Lamatua Yesus puri-pa'èle dhèu pèd'a lèke lod'o a'oro sasab'a
3
Èle èèna ka, Yesus lèpa hari la'e asa èmu manèngi-mangaj'i. D'ai nèi, ka Yesus paraga dènge dhèu èci dhu ai na roe cabèka.
Markus 3:1-19
2 Ètu èèna, abhu pèri-pèri dhèu dhu patangi-tenge sasala Yesus. Ra ma'u Yesus, neo re'a Na puri-pa'èle dhèu pèd'a lèke lod'o a'oro sasab'a, do aad'o.
3 Hèia Yesus paroa dhèu dhu ai roe cabèka èèna, aku Nèngu na, “Mai ku! Titu ku mi madha Ja'a ne.”
4 Ka Na karèi dhèu ae ètu sèra sa, aku Nèngu na, “Madhutu atora agama èdhi, èdhi bisa tao ngaa lod'o a'oro sasab'a? Tao madha j'ara dhu be'a, do karehe? Tao pabe'a dhèu, do pamadhe dhèu?” Te ngaa dhèu sèra èci sa bani boe bhoke hèb'a.
5 Nèti èèna ka, Yesus d'ara pèd'a, lula rèngu madhutu dhoka ad'a di, tao boe madha-dhilu mi dhèu ai roe cabèka ne. Yesus nasa, ka Na ladhe lème dhèu sèra. Hèia Na peka mi dhèu ai roe cabèka, aku Nèngu na, “J'ole kacui-aai èu mai sa ne'e!” Ka dhèu èèna soro kacui-aai asa Yesus la'e. Kabèdhi laa, èle dènge papèd'a na. 6 Ropa dhèu Parisi ladhe rèdhi Yesus pa'èle kacui-aai dhèu èèna lèke lod'o a'oro sasab'a, aa'i-aa'i ra kalua nèti d'ara èmu manèngi-mangaj'i. Ka lasi padhue dènge dhèu partei politik Herodes, ho tenge j'ara neo pamadhe Yesus.
Lamatua Yesus puri-pa'èle papèd'a dhèu ae ètu sebhe dano
7-8 Ca lod'o, Yesus dènge ana madhutu Na lasi asa sebhe dano Galilea. Te ngaa, lula dhèu ae sèra re'a le ngaa dhu Nèngu tao, ka dhèu aa'i-aa'i mai nèti rae-rae ho madhutu Ne. Rèngu mai nèti propensi Galilea, propensi Yudea, aa propensi Idumea. Abhu kahèi dhu mai nèti kota Yerusalem, kota Sidon dènge kota Tirus. Abhu kahèi cahag'e dhu mai nèti cabèka dhimu loko Yarden. Aa'i-aa'i sèra neo mai paraga dènge Ne. 9 Taga dhèu dhu mai sèra ae seli, ka Yesus pua ana madhutu Na lasi tenge koha cue hia Nèngu. Na neo padhai lii dènge dhèu ae sèra nèti dedha koha, sèna ka rèngu aa'i-aa'i ra bisa ladhe rèdhi rèhu Na, aa tadèngi lii padhai lii Na hèi.
10 Ca hari ni, Na puri-pa'èle dhèu pèd'a ae titu kèna. Nèti èèna ka, dhèu ae mai paseti èci dènge èci, neo g'ag'e Yesus.a 11 Ropa dhèu dhu nidhu tao sa ladhe rèdhi Yesus, ka ra bèbha d'ai rai ètu madha Yesus. Hèia ra taraa, aku rèngu na, “Èu ne mema tare'a Ana Ama Lamatua!”
12 Te ngaa Yesus kai rèngu, aku Nèngu na, “Miu baku ale dènge dhèu èci sa hèi, Ja'a ne cee!”
Yesus hag'e nare dhèu canguru dua j'aj'i ana madhutu Na
13 Èle èèna ka, Yesus kako la'e asa kolo ledhe èci. Na paroa pèri-pèri dhèu dhu Nèngu d'èi. Ka dhèu se mai madhutu Ne. 14 Èle èèna ka, Na hag'e nare dhèu canguru dua. Ka Na peka, “Ja'a pili miu ho madhutu taruu Ja'a, j'aj'i dhèu pajuu-paleha Ja'a. Ja'a neo pua miu, lami lole Lii Lolo Be'a Ama Lamatua mi dhèu aa'i-aa'i.” 15 Sèmi èèna kahèi Ja'a neo hia miu koasa, sèna ka miu bisa babège-lalèta nidhu nèti d'ara dhèu.”
