4 Te ngaa dhèu èci sa bhoka boe hèb'a. Hèia Yesus gai dhèu pèd'a ne, ka na èle dènge nèti papèd'a na. Ka Yesus pua dhèu ne, sèna ka lèpa ka. 5 Èle ka Yesus karèi hari si, peka na, “Ladhe ana èci manahu asa d'ara èi lèke dènge lod'o sabaj'a, miu lami ère eele ana ne'e, do aad'o? Ladhe sapi manahu asa d'ara èi la'e, miu soro tèke, do, lami kaso ne asa li'u? Tatu miu kaso ne asa li'u. De èèna, sasoa na, miu sab'a le, sina ma?”^a

6 Ropa tadèngi lii padhai Yesus ne, èci sa bisa boe dhaa.

7 Lod'o èèna, Yesus taru kira mi dhèu mai ra'a-sisi ètu d'ara èmu ne. Dhèu ae ka dhu d'èi era re madha, ho lasi madhèdi. Ropa nèdhi sèmi èèna, Yesus peka, 8 “Sanèd'e, ee! Ladhe dhèu nèru miu asa pesta kab'i, mage lami madhèdi ka asa era dhèu aae-dhèu kapai. Mage dhoka lamatua pesta ne nèru tamu dhu kapai risi. 9 Ladhe sèmi èèna, lamatua pesta mai gai èu, peka na, ‘Mage mu nasa kahèi, ama! Ama pidha sa kabodho, ee. Te ja'a tèke kadera ne hia dhèu kapai nèi.’ Hèia èu kèd'i dènge makae, tèke eele kadera ne, ka lamu madhèdi asa kabodho. 10 De ladhe èu abhu nèru, lamu madhèdi ètu kadera re kabodho tèka. Ropa lamatua pesta ladhe nèdhi èu, na mai peka, ‘Ama! Mai madhèdi asa madha ne.’ Dènge j'ara ne, miu abhu pakab'ua ètu madha tamu aa'i-aa'i ra.^b 11 Te dhèu dhu padedha iisi ra, èèna na Lamatua pahaha si. Te ngaa dhèu dhu tao iisi ra sèmi dhèu haha, èèna na Lamatua ded'e padedha si.”^c

12 Èle èèna ka, Yesus peka dènge lamatua èmu ne, “Lod'o leo, ladhe ama neo tao tatao, mage nèru dhoka a'ari ama dènge dhèu kaja sèra mesa ra! Te tatu rèngu bisa nèru hari ama. 13 Te ngaa ladhe ama tao tatao, nèru dhèu dhu dènge boe ngaa-ngaa, dhèu haga roe cabèka, dhèu karuku, dènge dhèu bèdhu sèra. 14 Tatu rèngu b'ala rare boe ama. Te ngaa ladhe ama nèru si, Ama Lamatua ka dhu b'ala ama. Ladhe d'ai lod'o Ama Lamatua pamamuri hari dhèu-dhèu parcaya dhu madhe le, Na bhèlu boe babe'a ama.”

15 Ropa tadèngi lii padhai lii Yesus ne, ca dhèu dhu madhèdi ca mei dènge Yesus, padhai lii, peka na, “Dhu karej'e risi ka, rèngu dhu madhutu ra'a pa'èci ètu d'ara èmu Ama Lamatua!”

16 Ka Yesus b'ala, peka na, “Ja'a lolo sèmi ne'e: abhu ca dhèu dhu tao tatao kapai. Hèia na nèru dhèu ae titu kèna. 17 Ropa d'ai tadha dhèu ra'a-rinu, ka na pua ènu na, la'e paroa dhèu dhu ra nèru sèra, peka na, ‘Mai lati ka, te neo mulai pesta kèna.’ 18 Te ngaa dhèu se'e padhai lii rupa-rupa, sèna ka lasi boe asa d'ara pesta. Ca dhèu peka sèmi ne'e, ‘Ja'a heka hèli kore oka cue, de neo laku ladhe sèku. De mage nasa, te ja'a lake kore boe.’ 19 Dhèu leo hari peka na, ‘Ja'a heka hèli kore sapi maroo rai lèmi pasa. De ja'a neo laku cob'a si. Baku nasa, te ja'a lake kore boe!’ 20 Dhèu leo hari peka na, ‘Ja'a heka kab'i kèna, de bisa boe dhiu.’

