Lamatualain natud'u Lamatua' Yesus manaselin
17
Seli fai nee ma, Yesus no'e Petrus, Yakob'is noo 'od'in Yohanis, fo reu hene ramalolo' risi' lete' naru' sa ata, fo mesa' se sia naa. 2 Losa ata ma, rita Yesus dad'i laen. Matan naronda 'ona' relo, noo buan dad'i muti makahahad'o'. 3 'Aib'oi' ma, ara rita Ana 'ola-'ola' noo ba'i Musa noo ba'i Elia. 4 Boe ma Petrus bingun de 'ola' nae, “Ama'! Hai ma'ahee sia ia ena, o! De malole lena' ata tao lalaat telu. Esa fee neu Ama', esa fee neu ba'i Musa, ma esa fai fee neu ba'i Elia.”5 Lele Petrus fe'e 'ola' ta'o naa, 'aib'oi' ma lelee maronda' a 'onda de tatana nala se. Boe ma ara titindindii rena hara' sa dea nema mia lele' a rala nae, “Rena, o! Yesus ia, Au Ana susue ngga. Ana tao rala ngga namaho'o nakandoo 'a. Rena malolole neu E, e!”a
6 Ana mana tungga na ra rena rala ta'o naa, ma ramatau rae mate, de ra'aloli ra'atotono'. 7 Te Yesus nema keis se, ma Ana nae, “Wee! Ama fela leo. 'Afi' mimitau!” 8 Basa ma ara boti' mata na ra, te nda rita esa sa boe. 'Aka' Yesus mesa' ne sia naa.
9 Basa ma, ara 'onda mia lete' naa. Boe ma Yesus na'anggee se nae, “Saa fo faa' ra hei mita' naa, 'afi' mifad'e esa boe, e! Te Au, Atahori Matetu' ia, musi mate dei. Dei fo Au 'usod'a bali' ena dei, fo ama fe'e na bole mifad'e atahori ena.”
10 Boe ma ara ratane E rae, “Ama' ia, mema' Kristus, te ba'i Elia sia bee? Huu meser agama ra ranori rae, ba'i Elia musi nema dei, fo Kristus fe'e nema na. Te tungga Ama', na ta'o bee?”b
11 Yesus nataa nae, “Mema' teb'e. Ba'i Elia musi nema dei, fo soi dala' fee neu Kristus. 12 Te rena malolole, e! Ba'i Elia nema ena, te atahori nda rahine sa. Ara tao ra'asusa' e, tungga hihii na ra. Dei fo ara tao Au, Atahori Matetu' ia 'ona' naa boe.”c
13 Ara rena basa ta'o naa, dei de bub'ulu' rae, ba'i Elia fo Yesus 'ola' naa, naeni Yohanis mana sarani' a.
Lamatua' Yesus na'ahahai' ana nitu tao' sa
14 Lele' Yesus se bali', ma ara randaa roo atahori hetar rahani se ena. Boe ma papa esa neu sende' lulu-langgan no'e tulun mbali E, 15 nae, “Papa! Kasian ana ngga dei! Te ana namahed'i mulu bib'i', ana doid'oso nala seli. Mete ma hed'in foe, na, ana 'aka' tud'a' oe rala neu, do hoko' na, ai rala neu. Tulun dei, Papa, e! 16 Au 'endi e nisi' Papa ana mana tungga ma ra ena, te ara nda bisa ra'ahahai' rala e sa.”
17 Yesus rena nala ma, Ana namanasa ana mana tungga na ra nae, “Hee'! Hei ia ra seli teb'e! Au 'unori 'usufafali nggi ena, te ama nda mihine malolole sa. Ma ama nda mimihere teb'e-teb'e' neu Au sa! Au musi 'u'utataa' 'oo nggi losa fai hira' fai? Moo 'ana' naa ia nema!”
18 Ara roo 'ana' naa, ma Ana 'oi hendi nitu mia e. Basa ma, nitu a lao hela 'ana' naa, ma ana hai neu' ena.
19 Basa de, lele' Yesus noo ana mana tungga na ra mesa' se, ma ara ratane E rae, “Ama'! Ta'o bee de faa' ra hai nda bisa 'oi hendi nitu naa sa?”
20 Yesus nataa bali' nae, “Ama nda bisa 'oi hendi nitu naa sa, huu nda mimihere teb'e sa na. Misined'a, e! Mete ma hei mimihere teb'e-teb'e' neu Au, 'ita' 'aka' mbei ana' a o, 'ona' deke anad'iki' sa o,d ama bisa parenda lete' sa mae, ‘Hee, lete'! Lali naa muu!’ Tantu ana lali. Dad'i hei bisa tao mala sud'i 'a saa, sad'i ama mimihere teb'e-teb'e' neu Lamatualain.e 21 [Te rena, e! Nitu mata' ia ra mema' de'ulaka'. Mete ma ama nda hule-o'e ma puasa fo mo'e tutulu-fafali' neu Lamatualain sa, na, ama nda bisa 'oi nitu mata' naa ra sa.”]f
Lamatua' Yesus 'ola' lao karuan so'al Eni mamaten
(Markus 9:30-32; Lukas 9:43b-45)
22 Lao esa ma, Yesus noo ana mana tungga na ra ra'ab'ue sia profinsi Galilea. Ana nafad'e se nae, “Nda doo' sa ena, te ara rae seo Au neu atahori fea' ra. 23 Basa ma ara tao risa Au, Atahori Matetu' ia. Mema' Au mate, te fini-esan ma, Au 'usod'a bali'.”
Ana mana tungga na ra susa rala seli, huu rena Ana 'ola' na'o naa.
Lamatua' Yesus 'ola' so'al ume hule-o'e' a bea na
24 Lele' Yesus noo ana mana tungga na ra reu risi' kambo Kapernaum, boe ma mana 'ed'a bea ra, ratane Petrus rae, “Hei Meser ma bae Ume Hule-o'e Huu' a bea na, do hoko'?”g
25 Boe ma Petrus nataa nae, “Bae, e!”
Lele' ana bali', ma Yesus nafad'e na'ahulu' neu e nae, “Wee, Simon! Du'a sob'a dei. Mane-mane' sia raefafo' ia ha'i bea mia seka? Mia ana na ra do, mia atahori fea' ra?”
26 Petrus nataa nae, “Mia atahori fea'!”
Yesus 'ola' fai nae, “Mete ma ta'o naa, na, mane' a anan 'afi' bae, to? 27 'Ona' naa boe noo ume Hule-o'e Huu' a bea na. Te hita 'afi' tao mana 'ed'a bea ra ramanasa. Dad'i malole lena' muu dolu 'u'u sia dano a. Mala 'u'u kaesan, na, fingga bafa na. Dei fo hambu doi fula' esa sia naa. Basa na muu bae ru'a nggita bea na mendi' doi' naa. Te naa dai soa' neu ru'a nggita ena.”h