4 Ka Yesus tuhu hari lii Na, aku Nèngu na, “Ana-ana, ee! Mage miu madha'u, ladhe dhèu neo pamadhe miu. Te rèngu pamadhe dhoka ngi'u aae di, te ngaa ra bisa boe tao ngaa mi samanga miu. 5 De Ja'a neo peka, na, miu hud'i madha'u mi cee ku. Miu hud'i madha'u ku dènge Ama Lamatua. Te Nèngu ka dhu bisa pamadhe miu, aa pèci asa d'ara ai naraka. De miu hud'i madha'u tare'a-re'a mi Nèngu.

6 Miu pangee sèku, ana mangungu kab'ua ca ngaa? Mura titu kèna! Lèmi ngi'u, dua doi, si? Masi ka sèmi èèna, te ngaa Ama Lamatua bhèlu boe ci'u sa hèi. 7 Aa sèmi èèna kahèi, Lamatua tao ai-hèb'a mi miu. Lamatua ne'a mèu, abhu rèu kètu pèri loa ètu kaba kètu miu. De miu baku madha'u, te Lamatua pakab'ua miu risi nèti ana mangungu ae-ae sèra.”

8 Èle ka, Yesus padhai lii dènge ana madhutu Na, aku Nèngu na, “Pasa dhilu miu paie-iie! Ladhe dhèu bani mangaku Ja'a ètu madha dhèu ae ètu rai-haha ne, pe Ja'a mangaku nèngu kahèi ètu madha ana pajuu Ama Lamatua ètu sorga, peka na, nèngu ne dhèu Ja'a. 9 Te ngaa dhèu dhu padhai lii ètu madha dhèu rai-haha, peka na, nèngu tadhe boe Ja'a, bèli-camèd'a ètu madha ana pajuu Ama Lamatua ètu sorga, Ja'a tadhe boe nèngu kahèi.

10 Ja'a ne, Dhèu Rai-haha Tare'a-re'a. Ladhe abhu dhèu dhu padhai pakarehe kolongara Ja'a, Ama Lamatua sadia ho pabhèlu eele sasala na era. Te ngaa ladhe na padhai pakarehe kolongara Roh Lamatua dhu Mola-Mèci èèna, Ama Lamatua bhèlu boe sasala na.^c

11 Ladhe dhèu ère rèti miu asa era uri lii langu agama, do, rèti miu asa dhèu paredha, lula miu parcaya Ja'a, mage miu pangee, na, tasamia miu bisa siri iisi. 12 Te ètu d'ara lai-lai èèna kahèi, Roh Ama Lamatua dhu Mola-Mèci èèna, peka dènge miu lii dhu pamèci ho b'ala dhèu sèra.”^d

13 Èle èèna ka, ca dhèu nèti dhèu ae sèra, karèi Yesus, aku nèngu na, “Ama Mese! Peka ku dènge a'a ku, ho pabagi dènge ja'a pusaka ama ji'i.”

14 Te ngaa Yesus b'ala ne, “Waa! Dhèu cee ka dhu ded'e Ja'a j'aj'i hakim, sèna ka pama'ète lii langu miu sèmi èèna?”

15 Hèia Yesus peka mi dhèu ae sèra, aku Nèngu na, “Sanèd'e, ee! Miu baku j'aj'i dhèu manga'a. Te kakaja-sasu'i bisa boe nèti mamuri dhu mera-milu.”

16 Èle ka, Na padhai lii pake lii pakasame, aku Nèngu na, “Dhèu kaja ca dhèu, isi oka na ae titu kèna. 17 Ka èmu-èmu dhu tèka nganga'a na pènu tao cacèci, aa risi eele hèi, ka ne'a heka tao tasamia. 18 Ka na pama'ète, peka na, ‘Ja'a neo tao sèmi ne'e ka! Èmu era tèka nganga'a dhu dhui se, ja'a sag'e eele ho patitu hari dhu kapai risi, sèna ka tèke nganga'a nèti d'ara oka dènge mèdha-panyau ja'a aa'i-aa'i ra. 19 Ladhe j'aj'i ka sèmi èèna, ja'a pama'ète kore, na, “Gud'a pènu le! Nganga'a tesa le, ku'a d'ai tèu-tèu. De ku'a-kinu pakarej'e iisi dènge pacapa haga!”’ 20 Te ngaa Ama Lamatua peka dènge ne, na, ‘Heeh! Dhèu goa! Mèda ne'e kahèi, èu madhe. Aa cee ka dhu abhu aa'i isi gud'a èu sèra?’

21 De sèmi ne'e! Bisa kahèi, dhèu pakaboko mèdha-panyau ae-ae ètu rai-haha ne hia ngi'u na, te ngaa ètu d'ara ngangee Ama Lamatua, nèngu ne, dhèu unu aad'o, lula pabe'a boe dènge Lamatua.”

