Lamatua' Yesus denu ded'enun atahori sanahulu rua
9
Lao esa, Yesus na'ab'ue ana ded'enun atahori sanahulu rua. Boe ma Ana fee se koasa fo reu 'oi nitur ra, ma tao rahai' atahori mamahed'i' mata'-mata'. 2 Ana denu se, fo reu rafad'e atahori so'al Lamatualain to'u parenda'. Ana o denu se fo reu tao rahai' atahori mamahed'i' sia bee-b'ee. 3 Te Ana nafad'e se nae, “Misined'a malolole! 'Afi' mendi saa-saa boe sia dala'. Mendi' a bad'u sia' ao ma ra. 'Afi' mendi teteas, do tas, do lepa-nggees, ma doi'. 'Afi' mendi bad'u selu-ao' boe! 4 Mete ma hei misi' kambo' sa, ma hambu atahori nau simbo nggi, na, mii leo sia ume na ra. 'Afi' heheli ume. Leo mikindoo sia naa, losa hei lao hela kambo' naa. 5 Mete ma misi' kambo' sa, ma atahori sia kambo' naa, nda nau simbo ma nda rena nggi sa, na, so'u ei ma ra fo lao hela se leo. Mete ma hei lao hela mamana' naa, na, tao tungga 'ad'at fo henda' hendi afu mia ei ma ra. Mifad'e se mae, ‘Hei nda nau rena sa, na, hela neu fo hei lemba-misaa ao ma ra!’”a6 Basa ma, ana ded'enu' ra lao mia kambo' risi kambo'. Ara reu rafad'e Lamatualain Hara-lii Malolen neu atahori ra. Ma ara tao rahai' atahori mamahed'i' ra boe.
Mane Herod'es bingun so'al Lamatua' Yesus
7 Lele' naa, Mane Herod'es Antipasb rena dud'uit mata'-mata' so'al Yesus. Ana rena dud'uit naa ra, ma ana bingun, huu hambu atahori hira rafad'e rae, “Yesus naa, naeni Yohanis mana sarani' a nasod'a bali' ena.” 8 Hambu ruma fai rafad'e rae, “Eni ia, ba'i Elia mana nasod'a bali' ena.”
Hambu ruma fai rae, “Eni ia, esa mia Lamatualain mana 'ola-'olan laen ra eni' a dalahulu na.”c
9 Te Herod'es nasaned'a nae, “Fai' naa, au mana denu tati 'etu Yohanis langga na. Ana nasod'a bali', do saa? Te ia, seka fai?” Boe ma ana sangga dala' fo nae nandaa mata' noo Yesus.
Lamatua' Yesus nahao atahori rifon lima
10 Lao esa, Yesus ana ded'enun fo ana denu' ra, bali' fo ra'ab'ue roo E fai. Ara rafad'e neu E basa saa fo sira tao' ra ena. Basa ma Yesus se lao' nee-nee risi' mamana' sa deka noo kambo Betsaida, fo reu hahae ao na ra sia naa. 11 Te atahori hetar rahine Yesus se rae reu sia bee, de ara tungga E. Dad'i Yesus simbo se noo malole', ma tao nahai' basa atahori mamahed'i ra, ma dui se so'al Lamatualain to'u parenda'.
12 Bob'on ma, Ana ded'enu kasanahulu rua' ra, roe mbali Yesus rae, “Malole lena' Ama' denu atahori ia ra risi' kambo' mana deka-d'eka ia ra, fo sangga nanaat ao na ra. Ma hela neu fo ara sangga mamana susunggu'. Huu mamana rou' 'ona' ia, ta'o bee fo ara hambu raa?”
13-14 Te Yesus nataa nae, “Ta'o ia! Hela fo hei mana mihao se!”
Te ara rareresi rae, “Awe', Ama' dei! Nda bisa ta'o naa sa ma? Atahori ia ra, rifon lima lena'! Naa fe'e 'aka' tou' ra, nda fe'e reken ina' ra roo anak ara sa! Ma hai rotim 'aka' bue' lima' a, ma 'u'u boa' rua' a. Mete ma Ama' nau hai mihao atahori ia ra, na, ta'o bee fo hai bisa hasa nanaat nae' fee se?!”d
Boe ma Yesus denu se nae, “Denu atahori ia ra 'endo' ra'ab'ue reu mamana' sa, na, lima nulu-lima nulu'.”
