2 Èle èna lod'o, hèia Yesus gale nèti Petrus, Yakobis, Yohanis, lasi asa ledhe èci dhu dhèu pea boe. Ropa d'ai ledhe èèna, rèngu ladhe, na, Yesus leko-leo. 3 Aa mèdha-papake Na pudhi kale'e. Abhu mèka mèdha dhu pudhi sèmi èèna ètu rai-haha ne. 4 Cag'ag'a laa, rèngu rèdhi Yesus padhai lii dènge Elia dènge Musa.

5-6 Ka Petrus si madha'u bia. Hèia Petrus malaa, ka na padhai lii ore leli. Hèia na peka dènge Yesus, aku nèngu na, “Ama! Èdhi ètu era ne'e, be'a titu kèna! Hua iia risi, ji'i tao paleo tèlu bua, cue hia Ama, cue hia Musa, aa cue hari hia Elia.”

7 Nèbhu boe ka, ra'i-liru puru mai sarimu nare si. Hèia ra tadèngi lii èci nèti ra'i-liru èèna, peka na, “Mi nanene! Yesus ne, Ana pasue Ja'a. Miu nanene paie Ne!”^a

8 Ropa tadèngi lii èèna, Petrus si laladhe palème, te ngaa rèdhi heka dhèu leo ètu èèna. Ate dhoka Yesus mesa Na.

9 Èle èèna ka, Yesus dènge ana madhutu Na sèra puru nèti ledhe èèna. Ka Yesus kai si, peka na, “Ngaa dhu miu mèdhi deo na, baku lolo dènge dhèu èci sa. Ja'a, Dhèu Rai-haha Tare'a-re'a ne, hud'i madhe uuru ku. Ho lod'o d'ai Ja'a mamuri hari, na, miu heka lolo dènge dhèu leo kèna.”

10 Rèngu tèke pa'èra lii moa èèna ètu d'ara ra. Ra ale boe dènge dhèu èci sa. Te ngaa tèlu ra pakarèi isi-aanga, “Na padhai lii ngaa ne, peka na, ‘Nèngu mamuri hari nèti mamadhe’? Tasamia, ee?”

11 Hèia ra karèi Ne, peka na, “Mese agama sèra peka na, ‘Elia hud'i mai uru ku, heka Kristus mai kèna.’ Te ngaa madhutu Ama, tare'a, do aad'o?”^b

12 Hèia Yesus dhaa, peka na, “Mema tare'a. Elia hud'i mai uuru ku, ho bhoke j'ara hia Kristus, dhèu dhu Ama Lamatua paj'uj'u karèi nèti uru ka. Te ngaa tasamia? Miu me'a mèka ngaa dhu suri rare le ètu d'ara Sasuri Mola-Mèci Ama Lamatua, lula-nèti Dhèu Rai-haha Tare'a-re'a? Dhu suri rare le, peka na, ladhe lod'o Na mai, dhèu paj'èra Ne, toke ra pamadhe Ne. 13 Nèti èèna ka, miu pasa paie dhilu miu! Elia mai le. Te ngaa dhèu paj'èra ne madhutu dad'èi rèngu. Èèna lèke dènge ngaa dhu baki-baki èdhi sèra suri tèke le karèi nèti uuru ka.”

14 Ropa Yesus dènge ana madhutu Na, dhèu tèlu sèra, paraga hari dènge ana madhutu leo sèra, ka ladhe rèdhi dhèu ae pakaboko ètu èèna. Dhèu ae sèra mai ho ra neo nanene ana madhutu Yesus dhu leo sèra pab'ala lii dènge mese agama ètu èèna. 15 Ropa dhèu ae sèra ladhe rèdhi Yesus, ka ra cag'ag'a, te rèngu neo laa, na, Yesus ètu ledhe era. Hèia ra rai mai soru Ne.

16 Hèia Yesus karèi si, peka na, “Miu pab'ala lii ngaa na?”

17 Dhèu èci nèti talora dhèu ae sèra ara sa madha, ka na dhaa, aku nèngu na, “Ama, mu nanene ku laa! Ja'a mai kèti ana mone ja'a dhu pèd'a, ho Ama ku puri-pa'èle ne. Nèngu lii aad'o, bisa boe padhai lii, lula nidhu tao ne. 18 Ladhe nidhu maso asa d'ara ngi'u na, na hake ngi'u ana ne mi rai. Ho hèb'a na horo karaka, na na'e ngutu na kico-kico sèna. Ho ngi'u na patèku sèmi aj'u. Ja'a manèngi le ana madhutu Ama ku babège eele nidhu èèna. Te ngaa ra bisa boe.”

