3 Te ngaa ètu era èèna, abhu pèri-pèri mese agama Yahudi dhu tadèngi lii padhai Yesus èèna. Ka ra nasa, hèia ra papeka, na, “Dhèu ne'e ne bani titu kèna peka sèmi èèna! Dhodhoka Ama Lamatua di dhu bisa abho sasala-sasigo dhèu. Te ngaa lii padhai Dhèu ne tao iisi Na sama sèmi Ama Lamatua sa. Nèngu ne pahaha Ama Lamatua!”

4 Te ngaa Yesus ne'a d'ara rèngu. Nèti èèna ka Na lii, aku Nèngu na, “Nga tao ka miu se pangee, na, Ja'a ne pahaha Ama Lamatua? 5 Mia ka dhu mud'a risi? Ladhe Ja'a peka dènge dhèu karuku ne, ‘Ja'a saku eele le sasala èu,’ do, Ja'a peka na, ‘Kèd'i, ho lèpa ka.’ 6 Ladhe na kèd'i dènge ka, miu heka mèdhi, na, Ja'a ne Dhèu Rai-haha Tare'a-re'a. Te Ja'a dènge hak ho abho sasala dhèu.”

Hèia Yesus paredha dhèu karuku ne, peka na, “Kèd'i ka! Ded'e mèti ka karad'a èu, ho lèpa ka!”

7 Ka dhèu karuku ne kèd'i, hèia na lèpa dènge ka. 8 Ropa ladhe rèdhi, hèia rèngu aa'i-aa'i ra malaa-maloha. Hèia ra ded'e padedha-dedha kolongara Ama Lamatua, peka na, “Ama Lamatua, kapai risi eele! Na hia koasa kapai sèmi ne'e, hia mi dhèu rai-haha.”

9 Èle ka Yesus la'e nèti era èèna, hèia ladhe nèdhi ca dhèu roro doi bea dhu sab'a ètu kantor bea. Ngara dhèu ne, Mateos. Hèia Yesus gale ne, peka na, “Mai madhutu Ja'a!” Ropa tadèngi nare, hèia Mateos kèd'i dènge ka, la'e madhutu Yesus.

10 Ka Mateos nèru Yesus si lasi ra'a-rinu asa èmu na. Na nèru kahèi mone aanga-angalai na dhèu roro bea sèra, aa tamu dhu leo kahèi, ho ra'a-rinu dènge rèngu.

11 Te ngaa abhu pèri-pèri dhèu nèti partei Parisi, mai ka'ugu ètu madha ana-ana madhutu Yesus, peka na, “Nga tao ka mese miu madhèdi na'a-ninu dènge dhèu-dhèu dhu guna boe se, nuka sèmi dhèu roro bea dènge angalai ra dhu bhelu-katub'a sèra?”^a

12 Te ngaa Yesus peka dènge rèngu, aku Nèngu na, “Dhèu pèd'a parluu dote-matarii, te ngaa dhèu dhu pèd'a boe parluu boe. 13 Be'a risi lami parisa paie-iie Lii Holo-Nori Ama Lamatua. Te uru èèna, Na pua Hosea, ca dhèu nèti lii padhai Na, dhu suri peka na,

Ne'e ne ka dhu Ama Lamatua peka tèke le. Nèti èèna ka, Ja'a mai boe ho uri dhèu dhu pangee na, rèngu dhèu mola, te ngaa Ja'a mai sèna ka ladhe-leru dhèu dhu laku-laku boe.”^b

14 Èle èèna ka, ana madhutu Yohanis tuka sarani sèra, mai sa Yesus. Dhèu se karèi, aku rèngu na, “Ji'i dhu madhutu Yohanis tema puasa. Aa dhèu Parisi puasa kahèi. Te ngaa tasamia ka ana madhutu Ama sèra loe boe ra'a-rinu? Rèngu re'a boe puasa, do?”

15 Te ngaa Yesus dhaa dènge lii pakasame, na, “Sèmi ne'e: ladhe pesta kab'i, tamu sèra puasa boe, te ngaa ra'a toke bècu. Ladhe pengantin mone dènge rèngu era, aa'i-aa'i ra ra'a-rinu palere-lere. Te ngaa ladhe dhèu leo rai rèti ka pengantin mone ne, hèia mone aanga-angalai Na, d'ara ra susa, de heka ra puasa kèna.

16 Dhèu bisa boe rare bèla hiu ca èta, ho kalape mi kodho dhui dhu mae. Te ropa base kodho ne, bèla hiu dhu kalape la'a deo na karuku, na kodho deo na asa mae aae.

17 J'ara sèmi èèna kahèi, dènge dhua dhu heka rèti mai nèti kapua, bisa boe bhori asa d'ara sabha dhui. Te aad'o na sabha ne madhore, hèia dhua bhori eele asa rai la'e. De dhua dhu hiu hud'i bhori ku asa d'ara sabha hiu, sèna ka dua ra be'a taruu!”^c [Dènge sèmi ne'e, Yesus nori si, peka na, a'aj'a Na dhu hiu, baku pakihu dènge a'aj'a dhu dhui.]

18 Ètu d'ara Yesus padhai lii era dènge ana madhutu Yohanis sèra, hèia kapala nèti èmu manèngi-mangaj'i mai paraga dènge Ne. Ka na patitu kètu urutuu ètu madha Yesus. Hèia na manèngi, aku nèngu na, “Ama, ee! Sue ku ja'a la! Te ana bhèni ja'a heka madhe kèna. De lati ho Ama bane ai mi ana ne, sèna ka na mamuri hari.”