16-19 Ngara dhèu canguru dua sa, nuka:
Simon (dhu Yesus pangare na, Petrus),
Yakobis,
Yohanis, (Yakobis dènge ari na, Yohanis ne, dua ra ana Sabadeus. Yesus pangare rèngu dua ra, ngara na ‘Boanerges’, dhu sasoa na ‘sama sèmi d'oro’.)b
Anderias,
Pelipus,
Bertolomeos,
Mateos,
Tomas,
Yakobis (ana Alpius),
Tadius,
Simon (dhu madhutu partei politik Selot),c
dènge Yudas Iskariot (dhu èèna na pahie eele Yesus).
Mese agama sèra peka Yesus abhu koasa nèti dhèu aae nidhu
20 Èle èèna ka, Yesus dènge ana madhutu Na sèra puru hari nèti kolo ledhe deo na. Ka lasi asa d'ara èmu èci. Dhèu ae titu kèna mai oke rare Ne, ka Na bisa boe na'a-ninu.
Markus 3:20-35
21 Rèdhi sèmi èèna, hèia ra papeka, aku rèngu na, “Miu ladhe ku Yesus! Ne'a heka lalau iisi Na.” Ropa a'ari Na tadèngi lii palolo dhèu, ka ra mai neo rare Ne.
22 Lod'o èèna, mese-mese agama nèti Yerusalem mai peka dènge dhèu ètu sèra, aku rèngu na, “Heh! Pasa dhilu miu! Baku madhutu Yesus. Te dhèu aae nidhu, dhu ra paroa ngara na Baalsebul, maso asa d'ara Yesus, ka hia Ne koasa, ho bata-magèla nidhu nèti d'ara dhèu.”d
23 Ropa Yesus tadèngi nare lii padhue rèngu èèna, heia Na paroa nare rèngu aa'i-aa'i ra, ka Na peka, “Lèke boe dènge ngangee dhèu! Tasamia ka dhèu aae nidhu bisa babège ngi'u mesa na!? 24 Ladhe ètu d'ara paredha dhèu aae èci, ana kabarai sèra èci patao-palaha dènge èci, paredha dhèu aae èèna taha nèbhu boe. 25 Sèmi èèna kahèi ètu d'ara èmu, ladhe isi èmu èci patao dènge èci, isi èmu èèna mae-manyèla! 26 Sèmi èèna kahèi dènge nidhu. Ladhe èci pamusu dènge èci, rèngu mae-manyèla kahèi. Sèmi èèna na, heka rèngu laho kao-kao.
27 Ladhe dhèu parapo neo mai parapo èmu dhèu èra èci, na hud'i èki-karadhe uuru ku lamatua èmu na, heka bau nèti mèdha-panyau kèna.e
28 Nèti èèna ka, Ja'a peka mema dènge miu: Ama Lamatua sadia saku eele sasala dhèu. Ladhe dhèu padhai lii karehe mi dedha dhèu leo, Ama Lamatua bisa saku eele sasala na era. 29 Te ngaa lii padhai lii karehe mi dedha Roh Ama Lamatua dhu Mola-Mèci, Ama Lamatua saku eele boe sasala nèngu, toke d'ai mia-mia la'e!”f
30 Yesus peka sèmi èèna, lula dhèu sèra peka na, “Dhèu èèna, nidhu tao.”
Dhèu dhu madhutu dad'èi Ama Lamatua, tare'a-re'a j'aj'i a'ari Lamatua Yesus
31 Èle èèna ka, ina dènge ari Yesus sèra mai tenge Ne. D'ai èmu dhu Yesus madhèdi ètu d'ara na, rèngu lasi boe asa d'ara, te ngaa ra titu ètu li'u, ka ra hia dhèu lasi paroa Yesus. 32 Lasi, na, Yesus madhèdi padhai lii dènge dhèu ae. Ka dhèu sèra peka dènge Ne, “Ama, ee! Ina Mu dènge a'ari Mu nuka ètu li'u si. Ra neo paraga dènge Ama.”
33 Te ngaa Yesus dhaa, peka na, “Cee ka dhu tare'a-re'a j'aj'i ina dènge a'ari Ja'a?”