19 Ropa Na nanene nare, hèia Yesus jèke si, peka na, “Heh! Miu seli-kolane! Ja'a aj'a miu pahari-pahari, te ngaa miu me'a boe ngaa-ngaa. Miu parcaya èra boe mi Ja'a! Ja'a mate miu nèbhu sange mia hari ku? Mèti ana èèna asa ne'e mai!” 20 Hèia ra sa'u rèti ana èèna asa madha Yesus. Te ngaa ropa nidhu ladhe nèdhi Yesus, na kalabhe ana ne mi rai, ka ana ne bèbhe kapod'e ètu rai, aa hèb'a na horo karaka.

21 Ka Yesus karèi ama na, “Nèngu sèmi ne'e ne, pèri lod'o kèna?”

Ka ama na dhaa, “Karèi nèti ana iiki ka mai. 22 Nidhu èèna nèbhu ae le neo pamadhe ana ne'e. Na tule ne pèri-pèri hari kèna asa d'ara ai, aa na pacène le kahèi asa d'ara èi. De Ama ku sue ja'a. Ladhe bisa, na, Ama puri-pa'èle ku ana ja'a la.”

23 Yesus dhaa, peka na, “Nga tao ka èu peka na ‘ladhe bisa’? Ja'a bisa tao aa'i mèu-mèu, te ngaa hud'i èu parcaya uuru ku!”

24 Nèti èèna ka, mone èèna dhaa dènge oe tangi, aku nèngu na, “Ama, mema ja'a parcaya, te ngaa pa'èra hari ku lalèka ja'a ne'e!”

25 Ropa Yesus nèdhi dhèu ae mai lingu, ka Na paredha nidhu èèna, aku nèngu na, “Heh! Nidhu bhelu! Kalua pakaj'èu ka nèti ana ne'e! Sèna ka na bisa tadèngi aa na padhai lii kahèi. Èu baku maso ia ka asa d'ara ana ne'e!”

26 Ropa nidhu tadèngi lii Yesus, hèia na pakèce. Ka na hake ana ne mi rai, ka na rèbha-rèbha sène, heka nidhu kalua nèti d'ara ana èèna kèna. Ana èèna kalau heka, nuka sèmi dhu madhe le. Ka dhèu ètu sèra sa peka, aku rèngu na, “Waa! Ana ne madhe le!”

27 Te ngaa Yesus kèpe kacui-aai ana ne, ka Na pakèd'i ne. Hèia na kèd'i dènge ka.

28 Èle èèna ka, Yesus dènge ana madhutu Na, tèke eele era èèna, lasi dhuli èmu cue. Ètu èmu èèna, rèngu mesa ra, ka ra karèi Yesus, peka na, “Ama! Nga tao ka ji'i bisa boe babège eele nidhu èèna?”

29 Hèia Yesus peka dènge si, aku Nèngu na, “Mi nanene paie! Nidhu sèra mema bhelu. De ladhe miu manèngi boe a'èra nèti Lamatua, na, miu bisa boe babège eele nidhu sèmi èèna.”

30 Èle ka, Yesus dènge ana madhutu Na tèke eele era èèna, lasi taruu asa propensi Galilea. Lod'o èèna, Yesus d'èi boe dhèu re'a Nèngu ètu èèna, 31 lula Na neo aj'a ana madhutu Na di. Ka Na lole dènge si, “Nèbhu heka dhèu pahie eele Ja'a dènge dhèu leo. Hèia ra pamadhe Ja'a, Dhèu Rai-haha Tare'a-re'a ne. Mema Ja'a madhe, te ngaa d'ai camèd'a, Ja'a mamuri hari.”^c

32 Yesus padhai lii sèmi èèna, te ngaa ana madhutu Na sèra malaa. Rèngu bani heka karèi sasoa lii padhai lii Nèngu.

33 Èle èèna ka, Yesus si lasi d'ai Kapernaum. Ropa ra maso asa d'ara èmu èci, Yesus karèi si, peka na, “Deo na miu pasisu ngaa ètu talora j'ara?”

