5-6 Èle èèna ka, Yesus pua ana madhutu Na canguru dua dhèu sèra, aa paredha si, peka na, “Ja'a pua miu lami asa dhèu èdhi dhèu Yahudi sèra, lula ae nèti rèngu dhu madhutu boe j'ara mamuri Ama Lamatua dènge mola. Rèngu cakaraa kahib'i-kalèbho dhu sala j'ara. Nèti èèna ka, baku lami asa dhèu Yahudi boe, nuka sèmi dhèu Samaria. 7 Lami peka dènge dhèu Isra'el èdhi sèra, na, ‘Ne'e ne, d'ai lod'o kèna, sèna ka dhèu aa'i-aa'i ra bisa j'aj'i dhèu unu Ama Lamatua.’ 8 Aa lami puri-pa'èle dhèu pèd'a, pamamuri hari dhèu madhe, pa'èle dhèu kusta, aa babège eele nidhu. Ama Lamatua hia le miu ae-ae, te ngaa Na manèngi hari boe ca ana maa sa. De lami ka ho pala pa'ae-ae mi dhèu leo, te ngaa mage mi manèngi hari ngaa-ngaa kahèi. 9 Pakèd'i dènge ai hua. Baku mèti doi, 10 gee j'ara, mèdha silu, salapa, do tatea. Te dhèu hud'i hia ku dhèu sab'a, ngaa dhu pantas ho ra bisa mamuri.^b

11 Ladhe miu maso asa d'ara kota do rae èci, na, miu hud'i tenge ku dhèu dhu neo sèmi rare miu. Hèia miu pea ètu èmu èèna, toke miu pakèd'i tèke eele era èèna. 12 Ladhe miu maso asa d'ara èmu dhèu, peka la dènge rèngu, ‘Saloom! Lamatua hia miu mèngi-nale.’ 13 Ladhe dhèu ètu d'ara èmu ne, sèmi rare miu dènge be'a, na, miu manèngi sèna ka Lamatua hia si berkat. Te ngaa ladhe ra ro'o boe sèmi rare miu, na, Lamatua hia boe rèngu berkat. 14 Ladhe dhèu ro'o boe nanene lii padhai miu, mi kalua nèti èmu èèna, do kota èèna, hèia miu caro eele ahu nèti haga miu, sèna ka j'aj'i mi tadha, peka na, ladhe ro'o boe nanene, pe rèngu d'ui rare pala ra.^c 15 Bèli-camèd'a, lod'o Ama Lamatua huku dhèu ètu rai-haha ne'e, tatu Na pabia mi dhèu Sodom dènge Gomora dhu uru èèna bhelu titu kèna. Te ngaa sanèd'e! Èèna na, Nèngu huku bia risi hari mi dhèu dhu ro'o boe sèmi rare miu!”^d

16 “Sanèd'e paie! Te Ja'a pua miu ne, èci èèna ka Ja'a patabuli kahib'i-kalèbho asa talora aae busa hui. Nèti èèna ka, ngangee miu hud'i sèmi mege dhu d'èlu-mèu. Aa d'ara mi hud'i mola ku nuka sèmi koro j'aha dhu ne'a boe tenge lii langu.^e 17 Te ngaa baku pamud'e! Te bèli-camèd'a dhèu paj'èra miu, sama sèmi busa hui kadhi pamadhe kahib'i-kalèbho. Èèna na, rèngu nuni rèti miu asa era parisa lii langu agama. Aa dhèu hake paparu miu ètu d'ara èmu sabaj'a. 18 Pe rèngu ère rèti miu asa madha gubernur dènge dhèu aae, lula miu madhutu Ja'a. Te ngaa miu hud'i pake lod'o sèra, ho peka-padhai dènge ra Lii Lolo Be'a nèti Ja'a. Dènge j'ara ne'e, dhèu dhu tadhe boe Ama Lamatua tadèngi kahèi kolongara Ja'a ne. 19 Te ngaa ladhe rèngu nuni rèti miu sèmi èèna, mage miu madha'u, peka na, ‘Èèna na, ja'a peka tasamia?’ Do, ‘Ja'a neo dhaa peka sèmi ngaa?’ Baku j'aj'i mi ngangee, te ladhe d'ai lod'o na, Ama mi ètu sorga ka dhu peka dènge miu, nèti j'ara mia ka dhu miu hud'i peka-padhai. 20 Lod'o èèna, ngaa dhu miu padhai, mai boe nèti d'ara miu unu mi, te Roh Lamatua dhu Mola-Mèci èèna ka dhu aj'a-nori ètu d'ara miu, sèna ka miu padhai sèmi ngaa sa.^f

21 Sanèd'e, te bèli-camèd'a ètu d'ara èmu cue, ladhe abhu ca dhèu parcaya Ja'a, èèna na a'ari nèngu mesa na, ka dhu tenge j'ara ho pamadhe ne. Aa ladhe ana ka dhu parcaya, èèna na ama na ka dhu pamadhe ne. Ladhe ina-ama ka dhu parcaya, bèli-camèd'a ana-ana ra ka dhu pamadhe si.^g 22 Sanèd'e! Te bèli-camèd'a dhèu aa'i-aa'i tèka d'ara dènge miu, lula miu parcaya Ja'a ne. Te ngaa dhèu dhu taha taruu, èèna na Ama Lamatua hia ne mamuri.^h 23 Ladhe dhèu paj'èra miu ètu d'ara kota cue, rai lami asa kota leo! Lèke kèna! Ja'a ne Dhèu Rai-haha Tare'a-re'a. Bèli-camèd'a ropa miu palème aa'i mèka kota-kota ètu Isra'el, te ngaa Ja'a dhu lèpa hari mai le èèna.

