Lii lolo dhu uru tèka
Nèti Ama Lamatua paj'aj'i dedha-liru dènge rai-haha
Ama Lamatua paj'aj'i dedha-liru, rai-haha, dènge isi ra
1
Uru-uru tèka, Ama Lamatua paj'aj'i dedha-liru dènge rai-haha.2 Lod'o rai-haha j'aj'i mèka, aa'i-aa'i dhae mèci mèka. Dhu abhu, èi. Aa maroga aatu-aatu saguru nare ne. Ka Roh Lamatua lela ètu dedha èi èèna.a
3 Hèia Ama Lamatua peka, “Hud'i ku dènge saraa.” Ropa peka nare sèmi ne'e, ka saraa j'aj'i dènge ka. 4 Ropa nèdhi saraa ne, d'ara Na karej'e, lula ngaa dhu Na ad'u, mema be'a. Hèia Na hag'e eele saraa nèti maroga, sèna ka èci-èci ka dènge taa na. 5 Ka pangare saraa ne ‘mèu’, aa maroga na ‘mèda’. Ne'e ne, lod'o ka èci kèna.
6-7 Hèia Ama Lamatua lii hari, Na peka, “Hud'i dènge ku era talele, sèna ka hag'e eele èi. Nèti èèna ka, èi re dedha, aa abhu kahèi èi re haha.” Ropa peka nare sèmi èèna, hèia èi b'agi dènge mi dua. 8 Ka Na pangare èi re dedha na, ‘liru’. Ne'e ne, lod'o ka dua kèna.
9 Hèia Ama Lamatua peka hari, aku Nèngu na, “Èi re haha hud'i pakaboko ku mi ca era, sèna ka abhu rai kamango.” Ropa padhai lii nare sèmi ne'e, j'aj'i dènge ka rai mango. 10 Ka era rai mango, Na pangare na ‘rai-dedha’; aa era èi dhu kaboko èèna, Na pangare na ‘dhasi’. Ropa nèdhi aa'i-aa'i ne, d'ara Na karej'e, lula ngaa dhu Na ad'u, mema be'a. 11 Ka Ama Lamatua lii hari, peka na, “Rai hud'i pamamuri ku rupa-rupa ana aaj'u. Sèna ka abhu aj'u dhu hua, dhu dènge lamusi, aa dhu dènge rèu mangèru. Sèna ka aj'u-aj'u se, hua-hela madhutu rupa rèngu.” Ropa padhai lii nare sèmi ne'e, j'aj'i dènge ka ana aaj'u aa'i-aa'i ra. 12 Ètu dedha-rai, ana aaj'u se hua-hela ka madhutu rupa rèngu. Ropa nèdhi aa'i-aa'i se, d'ara Na karej'e, lula ngaa dhu Na ad'u, mema be'a. 13 Ne'e ne, lod'o ka tèlu kèna.
14-15 Hèia Ama Lamatua lii hari, aku Nèngu na, “Re bèka dedha, hud'i abhu ku mèdha dhu saraa, ho pasaraa rai-haha ne. Hud'i abhu mèdha dhu pasaraa re mèu, aa abhu kahèi dhu pasaraa re mèda. Rèngu aa'i-aa'i se, j'aj'i tadha, ho sèna ka bisa ige lod'o, hèru, dènge tèu.” Ropa padhai lii nare sèmi ne'e, mèdha dhu heo aa'i-aa'i ra j'aj'i dènge ka. 16 Ka Na tao ka mèdha kapai dua dhu pasaraa rai-haha. Dhu kapai risi, pasaraa re mèu; aa dhu ako ana iiki, pasaraa re mèda. Aa Na tao hua-hètu kahèi. 17 Na tèke mèdha dhu saraa sèra ètu dedha-liru, sèna ka loti mai asa rai-haha. 18 Ka mèdha se, pasaraa ka re mèu, aa pasaraa re mèda. Dènge j'ara ne'e, Na hag'e eele saraa nèti maroga. Ropa nèdhi aa'i-aa'i se, d'ara Na karej'e, lula ngaa dhu Na ad'u, mema be'a. 19 Ne'e ne, lod'o ka èpa kèna.
20 Hèia Ama Lamatua padhai lii hari, peka na, “Hud'i abhu ku ae-ae dhu mamuri ètu d'ara èi. Dènge hud'i abhu ku rupa-rupa manu-bhui dhu lela ètu dedha rai-haha ne.” 21 Ka Na tao ka i'a aa'i-aa'i dènge badha kapai dhu mamuri ètu d'ara èi. Na paj'aj'i kahèi manu-bhui aa'i-aa'i. Ropa nèdhi aa'i-aa'i se, d'ara Na karej'e, lula ngaa dhu Na ad'u, mema be'a. 22 Ka Na padhai lii ho sèna ka hia berkat mi aa'i-aa'i dhu mamuri, peka na, “I'a se, hud'i laa bèba-kacanga sèna ka papènu èi ètu mia-mia. Aa manu-bhui, asa tabha kahèi.” 23 Ne'e ne, lod'o ka lèmi kèna.
24-25 Ka Ama Lamatua peka hari, na, “Hud'i abhu ku rupa-rupa badha dhu mamuri ètu rai-dedha. Sèmi: badha-manu dhu ani, badha hui, dènge badha dhu rod'o, èci-èci ka dènge rupa na.” Ropa padhai lii nare sèmi ne'e, badha aa'i-aa'i ra j'aj'i dènge ka. Ropa nèdhi aa'i-aa'i se, d'ara Na karej'e, lula ngaa dhu Na ad'u, mema be'a.
26 Ka Ama Lamatua peka hari, aku Nèngu na, “Hua iia, mai Ta paj'aj'i dhèu, madhutu rupa Èdhi. Hud'i laa ra leru dènge ator i'a aa'i-aa'i ètu d'ara dhasi, manu-bhui aa'i-aa'i ètu dedha-liru, badha-manu dhu ani, dènge badha leo aa'i-aa'i ra dhu mamuri ètu rai-haha ne.”b
27 Hèia Na paj'aj'i dhèu rai-haha ne madhutu rupa Na. Na paj'aj'i si, dhèu mone dènge dhèu bhèni. 28 Ka Na padhai lii ho sèna ka hia berkat mi rèngu, aku Nèngu na, “Miu hud'i bèba-kacanga ku, sèna ka pea papènu rai-haha ne, ho mi ator ne. Ja'a hia miu koasa, sèna ka mi ator i'a, manu-bhui, dènge badha-manu aa'i-aa'i ra ètu rai-haha ne. 29 Mi nanene paie-iie! Ja'a hia miu rupa-rupa nganga'a ètu rai-haha ne'e. Sèmi: ana aaj'u dhu dènge hua, dhu dènge lamusi, aa dhu dènge rèu mangèru. 30 Ja'a hia rupa-rupa ana aaj'u kahèi sèna ka j'aj'i nganga'a badha. Nganga'a hia badha-manu dhu ani, badha hui, badha dhu rod'o, dènge manu-bhui.” Ropa padhai lii nare sèmi ne'e, nganga'a badha sèra aa'i-aa'i ra j'aj'i dènge ka. 31 Ropa nèdhi aa'i-aa'i se, d'ara Na karej'e, lula ngaa dhu Na ad'u, mema be'a. Ne'e ne, lod'o ka èna kèna.