2 Hèia Yesus dhaa, peka na, “Èmu ne mema saraga titu kèna! Te nèbhu heka, dhèu paguri eele ne. Ka hadhu-hadhu sèra, èci sa pamadhèdi heka ètu dedha èci.”

3 Èle èèna ka, Yesus si lasi asa ledhe Saitun, ka Na madhèdi ètu era dhu patangara dènge Èmu Kapua Manèngi-Mangaj'i. Hèia Petrus, Yakobis, Yohanis dènge Anderias mai padhai lii dènge Yesus. 4 Ra karèi, aku rèngu na, “Ama! Lole hari ku, lii dhu Ama ku peka dènge ji'i deo na. Lod'o mia sèra sa j'aj'i? Aa tadha-tadha na, samia?”

5 Hèia Yesus dhaa, aku Nèngu na, “Sad'i miu pajiko paie-iie, sèna ka baku lèke tipu. 6 Te ladhe èèna na, dhèu ae mai tèb'a kakara, ho ra peka na, ‘Ja'a ne Kristus, Dhèu dhu Ama Lamatua moa nèti uru ka mai.’ Aa ra leko-monya dhèu ae. 7 Ladhe miu mèdhi dhèu pamusu, do tadèngi lii lolo dhèu papara-pakèj'i dènge pakasiro ètu mia-mia, miu baku madha'u kahèi. Sèra sa hud'i j'aj'i uuru ku. Te ngaa lod'o èle rai-haha èèna dhae d'ai mèka. 8 Dhèu nèti ca suku mai pamusu dènge suku leo, rai èci mai pamusu dènge rai leo. Ètu mia-mia, j'aj'i rai opo dènge kabake-manganga. Sèra sa j'aj'i tadha sama sèmi dhèu bhèni èci dhu kabake pèd'a neo nara iisi.

9 De hua iia, na, miu mage-mage! Te èèna na dhèu mai kèpa miu, ho ra nuni asa dhèu paredha agama dhu pama'ète lii agama. Aa ra game miu ètu d'ara èmu-èmu manèngi-mangaj'i. Ho èèna na rèti miu asa madha dhèu dhu dènge koasa, lula miu madhutu Ja'a. Te ngaa be'a kahèi, ne'e ne miu abhu tebho ho peka kolongara Ja'a mi rèngu. 10 Te dhèu unu Ama Lamatua hud'i lasi uuru ku lole Lii Lolo Be'a Ja'a mi suku aa'i-aa'i ètu rai-haha ne, heka lod'o èle rai-haha ne d'ai kèna. 11 Sanèd'e, ee! Ladhe ra èki rèti miu asa era pama'ète lii langu, miu baku madha'u, peka na, ‘Èèna na ja'a neo padhai lii ngaa? Do, ja'a neo dhaa ngaa?’ Ladhe d'ai lod'o èèna, miu padhai lii madhutu ngaa dhu Roh Mola-Mèci Ama Lamatua peka dènge miu.^a

12 Ètu d'ara èmu cue, ladhe abhu dhèu dhu parcaya Ja'a, èèna na a'ari nèngu tenge j'ara ho pamadhe ne. Sèmi èèna kahèi, ladhe abhu ana dhu parcaya Ja'a, èèna na ama d'èlu na tenge j'ara ho pamadhe ne. Sèmi èèna kahèi, ladhe abhu ina-ama dhu parcaya Ja'a, èèna na ana d'èlu rèngu tenge j'ara ho pamadhe si. 13 De èèna na, dhèu d'èi boe miu, taga miu madhutu Ja'a. Te ngaa dhèu cee dhu bisa taha toke d'ai èle lod'o èèna, tatu Ama Lamatua hia mamuri mi nèngu.”^b

14 Yesus tuhu hari lii padhai Na, aku Nèngu na, “Èèna na, abhu dhèu èci dhu bhelu-katub'a risi eele mai. Ho na mai maso ka titu ètu era laluri ètu d'ara Èmu Kapua Manèngi-Mangaj'i, dhu madhutu iia-iia na, nèngu bisa boe ètu era èèna, ho na pahera era èèna. Nèti èèna ka, Ama Lamatua tèke eele era èèna. Ladhe miu mèdhi le sèmi èèna, na, mi pajiko paie-iie! (Cee dhu baca lii ne'e, pajiko paie kahèi!) Èèna j'aj'i mi tadha, peka na, lod'o-lod'o j'aj'èra, dètu ae le. Ladhe mèdhi sèmi èèna, na, dhèu-dhèu ètu propensi Yudea lega-rai asa kolo ledhe lasi.^c 15 Rèngu hud'i rai pamèri-mèri, sèna ka baku abhu j'aj'èra. Ladhe dhèu mai le asa li'u, lèpa ia ka rare mèdha asa d'ara èmu. 16 Sèmi èèna kahèi, dhèu ètu d'ara oka, baku lèpa èmu rare mèdha-papake.^d 17 Dhu j'èra risi, dhèu bhèni dhu dènge babia, dènge ina dhu pasusu ana rara iisi hiu, lula rèngu rai rare boe. 18 De hua iia risi miu sabaj'a, sèna ka lod'o j'aj'èra sèra baku lèke dènge hèru èj'i lai. 19 Te j'aj'èra lod'o èèna, bia titu kèna! Mulai nèti Ama Lamatua tao rai-haha, toke d'ai sange ne'e, dhèu rèdhi mèka j'aj'èra dhu bia sèmi èèna. J'aj'èra bia sèmi èèna, lod'o limuri, j'aj'i heka hari.^e 20 Ladhe Ama Lamatua pab'ab'e boe lod'o j'aj'èra sèra, abhu boe dhèu èci sa dhu mamuri. Te ngaa, taga Ama Lamatua sue dhèu dhu Na hag'e nare sèra, ka Na pab'ab'e lod'o-lod'o j'aj'èra sèra.