21 Ka ènu ne, lèpa peka dènge lamatua na. Ropa tadèngi nare, ka nasa titu kèna. Hèia na paredha ènu na, aku nèngu na, ‘Ladhe sèmi èèna, èu lamu lai-lai! Lamu asa j'ara-j'ara, dènge asa sasanga j'ara ètu kota ne'e, sèna ka nèru dhèu dhu dènge boe ngaa-ngaa, dhèu kasia, dhu haga roe cabèka, dhu bèdhu, dènge dhèu-dhèu karuku sèra.’ 22 Ropa tadèngi nare, la'e dènge ka nèru dhèu-dhèu sèra. Ka na lèpa hari, hèia na peka dènge lamatua na, aku nèngu na, ‘Ama! Dhèu se, ka se'e le. Te ngaa era madhèdi ae era.’

23 Hèia lamatua na peka, ‘Ladhe sèmi èèna, lamu hari asa rae-rae ètu li'u kota, toke d'ai d'ara oka sèi. Lamu pamako sad'i cee èèna ka, mèti si mai ho ra madhèdi papènu d'ara pesta ne. 24 Nanene, ee! Dhèu dhu pahae boe dènge lii nèru ja'a ne, rèngu se re'a boe babe'a tatao ne ciki sa hèi!”’

25 Ka Yesus si lasi taruu asa Yerusalem. Dhèu ae madhutu Ne. Hèia Na kabib'a ladhe sa rèngu, ka Na peka, na, 26 “Dhèu dhu tare'a-re'a neo madhutu Ja'a, nèngu hud'i sue ku Ja'a risi nèti ngaa-ngaa aa'i-aa'i ra; risi nèti ina-ama na, risi nèti dhèu èmu-kamali na, risi nèti ana niki na, risi nèti a'ari na, aa risi-risi hari nèti ngi'u nèngu unu na. Ladhe aad'o, dhèu ne nia boe j'aj'i ana madhutu Ja'a.^d 27 Te dhèu dhu d'èi boe pasae j'aj'èra lula nèngu madhutu Ja'a, nèngu nia boe j'aj'i dhèu Ja'a. Dhèu dhu neo j'aj'i dhèu Ja'a, masi ka dhèu neo pamadhe ne, te ngaa nèngu pasae j'aj'èra na taruu.^e

28 De ladhe neo madhutu Ja'a, ngee pabe'a-be'a ku. Nuka sèmi dhèu neo tao èmu dhu dènge tad'a-tad'a. Nèngu hud'i ige uuru ku, ogo d'ai lutu sela. Mage dhoka doi d'ai boe. 29 Ladhe ige boe paie-iie, ele boe d'ai fanderen di, doi dhu aad'o heka le. Ladhe sèmi èèna, dhèu mari madhe aa pamakae ne hèi, 30 peka na, ‘Miu ladhe ku dhèu ne'e laa! Heka na sab'e fanderen kèna, te ngaa doi na saku aa'i le!’

31 Conto dhu leo, nuka sèmi dhèu lasi pamusu. Dhèu aae dhu neo la'e pamusu hud'i madhèdi ku, sèna ka pare'a uuru ku dènge angalai na. Ladhe sordad'u rèngu dhoka canguru riho dhèu di, bisa segi musu dua nguru riho dhèu, do aad'o? 32 Ladhe ige rare, te ngaa rèngu bisa boe segi, be'a risi lod'o musu dhu kaj'èu era, ra pua dhèu lasi peka sèna ka uri padame. 33 Sama sèmi èèna kahèi, dènge dhèu dhu neo madhutu Ja'a. Nèngu hud'i kali bagi ku la'e-mai, dhu peka na, nèngu dhu pa'èra le tèke eele aa'i ngaa-ngaa, do aad'o? Te ladhe aad'o, na, dhèu ne'e nia boe j'aj'i ana madhutu Ja'a.”

34-35 Yesus tuhu lii padhai pake lii pakasame dhu leo hari, na, “Masi ne, be'a. Èdhi pake ne ho pabe'a nganga'a. Te ngaa ladhe na sèro heka, j'aj'i ngaa hari? Bisa heka pake ne, ho pabe'a nganga'a. Neo tao mi pupuk, bisa boe kahèi. Dhodhoka core eele iia d'ara di. Dhèu cee dhu dènge ro'a dhilu, nanene paie-iie!”