6 Èle ka, ana madhutu se lasi ka asa rae-rae. Ra lole dènge dhèu-dhèu Lii Lolo Be'a Ama Lamatua. Aa puri-pa'èle kahèi dhèu nèti papèd'a ètu mia-mia.

7 Ca tèka, rupa-rupa lii lolo lula-nèti Yesus ne d'ai le dhèu aae Herodes Antipas.^b Ropa na tadèngi lii lolo se, hèia na bingu, lula dhèu cahag'e peka na, “Yesus ne, nuka Yohanis tuka sarani, dhu mamuri hari le.” 8 Aa cahag'e hari peka na, “Nèngu ne, baki Elia dhu mamuri hari.”

Abhu dhu leo hari, peka na, “Nèngu ne, ca dhèu nèti dhèu rèti lii padhai Lamatua dhu uru-uru sèra.”^c

9 Te ngaa Herodes sanèd'e era, peka na, “Ca hari ni, ja'a pua le poro pama'ète kètu Yohanis. De na mamuri hari, do? Aa ca dhèu ne, cee hari?” Ka na tenge j'ara, sèna ka patoo madha dènge Yesus.

10 Ca lod'o, ana madhutu dhu Yesus pua sèra, lèpa mai pa'èci hari dènge Ne. Ra lolo dènge Ne aa'i-aa'i dhu rèngu tao. Ka Yesus si kako mesa-mesa ra asa era èci, dhu padètu dènge rae Betsaida, ho ra ae ètu èèna. 11 Te ngaa dhèu ae dhu re'a rare, na, Yesus si neo lasi sa mia, ka ra paki'u re limuri. Yesus sèmi si, hèia Na pa'èle dhèu pèd'a aa'i-aa'i, aa Na peka-padhai dènge ra, j'ara-j'ara Ama Lamatua nèd'u paredha.

12 Ropa d'ai lod'o nihia, ka canguru dua ana madhutu Yesus sèra, peka dènge Ne, “Be'a risi Ama pua dhèu se'e lasi asa rae-rae dhu padètu dènge era ne'e, sèna ka ra tenge nganga'a unu ra. Aa hud'i laa ra lasi tenge era ho j'unu taha. Te era dhu kaj'èu nèti rae sèmi ne'e, tasamia ka rèngu bisa abhu ra'a-rinu?”

13-14 Te ngaa Yesus b'ala si, peka na, “Sèmi ne'e! Miu ka dhu panga'a si!”

Hèia ana madhutu se dhaa, peka na, “Ira ii! Ama, ee! Tasamia bisa sèmi èèna? Dhèu se risi nèti lèmi riho dhèu! Èèna dhèu mone di, ige mèka bhèni dènge ana niki! Ètu d'ara adhe-aai ji'i, abhu dhoka roti lèmi bua, dènge i'a dua ngi'u di. Ladhe Ama neo sèna ka ji'i panga'e dhèu se'e, tasa mera mia ho ji'i hèli nganga'a ae-ae hia ra?!”^d

Ka Yesus dhaa, “Pakaboko si madhèdi lèmi nguru-lèmi nguru dhèu, ca kaboko.”

15 Hèia lasi tao sèmi èèna. 16 Ropa dhèu se madhèdi, ka Yesus nare roti lèmi bua dènge i'a dua ngi'u sèra. Ka Na tangara sa dedha, ho Na manèngi makasi. Èle ka Yesus pamae roti dènge i'a sèra. Hèia Na j'ole sa ana-ana madhutu Na, ho papala mi dhèu-dhèu sèra. 17 Dhèu aa'i-aa'i se ra'a toke bècu. Ka nganga'a dhu risi sèra, kaboko rare pènu canguru dua soe.

18 Ca tèka, Yesus la'e mesa Na ho sabaj'a ètu era èci. Hèia ana madhutu Na mai ka pa'èci dènge Ne. Sabaj'a nare, ka Yesus karèi si, aku Nèngu na, “Miu tadèngi-tadèngi dhèu palolo na Ja'a ne, cee?”

