2 Lod'o èèna lèke dènge lod'o sabaj'a dhèu Yahudi. Hèia Yesus la'e asa d'ara èmu manèngi-mangaj'i ho Na aj'a Lii Holo-Nori Ama Lamatua ètu èèna. Lod'o èèna, dhèu ae lasi manèngi-mangaj'i. Ropa ra tadèngi Yesus aj'a Lii Holo-Nori Ama Lamatua, hèia dhèu aa'i-aa'i sèra malaa, aku rèngu na, “Dhèu ne mèu samia ne! Na dènge koasa kahèi! Tasamia ka Na sèmi èèna, ee? 3 Nèngu ne'e dhoka tuka aj'u di. Èdhi tadhe ina Na, Maria. Sèmi èèna kahèi ari Na, Yakobis, Yoses, Yudas dènge Simon, dènge ari Na dhèu bhèni sèra. Rèngu dènge èdhi pea ca rae.” Dhèu se'e ngee ètu d'ara rèngu na, rèngu mèu risi nèti Yesus. Nèti èèna ka, ra d'èi heka nanene Ne.

4 Ka Yesus peka, “Mema tare'a! Dhèu pakab'ua risi dhèu nèti lii padhai Ama Lamatua nèti rae leo. Te ngaa ra pakab'ua boe dhèu nèti lii padhai Ama Lamatua dhu nèti rae nèngu.”^a

5-6a D'ara dhèu sèra adhu sèmi hadhu, ka ra parcaya boe lii padhai lii Yesus. Nèti èèna ka, Na malaa, hèia Na pake boe koasa Na. Ka Na puri-pa'èle dhoka dhèu pèri di, ètu èèna.

6b Èle èèna ka, Yesus kako palème asa rae-rae dhu padètu ètu sèra, ho aj'a dhèu j'ara mamuri Ama Lamatua. 7 Na paroa nare ana madhutu Na dhèu canguru dua sèra, ka Na pua rèngu lasi dua-dua ho lole Lii Lolo Be'a nèti Ama Lamatua. Na hia si koasa kahèi, ho babège eele nidhu nèti d'ara dhèu. 8-9 Na peka dènge si, aku Nèngu na, “Miu baku mèti mèdha ae ètu d'ara kakako miu. Baku mèti nganga'a, doi, dènge tas. Mèti dhoka tatea, salapa ètu haga, dènge kodho ètu ua di. 10 Ladhe cee dhu sèmi rare miu ètu èmu ra, miu pea dhoka ètu èèna di, toke d'ai pakèd'i hari. 11 Te ngaa ladhe miu lami asa era èci, hèia dhèu ètu sèra sèmi rare boe miu, aa ra d'èi boe nanene lii padhai lii miu, tèke eele era èèna. Aa peka mi dhèu sèra, na, ‘Miu mo'o boe nanene, si! De bèli-camèd'a sèmi mere pala mi!”’^b

12 Èle èèna ka, ra lasi lole Lii Lolo Be'a. Ra peka, dhèu aa'i-aa'i hud'i ele ho'a nèti sasala-sasigo ra, ka lèpa ho mamuri madhutu dad'èi Lamatua. 13 Ka ra babège eele nidhu nèti d'ara dhèu. Ra pasuti èi lèngi mi kètu dhèu pèd'a, aa sabaj'a ho pa'èle si nèti papèd'a. Ka ra èle dènge.^c

14 Lod'o èèna, dhèu ètu mia-mia tadhe aa'i le Yesus. Dhèu aae Herodes tadèngi le lii lolo lula-nèti koasa Yesus kahèi. Dhèu palolo ètu mia-mia, aku rèngu na, “Yohanis tuka sarani èèna, mamuri hari le ètu d'ara ngi'u Yesus! Nèti èèna ka, Na bisa tao tadha malaa sèra.”

15 Te ngaa dhèu cahag'e hari peka, aku rèngu na, “Aad'o! Ne'e ne, Elia dhu mamuri hari d'ara ngi'u Yesus.”

Aa dhèu cahag'e hari, peka na, “Dhèu ne'e ne, dhèu nèti lii padhai Ama Lamatua dhu leo hari nèti uru sèra.”^d

16 Ropa dhèu aae Herodes tadèngi nare lii lolo dhèu se'e lula-nèti Yesus, ka na dhaa, peka na, “Èèna Yohanis tuka sarani, dhu ca hari ni ja'a hia dhèu pare pamadhe le, te ngaa na mamuri hari!”

