3-4 Te ngaa Yesus b'ala, peka na, “Tasamia, ee? Miu sanèd'e lii lolo baki Daud? Daud dènge dhèu madhutu na lula manganga ae, ka maso lasi asa d'ara Paleo Manèngi-Mangaj'i Ama Lamatua. Hèia ra'e roti dhu ama agama hia le Lamatua. Te ngaa roti se'e dhodhoka ama agama di dhu bisa ra'e. Dhèu leo bisa boe. Ka baki Daud si ra'e, te ngaa ca dhèu sa peka boe, na, rèngu sale. Miu se, sèmi baca mèdhi boe Sasuri Mola-Mèci Ama Lamatua!^b

5 Pasa dhilu ho nanene paie-iie! Ja'a ne, Dhèu Rai-haha Tare'a-re'a. Ja'a dènge hak ho pama'ète, na, dhèu bisa sab'a ngaa, lèke dènge lod'o a'ae sasab'a.”

6 Ca tèka, lèke dènge lod'o a'ae sasab'a dhu leo, Yesus la'e aj'a ètu d'ara èmu manèngi-mangaj'i. Ètu era èèna, abhu dhèu mone èci, dhu ai madhe cabèka. 7 Ètu èèna, abhu kahèi pèri-pèri mese agama, dènge dhèu nèti partei agama Parisi, dhu tenge j'ara ho pamanahu Yesus. Ra tatae, tao-tao Na neo puri-pa'èle dhèu dhu ai madhe cabèka ne, lèke dènge lod'o a'ae sasab'a. Dènge j'ara ne'e, rèngu bisa abhu j'ara ho galaa Ne ètu madha dhèu ae. 8 Te ngaa Yesus ne'a ngangee rèngu. Nèti èèna ka, Na paroa dhèu dhu ai madhe cabèka ne, aku Nèngu na, “Angalai! Mai ku. Titu ètu talora aae ne!” Hèia la'e titu dènge ka ètu talora èèna. 9 Ka Yesus karèi dhèu-dhèu ètu sèra, peka na, “Ja'a karèi ku miu laa. Madhutu atora agama èdhi, ngaa dhu èdhi bisa tao ètu lod'o a'ae sasab'a? Èdhi tao dhu be'a, do, tao dhu karehe? Hia mamuri mi dhèu, do, pa'ele iie mamuri na?” 10 Hèia Yesus ladhe palème rèngu aa'i-aa'i ra, ka Na lii dènge dhèu dhu ai madhe cabèka ne, peka na, “J'ole ai èu mai!” Ka na soro ai na, hèia èle dènge ka.

11 Ropa rèdhi sèmi èèna, ka dhèu kapai se nasa titu kèna. Hèia ra peka, na, “Èdhi tenge hari ku j'ara leo, sèna ka pamanahu Ne!”

12 Nèbhu boe ka, Yesus la'e sabaj'a asa ledhe èci. Na sabaj'a ètu èèna camèd'a kateme. 13 Asa bèli mad'ae, Yesus paroa ana madhutu Na. Ka nèti rèngu aa'i-aa'i ra, hag'e nare canguru dua dhèu ho j'aj'i dhèu pajuu-paleha Na. Dhèu dhu hag'e nare sèra, nuka:

17 Ropa puru mai nèti ledhe deo na, Yesus dènge ana madhutu Na, ae taha ètu era mera èci. Ètu èèna, abhu dhèu ae dhu pakaboko. Dhèu se mai nèti propensi Yudea, nèti kota Yerusalem, aa nèti Tirus dènge Sidon, nuka dua kota ètu sebhe dhasi. 18 Rèngu mai ho nanene lii padhai Yesus, aa abhu kahèi dhu neo manèngi sèna ka Na puri-pa'èle dhèu pèd'a. Ka Yesus pa'èle si. Na pa'èle kahèi dhèu dhu nidhu tao, dènge magèle eele nidhu nèti dhèu sèra. 19 Dhèu ae dhu neo goi Ne. Te ropa goi lèke Ne, dhèu se èle dènge nèti papèd'a ra, lula abhu koasa dhu kalua nèti Nèngu.

20 Èle ka Yesus kabib'a asa ana madhutu Na, hèia Na aj'a si, aku Nèngu na,

De ladhe dhèu paj'èra miu sèmi èèna, pakarej'e laa d'ara miu! Aa karae laa dènge pasoa-pasoka! Mage malaa kahèi, lula dhèu dhu paj'èra miu limuri ne, bèi-baki ra dhu uru èèna, paj'èra le dhèu rèti lii padhai Lamatua sèra kahèi.

27 Hèia Yesus tuhu hari lii padhai Na, “Pasa dhilu ho nanene paie-iie! Èu hud'i sue ku musu èu, aa tao pabe'a laa mi dhèu dhu tèka d'ara dènge èu. 28 Sabaj'a ho manèngi Ama Lamatua, sèna ka hia babe'a mi dhèu dhu dhoo èu. Aa manèngi sèna ka Lamatua hia mèngi-nale mi dhèu dhu paj'èra èu rupa-rupa. 29 Ladhe dhèu tèb'e ripi èu cabèka, soro hari ripi cabèka ho na tèb'e. Ladhe dhèu parame rare kodho pana èu, na, hia hari laa kodho èu dhu leo. 30 Ladhe dhèu manèngi mèdha èu èci, hia laa. Aa ladhe dhèu ded'e rèti mèdha èu èci, soro tèke sène. Mage mu manèngi hari! 31 Èu hud'i tao ku dhèu leo, nuka sèmi èu neo dhèu tao mi ngi'u èu.^f

32 Èu d'èi pad'elo sasue mi dhèu èu mesa mu. Èèna be'a. Te ngaa kolo-karisi na ngaa? Te dhèu bhelu sue dhèu rèngu kahèi. 33 Ladhe èu pabe'a dhoka dènge dhèu dhu be'a dènge èu di, kolo-karisi ètu mia? Te dhèu bhelu sèra, re'a b'ala babe'a dhèu sèmi èèna kahèi. 34 Ladhe èu dhodhoka hia pija mi dhèu dhu bisa pula hari doi èu, kolo-karisi na ngaa? Te dhèu bhelu kahèi re'a hia dhèu leo pija doi, sad'i bèli-camèd'a sèmi aa'i hari dhu kateme iisi.

