bei lakababatu.

53 Ledo-eik ala losa dano selik, boe ma ala see leu kota Genesaret tasi bifin. 54 Ledo-eik ala konda leme ofak lain mai, tehuu hataholi no'uk kala lita sala so. Boe ma ala bobouk lae, “Wei! Yesus mai so bou!” 55-56 Sila basa sala lalai ndule leu hoka lafeok, boe ma hataholi la ndolo loo basa hataholi kamahedik kala mai.

Keke'un neu, sadi lamanene Yesus nai mamanak esa, na, basa sala ndolo leni basa hataholi kamahedik kala fo lakambembeu sala leu mook ndia. Ala dudu'a nai dalen lae, “Sadi hataholi kamahedik kala sila kame la'e Yesus badu mbedan, na ala hai ndia so.” Kame la'e leo ndiak, boe ma ala hai tutik.