19 Ropa Na tadèngi, hèia Yesus dènge ana madhutu Na, madhutu dènge ka dhèu deo na.

20-21 Ètu talora j'ara, ca dhèu ina kako la'e madhutu si. Bhèni ne lèke papèd'a bhèni, dhu loe boe ciki sa d'ai canguru dua tèu kèna. Na pangee, na, “Sad'i ja'a gai lèke kodho Yesus di, tatu èi papèd'a ja'a ne èle.” Nèti èèna ka, na ara padètu la'e, hèia na gai lèke suu kodho Yesus.

22 Yesus dhu ne'a, hèia Na kabib'a, ladhe sa ina ne. Ka Na lii, peka na, “Ina, ee! Pa'èra la d'ara èu. Te, lula èu parcaya Ja'a tare'a-re'a, nèti èèna ka èu èle nèti papèd'a.” Hèia bhèni ne èle dènge ka.

23 Èle ka, Yesus si lasi taruu asa èmu nèti kapala èmu manèngi-mangaj'i èèna. D'ai era nèi, maso la'e asa d'ara, hèia Na ladhe nèdhi dhèu dhu tema karihu musiik mamadhe, dènge dhèu ae dhu tangi d'ara pèd'a. 24 Te ngaa Yesus peka dènge ra, aku Nèngu na, “Ae eele ka tangi, aa lami ka èmu miu! Te ana ne madhe boe, dhoka na bhèj'i di.” Te ngaa dhèu se mari dènge pakapengo hèb'a mi Yesus.

25 Èle ka, dhèu se aa'i-aa'i lasi asa li'u. Ka Yesus maso asa d'ara kama ana bhèni ne. Na kèpe ai ana ne, hèia ana ne mamuri dènge ka. 26 Ropa ladhe rèdhi j'ara ne, ka dhèu mulai palolo lème ètu kabarai ra, lula-nèti ngaa dhu Yesus tao ne.

27 Èle, hèia Yesus kako taruu. Ètu talora j'ara, abhu dhèu bèdhu dhèu dua dhu madhutu Ne. Dua ra rodhe, peka na, “Ana-èpu dhèu aae Daud! Sue ku ji'i la!”

28 Ropa Yesus maso asa d'ara èmu cue, dhèu bèdhu se lasi paraga dènge Ne. Ka Yesus karèi dua ra, peka na, “Miu se lèka tare'a-re'a, na, Ja'a ne dènge koasa ho puri-pa'èle miu, sèna ka bisa ladhe mèdhi, do?”

Hèia dua ra dhaa, aku rèngu na, “Ama karèi ia ka, te ji'i dhu lèka mema-mema le.”

29 Ropa tadèngi lii dhaa dua ra, hèia Yesus g'ag'e musi madha ra, ka Na peka na, “Ladhe sèmi èèna, na, j'aj'i ka madhutu parcaya miu.” 30 Yesus padhai lii èle, hèia dua ra ladhe rèdhi dènge ka. Te ngaa Yesus pasanèd'e si, peka na, “Baku miu peka dènge ca dhèu sa, ngaa dhu j'aj'i le!”

31 Te ngaa dhèu se taha rare boe d'ara ra. Ka ra kako palème kabarai èèna, lole dènge dhèu aa'i-aa'i, tatao Yesus mi rèngu dua ra.

32 Ropa dhèu bèdhu se lasi, dhèu rèti dhèu leo hari èci asa Yesus. Dhèu ne bisa boe padhai lii, lula nidhu tao ne. 33 Ropa ladhe nèdhi, hèia Yesus paredha nidhu kalua nèti dhèu lii aad'o ne. Nidhu èèna kalua, ka dhèu ne padhai lii dènge ka. Hèia dhèu ae ètu era èèna malaa, ka ra peka na, “Ira ii! Èdhi dhèu Yahudi paraga tèdhi mèka madha j'ara sèmi ne'e ne!”

34 Te ngaa dhèu Parisi ka'uu, peka na, “Dhèu aae nidhu ka dhu hia Ne koasa, sèna ka Na bisa babège eela nidhu.”^d

35 Èle èèna ka, Yesus kako palème kota-kota dènge rae-rae, sèna ka aj'a-nori dhèu ètu d'ara èmu sabaj'a sèra. Na aj'a dhèu nèti Lii Holo-Nori Ama Lamatua, aa j'ara tasamia rèngu bisa j'aj'i dhèu unu Ama Lamatua. Na puri-pa'èle kahèi dhèu nèti papèd'a-tarègu ra.^e 36 Ropa Yesus ladhe nèdhi dhèu ae se, hèia Na taha nare boe d'ara, lula dhèu se re'a heka tao sèmi ngaa sa. Te rèngu nuka sèmi kahib'i-kalèbho dhu dènge boe dhèu madhenga.^f 37 Èle ka, Yesus padhai lii dènge ana madhutu Na, aku Nèngu na, “Dhèu ae se, nuka sèmi nganga'a ae-ae ètu d'ara oka-tedhe. Masi ka nganga'a ae titu kèna, te ngaa dhèu sab'a d'ai boe ho puu-g'ètu, sèna ka tèke asa d'ara gud'a.^g 38 Nèti èèna ka, miu hud'i manèngi ku mi Lamatua oka, sèna ka Na tabha hari dhèu sab'a, ho lasi puu-g'ètu isi oka se.”