35 Te ngaa dhu lèke ka, sèmi ne'e: sue la musu èu sèra! Aa tao la be'a mi rèngu. Ngaa dhu ra parluu, hia si pija. Baku pangee, na, ra pula hari do aad'o. Dènge j'ara ne, èèna na Ama Lamatua b'ala èu. Pe èu j'aj'i ana nèti Ama Lamatua dhu Dedha Risi Eele. Lula mamuri èu sama sèmi Ama mu, dhu d'èi ad'u-ue j'ara hua iia hia dhèu bhelu. Nèngu d'èi kahèi tao j'ara hua iia hia dhèu dhu re'a boe manèngi makasi. 36 De èu hud'i pad'elo ku kasia mi dhèu, nuka sèmi Ama mu ètu sorga dhu pad'elo kasia Na mi èu.”

37 Ka Yesus tuhu hari lii aj'a Na, peka na, “Baku lee dhèu, sèna ka dhèu baku lee hari èu. Baku kahèti leli lii padhai dhèu, te aad'o na dhèu tao hari èu sèmi èèna kahèi. Pabhèlu eele sasala dhèu, sèna ka rèngu baku nui sasala èu. 38 Ladhe èu hia dhèu ngaa dhu ra parluu, pe èu abhu hari. Te bèli-camèd'a ra hia hari èu pènu ai. Èèna, nuka sèmi dhèu isi kab'ui asa d'ara balee a'uku, ka ra karèko ne, aa cèci ne, toke bua lale eele. Dhu èu abhu, sama èci èèna ka. Ladhe èu hia ciki, èu abhu hari ciki kahèi. Te ngaa ladhe èu hia ae, èu abhu hari ae-ae.”

39 Yesus aj'a pake lii upama kahèi. Na lole, peka na, “Dhèu bèdhu bisa boe pad'elo j'ara hia dhèu bèdhu dhu leo. Te aad'o na, dua ra manahu asa d'ara ro'a lasi!^g 40 Ana sakola bisa boe mèu risi nèti mese na! Te ngaa ladhe na madhutu dènge be'a lii a'aj'a mese na, nèngu bisa j'aj'i sama sèmi mese na.^h

41 Èu pa'èki more sasala dhèu, masi ka ana iiki-iiki èèna ka. Te ngaa sasala èu dhu kapai, èu sèmi pame'a boe sa. Èèna, nuka sèmi èu mèdhi ahu ca katèd'a ètu musi madha dhèu. Masi ka agarii aae dhu pa'abhe nare musi madha èu, te ngaa èu oe sèmi pame'a boe sa! 42 Tasamia ka èu bani peka dènge angalai mu, na, ‘Mai, ho ja'a tiu eele ahu nèti d'ara madha èu.’ Te ngaa èu mesa mu bisa boe ladhe mèdhi ngaa-ngaa, te agarii dhu pa'abhe nare musi madha èu! Weeh! Èu ne, mema dhèu kapod'e-kabèli! Tao eele uru ku agarii nèti d'ara madha èu, heka èu ladhe mèdhi, ho tiu eele ahu ca katèd'a èèna, nèti d'ara madha angalai mu.”

43 Ka Yesus tabha lii pakasame èci hari, peka na, “Abhu ètu mia, aj'u be'a, ladhe d'ai lod'o hua, hua na karehe. Aa abhu boe ladhe aj'u karehe na hua, hua na be'a. 44 Dhèu bisa tadhe ladhe aj'u ca kapua, be'a do aad'o, mai nèti hua na. Dhèu aa'i-aa'i re'a, peka na, ètu mia dhèu puu lolobhangi, do, hua anggor nèti aj'u padhudhu.^{i j} 45 Sèmi èèna kahèi dènge dhèu dhu d'ara mola-mèci, ne'a tao j'ara-j'ara dhu be'a. Te ngaa dhèu dhu d'ara kaj'alu, tao j'ara-j'ara dhu bhelu-katub'a. Te nèti lii padhai na, èdhi bisa tadhe babe'a-karehe dhèu.”^k

46 Hèia Yesus tuhu lii padhai Na, aku Nèngu na, “Miu se loe boe paroa Ja'a, na, ‘Lamatua’. Te ngaa tasamia ka miu mo'o boe tao madhutu lii padhai Ja'a? 47 Dhèu dhu mai nanene lii padhai Ja'a, ho na tao madhutu, nèngu ne èci èèna ka 48 dènge dhèu dhu neo patitu èmu dhu èra. Na kèi ro'a fanderen toke abhu hadhu. Hèia na padhèdi fanderen, heka na patitu èmu kèna. Ladhe èi aae lala, èmu ne gaged'o boe sa hèi, lula era padhèdi na èra. 49 Te ngaa dhèu nanene dènge d'ara kajari, aa madhutu boe lii padhai Ja'a, nèngu ne èci èèna ka dènge dhèu dhu neo patitu èmu sad'i j'aj'i di. Na tao boe fanderen, te ngaa na patitu èmu na ètu dedha rai ètu sebhe loko. Hèia ropa èi aae lala, èmu na guri laho mae-mae!”