19 Hèia ra dhaa, “Cahag'e peka na, Yohanis tuka sarani. Aa cahag'e peka na, baki Elia. Ladhe aad'o, na, ca dhèu nèti dhèu rèti lii padhai Ama Lamatua uru-uru sèra dhu mamuri hari.”^e

20 Hèia Yesus karèi hari si, peka na, “Madhutu a'abhu miu, na, Ja'a ne, cee?”

Ka Petrus dhaa, “Ama ne, Kristus, nuka Dhèu dhu Ama Lamatua paj'uj'u karèi nèti uru ka!”^f

21 Èle ka Yesus kai si, sèna ka baku ale dènge dhèu èci sa, peka na, Nèngu na, Kristus.

22 Ka Yesus tuhu hari lii padhai Na, aku Nèngu na, “Ja'a ne, Dhèu Rai-haha Tare'a-re'a. Ja'a hud'i pasae ku rupa-rupa j'aj'èra dhu bia. Bèli-camèd'a dhèu heka ad'a Yahudi, kètu agama Yahudi dènge mese agama sèra, ro'o boe sèmi, ladhe peka, na, Ja'a ne Kristus. Aa èèna na, ra pamadhe Ja'a. Mema tare'a-re'a Ja'a madhe, te ngaa asa camèd'a èèna, Ja'a mamuri hari!”^g

23 Èle ka Na peka dènge dhèu ae se, aku Nèngu na, “Dhèu dhu neo madhutu Ja'a, nèngu hud'i madhutu dènge d'ara kateme ètu lod'o bèli-lod'o bèli. Nèngu hud'i core eele ku dad'èi d'ara na. Nèngu hud'i madhutu taruu, masi ka dhèu neo pamadhe ne, nuka sèmi dhèu pasae aj'u palolo-palèbha na, ho la'e asa era ra pamadhe ne.^h 24 Te dhèu dhu sadia madhe lula madhutu Ja'a, bèli-camèd'a nèngu unu mamuri taa-taa dènge Ama Lamatua. Te ngaa dhèu dhu neo dhoka mamuri hia ngi'u aae na, bèli-camèd'a nèngu pakaj'èu-j'èu nèti Lamatua.ⁱ 25 Ladhe dhèu unu aa'i ngaa-ngaa ètu rai-haha ne, te ngaa Ama Lamatua tule eele ne, a'oto na ngaa? 26 Ja'a ne, Dhèu Rai-haha Tare'a-re'a. De dhèu dhu makae madhutu Ja'a, aa makae sèmi lii aj'a Ja'a, Ja'a kahèi makae mangaku nèngu ètu madha Ama Lamatua, lod'o Ja'a lèpa mai nèti sorga. Te bèli-camèd'a Ja'a puru mai dènge dadedha Ama Ku, palere-lere dènge ana-ana pajuu Na nèti sorga. 27 Ja'a peka patare'a dènge miu. Abhu pèri-pèri nèti miu ètu se'e se, bèli-camèd'a ladhe rèdhi unu ra Lamatua nèd'u paredha, heka ra madhe kèna.”

28 Èle aru lod'o, ka Yesus nèti Petrus, Yohanis dènge Yakobis, lasi ca'e asa ledhe èci, ho neo sabaj'a. 29 Dhu Na sabaj'a era, rèhu Na j'aj'i leko-leo, aa mèdha-papake Na pudhi lao-lao.

30 Cag'ag'a laa, dhèu dua cèu mai. Dhèu se, nuka baki Musa dènge baki Elia. Ka ra padhai lii dènge Yesus. 31 Dua ra ladhe na le'e-le'e hèti-hèti. Tèlu ra padhue-padhai lula-nèti mamadhe Yesus bèli-camèd'a ètu Yerusalem.

32 Lod'o èèna, Petrus dènge angalai na dhèu dua sèra musi madha sakaa titu kèna, ka ra bhèj'i luu. Ropa ra kabèdhi, hèia rèdhi Yesus titu dènge dhèu dua. Aa rèdhi Yesus dhu kaha'a kahèi.

