Bhèni balu dhu unu boe ngaa-ngaa, hia kolete dhu ae risi
21
Lod'o Yesus aj'a ètu Èmu Kapua Manèngi-Mangaj'i, ladhe nèdhi dhèu kaja mai pamaso doi asa d'ara boaraka derma. 2 Ladhe nèdhi kahèi bhèni balu ca dhèu dhu unu boe ngaa-ngaa mai madhutu sabaj'a. Na pamaso kahèi doi dua sen asa d'ara boaraka ne. Doi na se'e, kab'ua ciki oo'e di. 3 Ka Yesus lii dènge ana madhutu Na, peka na, “Nanene pabe'a-be'a! Bhèni balu ne, dhoka pamaso doi dua sen di, te ngaa na hia risi nèti dhèu aa'i-aa'i ra. 4 Dhèu leo se pamaso doi kolete nèti doi karisi rèngu. Te ngaa bhèni balu ne hia aa'i mèu-mèu doi na tao mi doi kolete. Masi ka nèti doi ne'e, nèngu ako taha mamuri.”Lamatua Yesus peka gaguri Èmu Kapua Manèngi-Mangaj'i
5 Lod'o èèna, ana madhutu Yesus dhu koa-kad'iri Èmu Kapua Manèngi-Mangaj'i, peka na, “Ama! Ladhe ku laa, Èmu ne be'a titu kèna! Ra pake hadhu cetak dhu kapai hua, ka ra paca'e mera titu kèna. Aa dhèu hia kahèi mèdha ra dhu kab'ua, sèna ka pasaraga Èmu Lamatua ne!”
Te ngaa Yesus b'ala, na, 6 “Èmu ne mema saraga. Te ngaa nèbhu heka, dhèu paguri eela hadhu se, toke mera dènge rai.”
Lod'o-lod'o sasusa dènge j'aj'èra
7 Hèia ana madhutu Yesus se karèi, peka na, “Ama Mese! Ngaa dhu Ama peka-padhai deo na, j'aj'aj'i na pèri lod'o? Ladhe lod'o na dètu le, tadha-tadha na sèmi ngaa sa?”
8 Ka Yesus dhaa, aku Nèngu na, “Sad'i miu j'aga paie-iie, ho baku lèke tipu. Te èèna na rupa-rupa dhèu mai tèb'a kakara ra, peka na, ‘Ja'a ne, Kristus.’ Abhu kahèi dhu peka na, ‘Lod'o a'èle rai-haha dètu kèna!’ Te ngaa baku mi parcaya kahèi! 9 Ladhe miu tadèngi ka dhèu palolo, peka na: dhèu patao-palaha, dènge papara-pakèj'i ètu mia-mia, baku mi cag'ag'a. Sèra sa hud'i j'aj'i uru ku. Te ngaa d'ai mèka lod'o èle rai-haha ne.
10 Bèli-camèd'a suku èci pamusu dènge suku leo. Negara èci papara-pakèj'i dènge negara leo. 11 Èèna na, j'aj'i rai opo dhu kapai aae. Ètu mia-mia, manganga-mad'èu dhu seli eele, aa èi papèd'a pad'ai cèu palème era. Bèli-camèd'a dhèu ladhe rèdhi kahèi tadha dhu pamadha'u dhèu, aa tadha-tadha dhu kapai aae ètu dedha-liru. 12 J'ara se'e se j'aj'i aa'i mèka, te ngaa èèna na dhèu mai kèpe rare miu, aa paj'èra miu, lula miu parcaya Ja'a. Hèia ra soro miu asa dhèu dhu uri lii langu ètu d'ara èmu-èmu sabaj'a, aa ra taha miu ètu d'ara bèdho. Ra rèti miu asa madha dhèu aae-dhèu aae, dènge dhèu paredha leo. Aa'i-aa'i se j'aj'i, lula miu madhutu Ja'a. 13 Te ngaa miu hud'i pake lod'o ne'e, sèna ka peka dènge rèngu Lii Lolo Be'a Ja'a. 14 De mage pangee tasamia miu siri iisi. 15 Te lod'o èèna, Ja'a hia miu lii-lii dhu pamèci dènge lii dhaa. Dènge sèmi èèna, musu miu sèra, re'a heka peka-padhai sèmi ngaa hari.a 16-17 Bèli-camèd'a dhèu tèka d'ara dènge miu, lula miu madhutu Ja'a. Abhu nèti a'ari miu unu mi, sèmi ina-ama, a'ari, kera ba'i, rae lesa dènge mone anga-aangalai. Èèna na nèti rèngu se'e ka, tenge j'ara ho pahie eele miu, toke ra pamadhe miu cahag'e. 18 Te ngaa miu baku madha'u, te Lamatua bhèlu boe miu. Rèu kètu miu ca loa sa kabhui eele boe, ladhe dènge boe dad'èi Na. 19 Ladhe miu taha mere taruu, tatu Ama Lamatua pala-bagi mamuri hia miu.”
