2 Lod'o èèna, Yohanis ètu d'ara bèdho. Ropa na tadèngi j'ara aa'i-aa'i dhu Yesus tao, hèia na pua ana madhutu na ho lasi karèi Yesus, peka na, 3 “Ama Lamatua dhu pajaji tèke le karèi nèti uru ka, na, Nèngu neo pua Kristus mai, sèna ka pala mamuri mi èdhi dhèu Yahudi. Ama ne, Kristus, do? Do, èdhi hud'i mate hari ku dhèu leo?” Ka lasi karèi Yesus.

4 Ropa tadèngi nare, hèia Yesus dhaa, aku Nèngu na, “Miu se tadèngi le, aa mèdhi unu mi dènge madha. De lèpa ho lami peka dènge Yohanis, aa'i-aa'i dhu j'aj'i, nuka sèmi ngaa dhu dhèu nèti lii padhai Ama Lamatua, Yesaya, suri tèke le, peka na:

6 De sèmi ne'e: lami peka dènge Yohanis, bèli-camèd'a nèngu abhu a'oto, ladhe na parcaya Ja'a taruu. Nèti èèna ka, Ama Lamatua hia mèngi-nale mi dhèu dhu parcaya Ja'a pa'èra-èra!”

7 Ropa ana madhutu Yohanis se lèpa, hèia Yesus peka dènge dhèu ae se, lula-nèti Yohanis ne, aku Nèngu na, “Lod'o miu neo paraga dènge Yohanis ètu d'ara pad'a sod'a, miu pangee, na, neo paraga dènge dhèu dhu sèmi ngaa sa? Tatu boe, miu paraga dènge dhèu dhu roe aala-aala, nuka sèmi kalai èèu dhu bhabheu madhutu ngèlu di! 8 Aa tatu boe miu mèdhi dhèu dhu pake mèdha-papake dhu kab'ua aae, te dhèu sèmi èèna era pea na dhodhoka ètu d'ara èmu dhèu aae di! 9 De lami ladhe dhèu sèmi ngaa sa ètu nèi? Mi pangee na, miu lami tenge dhèu nèti lii padhai Ama Lamatua! Tare'a! Te nèngu ne, ca dhèu nèti lii padhai Lamatua dhu kapai risi. 10 Te ètu d'ara sasuri Ama Lamatua dhu Mola-Mèci èèna, dhu suri tèke le lula-nèti Yohanis ne, peka na,

11 Nanene paie! Ètu rai-haha ne, abhu boe ca dhèu sa dhu kapai risi nèti Yohanis ne. Te ngaa nèti dhèu rai-haha aa'i-aa'i dhu mangaku Ama Lamatua sama sèmi Dhèu Aae, dhèu dhu haha d'ai seli èèna ka, nèngu dhu kapai risi nèti Yohanis. 12 Karèi nèti Yohanis pakako sasab'a na, d'ai sange ne'e ne, abhu dhèu ae-ae dhu j'aj'i le dhèu unu Ama Lamatua. Te ngaa abhu dhèu leo dhu pangee sala, peka na rèngu hud'i pamusu ku, sèna ka laka-seti dhèu ho j'aj'i dhèu unu Ama Lamatua. 13 Toke d'ai lod'o mamai Yohanis tuka sarani, èdhi dhèu Yahudi dhu tema madhutu atora Musa, dènge atora dhèu rèti lii padhai Ama Lamatua leo sèra.^c 14 De parcaya la Ja'a! Yohanis ne, nuka Elia, dhu dhèu rèti lii padhai Ama Lamatua, peka mema le lula-nèti mamai na.^d 15 De dhu neo me'a mèu, hud'i nanene ku paie-iie!

16 Ja'a neo hia lii pakasame, sèna ka miu me'a, rupa sèmi mia ka dhèu taa limuri ne. Te rèngu se cakaraa dènge ana-ana dhu madhèdi ètu d'ara pasa. Rèngu dhu pa'oo-parodha dènge angalai ra, peka na,

18 Miu se sama sèmi ana iiki dhu re'a boe roca. Lod'o Yohanis mai, nèngu d'èi puasa, aa ninu boe èi anggor. Te ngaa dhèu peka na, ‘Nèngu, nidhu tao!’ 19 Te ngaa Ja'a, Dhèu Rai-haha Tare'a-re'a ne, mai le. Ja'a puasa boe, aa kinu èi anggor. Te ngaa dhèu peka na, ‘Nèngu èèna, dhèu gagoo-gagehu! Dhèu tema mahu bia! La'e pa'angalai dènge dhèu roro bea! Pa'èci dènge dhèu dhu laku-laku boe. Nèngu dhu ne'a boe makae!’ Te ngaa mi patadhe lii padhai Ja'a ne! Mamèu Ama Lamatua èèna, cèu ètu d'ara mamuri dhèu unu Na.”