15 Boe ma ara reu ator se 'endo' ta'o naa. 16 Lele' ara 'endo' rala ma, Yesus ha'i nala roti bue kalima' ma 'u'u boa' karua' naa ra. De Ana oro'aa lalai ata neu, ma hule-o'e no'e makasi. Basa de Ana bib'ib'i roti noo 'u'u ra, de loo fee neu ana ded'enu na ra fo reu bab'anggi fee neu atahori naa ra. 17 Basa se raa losa ra'ab'eta. Basa de, ara rad'uru rala nanaa lena' ra, sofe boa sanahulu rua.
Petrus med'a nae, Lamatua' Yesus naa, Kristus, naeni Atahori fo Lamatualain helu-fuli mema' mia dalahulun ena
18 Lao esa, Yesus mesa' ne hule-o'e sia mamana' sa. Basa ma, ana ded'enu na ra ra'ab'ue roo E. Hule-o'e basa ma, Ana natane se nae, “Hei rena-rena' atahori 'ola-'ola' rae, Au ia, seka? ”
19 Ara rataa rae, “Ruma rae Ama' ia, Yohanis mana sarani' a. Laen ra rae, mbei ma Ama' ia, ba'i Elia. Hoko', na, esa mia Lamatualain mana 'ola-'olan ma'ahulun nasod'a bali' ena.”e
20 Boe ma Yesus natane se fai nae, “Mete ma tungga hei, na, hei mae Au ia, see?”
Basa ma Petrus nataa nae, “Ama' ia, Kristus, naeni Atahori fo Lamatualain dud'u mema' eni' a dalahulun!”f
21 Basa ma Yesus na'angge se 'oi, 'afi' rafad'e neu see-see boe rae, Eni, Kristus.
Lamatua' Yesus 'ola' so'al Eni mamaten, ma Eni nasod'a bali'
22 Basa ma, Yesus 'ola' nakandoo nae, “Au ia, Atahori Matetu' a. Au musi lemba doid'oso beran mata'-mata'. Dei fo atahori Yahud'i ra lasi-lasi 'ad'at, ma malangga agama Yahud'i ra malangga na ra, roo meser agama ra nda nau simbo rae, Au ia, Kristus sa. Basa fo ara risa Au. Mema' Au mate, te fini-esan ma, Au 'usod'a bali'!”g
23 Basa ma, Ana nafad'e atahori hetar nae, “Atahori mana nae tungga Au, na, musi na'atataa' tungga nakandoo fais-fais. Ana musi mbo'i hendi hihii-nanau na. Musi tungga nakandoo 'a, 'ona' mae atahori ra rae tao risa e, 'ona' atahori rasaa hau ngganggen fo neu nisi' eni mamana mamates na.h 24 Te atahori mana nahehere mate huu tungga Au, dei fo ana hambu masod'a' nakandoo noo Lamatualain. Te atahori fo nau nasod'a soa' neu 'aka' aon, dei fo ana saranggaa noo Lamatualain.i 25 Mete ma atahori sa hambu basa raefafo' noo isi oen, te Lamatualain nda simbo e sa, na, ana hambu 'onton saa? 26 Au ia, Atahori Matetu' a. Dad'i atahori mana mae tungga Au, ma mae to'u nenori ngga, dei fo Au o mae 'utaa e sia Lamatualain matan lele' Au bali' mia sorga 'uma. Huu dei fo Au 'onda 'uma 'oo Ama ngga mandete-masa'an, 'oo basa ate na ra mia sorga ra. 27 Au 'ufad'e teb'e-teb'e' neu nggi. Hambu hira mia hei mana sia ia ra, dei fo rita rala Lamatualain to'u parenda', fo ara fe'e mate ena.”
Lamatua' Yesus mata-aon dad'i laen sia lete' ata
28 Basa fai kafalun, ma Yesus no'e noo Petrus, Yohanis ma Yakob'is reu sia lete' esa fo hule-o'e. 29 Lele' Yesus hule-o'e, boe ma mata-aon dad'i laen, ma bua-b'a'u na ra dad'i muti makahahad'o'.