Èèna na kota Yerusalem ele iie
20 Yesus padhai lii tabha hari, aku Nèngu na, “Ladhe miu mèdhi ka sordad'u mai pamusu reo rare Yerusalem, miu me'a le, na, d'ai lod'o ele iie Yerusalem kèna. 21 Ropa ladhe mèdhi sèmi èèna, dhèu ètu propensi Yudea rai dènge ka asa ledhe-ledhe. Dhèu ètu d'ara kota kèd'i kahèi, sèna ka rai. Aa dhèu ètu rae, mai ia ka asa d'ara kota. 22 Te Lamatua hia lod'o-lod'o sasusa sèra, ho huku dhèu-dhèu dhu ro'o boe nanene Nèngu. Se'e se lèke nuka sèmi lii padhai nèti dhèu rèti lii padhai Ama Lamatua dhu suri tèke karèi nèti uru ka.b 23 Lod'o èèna, dhèu dhu j'èra risi, nuka, dhèu bhèni dhu dènge babia, aa ina-ina dhu dènge ana susu. Lod'o èèna, abhu susa palème rai-haha, aa dhèu Yahudi j'èra bia, lula Ama Lamatua nasa dènge rèngu sèra. 24 Èèna na musu mai pamadhe si cahag'e, aa taha cahag'e ho j'aj'i ènu ètu mia-mia ètu rai-haha ne. Ka dhèu leo rai kara dhu tadhe boe Ama Lamatua, mai j'aj'èli pakaj'alu kota Yerusalem, aa koasa rare kabarai na, toke èle lod'o ra.”
Mamai hari Dhèu Rai-haha Tare'a-re'a
25 Èle ka Yesus lole mamai hari Na, aku Nèngu na, “Bèli-camèd'a ladhe Dhèu Rai-haha Tare'a-re'a neo mai hari, abhu tadha ètu madha lod'o, hèru, dènge hua hètu-hua hètu. Ètu rai-haha ne abhu tadha kahèi, sèmi uli sea, dhasi ko'a dhu loe boe, aa naha aae lalulu mai. Se'e se tao dhèu rai-haha ne, madha'u dènge ele ngangee, toke re'a heka tao ngaa-ngaa.c 26 Koasa-koasa ètu dedha-liru loe boe karèbha. Ropa ladhe rèdhi aa'i-aa'i, hèia ra madha'u titu kèna, lula rai-haha ne oe ele iie kèna! 27 Èle ku heka dhèu ladhe rèdhi Ja'a kèna, ‘Dhèu Rai-haha Tare'a-re'a ne puru mai ètu d'ara ra'i-liru’. Ja'a mai dènge koasa, aa dènge dadedha dhu kapai risi eele.d 28 Ladhe mulai j'aj'i ka tadha sèra, na, miu boti ka kètu miu, te lod'o d'ai kèna, Lamatua hia mamuri mi miu.”
Lii pakasame nèti aj'u
29 Èle èèna ka, Yesus lolo pake lii pakasame, aku Nèngu na, “Miu taru kira pabe'a-be'a ku mi aj'u sèra. 30 Ladhe d'ai ka hèru rèu ra karara, èèna tadha na hèru hadhu dètu le. 31 Sèmi èèna kahèi dènge lod'o-lod'o sasusa. Ladhe cèu, èèna tadha na paredha Ama Lamatua dhu dètu iiki le.
32 Ja'a pasanèd'e mema miu! Nèti dhèu aa'i-aa'i dhu mamuri limuri ne, bèli-camèd'a cahag'e dhae madhe mèka, te lod'o-lod'o j'aj'èra se mai le. 33 Masi ka liru dènge rai-haha ele, te ngaa Lii Holo-Nori Ja'a taha taa-taa.”
Mate tatae mamai hari Lamatua Yesus
34 Hèia Yesus tuhu lii padhai Na, aku Nèngu na, “Mi j'aga-j'aga, te cag'ag'a laa Ja'a mai hari sahèka! Mage dhoka miu taru kira heka, hèia miu mamuri dènge minu mahu, aa bhute dhoka tenge mamuri karej'e di. Mage dhoka miu me'a boe tadha ne, lula miu bhute dènge j'ara dhu leo. 35 Ladhe Ja'a lèpa hari mai, abhu boe ca dhèu sa dhu bisa pahuni iisi ra nèti madha Ja'a. 36 De miu hud'i mate tatae ku. Baku ma'ète manèngi-mangaj'i, sèna ka miu bisa taha ètu talora aae sasusa sèra. Dènge sèmi èèna, ropa Ja'a lèpa hari mai, miu makae boe titu ètu madha Dhèu Rai-haha Tare'a-re'a ne.”