34 Èci sa bani boe dhaa, lula ètu talora j'ara deo na, rèngu ako pasala d'ara, nèti ra pasisu, cee ka dhu kapai risi ètu talora rèngu.^d

35 Hèia Yesus madhèdi, ka Na holo si, peka na, “Cee dhu neo j'aj'i dhèu kapai, mamuri nèngu hud'i sama sèmi dhèu haha dhu lalau-lalo'o dhèu.”^e

36 Èle èèna ka, Yesus sa'u nare ana iiki èci, ka la'e asa talora rèngu aa'i-aa'i ra. Hèia Na peka, aku Nèngu na, 37 “Dhèu dhu madhutu Ja'a, ho na lalau-lalo'o dhèu sèmi ana iiki ne, èèna sama sèmi nèngu lalau-lalo'o Ja'a kahèi. Aa nèngu lalau-lalo'o Ama ku kahèi, dhu pua Ja'a mai asa rai-haha ne.”^f

38 Èle èèna ka, ana madhutu Yesus dhu ngara na Yohanis, peka na, “Ama! Ca tèka ji'i ngèdhi ca dhèu pake kolongara Ama ku, ho na babège eele nidhu. Te ngaa ji'i kai ne, lula nèngu dhèu èdhi boe.”

39 Te ngaa Yesus dhaa, aku Nèngu na, “Baku mi kai ne! Te dhèu dhu pake kolongara Ja'a, ho na tao tadha malaa, nèngu pa'ele iie boe kolongara Ja'a. 40 Ladhe nèngu palab'a boe dènge èdhi, nèngu na dhèu èdhi.^g 41 De mi sanèd'e paie! Ladhe abhu dhèu ne'a, na, miu madhutu Kristus, ka na soru-bara miu, tatu Ama Lamatua bhèlu boe rui-j'aj'èra nèngu. Masi ka dhèu dhu hia miu èi iia ca galaa èèna ka, Ama Lamatua bhèlu boe tatao nèngu èèna.”^h

42 Èle èèna ka, Yesus padhai lii hari dènge ra, peka na, “Mage-mage, ladhe abhu dhèu dhu tao ana iiki èci kako sala j'ara, toke ana ne parcaya heka Ja'a! Be'a risi hia dhèu èèna, rare hadhu aae cue,ⁱ ho èki mi ladha goro ne, ho pacène ne asa talora dhasi.

43 Ladhe èu tao sala pake kacui-aai èu, na, poro eele ne. Te be'a risi èu maso sorga dènge kacui-aai cabèka di. Baku d'ai ra core èu asa d'ara ai heo robhe-robhe dènge kacui-aai kateme.^j 44 [Naraka èèna, mema era j'aj'èra. Ai na madhe boe. Sèmi èèna kahèi, èru-èru kamoke dènge ra'a taruu ngaa-ngaa dhu hèu ètu èèna.]^k 45 Ladhe èu tao sala pake haga èu, na, poro eele ne. Te be'a risi èu maso sorga dènge haga cabèka di. Baku d'ai ra core èu asa d'ara ai heo robhe-robhe dènge haga kateme. 46 [Naraka èèna, mema era j'aj'èra. Ai na madhe boe. Sèmi èèna kahèi, èru-èru kamoke dènge ra'a taruu ngaa-ngaa dhu hèu ètu èèna.]^l 47 Ladhe èu tao sala pake musi madha èu, na, ed'o eele ne. Te be'a risi èu maso sorga dènge musi madha cabèka di. Baku d'ai ra core èu asa d'ara ai heo robhe-robhe dènge musi madha kateme.^m

49 A'aj'a Ja'a ne, mema bia. De ladhe cee dhu madhutu Ja'a, nèngu hud'i taha taruu, sèmi dhèu dhu neo paga sisi hud'i masi uuru ku, sèna ka sisi paga èèna taha nèbhu.

50 Masi mema be'a. Èdhi pake ho pasèro nganga'a. Te ngaa ladhe masi sèro heka, guna na ngaa? Dhoka bhori eele di. Miu hud'i j'aj'i sèmi masi kahèi, sèna ka mamuri pasue dènge dhèu leo aa'i-aa'i.

De mi pasisu ia ka, peka na, cee ka dhu kapai, aa cee ka dhu ana iiki.”^o