30 'Aib'oi' ma, atahori rua rema boe. Ru'a se, naeni ba'i Musa noo ba'i Elia. Boe ma ara 'ola-'ola' roo Yesus. 31 Ara o randela-rasa'a. Telu' se 'ola-'ola' so'al Yesus mamaten sia Yerusalem.
32 Lele' naa, Petrus noo nonoo karua na ra nduar kau-kau de ara sunggu'. Lele' ara fela, boe ma rita Yesus nambarii' noo atahori rua. Ara o rita Yesus naronda manggarelo' boe.
33 Lele' ba'i Musa noo ba'i Elia rae lao, ma Petrus bingun, nda nita' nae tao saa sa boe. Boe ma ana 'ola' leli nae, “Papa! Sia ia malole', o! Dad'i malole lena' hai miririi lalaa' telu. Esa fee neu Papa, esa fee neu ba'i Musa, ma esa fai fee neu ba'i Elia.” 34 Te lele' ana fe'e 'ola-'ola' ta'o naa, ma lelee bub'ue' sa nema tatana nala se. Boe ma Petrus se ramatau. 35 Boe ma ara rena hara' sa mia lelee' naa nae,
“Ia, Au Ana ngga fo Au pili mema' a!
Ana 'ola', na, rena malolole neu E!”j
36 'ola' basa ma, Petrus se rita 'aka' Yesus mesa' ne. Telu' se nee-nee' a ma nda dui neu esa sa boe, saa fo sira rita' naa. Doo-d'oo dei de ara fe'e dui neu atahori laen ena.
Lamatua' Yesus tao nahai' ana' fo nitu de'ulaka' tao' a
37 Mbila' neu ma, Lele' Yesus noo Petrus se 'onda mia lete' naa, atahori hetar rema randaa roo Yesus. 38 Boe ma atahori sa nameli mbali E nae, “Ama Meser, e! Tulun se'u ana mone 'ise ngga dei! 39 Te nitu 'aka' to'u nala e, fo tao e nggasi 'aib'oi'-aib'oi', ma mbembesi' e losa fufure' lua mia bafa na. Nitu naa o, 'aka' momoko e, ma neu kakaur e nakandoo 'a. 40 Au 'o'e tulun Ama' ana ded'enu na ra fo 'oi hendi nitu naa, te ara nda bole e sa!”
41 Rena ta'o naa, ma Yesus bua basa se nae, “Woi! Hei nda mimihere mae Lamatualain bisa tao nahai' nala atahori sa, do? Hei ia ra, mema' atahori nda mana mihine misod'a tungga dala ndoos sa! Au musi 'u'ub'ue 'oo hei losa fai hira' fai, dei fo hei nau mimihere neu Au? Au musi 'u'utataa' 'oo hei losa fai' bee fai!?”
Basa ma Ana 'ola' noo ama' naa nae, “Moo anam ia nema leo!”
42 Lele' ara roo ana' naa nisi' Yesus, boe ma nitu a rupa ana' naa neu rae a, ma mbembesi' na'amimina' e. Te Yesus parenda nitu a fo lao hela ana' naa, boe ma ana' naa hai neu' ena. Basa de Yesus fee ana' naa neu ama na. 43a Atahori mana rita Lamatualain koasa manaselin naa, basa se titindindii.
Lamatua' Yesus 'ola' selu' so'al Eni mamaten
43b Lele' basa atahori ra fe'e 'ola-'ola' so'al manad'ad'i manaseli' fo Yesus tao' ra, Ana nafad'e ana ded'enu na ra nae, 44 “Misined'a malolole 'o'ola ngga ia! Nda doo' sa te, atahori rae seo hendi Au, Atahori Matetu' ia. Ara fee Au 'isi' atahori dea' ra.” 45 Te ana ded'enun na ra titindindii' a. Ara nda rahine dud'u'an sa. Ara o ramatau ratane naa sosoan saa.