22 Ka Yesus aj'a tabha hari ana madhutu Na, aku Nèngu na, “Miu mage dhoka pangee mamuri miu bèli-bèli, nèti nganga'a-nganginu, do mèdha-papake. 23 Te mamuri èdhi ne risi nèti ngaa dhu èdhi ta'a, aa ngaa dhu èdhi pake. 24 Ladhe sèku lakaa! Rèngu sèra sèla boe, puu-g'ètu boe, dènge boe gud'a ho tèke nganga'a, te ngaa Ama Lamatua kab'oi si. Ladhe sèmi èèna, tatu Nèngu piara miu kahèi. Lula Na pakab'ua miu risi nèti manu-bhui sèra. 25 Sèmi dhèu titu ètu madha tèru, ho lalau iisi na, nèngu bisa pamadhera mamuri na, do? Aad'o, sina ma! 26 De ladhe bhute dènge ngaa-ngaa dhu ana iiki sèra, dhu dènge boe kolo-kapua, tasamia hari ka miu bhute dènge madha j'ara dhu kapai? A'oto na ngaa?

27 Ladhe sèku bunga dhu muri tab'a ètu d'ara j'ami. Rèngu sab'a boe oka-tedhe, aa ra manènu boe sig'i-rabhi. Te ngaa mèdha-papake dhèu aae Soleman dhu kab'ua aae, saraga risi boe hela bunga dhu muri tab'a ètu d'ara j'ami sèra.^e 28 Te Ama Lamatua piara j'u'u dhu ana iiki-iiki dhu kab'ua aad'o, dhu dhoka mamuri deo ne'e, aa bèli madhe, ho dhèu core asa d'ara ai. Ladhe sèmi èèna, na, Nèngu bisa kab'oi miu dhu kab'ua risi eele nèti j'u'u sèra. De tasamia ka parcaya miu èra boe mi Lamatua? 29 Sèmi èèna kahèi, miu baku bhute dènge nganga'a-nganginu. Te èèna na, Lamatua uri hia miu. 30 Dhèu dhu tadhe boe Lamatua, rèngu sèra sab'a toke madhe, sèna ka tao j'ara sèra. Te ngaa miu baku sèmi rèngu, te Ama miu ètu sorga dhu ne'a aa'i le ngaa dhu miu parluu. 31 Te ngaa pakako uuru ku sasab'a Ama Lamatua, pe Na uri j'ara se'e hia miu kahèi.”

32 Hèia Yesus tuhu hari lii padhai Na, peka na, “Miu nuka sèmi cakaboko iiki kahib'i-kalèbho dhu èra boe. Te ngaa baku madha'u! Te Ama miu ètu sorga, Dhèu Aae Kapai. Ngaa dhu unu Nèngu, Na hia mi ana-ana Na dènge d'ara karej'e. 33 De lami pahie mèdha-panyau miu, ho kab'ua na pabagi dènge dhèu dhu dènge boe unu. Dènge sèmi èèna, miu tèke le mèdha-panyau miu ètu sorga ètu era dhu ele iie boe taa-taa. Dhèu mana'u bisa boe lasi mana'u rare. Ana cangèpi bisa boe pa'ele iie. 34 Sanèd'e paie-iie! Mèdha-panyau miu ètu mia, na, d'ara miu ètu èèna kahèi.”

35-36 Yesus padhai lii hari, peka na, “Mèda-mèu miu musti bori mema dhari ho lalau Lamatua. Nuka sèmi ènu dhu beke, mate lamatua èmu na lèpa nèti pesta kab'i. Ropa lamatua na kad'eu babèdho èmu, nèngu bhoke dènge.^f 37 Ladhe lamatua mai nèdhi dhèu sab'a se dhu mate tae-tae, tatu rèngu oto. Pe lamatua ra pad'elo d'ara be'a na mi rèngu. Na pake mèdha-papake dhèu sab'a, ho la'e lalau nganga'a be'a, sèna ka hia dhèu sab'a se'e ra'a-rinu. 38 Dhèu sab'a se mema oto, lula rèngu ladhe-leru lamatua ra dènge be'a. Masi ka lamatua ra lèpa èmu hake pèri èèna ka, d'ara talora mèda, do oe mèu, rèngu dhu bori mema dhari.