33 Ropa Musa dènge Elia neo lèpa, Petrus bingu, ne'a heka tao tasamia. Ka na padhai lii leli, na peka na, “Ama! Ji'i ètu ne'e, be'a d'ai seli! De hua iia ji'i tao paleo tèlu bua. Cue hia Ama, cue hia baki Musa, aa cue hari hia baki Elia.” 34 Te ngaa ropa Petrus padhai lii era, ra'i-liru puru mai, ka saguru rare rèngu. Hèia Petrus si madha'u bia. 35 Ka ra tadèngi lii nèti d'ara ra'i-liru èèna, peka na,

36 Ropa lii na èle, Petrus si ladhe rèdhi dhoka Yesus mesa-mesa na. Rèngu tèlu ra, peka boe dènge dhèu èci sa, ngaa dhu rèngu rèdhi le. D'ai nèbhu ku, heka ra palolo dènge dhèu leo kèna.

37 Asa bèli èèna, lod'o Yesus dènge Petrus si puru mai nèti ledhe, dhèu ae mai paraga dènge Yesus. 38 Ka dhèu èci rodhe Ne, peka na, “Ama Mese! Ladhe ku ana mone ja'a ca dhèu ne laa! 39 Te abhu nidhu dhu loe boe kèpe ne, ka na pakèce sahèka, aa nyanyoko ne, toke hèb'a na horo karaka. Nidhu ne loe boe dhadhedhe ana ne, aa d'èi boe hia ana ne ae nare ciki sa. 40 Ja'a manèngi le kahèi ana madhutu Ama se ho ra babège eele nidhu ne, te ngaa tao rare boe!”

41 Ka Yesus jèke si, peka na, “Eeh! Miu se parcaya boe, na, Lamatua bisa pa'èle dhèu nèti papèd'a ra. Miu mema dhèu dhu me'a boe mamuri madhutu j'ara mola! De Ja'a hud'i tatae hari miu toke pèri lod'o?”

Hèia Na peka dènge ama ana ne, “Mèti ana mu sa ne'e mai!”

42 Ropa pakako rèti ana ne asa Yesus, hèia nidhu hake pabèbhe, aa rarumu ne. Te ngaa Yesus paredha nidhu ho kalua tèke eele ana ne, hèia na èle dènge. Ka Yesus hia ana ne asa ama na la'e. 43a Dhèu-dhèu ètu sèra dhu ladhe rèdhi koasa Yesus, aa'i-aa'i ra malaa-maloha.

43b Ropa dhèu se padhue era tadha malaa dhu Yesus tao, Nèngu lii dènge ana madhutu Na, aku Nèngu na, 44 “Miu patadhe paie lii padhai Ja'a ne! Nèbhu boe dhèu neo pahie Ja'a, Dhèu Rai-haha Tare'a-re'a ne. Ka ra soro Ja'a asa d'ara adhe-aai dhèu leo.” 45 Te ngaa ana madhutu Na se bingu. Masi ka rèngu dhane rare boe sasoa na, te ngaa ra madha'u karèi Ne, sasoa na ngaa.

46 Ca lod'o, ana madhutu Yesus pasisu lula-nèti rèngu se, cee ka dhu bèli-camèd'a j'aj'i dhèu re madha.^k 47 Te ngaa Yesus ne'a ngaa dhu rèngu pasisu. Ka Na paroa nare ana iiki ca dhèu, hèia Na patitu ètu karasa Na. 48 Ka Yesus peka dènge ra, “Nanene paie! Dhèu dhu madhutu Ja'a, ho na ladhe-leru dhèu haha, dhu sama sèmi ana iiki ne, sasoa na nèngu ladhe-leru Ja'a kahèi. Aa na ladhe-leru kahèi Ama Ku ètu sorga dhu pua Ja'a mai asa rai-haha ne. Abhu dhèu ae dhu pusi-pahae boe dhèu sèmi se'e se. Dhèu se'e, nuka: dhu unu aad'o, dhu susa, dhu laku-laku boe, dhu kalua aapa, aa dènge dhèu haha. De dhèu dhu d'èi lalau-lalo'o dhèu sèmi se'e se, madhutu Ama Lamatua, nèngu ka dhu dhèu re madha.”^l

49 Hèia Yohanis peka dènge Yesus, aku nèngu na, “Ama! Ca lod'o ji'i ngèdhi ca dhèu babège eele nidhu, dènge ale kolongara Ama. Ka ji'i kai ne, sèna ka na ale ia ka ngara Ama, lula nèngu ne dhèu èdhi boe.”