20 Èle èèna ka, Lamatua Yesus pasanèd'e dhèu-dhèu dhu pea ètu pèri-pèri rae. Na tao le tadha-tadha malaa ae risi ètu nèi, te ngaa ro'o boe ae eele nèti sasala ra, ho madhutu j'ara mamuri Ama Lamatua dhu mola. 21 Yesus jèke si, peka na, “Heh! Miu dhèu Korasin, aa miu dhèu Betsaida! Mate unu miu! Bèli-camèd'a pasae mere mamadhe-mamopo! Ja'a tao le rupa-rupa tadha malaa ètu katanga madha miu, te ngaa miu mo'o boe parcaya Ama Lamatua. Masi ka miu dhèu Yahudi dhu peka na, miu tadhe Lamatua, te ngaa ladhe sèmi tadha malaa dhu Ja'a tao se'e ètu kota Tirus dènge kota Sidon, tatu nèbhu nare sange ne'e, dhèu-dhèu ètu sèra èle le ho'a, aa tèke eele le sasala-sasigo ra ho madhutu Ama Lamatua. Aa tatu ra pake le bèla mèdhi, dènge tao ahu mi kètu ho j'aj'i mi tadha, na, rèngu manyasa nèti sasala ra. Masi ka dhèu Tirus dènge dhèu Sidon sèra dhèu Yahudi boe, dhu mangaku na, tadhe Lamatua.^e 22 Ja'a monya boe! Bèli-camèd'a mèdhi unu mi! D'ai lod'o dhu Ama Lamatua pama'ète lii langu dhèu aa'i-aa'i ra, hahuku dhèu Tirus dènge dhèu Sidon samaa risi nèti hahuku miu.

23 Miu dhèu Kapernaum! Mage-mage, ee! Mage mi pangee, na, Ama Lamatua paca'e miu lami asa sorga. Aad'o! Èèna na Lamatua pèci mi asa d'ara naraka! Ladhe sèmi tadha-tadha malaa dhu Ja'a tao ètu rae miu dhu j'aj'i uuru le ètu kota Sodom, tatu Ama Lamatua parluu boe labhu pakèpu kota èèna. Te ladhe dhèu Sodom rèdhi tadha malaa se, tatu ra rai eele le nèti bhabhelu-katub'a ra.^f 24 Tare'a! Pe mèdhi unu mi! Ladhe d'ai ka lod'o Ama Lamatua pama'ète lii langu dhèu aa'i-aa'i, hahuku dhèu Sodom samaa risi nèti hahuku miu se!”^g

25 Ropa padhai lii nare, hèia Yesus sabaj'a, peka na, “Ama! Ama dhu j'aj'i Lamatua ètu dedha-liru dènge rai-haha. Ja'a manèngi makasi ae-ae, lula Ama pahuni pamèno-mèno j'ara-j'ara dhu Ama hia huku mi dhèu-dhèu dhu pangee na, rèngu d'èlu-mèu, aa dhu padedha iisi ra. Te ngaa Ama bhoke patalele j'ara se'e aa'i-aa'i mi dhèu haha dènge dhu pahaha iisi ra. 26 Tare'a, Ama! Te sèmi èèna ka, dhu pakarej'e d'ara Ama!”

27 Ropa sabaj'a nare, hèia Yesus peka dènge dhèu-dhèu ètu sèra, na, “Nanene paie-iie! Ama Ku ètu sorga pangèd'u le koasa aa'i-aa'i mi Ja'a ne. Dhu tadhe mèu Ja'a, dhoka Ama ku di. Aa dhu tadhe mèu Ama, dhoka Ana Na, nuka Ja'a ne. Aa Ja'a hag'e kore dhèu leo, sèna ka peka dènge ra, ho rèngu tadhe mèu Ne kahèi.^h

28 Miu aa'i-aa'i mi dhu roe lula sab'a bia, mai madhutu Ja'a! Aa miu aa'i-aa'i mi dhu pasae bia, mai la asa Ja'a! 29 Ladhe miu sèmi mere a'aj'a Ja'a, ho kako palere-lere dènge Ja'a, na, èdhi ca ropa dènge sapi dua ngi'u dhu nuni kataka pare rai èci. Te Ja'a ne, d'ara hua iia, aa lii mako. Ladhe miu madhutu Ja'a, miu j'aj'i èra hari.ⁱ 30 Lula a'aj'a Ja'a, carui boe. Aa paredha Ja'a, bia boe kahèi.”