24 Biasa dhèu pakab'ua ca dhèu mese risi nèti ana sakola na sèra. Aa dhèu pakab'ua ca dhèu lamatua risi nèti ènu na sèra.ⁱ 25 Ladhe ana sakola mèu sama sèmi mese na, nèngu pangee na d'ai le. Aa ladhe ènu d'èlu-mèu sama sèmi lamatua na, nèngu ngee na d'ai le.

De sanèd'e paie! Ladhe dhèu paroa lamatua èmu, peka na, ‘Èu ne, Baalsebul, dhèu aae nidhu!’ tatu isi èmu na abhu kolongara dhu karehe risi hari.”^j

26 “De miu baku madha'u dènge dhèu dhu lab'a miu. Te, ngaa dhu dhèu tao pahuni, bèli-camèd'a dhèu aa'i-aa'i ladhe rèdhi.^k 27 Ngaa dhu Ja'a aj'a-nori le miu mesa mi, miu hud'i lami lole ku mi dhèu aa'i-aa'i. Aa ngaa dhu Ja'a paholo le dènge miu, miu se hud'i lami peka ku palème era. 28 Baku madha'u dènge dhèu rai-haha, te rèngu bisa dhoka pamadhe ngi'u aae dhèu di, te ngaa bisa boe pa'ele iie samanga. Nèti èèna ka, miu hud'i madha'u ku dènge Ama Lamatua, te dhoka Nèngu di dhu dènge koasa ho pamaso ngi'u aae dhèu dènge samanga kateme, asa d'ara dhasi ai dhu heo na loe boe ciki sa. 29 De pa'èra d'ara miu. Dhèu pahie ana mangungu ètu d'ara pasa dènge kab'ua ciki oo'e di. Te ngaa ci'u sa bisa boe madhe, ladhe Ama mi ètu sorga no'o mèka. 30 Ama miu ètu sorga dhu loe boe ladhe-leru miu, toke j'ara-j'ara dhu ana iiki-iiki. D'ai rèu kètu ètu kab'a kètu miu, Na ige nare aa'i hèi. 31 De baku madha'u! Lula Ama Lamatua pakab'ua miu risi nèti ana mangungu aa'i-aa'i ra.”

32 Hèia Yesus tuhu hari lii padhai Na, peka na, “Dhèu dhu bani mangaku Ja'a ètu madha dhèu ae ètu rai-haha ne, pe Ja'a kahèi mangaku nèngu ètu katanga madha Ama Ku ètu sorga, peka na, ‘Nèngu ne dhèu Ja'a.’ 33 Te ngaa dhèu dhu pasili Ja'a ètu madha dhèu ae, peka na nèngu tadhe boe Ja'a, bèli-camèd'a Ja'a peka dènge Ama Ku ètu sorga kahèi, na, ‘Ja'a tadhe boe dhèu ne'e.”’^l

34 “Mage mi pangee na, Ja'a ne mai kèti dame asa rai-haha ne. Te mamai Ja'a ne, sèna ka dhèu rai-haha ne èci lab'a èci. 35 Ja'a mai asa rai-haha ne, madhutu ngaa dhu dhèu rèti lii padhai Ama Lamatua peka tèke èèna,

37 De dhèu dhu neo madhutu Ja'a tare'a-re'a, nèngu hud'i sue ku Ja'a, risi nèti aa'i-aa'i, risi nèti ina-ama na, aa risi nèti ana niki na. Ladhe aad'o, na, nèngu nia boe j'aj'i dhèu unu Ja'a. 38 Te dhèu dhu neo madhutu Ja'a, te ngaa d'èi boe pasae j'aj'èra, nèngu nia boe j'aj'i dhèu unu Ja'a.ⁿ 39 Dhèu dhu sadia madhe lula na madhutu Ja'a, bèli-camèd'a nèngu abhu mamuri taruu dènge Ama Lamatua. Te ngaa dhèu dhu dhoka neo mamuri hia ngi'u nèngu unu na, èèna na, mamuri na ele iia d'ara!”^o

40 “Dhèu dhu sèmi nare miu dènge be'a, nèngu sèmi nare Ja'a kahèi. Aa dhèu dhu sèmi nare Ja'a, nèngu kahèi sèmi nare Ama Lamatua dhu pua Ja'a mai.^p 41 Dhèu dhu sèmi nare dhèu nèti lii padhai Ama Lamatua, lula na padhue-padhai Lii Holo-Nori Ama Lamatua, pe Lamatua b'ala nèngu sama sèmi Na b'ala mi ca dhèu nèti lii padhai Nèngu. Aa dhèu dhu sèmi nare ca dhèu d'ara mola, lula dhèu èèna madhutu tare'a-re'a dad'èi Ama Lamatua, pe Lamatua b'ala nèngu sama sèmi Na b'ala mi ca dhèu d'ara mola. 42 Dhèu dhu sèmi nare ca dhèu dhu haha d'ai seli, lula nèngu madhutu Ja'a, tatu Ama Lamatua b'ala ne. Masi ka dhèu hia èi hua ca galaa di, tatu Ama Lamatua bhèlu boe ne.”