21 Ladhe lod'o d'ai na, miu tadèngi dhèu mai peka, aku rèngu na, ‘Ladhe ku! Kristus ètu ne'e!’ Aa dhèu leo hari peka, aku rèngu na, ‘Aad'o! Kristus ètu nèi!’ Miu baku nanene kahèi! 22 Te ladhe èèna na, dhèu mai ho tèb'a kakara, peka na, ‘Ja'a ne, Kristus!’ Aa cahag'e hari peka na, ‘Ja'a ne, dhèu nèti lii padhai Ama Lamatua.’ Èèna na ra tao tadha malaa ae-ae dènge koasa nidhu, ho kapod'e-kabèli dhèu. Rèngu patangi-tenge j'ara sèna ka dhèu unu Ama Lamatua lèke tipu kahèi! 23 Nèti èèna ka, miu pajiko paie-iie! Mema lod'o j'aj'èra bia èèna d'ai mèka, te ngaa Ja'a pasanèd'e uuru miu!”

24 Èle èèna ka, Yesus peka hari dènge ana madhutu Na sèra, aku Nèngu na, “Ladhe èle lod'o j'aj'èra sèra, na,

26 Èle èèna, heka dhèu ladhe rèdhi Ja'a, Dhèu Rai-haha Tare'a-re'a ne. Èèna na Ja'a mai dènge ra'i-liru nèti dedha. Hèia dhèu aa'i-aa'i ladhe rèdhi a'èra dènge dadedha Ja'a.^h 27 Ka Ja'a paredha ana pajuu Ama Lamatua nèti sorga, ho puru lasi oru-kaboko dhèu aa'i-aa'i dhu Ja'a hag'e kore nèti mia-mia ètu rai-haha ne; nèti suu haa d'ai suu dhimu, nèti suu badae toke d'ai suu balèu.”

28 Yesus tuhu hari lii padhai Na, peka na, “Ja'a kore upama nèti ana aaj'u. Ladhe rèu na mulai karara, èèna tadha hèru hadhu dètu le!

29 Sèmi èèna kahèi, ladhe miu mèdhi lod'o-lod'o j'aj'èra sèra j'aj'i, sama sèmi lii peka Ja'a deo na, èèna j'aj'i mi tadha, peka na, mamai Ja'a dètu ae le. 30 Ne'e ne Ja'a peka dènge miu kèna! Nèti dhèu aa'i-aa'i dhu mamuri se, èèna na abhu cahag'e dhu dhae madhe mèka, te lod'o-lod'o dhu pènu dènge j'aj'èra na d'ai le. 31 Masi ka liru dènge rai-haha ne ele, te ngaa lii holo-nori Ja'a ele boe, toke d'ai mia-mia la'e.”

32 Yesus tuhu hari lii, peka na, “Dhèu èci sa re'a boe lod'o do jam dhu Ja'a mai hari. Ana pajuu Ama Lamatua ètu sorga sèra re'a boe kahèi. Ja'a mesa ku, ke'a boe kahèi. Dhoka Ama Ku mesa Na di, dhu ne'a.ⁱ 33 Nèti èèna ka, miu aa'i-aa'i mi hud'i pajiko paie, lula miu me'a boe lod'o d'ai na.

34 Nèbhu heka, Ja'a laku tèke eele miu kèna, te ngaa èèna na Ja'a mai hari. Sama sèmi dhèu dhu la'e tèke eele èmu nèngu, ho la'e asa rai kaj'èu. Na pua ana-ana nèngu j'aga paie èmu. Aa na bagi hia si sasab'a. Ka na paredha ana madhenga èmu, sèna ka na j'aga paie, toke d'ai nèngu lèpa hari.^j 35 Miu hud'i j'aga mèda-mèu kahèi, lula miu me'a boe lod'o mia Ja'a mai hari, sama sèmi ana madhenga èmu ne'a boe lod'o lamatua èmu na lèpa. Lèpa lod'o nihia, talora mèda, oe mèu, lod'o rea, do lod'o nètu; miu me'a boe jam èèna. 36 Mage dhoka na mai sahèka, te abhu miu dhu bhèj'i luu era.

37 De, ngaa dhu Ja'a peka dènge miu ne'e, Ja'a peka lème dènge dhèu leo kahèi, ‘Miu hud'i pajiko paie, ho mi soru mamai Ja'a.”’

[D'ai sange ne'e ka, Lamatua Yesus padhai lii lula-nèti lod'o-lod'o j'aj'èra dhèu rai-haha, dènge ana madhutu Na sèra ètu ledhe Saitun.]