Seka mana dad'i malangga
46 Lao esa, Yesus ana ded'enu na ra rareresi seka mia sira e dei fo mana dad'i malangga.k 47 Te Yesus bub'ulu' saa fo ara rareresi' a. Boe ma Ana no'e anad'iki' sa, de fee ne nambarii' neu bob'oa na. 48 Basa ma nafad'e se nae, “Rena malolole! Atahori mana tungga Au fo mete-se'u atahori anad'iki' 'ona' ana' ia, naa sosoan, eni mete-se'u Au. Ma eni o mete-se'u Ama ngga sia sorga mana denu Au raefafo' 'uma. Hambu atahori nae' hii 'a raloe-rad'ae se. 'Ona' atahori mana tud'a-loloe', atahori manasusa', atahori nda papake' ra sa, atahori mana soe', ma atahori anak ra. Naa! Atahori mana hii 'a mete-se'u atahori mata' naa ra, Lamatualain du'a nae sira manaseli' ra.”l
Atahori nda mana lab'an hita sa, eni hita nonoon
49 Basa ma Yohanis nafad'e Yesus nae, “Papa! Lao esa, hai mita atahori sa 'oi nitur nendi' Papa nara na. Dad'i hai 'ai fo 'afi' ingga-ingga' Papa naran, huu eni nda hita atahorin sa.”
50 Te Yesus nataa nae, “'Afi'! Huu atahori nda mana lab'an hita sa, eni hita nonoo na.”
Atahori sia kambo' esa sia Samaria nda nau simbo Lamatua' Yesus sa
51 Yesus bub'ulu' nae, Eni fai hehene sorga neu deka-d'eka ena. Boe ma Ana na'etu' fo lao kota Yerusalem neu. 52 Ana denu atahori lao ra'ahulu' se, naa fo ara ralalau hela nanaa-nininu'. Boe ma ara risi' kambo' sa sia profinsi Samaria de rae ralalau mamana leleo'. 53 Te atahori Samaria naa ra nda nau simbo Yesus se sa, huu Ana nae lao neu hule-o'e neu Lamatualain sia kota Yerusalem.m 54 Lele' Yakob'is noo Yohanis rena atahori Samaria ra tatao na ra, ma ara kokoe Yesus rae, “Papa! Ta'o bee? Ata to'e Lamatualain na'onda' ai mia lalai nema fo naa hendi basa se, do?”n
55 Te Yesus mete mbali ru'a se, ma 'ai nae, “Sud'i boe du'a ta'o naa fai.” 56 Basa ma ara lao rakandoo risi' kambo' laen.
Dala' tungga neu Lamatua' Yesus
57 Lele' ara fe'e lao-lao', hambu atahori sa 'ola' noo Yesus nae, “Ama'! Ama' neu sia bee o, au nau tungga 'ukundoo 'oo Ama'!”
58 Te Yesus nataa nae, “Malole, boe! Te musuned'a ta'o ia. Basa atahori roo banda ra esa' noo mamana lu'u-leleo na. Busa fui bali' nisi' ndola na. Mbui' bali' nisi' nduna na. Te Au, Atahori Matetu' ia, nda maume' fo bali' 'uu sa. Mamana' fo ndae langga' o, nese boe.”
59 Lao esa, Yesus no'e atahori laen sa nae, “'Uma tungga Au, fo dad'i atahori ngga.”
Atahori naa nataa nae, “Neu! Te ta'o ia, Papa. Hela fo au bali' mete-se'u 'ala ina-ama ngga ra dei. Mete ma ama ngga mate ena, dei fo au fe'e tungga na.”
60 Te Yesus nafad'e neu e nae, “Ta'o ia! Hela fo atahori nda mana ramahere neu Lamatualain sa, ralalau sira atahori mates na ra. Te hei mana mimihere neu Lamatualain, hei ue-tatao ma ra mii mifad'e so'al Lamatualain to'u parenda'.”
61 Hambu atahori sa fai nae, “Malole boe, Papa! Au 'ae tungga Papa 'ukundoo. Te fee kaka'e' fo 'uu 'id'u 'ala bob'onggi ngga ra, dei fo au bali' 'uma tungga Papa.”o
62 Te Yesus nafad'e neu e nae, “Ta'o ia! Mete ma atahori tatati rala osi na ra, basa ma ara mbute-mue roo' a ue-tatao laen ra losa ara lilii' sela, na, osi naa nda dad'i sa. 'Ona' naa boe atahori mana na'etu' nae tungga Au, te 'aka' nasaned'a masod'a ma'ahulu na. Atahori mata' naa nda na'ena ngguna dad'i atahori mana ue-tao sia Lamatualain parendan sa.”