39 Sanèd'e paie-iie! Ladhe abhu lamatua èmu dhu ne'a mema hake pèri dhèu mana'u mai mana'u, tatu na soro tèke boe ho dhèu mana'u huki èmu na. 40 De miu hud'i bori mema dhari, te ca dhèu sa dhu re'a boe pèri lod'o Dhèu Rai-haha Tare'a-re'a èèna mai hari.”^g

41 Hèia Petrus karèi Yesus, peka na, “Ama Mese! Lii pakasame Ama deo na, lèke dhoka mi ji'i do, lèke mi dhèu aa'i-aa'i?”

42-44 Ka Yesus dhaa, na, “Lii pakasame deo na lèke mi dhèu aa'i-aa'i dhu tao sèmi kapala urusan dhu satia. Nèngu d'èlu-mèu uri j'ara-j'ara dhu be'a hia mi lamatua na. Te èèna na, lamatua na ded'e ne, sèna ka papala nganga'a hia mi dhèu sab'a dhu leo sèra. Ladhe nèngu maj'èni sab'e madhutu sasab'a na sèmi èèna, masi ka lamatua na mai sange mera mia èèna ka, te ngaa nèngu ne dhu loe boe tao j'ara dhu lèke. Hèia na oto, lula lamatua na ded'e ne ho ladhe-leru mèdha-panyau na aa'i-aa'i.

45 Te ngaa carui bagi kapala urusan dhu pangee, na, ‘Ele boe nèbhu ku, heka lamatua ne lèpa kèna.’ Hèia na kalabhe dhèu sab'a dhu leo sèra, mone dènge bhèni. Ka na madhèdi na'a-ninu dènge kea rae-rae toke mahu. 46 Te ngaa ca tèka kapala urusan ne ne'a nare boe, cag'ag'a laa, lamatua na lèpa. Ka lamatua na kalabhe ne, hèia babège eele ne, sèna ka sèmi nare pala na ètu li'u, palere-lere dènge dhèu dhu satia boe, tao madhutu dad'èi lamatua ra.

47 Te dhèu sab'a dhu re'a dad'èi lamatua ra, te ngaa pa'èra boe tao madhutu, do, d'èi boe sab'e madhutu, bèli-camèd'a ra dui rare hahuku dhu bia. 48 Te ngaa dhèu sab'a dhu sab'e sale, lula re'a boe dad'èi lamatua ra, rèngu abhu boe hahuku dhu bia. Te dhèu dhu abhu ae, ra manèngi ae nèti nèngu kahèi. Dhèu dhu abhu sasab'a kapai, dhadhaa na kapai kahèi.”

49 Èle èèna ka, Yesus tuhu hari lii padhai Na, aku Nèngu na, “Mamai Ja'a ne ho cèri eele dhèu Ja'a nèti dhèu leo ètu rai-haha ne. Ne'e nuka sèmi dhèu pake ai, ho tunu eele maruru. Dad'èi Ja'a ka ladhe ai ne mulai heo ètu mia-mia. 50 Te ngaa uru nèti èèna, Ja'a hud'i pasae ku j'aj'èra dhu bia. Ja'a bèli-camèd'a j'èra ae, toke d'ai èle sasab'a-la'a Ja'a.^h 51 Miu pangee, na, Ja'a mai kèti dame ètu rai-haha, do? Aad'o! Ja'a mai sèna ka tao dhèu rai-haha ne patao-palaha dènge mae-manyèla, lula lii holo-nori Ja'a. 52 Nèti deo ne'e, dhèu dhu pa'a'ari mae-manyèla. Ètu d'ara èmu cue, dhèu tèlu lab'a dhèu dua, dua lab'a tèlu.

54 Hèia Yesus lii dènge dhèu ae sèra, aku Nèngu na, “Ladhe miu mèdhi ra'i-liru mèdhi aae cèu nèti haa, miu peka na, ‘Ne'e, tadha èj'i oe mai kèna.’ Mema lèke sèmi èèna. 55 Ladhe ngèlu balèu mai, miu peka na, ‘Ne'e, tadha lod'o pana titu kèna.’ Mema tare'a sèmi èèna kahèi. 56 Weeh! Miu dhèu leko-monya dhu padhai lii leo, tao leo! Miu d'èlu-mèu titu kèna me'a peka mia lod'o èj'i, aa mia lod'o pana aae. Te ngaa tasamia ka mo'o boe me'a dènge dad'èi Lamatua ètu taa limuri ne?”

57-58 Ka Yesus tuhu hari lii Na, aku Nèngu na, “Ladhe miu tao lii langu, nga tao ka miu bisa boe pama'ète unu mi, mia dhu lèke! Be'a risi uri uuru ku dame! Mage dhoka miu d'ai katanga madha hakim, ho na pama'ète, na, miu maso asa d'ara bèdho. 59 Te ladhe sèmi èèna, miu bisa boe kalua, ladhe miu b'ae mere mèka dedha dhu hakim pama'ète nare èèna.”