50 Te ngaa Yesus dhaa, peka na, “Baku! Te dhèu dhu lab'a boe èdhi, nèngu èèna angalai èdhi.”

51 Yesus ne'a le lod'o Na ca'e asa sorga dètu le. Ka Na pama'ète nare, ho la'e asa kota Yerusalem. 52 Na pua dhèu lasi uuru, sèna ka ra lalau nganga'a-nganginu. Ka dhèu lasi uuru se, maso lasi asa d'ara rae cue ètu propensi Samaria, ho lalau mema era rèngu manubha. 53 Te ngaa dhèu ètu Samaria se, ro'o boe sèmi rare Yesus si, lula Nèngu neo la'e sogo-tagu Ama Lamatua ètu kota Yerusalem.^m 54 Ropa Yakobis dènge Yohanis tadèngi lii ne'e, ka ra pamako Yesus, aku rèngu na, “Ama! Tasamia na ti manèngi Ama Lamatua papuru ai mai nèti dedha-liru, ho tunu pakèpu si?”ⁿ

55 Te ngaa Yesus ladhe asa dua ra, hèia Na kai si, peka na, “Baku pangee sèmi èèna.” 56 Èle èèna ka, lasi hari asa rae leo.

57 Ropa rèngu kako era, dhèu èci lii dènge Yesus, peka na, “Ama! Ama neo asa mia èèna ka, ja'a neo madhutu Ama taruu!”

58 Hèia Yesus b'ala, peka na, “Be'a kahèi! Te ngaa pangee ku laa. Dhèu aa'i-aa'i dènge era pea-palu'u. Sèmi èèna kahèi dènge badha-manu. Busa hui lèpa la'e asa d'ara ro'a na. Manu-bhui lasi asa d'ara rèd'a ra. Te ngaa Ja'a ne, Dhèu Rai-haha Tare'a-re'a, dènge boe era pea-palu'u ho pasoru iisi Ja'a ne. Era lalaka kètu, aad'o kahèi.”

59 Ca tèka, Yesus paroa dhèu leo ca dhèu, ka Na peka, “Mai madhutu Ja'a, ho j'aj'i dhèu Ja'a.”

Ka dhèu ne dhaa, aku nèngu na, “Be'a kahèi, do! Te ngaa sèmi ne'e, Ama. Hud'i ja'a lèpa ku ladhe-leru ina-ama ja'a. Ladhe padhane kore ama ku, heka ja'a madhutu kèna.”

60 Te ngaa Yesus peka dènge ne, “Sèmi ne'e! Hud'i laa dhèu dhu parcaya boe Lamatua, uri dhèu rèngu dhu madhe. Te ngaa miu dhu lèka Lamatua, sasab'a miu lami peka-padhai j'ara-j'ara paredha Ama Lamatua.”

61 Abhu dhèu leo dhu peka na, “Be'a kahèi. Ja'a neo madhutu Ama taruu. Te ngaa hud'i ja'a laku palangu ku lii dènge a'ari ja'a, heka ja'a mai madhutu Ama.”^o

62 Te ngaa Yesus lii dènge ne, “Sèmi ne'e. Ladhe dhèu neo pare rai, te ngaa tao hari ngaa-ngaa dhu leo, toke bhèlu sèle, tatu oka na j'aj'i boe. Sèmi èèna kahèi dènge dhèu dhu pama'ète nare le neo madhutu Ja'a, te ngaa pangee taruu mamuri na lod'o dhu uru sèra. Dhèu sèmi èèna gaguna na aad'o j'aj'i dhèu sab'a ètu d'ara paredha Ama Lamatua.”