17-18 Dhèu aae Herodes pua sèmi èèna, lula nèngu lii langu dènge Yohanis. Lii lolo na sèmi ne'e ka: dhèu aae Herodes leo nare dhèu èmu ari na, Pelipus, ngara na Herodias. Aa te ngaa Pelipus dènge Herodias dhae pa'ia mèka. Nèti èèna ka, Yohanis kai pahari-pahari, peka na, “Ama dhèu aae baku leo dènge dhèu èmu ari mu. Te èèna sisu ad'a èdhi dhèu Yahudi.” Masi ka sèmi èèna, te ngaa Herodes leo nare bhèni ne'e kahèi. Hèia na pua dhèu lasi kèpe rare Yohanis, ho pamaso ne asa d'ara bèdho.^e

19 Lula Yohanis kai pèri hari le, hèia bhèni ne tèka d'ara dènge ne, ka na neo pamadhe ne. Te ngaa lake nare mèka, te Herodes dhu pamaso le Yohanis asa d'ara bèdho la'e. 20 Ka na pua sordad'u sèra madhenge paie ne ètu d'ara bèdho.

Herodes madha'u dènge Yohanis. Na ne'a tare'a, Yohanis ne dhèu dhu Ama Lamatua pua mai. Aa Yohanis ne dhèu d'ara mola. Herodes d'èi nanene lii padhai lii Yohanis kahèi. Te ngaa stèka-stèka, d'ara na pèd'a nanene lii padhai lii Yohanis.

21 Ka ca tèka, Herodias abhu lod'o dhu be'a, sèna ka na b'ala d'ara pèd'a na. Lod'o èèna, lèke dènge hari jadi Herodes. Ka ra nèru dhèu aae-dhèu kapai mai ra'a-sisi hari jad'i. Dhèu dhu mai sèra, ama-ama dhu paredha, ama-ama sordad'u, dènge dhèu heka-dhèu heka ad'a ètu Galilea. 22 Ètu d'ara talora tatao èèna, ana bhèni Herodias la'e roge. Na roge be'a risi eele, ka d'ara Herodes dènge dhèu dhu nèru sèra karej'e bia. Nèti èèna ka, Herodes paroa ne mai asa madha, ka na karèi, aku nèngu na, “Èu neo manèngi ngaa? Èu peka ho ja'a hia. 23 Èu manèngi era paredha ja'a ne bagi dua, hia èu cabèka èèna ka, ja'a ko'o kahèi. Ja'a subha dènge ngara Ama Lamatua!”

24 Ka ana bhèni èèna la'e karèi ina na, aku nèngu na, “Ina, ee! Madhutu ngangee ina ku, na, ja'a manèngi ngaa dhu be'a risi nèti ama ku?”

Ka ina na dhaa, aku nèngu na, “Lamu asa madha ama mu ho peka dènge ne, ja'a manèngi dhoka kètu Yohanis di.”

25 Ka ana bhèni ne la'e asa madha Herodes, ka na peka, aku nèngu na, “Ama! Ja'a manèngi kètu Yohanis, tao ètu d'ara dula èci hia ja'a. Deo ne'e ne, kahèi!”

26 Ropa Herodes tadèngi nare lii manèngi ana bhèni na, ka d'ara na cag'ag'a. Te ngaa nèngu bisa heka ère hari lii subha nèngu deo na, lula dhèu ètu sèra tadèngi aa'i le. 27 Èle èèna ka, Herodes paredha komedhaa sordad'u lasi poro rare kètu Yohanis nèti d'ara bèdho. 28 Ropa ra poro rare, ra tao asa d'ara dula èci, ka rèti la'a asa ana bhèni èèna. Na sèmi nare, hèia nèti asa ina na la'e. 29 Ropa ana madhutu Yohanis sèra tadèngi ra poro rèti le kètu Yohanis, rèngu mai nedhe rèti ngi'u nèngu lasi padhane.

D'ai sange ne'e ka, lii lolo mamadhe Yohanis.

30 Ca lod'o hari, ana madhutu Yesus dhu Na pua lasi asa rae-rae ho aj'a dhèu j'ara mamuri Ama Lamatua sèra, lèpa hari mai, ka ra pakaboko hari dènge Ne. Ra lolo dènge Yesus ngaa dhu rèngu tao dènge aj'a mi dhèu.

31 Lod'o èèna, dhèu ae mai patangi-tenge Yesus. Lula dhèu ae seli eele, ka Yesus dènge ana madhutu Na abhu boe tebho ra'a-rinu hèi. Nèti èèna ka, Yesus ale dènge ana madhutu sèra, peka na, “Be'a risi èdhi pakèd'i nèti era ne'e lati tenge era èci dhu mau, sèna ka èdhi ae tara ciki.”

32 Ka ra ca'e koha cue lasi asa era dhu mau, kaj'èu nèti d'ara rae.

33 Te ngaa dhèu ae ètu sèra sa, ladhe rèdhi koha rèngu kako re sebhe dano. Hèia ra kalua nèti rae ka kako pamèri madhutu re dedha rai. Nèti èèna ka, rèngu d'ai uuru Yesus si. 34 Ropa Yesus puru nèti dedha koha, ladhe laa, na, dhèu ae dhu mate Ne. Dhèu se'e re'a heka tao iisi ra tasamia. Nèti èèna ka, d'ara Yesus sue si, te rèngu sama sèmi kahib'i-kalèbho dhu dènge boe ana madhenga. Èle èèna ka, Na aj'a si j'ara mamuri Ama Lamatua.^f 35-36 Na aj'a nèti loo nètu, toke d'ai nihia la'e. Hèia ana madhutu Na sèra mai padhue dènge Ne, aku rèngu na, “Ama! Hua iia Ama ku pua si lasi hèli nganga'a ètu rae dhu dètu ètu era se'e. Te oe mèda kèna, aa ètu era ne'e nganga'a aad'o.”

37 Te ngaa Yesus b'ala lii rèngu, aku Nèngu na, “Baku tao sèmi èèna! Hud'i laa, pe miu panga'a si.”

Hèia ra karèi hari Ne, “Ira, ee! Ladhe èdhi panga'a dhèu ae sèmi ne'e, èdhi kalua doi ae bia, nga. Sama sèmi gaji tuka ca tèu kateme, nga!^g Aa èdhi tare doi sèra, nèti mia hua kèna!”

38 Yesus dhaa, peka na, “Miu lami karèi sèku dhèu sèra, teko cee dhu nèti nganga'a mèra.”

Hèia ra lasi karèi, ka mai peka dènge Ne, “Abhu dhoka roti lèmi bua, dènge i'a dua ngi'u di.”

39 Hèia Yesus pua dhèu aa'i-aa'i sèra ho madhèdi cakaboko-cakaboko ètu dedha j'u'u. 40 Dhèu se'e madhèdi sèmi dhu Yesus pua. Abhu kaboko dhu dhèu cangasu-cangasu, aa abhu kaboko dhu dhèu lèmi nguru-lèmi nguru.

41 Hèia Yesus nare roti lèmi bua dènge i'a dua ngi'u sèra, ka na ladhe asa dedha. Na manèngi makasi mi Ama Lamatua. Èle èèna ka, nare roti lèmi bua, ka Na ku'u pamae ca'èta-'èta. Hèia Na hia mi ana madhutu Na, ho lasi papala hia dhèu dhu madhèdi sèra. Na pala-bagi i'a dua ngi'u sèra kahèi. 42 Ka dhèu sèra ra'a toke bècu. 43 Ra'a èle, hèia ana madhutu Na sèra lasi pakaboko nganga'a dhu risi eele sèra, pènu canguru dua soe.

44 Dhèu dhu ra'a sèra, dhèu mone di, lèmi riho dhèu, ige mèka bhèni dènge ana iiki.

45 Èle ka, Yesus pua ana madhutu sèra pakèd'i uuru dènge koha asa rae Betsaida ètu cabèka dano. Te Nèngu dhae la'e mèka, ho Na pua dhèu ae sèra lèpa. 46 Ropa dhèu sèra lèpa, Na la'e asa ledhe èci ètu èèna, ho Na manèngi-mangaj'i.

47-50 Lod'o mèda le, ka Yesus puru mai. Na ladhe nèdhi ana madhutu Na sèra dènge koha lasi d'ai talora dano le. Lula ngèlu madha mèdhu ae, ka ra tuku koha d'ai madhe. D'ara oe mèu sa, Yesus heka la'e madhutu si kèna. Te ngaa Na kako re dedha èi. Ropa Na kako oe seli koha ra, ana madhutu sèra ladhe rèdhi Ne, ka ra madha'u titu kèna. Hèia èci karèi èci, aku rèngu na, “Irii! Ngaa nèi? Nidhu, do?”

Hèia Yesus lii dènge si, aku Nèngu na, “We! Miu baku madha'u! Te Ja'a ne!”

51 Ropa Yesus ca'e la'e asa dedha koha, kabèdhi laa, ngèlu mau dènge. Ana madhutu Na sèra malaa bia. 52 Rèngu heka rèdhi kèna, Yesus pake koasa Na, lod'o panga'a lèmi riho dhèu èèna. Te ngaa rèngu re'a iia boe koasa Yesus, lula d'ara rèngu adhu sèmi hadhu.

53 Ropa rèngu d'ai cabèka dano, ra panahu koha ètu dae Genesaret. 54 Ropa ra puru nèti dedha koha, dhèu ae ladhe rèdhi si. Ka ra rodhe lème, aku rèngu na, “Ee! Yesus mai le!” 55-56 Dhèu sèra aa'i-aa'i ra lasi peka palème rae, nèti èèna ka, dhèu mai nèti mia-mia, jèru rèti a'ari rèngu dhu pèd'a asa Yesus.

Sad'i ra tadèngi Yesus ètu era èci, na, rame-rame nedhe rèti dhèu pèd'a mai. Ra paj'unu si ètu d'ara tana lapa ètu èèna. Te ra pangee, na, “Sad'i dhèu pèd'a sèra goi lèke sebhe kodho Yesus di, èle dènge nèti papèd'a ra.” Ka dhèu goi lèke kodho Na, hèia èle nèti papèd'a ra.